MARKUS 9

1“Katitongte!” angkung I Yesus. “Bou tal᷊oara i kumu su si'i pia ko sarung ta mate, suhoro makawua Mawu Ruata mamarenta dingang u kawasa!”

I Yesus nipakawantughi

(Mat. 17:1-13; Luk. 9:28-36)

2 # 2Ptr. 1:17-18 Nungu l᷊ou bou e'e I Yesus numbawa si Petrus dingang i Yakobus l᷊au tuaringe i Yohanes, nutingkahae sarang wul᷊uri simbau ko marange. Su saruang u mata ngi sire I Yesus nuwal᷊u ghahi-E. 3L᷊aku-E nakoa ko mawira kukerong. Takoae sarang singkatau mangangunsa su dunia i'i makabursi sarang kere'e kawirange. 4Bou e'e i sire tilu tumatuhu-E e'e nakawua si Yesus kapudidatonge dingang i Elia l᷊au i Musa. 5Kuteu i Petrus nangul᷊i si Yesus, “Tuang Guru matemang kahingang i kite su si'i. Mapiangwe i kami mukoa raseng tatilu; simbau guna ngi Tuang, simbau guna ngi Musa, l᷊au simbau l᷊ai guna ngi Elia.” 6I Petrus seng wugha ngu apang ko hino ngu ipudidatoe, watu'u i sie dingang u ringange darua su katatakutang takoae sihinge.

7 # Mat. 3:17; Mrk. 1:11; Luk. 3:22 Bou e'e pia winawa nuhimbukung si sire dang bou l᷊al᷊ung u winawa e'e pia tingihi nikaringihi ko nangul᷊i, “Seng i'i Ana-Ku ko ikukindaghi. Raringihi I Sie!” 8Masahawu-sahawu i sire nutuhung tamai-mai, dang seng ta nakawua l᷊ai manga si sai-sai dingang i sire su se'e, su l᷊ikuri Yesus sisane. 9Su tempo ngi sire karusunge bou wul᷊uri e'e, I Yesus nangonggo u ingati si sire, “Kumbahang i kumu muwuke si sai-sai apang ko nikawua ngi kumu kanini su horo Ahusi Taumata ipuwangung bou papate.”

10I sire nundaringihi tatanata e'e, kateho su tal᷊oara i sire ha i sire nanita nudidato ngu apa pandung I Yesus dingang u didato-Nge “sau muwiahi bou papate”. 11#Mal. 4:5; Mat. 11:14Kuteu i sire nukina si Sie, “Nakurawe manga meteri u agama nangul᷊i uare i Elia mang mambeng sumongo horo?”

12I Yesus nusumimbahi, “I Elia tingari seng nusumongo horo tadeau pangatori kaul᷊i u patiku. Kateho kirapa dingang u Ahusi Taumata? Nakurawe su l᷊al᷊ung u Buki Susi kawawohe himoneu I Sie sarung mutatahang u singsara l᷊au ihinakaneng u taumata? 13Kateho Ia mangul᷊i si kumu: I Elia seng nusumongo, dang manga taumata nukoa si sie nutuhu kao i sire. E'e nuhino dingang ko seng mawawohe su l᷊al᷊ung u Buki Susi hal᷊i u watangenge.”

I Yesus nupakaul᷊e ngu ana ko nikasukang u roh ko dal᷊ai

(Mat. 17:14-21; Luk. 9:37-43a)

14Su tempo I Yesus dingang u tumatuhu-E tatilu nasongo sau su tal᷊oara u tumatuhu ko wal᷊inge i sire nakawua taumata maul᷊i su se'e. Manga meteri u agama pirangkatau seng kapurarendehi dingang u manga tumatuhu I Yesus e'e. 15Saritau manga taumata e'e nakawua si Yesus, i sire nahuwi, bou e'e nahuntal᷊ang nanginsomahi si Sie. 16“Ko apa ipurarendehi i kumu dingang u manga meteri agama e'e kakina I Yesus su manga tumatuhu-E?”

