RASUL-RASUL EKUGWA WENE 18

O Korintus nen ekugwa wene

1Eta wagagerek, Ar Paulus o Atena dambe kalok, nen o Korintus arar lagage. 2Etoma ap Yahudi mende endaga Akwila, ar ai Pontus mende ma, imbirak abuk agugwa. Akwila agwe endaga Priskila imbirak o Italia nen ngger ar wagugwa o. Kaisar Klaudius nen akuni Yahudi mende, o yoma dambe kalok wundurak o yiluk yoragagemo, ar Paulus nen bikda lagage. 3Nen, inom eta dogolir yabu ambi mo eku lagugwa. Ir yabu ar Paulus erir taga mende ndak-ndak ar eku lagugwa. Nen yabu eku lagugwa ebe eti tu tenda nggwaku lagugwa. 4Hari Sabat aga kalok Paulus nen ir akuni Yahudi mende inom, nen akuni nin Yunani mende Yesus ane waganuwak nen yiluk, wene yoraga eka lagage.

5Ir Silas Timotius imbirak, o Makedonia nen wagugwama, ar Paulus nen Allah wene nggok togo akuni Yahudi mende, Ar Yesus eti endaga mbogor akuni ndilninakwa, Allah nen lakbi warigin yirige ernogo, Ar arar o, yiluk yoraga lagage. 6Ogwe ir nen aik dagok mbaik dagok yogwi, kar kane kolu nina'ir a yiluk yogwi ekugwama, wene ir maduk eko yiluk inilu aruwak nen yega lagagerek, ar Paulus nen iyom wul mokmok pulogo lakbiluk, “Kir watagun kalok, kir kinobabur paga arar o. Yogondak ya kudi nen, an akuni Yahudi dek mende arar inoba wene wolok ligin o.” 7Nen, Paulus ir ap Yahudi dek mende ogwe, ar nen Allah ebebar yiluk andarige mende ambi endaga Titus Yustus ma, ar ai o tamban erir tagama korok ar werek ma, ir akuni Yahudi mende enogo dambe dalok ar oba lagugwa.

8Nen ap Krispus o tamban erir tagama akepala eti akburi inom, obogar Ar Yesus oba iniliti ebebar andalok waganggugwa. Nen ir akuni o Korintus mende amberak, Paulus wene yoraga inaruk kolal kugwa mende, Ar Yesus oba iniliti panggolku nanggugwa, ir inebe ima wukdarugwa o.

9O ambi kukbaga, Tuhan nen Paulus akbi ngganggo paga yoga dogolir, “Paulus wae, kane dek puk arugup o, wene tedak togon yoragik mban eka dogon o. Nen kobade mondok arugup o! 10Akuni o yoma werek mende, an nakburi arugun ma, akuni nen karugun dek o, An karuwam dogogin o,” yiluk yorige.

11Eta yorigemo, ar Paulus nen, Allah awene o Korintus yoraga kigik, satu setengah tahun ekige.

12Ap Galio gubernur o Akhaya paga dagarigemo, ir akuni Yahudi mende dambul latuk, ar Paulus ina'ir kundiluk nen pagago wolok pengadilan lagugwa. 13Ir nen ar Paulus oba wene yi birugwa, “Ap yi nen, Ar Allah woguk dugu dogolir, Musa yirige wene dambe kalok adik mende paga ar erurak o, yiluk akuni ambigar nomal inabitaga o!”

14Ar Paulus wene onggo yigiluk erigin nanggige, Galio nen Paulus ane nggaruk togo yoraga dogolir, “Yahudi akuni yi! Wene yi maduk erek kwak paga inom, nen wene kolek tagalek paga inom, dogolepma we yanggo togon naruk kolek puk atep o. 15Ogwe, Wene oba bogop yoma, we kinane wene paga inom, kinendaga uwa paga inom, kir eritagwi kinobabur kindirik paga inom, wene mende ma, kir nen yi lani o. An wene yegerogo mende ninom mbalu ndak dek o!” 16Ma kir kinawene yi kodalok wundini a, yiluk pengadilan nen mugogo wulinakige. 17Wuldarigemo inanini nen, ar ap Sostenes o tamban erir tagama akepala enogo, meja pengadilan eloktekma ndugi mburalkugwa. Ogwe ar ap Galio nen kinaredo ar endi, yiluk dambe darige.

