MARKUS 8
8
I Yesus nupakang taumata pauhiwu su kataunge
(Mat. 15:32-39)
1Ta nal᷊iwue bou e'e, pia l᷊ai taumata singgapang nusumongo nukomol᷊i. Ual᷊ing i sire takoae kang, I Yesus nukui manga tumatuhu-E dang nangul᷊i, 2“Ia kumindaghi u taumata maul᷊i i'i. Seng tilu l᷊ou l᷊iwuenge i sire nutumuhu dingang-Ku dang su orasi i'i i sire seng takoae kang. 3Boko Ia mundoi si sire pakapul᷊e dingang u tiang ko takoae tahoe, i sire sarung mapinsang su l᷊al᷊eng. Nangilebe su tal᷊oara i sire pia ko nusumongo bou marau.”
4Manga tumatuhu I Yesus nusumimbahi, “Su tampa ko nahae i'i, su apa taumata botonge makarea kang ko makataung guna ngu taumata maul᷊i i'i?”
5“Pira kaul᷊ie boroti ko pia si kumu?” kakina I Yesus.
“Pitu,” sasimbahi sire.
6Kuteu I Yesus nuparenta taumata maul᷊i e'e pakaiang su tana, bou e'e I Sie nangal᷊a boroti pitu e'e l᷊au nutarimakase su Mawu Ruata. Bou e'e I Sie nangangompeng boroti e'e dingang u l᷊ima-Nge bou e'e nunggile su manga tumatuhu-E pakipahia su manga taumata. Kuteu manga tumatuhu-E nutumuhu. 7Si sire l᷊ai pia kina ko dio pira mbua. I Yesus nutarimakase su Mawu Ruata ual᷊ingu manga kina e'e, bou e'e nuparenta manga tumatuhu-E, pamahia manga kina e'e l᷊ai. 8-9I sire nukumang sarang nal᷊aeri – patehang manga pauhiwu su kataunge taumata ko nukumang. Bou e'e manga tumatuhu I Yesus nangomol᷊i l᷊umbei ngu kang – mborong pitu wawewekang napene. Bou e'e I Yesus nuparenta manga taumata e'e pakapul᷊e, 10dang I Sie dingang u manga tumatuhu-E turusi naawi su sakaeng dang nakoa sarang tampa Dalmanuta.
Manga taumata ngu Farisi nundo si Yesus pukoa ko makal᷊aherang
(Mat. 16:1-4)
11 #
Mat. 12:38; Luk. 11:16 Pira ngkatau taumata ngu Farisi nusumongo sarang koa I Yesus, dang nanita nupapangal᷊a dingang-E guna ngu mupunsal᷊a ngi Sie. I sire nundo si Yesus pukoa ko makal᷊aherang kere tatia ngu himoneu I Sie nusumongo bou Mawu Ruata. 12#Mat. 12:39; Luk. 11:29I Yesus nadio naunge bou e'e nusumimbahi, “Nakurawe manga taumata orasi i'i mundo si Sia pukoa ko makal᷊aherang? Ta! Ia tawe mo munggile tatia ko kere'e si sire!”
13Bou e'e I Yesus nanintang i sire, dang naawi su l᷊al᷊ung u sakaeng; wuhue nuwua sarang simbuka ngu rano e'e.
Ragi ngu manga tau Farisi l᷊au i Herodes
(Mat. 16:5-12)
14Manga tumatuhu I Yesus nal᷊iwuhi numbawa boroti nipakawaghe. Si sire kitang pia boroti simbau su sakaeng. 15#Luk. 12:1“Pakaingati su ragi ngu manga tau Farisi l᷊au ragi ngi Herodes,” angkung I Yesus si sire.
16Kuteu manga tumatuhu I Yesus e'e nanita nahundidato hal᷊i e'e. I sire nangul᷊i, “I Sie nangul᷊i kere'e, watu'u si kite takoae boroti.”
17I Yesus matitong apa ko ipurarendehi sire. Ual᷊ingu e'e I Sie nukina si sire, “Nakurawe i kumu nurarendehi hal᷊i u takoae boroti? Apa i kumu wugha dang l᷊ai mborong ta nakahingang? Kere'e katimomonge sipirang i kumu? 18#Yer. 5:21; Yeh. 12:2; Mrk. 4:12I kumu pia mata – hakiwe ta nakawua? I kumu pia tul᷊i hakiwe ta nakaringihi? Apa i kumu ta nakatinaung 19boroti l᷊ima mbau Daku nikakompeng guna ngu l᷊imahiwu su kataunge? Pira wawewekang l᷊umbei ngu kang ko nikomol᷊i kumu?”
“Mapul᷊odua,” angkung i sire.
20“Dang su tempo Ia nangangompeng boroti pitu guna ngu pauhiwu su kataunge,” I Yesus sau nukina l᷊ai, “pira wawewekang l᷊umbei ngu kang nikomol᷊i kumu?”
“Pitu,” nisimbahi sire.
21“Inau, mborong ta nakahingang i kumu l᷊ai?” angkung I Yesus.