17Singkatau bou taumata maul᷊i e'e nusumimbahi, “Tuang Guru, ia numbawa anaku sarang koa i Tuang. I sie ko bobo watu'u nikasukang u roh ko dal᷊ai. 18Boko roh e'e sumu si sie, badange nibabanting su tana, mohonge nusumuwu, isie kukaruti l᷊au badange mal᷊ome. Ia seng mbua nundo su manga tumatuhu i Tuang panguseri roh ko dal᷊ai e'e, kateho i sire tawe makakoa hal᷊i e'e.”

19Kuteu I Yesus nangul᷊i si sire, “Wal᷊inge gampang i kumu i'i! I kumu mang tinga-tingari taumata ko ta mangimang. Sarang kangereng Ia mambeng matana dingang i kumu dang musabari si kumu? Wawae ana e'e simai!” 20I sire numbawa rario e'e sarang koa I Yesus.

Saritau roh ko dal᷊ai e'e nakawua si Yesus, i sie nukoa badang u ana e'e nutumondohi hakiu rario e'e nanawo nal᷊al᷊unggi su tana. Mohonge nusumuwu. 21Bou e'e I Yesus nukina si papange, “Seng pira kal᷊iwuenge i sie kiri'i?”

Angkung i papange, “Nanita i sie mborong ko dio.” 22“Seng masau roh ko dal᷊ai e'e mukakal᷊ika mamate si sie dang mamandu su putung l᷊au u mundume su ake. Kateho boko i Tuang makatul᷊ung, kere wotonge i Tuang mukumindaghi l᷊au mutul᷊ung si kami.”

23“Apa angkungu? Boko i Tuang botonge makatul᷊ung?” sasimbahi I Yesus. “Kaul᷊ie botonge asal᷊i taumata mangimang!”

24Turusi i papange e'e nukumiha, “Mawu, ia mangimang, katewe pangangimangku singkodo. Tul᷊ung ko ia tadeau lebe mangimang l᷊ai!”

25Su tempo I Yesus nakawua taumata maul᷊i nanita nusumongo nul᷊ahumbung, I Sie nuparenta roh ko dal᷊ai e'e dingang nangul᷊i, “Roh wenggeli dang roh bobo, Ia muparenta si kau suwangte bou rario i'i dang kumbahang musau sumu si sie!”

26Roh ko dal᷊ai e'e nukumiha, bou e'e nukoa badang u rario e'e nutumondohi, mbuhue nusumuwang bou rario e'e. Rario e'e tuhungang kere tau ko nate hakiu manga taumata kaul᷊ie nangul᷊i, “I sie seng nate!” 27Arawe I Yesus nuhinggo l᷊imange l᷊au nutul᷊ung nupuwangung si sie. Rario e'e dingang nuwangung.

28Suapang I Yesus su wal᷊e, manga tumatuhu-E nusumongo pusingkatau sarang koa-E l᷊au nukina, “Nakurawe i kami ta makauseri roh ko dal᷊ai e'e?”

29I Yesus nusumimbahi, “Roh ko dal᷊ai kere'e ta ikauseri dingang u manga akal᷊i apa, su l᷊ikuri kakal᷊iomaneng.”

I Yesus sau nuhabari hal᷊i u papate-Nge

(Mat. 17:22-23; Luk. 9:43b-45)

30I Yesus l᷊au manga tumatuhu-E nanintang u tampa e'e dang nanurusi l᷊al᷊engang nul᷊umiu Galilea. I Yesus mandiri katitonang u taumata su apa I Sie ene, 31watu'u I Sie kapanintironge manga tumatuhu-E. “Ahusi Taumata sarung isarakang su kawasa ngu taumata,” kere'e didato ngi Yesus, “Dang I Sie sarung pateng. Kateho su l᷊ou katilunge I Sie sarung muwangung!”

32Manga tumatuhu-E ta nakahingang apang ko nitintiro-E, kateho i sire mataku mukina si Sie.

I sai ko kal᷊abokange?

(Mat. 18:1-5; Luk. 9:46-48)

33I sire nahumpa su Kapernaum. Suapang seng su wal᷊e, I Yesus nukina su manga tumatuhu-E, “Ko apa ipurarendehi kumu kanini su l᷊al᷊eng?”

