RASUL-RASUL EKUGWA WENE 10

Ar Petrus ap Kornelius imbirak ekugwa wene

1O Kaisarea etoma ap ambi endaga Kornelius welagage. Ar ebe ap Tentara Italia mende inewe welagage. 2Ar nen Allah oba um palek welaga. Ar nen akuni Yahudi mende ininggi dek mende kalok, yamak daga dogolir, tamban ninggi nanggi Allah oba eka lagage. 3O ambi paga, keyanggune jam tiga ndak-ndak, ar akbingganggo paga, malaikat Allah mende nen wai yoga dogolir, “Kornelius wae!” yiluk yorigemo,

4Ar Kornelius nen malaikat enogo il lakau obade-obade negen eka dogolir, “Ae nombae, Kar nena yornirik yiluk yitagan?”

Yiluk yorigemo, ar malaikat nen wene onggo yoga dogolir, “Tamban eken inom, kobabur pano inom, Ar Allah obok il keyaga, nen aruk kolalka eka lagarik, koba Ar Allah akla eberek werek o. 5Yogondak kar nen, ap endaga Petrus, nen endaga ambi yogu dogolir Simon Petrus yogwi, ap eti o Yope etoma werek ma, elege ambi wagani lowak nen lakban o. 6Ar ebe ap binatang agakdo agabak kigirkwa endaga Simon, ai i aik paga ma, imbirak werek o,” yiluk yorige. 7Nen malaikat enogo arar lagagemo, Kornelius nen ayedoman inebe mbere, nen anggota tentara mende, ar aruwam dogitaga mende ambi obabur pano ma, inom wai yoragage. 8Nen ar Kornelius akbi karige mende obogar yoralok, inebe o Yope etoma arar lani o, yiluk lakbarigemo, lagugwa.

9Kubenengge ir tuan taga lagwi dagik, o Yope unggu korok ari lagugwarik, ar Petrus dinggaga tamban erik yiluk tidama dagarige. 10Petrus erom abu ambik agagemo, erom nau ndugukwi kigik, Petrus akbingganggo ambi karige. 11Petrus ar il werekma, mbogor taga tu kurogo biluk, kain nggok ambi oba tugunogo wukdi wagage. 12Ye wado nde wado, obogar inom, tewe tekmana mende inom, akla yagadek karige. 13Ane ambi ta nen dek, ar Petrus yoga dogolir, “Petrus, menarin o! Nen yoma obogar warogo nano o!” yiluk yorige. 14Petrus nen, “Iai, Tuhan,ndak dek mondok o! Yoma an nertagodek mende mondok arar o!” 15Nen, ane enogo ambi inom ar yoga dogolir, “Allah tamolke mende, kar nen kwanerogo bugup o.” 16Ar Petrus nen, akbi ngganggo eti inggi kenagan paga inugu kalok, nen kain enogo mbogor paga tuguluk wolok dagarige o.

17Ar Petrus nen, yi nena eruwam yiluk, dikburak mendek dek ar agage, akuni Kornelius nen lakbarige mende, Simon uma ari lagugwarik, madi aila unggirugwa. 18Ir nen akuni kwak balok kinok wogonaku dogolir, “Ap ambi yoma kuro waga mende, ar endaga Simon Petrus enaga yoma dogu a?” yiluk yorugwa.

19Nen ar Petrus enogo, akbi karige mende, nenggerogo paga kigi yiluk eberkanem, Ar Roh Allah nen “Petrus, ap inebe mbere ambi nen kwak kabir waga yorik o. 20Ibar agar taga wura lan o. Ap eti an nen lakba wagarikma, nobade yugup o, kinom arar lan o,” yiluk yorige. 21Nen ar Petrus ibar-ibar inoba wuka lagagerek, yoraga dogolir, “Kir kwaknabir wagop nebe yi o, kir nenaluk wagop?” yiluk yorarige.

22Yorarigemo ir nen, “Nir ap kapten Kornelius nen lakbinani wagama wago o. Ar ebe ap obabur pano, Allah oba um palek, akuni Yahudi nen ar mban wogokdi tagwi o. Ap malaikat mende oba wagarik nen, ar tamban eke mende onggo yoga dogolir, kar kebe ar oba uma lowak nen yiluk yogemo, nir kayonggo wago o. Wene ambi kar nen yoru mende werek ma, wene eti yoga keyalok, ar nen kar yorigin mende eti mutok laga dogogin o, yiluk yogemo, nir lakbinani waga o.” 23Yirugwama, ar Petrus nen ir wogorek uma unggirige.