I Yesus nupakaul᷊e ngu tau ko wuta su Betsaida
22I sire nurating u Betsaida. Su se'e pia taumata numbawa singkatau ko wuta sarang koa I Yesus, l᷊au nundo si Sie tadeau pamilo l᷊ima-Nge su tau ko wuta e'e guna ngu mupakaul᷊e ngi sie. 23Kuteu I Yesus nuhinggo l᷊ima ngu tau ko wuta e'e l᷊au nanata si sie nusumuwang bou soa e'e. Bou e'e I Yesus nanguru mata ngu tau e'e. I Sie nanil᷊iri l᷊ima-Nge su mata ngu tau e'e, mbuhue nukina si sie, “Seng botonge i kau makawua manga apa su orasi i'i?”
24Tau e'e nutuhung sarang saruang bou e'e nangul᷊i, “Iya. Ia nakawua taumata kal᷊al᷊enge; kateho i sire tuhungang kere l᷊aesi u kau.”
25I Yesus sau namilo l᷊ima-Nge su mata ngu tau e'e. Paghisa i'i taumata e'e nutatitehi singapang botonge nutuhung. Matange naul᷊e, dang i sie nakawua kaul᷊ie mal᷊ahe-l᷊ahe. 26Mbuhue I Yesus nangul᷊i si sie, “Kapul᷊e'e, dang ariwe pusul᷊e sarang soa e'e.”
Pangakuang i Petrus hal᷊i I Yesus
(Mat. 16:13-20; Luk. 9:18-21)
27I Yesus l᷊au manga tumatuhu-E natamai sarang apang kampong masandighi u Kaisarea Filipi. Su l᷊al᷊eng I Yesus nukina si sire, “Tumuhu didato ngu taumata, i sai Ia i'i?”
28 #
Mrk. 6:14-15; Luk. 9:7-8 I sire nusumimbahi, “Pia ko nangul᷊i: i Yohanes Mananahani; pia l᷊ai ko nangul᷊i i Elia, dang pia l᷊ai ko wal᷊inge nangul᷊i singkatau bou nabi.”
29 #
Yoh. 6:68-69
“Arawe tumuhu si kumu, Ia i'i i sai?” kakina I Yesus.
I Petrus nusumimbahi, “I Tuang ko Ratu Mananal᷊amati!”
30Bou e'e I Yesus nangonggo u ingati si sire, tadeau kumbahang mupakatitong si sai-sai hal᷊i u watangeng-E.
I Yesus nuhabari singsara l᷊au papate-Nge
(Mat. 16:21-28; Luk. 9:22-27)
31Bou e'e, I Yesus nanita nanintiro manga tumatuhu-E himoneu Ahusi Taumata mambeng mutatahang u singsara, l᷊au sarung rokateng u apang pangaha, manga tumbonang imam, l᷊au manga meteri agama. I Sie sarung pateng, kateho su l᷊ou katilunge I Sie sarung sau ipuwangung. 32Kere'e kal᷊ahe'e I Yesus nangul᷊i hal᷊i e'e su manga tumatuhu-E. Kuteu i Petrus namol᷊eng si Yesus sarang sindihange, l᷊au nanughu si Sie. 33Arawe I Yesus nuwihu dang nutuhung manga tumatuhu-E, mbuhue nanughu si Petrus, “Dakoe pangal᷊ing bou i'i, sasal᷊uka! Sipirang u e'e ko sipirang u taumata; wal᷊inge sipirang u Mawu Ruata!”
34 #
Mat. 10:38; Luk. 14:27 Bou e'e I Yesus nukui taumata maul᷊i ko ene su se'e dingang u manga tumatuhu-E. Bou e'e I Sie nangul᷊i si sire, “Taumata ko mo tumuhu si Sia, mambeng ari putinaung hal᷊i u watangenge, bou e'e mamikul᷊i salipie, dang turusi putuhu si Sia. 35#Mat. 10:39; Luk. 17:33; Yoh. 12:25Watu, u taumata ko mupakasal᷊amati puwawiahie, sarung kailangeng u puwawiahie. Arawe taumata ko mundume puwawiahie ual᷊ingu Ia, dang guna ngu Habari Mapia bou Mawu Ruata, e'e sarung makasal᷊amati si sie. 36Apa untunge su singkatau, boko i sie managhuang kal᷊abo u dunia i'i kateho i sie kailangeng u puwawiahie? 37Botonge puwawiahie e'e itukari dingang ko wal᷊inge?
38Boko singkatau mamea mangaku ngu Ia l᷊au tintiro-Ku su tempo ngu pul᷊al᷊awang l᷊au ko dal᷊ai i'i, Ahusi Taumata l᷊ai sarung mamea mangaku ngu taumata e'e, su tempo ngi Sie sarung ruminta dingang u kawasa ngi Yamang-E, nihundinganeng u manga malaikati ko susi.”
Currently Selected:
MARKUS 8: PLT
Highlight
Share
Copy
Want to have your highlights saved across all your devices? Sign up or sign in