34 # Luk. 22:24 I sire ta nusumimbahi, watu'u su l᷊al᷊eng i sire kapurarendehi hal᷊i u ko i sai ko kal᷊abokange. 35#Mat. 20:26-27, 23:11; Mrk. 10:43-44; Luk. 22:26I Yesus nukumangiang, bou e'e nukui manga tumatuhu-E i sire mapul᷊odua e'e, I Sie nangul᷊i si sire, “Taumata ko mo makoa kahimotongange, i sie mambeng makoa kasamuriange l᷊au mambeng makoa mutatal᷊ung kaul᷊i u taumata.” 36Bou e'e I Yesus nangal᷊a singkatau ana ko dio, l᷊au nupararisi u ana e'e su tingo ngi sire kaul᷊ie. I Yesus nanaruru ana e'e dingang nangul᷊i su manga tumatuhu-E, 37#Mat. 10:40; Luk. 10:16; Yoh. 13:20“Taumata ko manarima singkatau rario kere i'i ual᷊ingu Ia, e'e mangal᷊enge manarima si Sia l᷊ai. Dang taumata ko manarima si Sia, i sie wal᷊ingewe kitang manarima si Sia, kateho l᷊ai manarima I Sie ko nundoi si Sia.”

I sai ko ta mundoka si kite tumatawang si kite

(Luk. 9:49-50)

38Bou e'e i Yohanes nangul᷊i si Yesus, “Tuang Guru, i kami nakawua pia taumata singkatau nanguseri setang dingang u areng I Tuang. Dang i sie nilarang i kami watu'u i sie wal᷊inge bou koa i kite.”

39Kateho I Yesus nangul᷊i, “Kumbahang mularang i sie, watu'u takoae sarang singkatau ko mukoa ko makal᷊aherang dingang u areng-Ku, bou e'e turusi mundal᷊ai si Sia. 40#Mat. 12:30; Luk. 11:23Watu'u taumata ko ta mundoka si kite, mangal᷊enge tumatawang si kite 41#Mat. 10:42Tinaungete taumata ko nungonggo inung si kumu ual᷊ing i kumu tumatuhu Ratu Mananal᷊amati, kuteu seng nal᷊ahe i sie sarung manarima l᷊uange.”

Manga hal᷊i ko makakoa taumata mukoa dosa

(Mat. 18:6-9; Luk. 17:1-2)

42“I sai makakoa singkatau bou manga ana ko dadio i'i ta mangimang l᷊ai si Sia, mapiang seng ikitang u watu ghaghilingang su l᷊ehie, dang i sie iwontol᷊i su l᷊auri. 43#Mat. 5:30Boko l᷊imau makakoa dosa si kau, potoe l᷊ima e'e! Mapiang i kau muwiahi dingang u l᷊imau simbuka dingang u Mawu Ruata sihing u i kau dingang l᷊imau darua bou e'e mataho su naraka, e'e putung ko tawe mate. 44[Su se'e putung tawe mate l᷊au ul᷊iri tawe mate.] 45Dang boko l᷊aeri u makakoa dosa si kau, potoe l᷊aeri u e'e, mapiang i kau muwiahi dingang u l᷊aeri u simbuka dingang u Mawu Ruata, sihing u i kau dingang u l᷊aeri u dua mbuka e'e i kau irume su naraka. 46[Su se'e putung tawe mate l᷊au ul᷊iri tawe mate.] 47#Mat. 5:29Boko matau makakoa dosa si kau, l᷊oie mata e'e mapiang i kau sumu su Dunia ngu Mawu Ruata Ko Wuhu dingang u matau simbuka, sihing u i kau dingang matau dua mbuka bou e'e irume su naraka. 48#Yes. 66:24Su se'e putung tawe mate l᷊au ul᷊iri ta mate.

49Apang taumata sarung isuwu su putung, musul᷊ung u sasumba niuhasi u asing.

50 # Mat. 5:13; Luk. 14:34-35 Asing e'e ko mapia, kateho boko makoa ko malele, apa botonge sau ipakapuhari? Inau, kenangko i kumu pakakoa kere asing – puwiahite singkahindo dingang purarame.”

Currently Selected:

MARKUS 9: PLT

Highlight

Copy