Ar Paulus iyok paga, o Antiokhia lagage wene

18 # Bil. 6:18 Eta eku lagugwarik, ar Paulus o Korintus ambi inom ar welagage. Welagagerek nen, kir yogo arar dogoni o, yiluk keyagi warinaku lagarik, ar Akwila Priskila imbirak inom to paga, o Siria nggwe etoma lagugwa. O Kengkrea ari lalok, ar Paulus iri Tuhan ake ambelabe#18:18: Paulus iri Tuhan ambelabe birige: Ir akuni Yahudi mende, iniri mbalku lagugwa eti, inane amburu yu mende a, kwan bu mende a enogo arar ekbiluk kalok eku lagugwa. birige mende, iri mondok idu wadu agagerek ma, etoma nen iri mbalkige. 19O Efesus wura lagugwarik, ar Akwila Priskila imbirak uma balok, ar Paulus Yahudi ineramban erir tagama onggega lagagerek, Yahudi mende inom wene mbalku dogolir, Allah wene paga kinok waganggwi dalok, ar nen onggo yoraga, eku lagugwa. 20Ir nen, kar ninom ya ambi inom dogowok o, yiluk yorugwa mende, ar nen na'ir o, yoragage. 21Eta yorugwa mende, ar Paulus nen damber dalok laga dogolir, “Ar Allah nen lan yonega kalok, kinoba warigin o,” yoralok to paga lagugwa.

22Nen o Kaisarea unggwi lagugwarik, ar Paulus Allah akburi o Yerusalem mende, keyagi warinabik nen yiluk, lok-lok o Antiokhia lagage. 23O Antiokhia welagagerek, ar nen Allah akburi o Galatia, Frigila iniliti aik wakdar, inaruk waka erir lagage.

Ar Apolos o Efesus inom nen Korintus inom etoma dogolir ekige wene

24Eta ekwi dagik, ap Yahudi mende ambi ai o Aleksanderia nen endago mende, wene mbalu ane nggonggo werek, iliti kode nen Alkitab wene mbalek ilu mondok mende endaga Apolos ma, o Efesus wagage. 25Nen ar ebe wene Ar Yesus wene yirige mende obogar ilu aruwak yiluk emerirugwa mende ar o. Ar iliti mondok adeknggen aganggen paga, Ar Yesus awene mor-mor yoraga, nen ar wene baptisan Yohanes eka lagage mende eti abok mban, adigar ilu o. 26Yahudi ineramban etar tagama ungguluk, obade mondok dek dogolir yega kalok, ir Akwila Priskila imbirak inil kalok wolok inuma lagugwa. Uma nen ir Akwila Priskila nen, Ar Allah nen, ir akuni obogar Ar Yesus pagaru ndilinabik nen yiluk, yirige mende ebe yegerogo o, yiluk dirogon yorugwa. 27Eta nen ar Apolos ernogo, o Akhaya nggwe lak nen yiluk yirigemo, ir Allah akburi o Efesus mende nen, Allah akburi o Akhaya mende inoba surat erogo lakbugu dogolir, Apolos kinoba waritaga endi, agur malogo waganini o, yiluk ekugwa. Nen ar Apolos o Akhaya etoma lagagerek, Ar Allah eyabu nggok mondok ar ekige. Nen ir Ar Allah inakba karigemo, Ar Yesus oba iniliti panggol kugwa mende, nggok togo Yesus oba kunogo baga lagage. 28Ar Apolos iliti mondok kode ma, ap Yahudi mende inom Allah wene enggen kwaku dogolir, ar nen ir ap Yahudi mende mondok tebelogo baga lagage. Ar ayat-ayat Alkitab paga, Yesus yi endaga mbogor ndilninabuwak nen yiluk, Allah nen ane amburu yirige mende enogo ebe yi arar o, yiluk yoraga lagage.

Currently Selected:

RASUL-RASUL EKUGWA WENE 18: WLW

Highlight

Copy