Kubenengge nen Petrus iluk atuk, inom ir werekma lagugwa. Nen akuni ebebar o yiluk yirugwa mende, o Yope nen amberak inom ar lagugwa. 24Kubenengge, o Kaisarea unggwi lagugwa. Nen ar Kornelius aguya ombae inom, arugwi inayonggo birige mende inom, tokdagwi werek ma, arar inoba lagugwa. 25Ar Petrus Kornelius arar oba lagagemo, Kornelius nen wogonaka lagagerek, endop yunggu yiluk keyagi warigi nanggige, 26ar Petrus nen, akdin pagago mendiluk “An akuni agar taga mende ma, menarin o!” yiluk yorige. 27Nen ar Kornelius imbirak wene mbalir uma unggugu lagugwa, akuni ambigar torek werek ma il darige. 28Ar nen ir yoraga dogolir, “Nawor nakbur, kir kinilu o. Ap Yahudi mende endago kau, akuni adik mende inuma lagwi, inom kunggwi erukbuk yirige mende, yogondak Ar Allah nen, maduk akuni mende obogar kinom dambulogo dogoni o, yiluk yonege o. 29Eti paga nen, Tuan kar nen kuma waruwak yiluk nayonggo begena, an arar kenorogo wagi o. Yogondak kar an nena yorkiruwak yiluk nayonggo begen, yanggurogo ar yornirin o,” yiluk yorige. 30Kornelius nen, “Kibir, o nir agorik ya ndak-ndak, an tamban eki nanggi, jam tiga paga, ap ambi an neloktekma menari waga o. Nen ebe iyom paga etoma, akbinak kerekdo mbakdo erek eti nen, 31yega dogolir, ‘Kornelius wae! Allah nen kar tamban eken mende, Ar aruk muk kolalke o. Nen kobabur akuni inakba ekwa mende eti, Ar Allah akla eberek agarik o. 32Etiar ma, akuni o Yope etoma, Ar Simon Petrus eti, elege ayonggo lowak nen yoran o. Nen ar ebe ap ambi endaga Simon nen ar eyabu binatang agakdo nggolalek agubak kigirkwa, ao i laut aik paga eta arar o,’yiluk yonirige o. 33Wene eti paga nen, elege kar wokabi lawak nen yiluk kayonggo lakbagi o. Mende Nombae kar nakba nen arar noba wagan o. Ma nir yogondak ya, Ar Allah nen Tuan kar wene nena yokirumo nir yorneragin yiluk, ninebe wonggalkorik mo, wene yorneragin arar o,” yiluk yorige.

Petrus nen Allah wene wurakige wene

34 # Ul. 10:17 Yorigemo, ar Petrus nen yoraga dogolir, “Yogondak an ebebar dikbigi o, Allah, akuni obogar ninakba kertaga o. 35Akuni Allah oba um palek dogolir, akuni amberak pano erinakwi dalok, Ar Allah inelokte yambenigin dek o, ir Ar Allah nen inebe wogonabir taga o. 36Nawor nakbur, Ar Allah nen wene edo wene, ir ap Yahudi mende yoragage eti kir kinilu o. Wene eti, Ar Yesus Kristus, akuni obogar mende Tuhan eti abok, wene Pano Wene dambulo maga binanurak wene eti arar o. 37Kir obogar o Yudea paga yoma, etagage mende kinilu o. Eti Galilea yoma Yohanes nen ima wukdaga lagage kudi nen, yogondak kudi etagage eti kinilu werek o. 38Ar Allah nen Ar Yesus ai o Nazaret mende eti pulogo biluk, Roh Allah oba bega, obatne werek mende inom wogotuk, menogo birigemo o. Kir kinilu o, Ar Yesus o ya nda nega dogolir, akuni u warek mende pano erinaka, Iblis inakla werek mende nggigilogo wulinaka, Allah imbirak nega dogolir eka lagage o. 39Nir yi Ar erir nega ninil kugu lago mende arar o. Ar erir laga lagage eti, ir ap Yahudi inuma, o Yerusalem etoma arar o. Etamende, ir nen ar ebe o kari kago paga warogo birugwa o. 40Ogwe, Ar ebe warek noge inggi mbere ambi yega lagagerek, Allah nen warekma mende iluk erogo birige o. Nen, akuni yoma obogar inil karugwa o. 41Akuni amberak awan dagik, nir Allah karugu mende, yorar nugu dogowak nen yiluk ninayonggo birige mende ndak, Ar Ebe inugur ninarige o. Ebe warek mende iluk agagerek nen, nir ninom erom engga, nunggu lago ar o. 42Ar nen wene Pano Wene eti, kir nen eka karugup ndak-ndak, akuni yorar lani o. Ma Ar ebe etia ar, Ar Allah nen akuni iniluk werek mende inom, nen akuni warek mende inom, obogar inuwak dolkwa mende inggimo birigemo o. 43Ir ap nabi obogar, ar ake wene yugu lagugwama, Ir nen yugu dogolir akuni nen Yesus obarne paga inomaduk ekugwa mende korinabigin o. yiluk yugu lagugwa o.”

Akuni ir nin ap mende, Roh Allah wogoragage wene

44Ar Petrus wene auwan yega kigik, Roh Allah wura waga lagagerek, akuni wene yega inaruk kulkunem, ir inoba indu aknggan talek, kwi ndede erogo barige o. 45Akuni Yahudi mende, Yesus ane waganggugwa mende, ar Petrus inom o Yope nen wagugwa mende nen, Ar Allah nen Ar Aguringge, akuni ir nin mende ar, Yahudi mende dek kigigar ogwe, wogoraga inil kalok, wi'au, yiluk bi wakugwa. 46Ir akuni etoma nen inane elalin wene yugwi, Allah woguk bugwi, ekugwama Petrus nen, 47“Wadigi yi, kinil laktarni, akuni yoma, nir Roh Allah wokneragage kwak, ir arar inaba wura waga o. Eti ar ma, ir ima wukbaurak mende nggodo mbalogo baurak ambi werek kogop a?” yiluk yirige. 48Mar ar Petrus nen, akuni yoma ar Yesus Kristus endaga paga, inebe ibar ima wukbani arar o yiluk yirige. Tuguluk ir nen ar Petrus enogo, ilambi ar ya ninom dogoluk nen laurak o, yiluk nggino yorugwama, nen inom eta ambi inom ar welagage.

Currently Selected:

RASUL-RASUL EKUGWA WENE 10: WLW

Highlight

Copy