MIKHA 7

Kakanoa u Israel nal᷊al᷊ai

1Silaka ia! Ia musul᷊ung kere taumata ko nikal᷊unusang ko natamai nanipo wua suapang seng nal᷊iu temponge. Seng takoae manga wuange su manga kotoe. Wua ngu anggori l᷊au wua ngu ara ko mapapia kaul᷊ie seng nasue tiponge. 2Taumata ko matulasi seng nailang bou wanua, taumata ko masatia su Mawu Ruata seng ta nipusugha l᷊ai. Apang taumata kapangampal᷊i tempo guna ngu mamate. Singkatau-singkatau nutaing u seri su sinsul᷊unge. 3Kaul᷊ie pande mukoa ko dal᷊ai. Mapapangkati dang mamamonesi mundo doi ngu soroki, dang tumbonang u ana u kawanua manihasa kaoe, ko kere'e i sire nusingkongkoli singkahindo. 4Ko kapiange l᷊au ko katulasenge bo i sire l᷊ai kere rindulu ko pia sasusue ko takoae gunange. Seng nurating temponge Mawu Ruata muhukung umati-E kere ko seng nionggol᷊ang-E ingati si sire bou manga nabi-E. Orasi i'i seng nutumimbul᷊i gara su tal᷊oara i sire. 5Kumbahang mangimang su l᷊ampungu, kumbahang mangumbahasi su ghawe. Pakaingati su manga didatongu maning ko mundaringihi e'e ko kawingu sisane. 6#Mat. 10:35-36; Luk. 12:53 Watu'u, su tempo ko kiri'i apang walagheng muraroka: ana ko ese muhinakang si papange, ana kowawine mundoka si mamange, dang manuhang kowawine musitori dingang i emponge kowawine.

7Kateho i kite muharapi su Mawu; dingang napene u pangangaking i kite mangampal᷊i Mawu Ruata ngi kite. I Sie sarung mundaringihi kakal᷊iomaneng i kite dang mupakasal᷊amati si kite.

Mawu mupakasal᷊amati

8Takoae alasange su manga roka i kite guna ngu l᷊umiaghi u kananawo i kite. Watu'u maneng i kite nanawo, i kite mang sarung sau muwangung. Orasi i'i i kite ene su l᷊al᷊ung u kararundung, kateho Mawu sarung mupakasua si kite. 9I kite seng nubardosa su saruang u Mawu, ual᷊ingu e'e orasi i'i i kite mambeng makapundang wawal᷊uang-E. Kateho ta mal᷊iwue I Sie sarung manatawang si kite dang mangonggo kal᷊aadili si kite. I Sie sarung mumbawa si kite musumuwang sarang kasasua, i kite sarung makapundang sisane himoneu I Sie manal᷊amati si kite. 10Ndahuwite roka nuhinakang si kite dingang nangul᷊i, “Ko su apa Mawu Ruata ngi kumu e'e?” Arawe orasi i'i i sire sarung makawua apa ko sarung ikoa u Mawu si kite, dang i sire sarung mamea. I kite sarung makawua manga roka i kite e'e ikawata dang il᷊al᷊indang kere l᷊ota su l᷊al᷊eng.

11Ei Yerusalem! Seng nurating temponge i kumu sau mamangung manga meseli soa ngi kumu. Su l᷊ou i'i tampa u sarung ipakal᷊oahi. 12Manga taumatangu sarung musul᷊e sarang koau bou apang tampa – bou Asyur su simbuka ngu raki, bou Mesir su simbuka ngu timuhi, bou bahageang u Sal᷊uhi Efrat, bou simbuka ngu l᷊auri dang bou manga wul᷊uri ko marau. 13Kateho dunia sarung mal᷊inggi ual᷊ingu kal᷊al᷊ai u taumatange.

Kakal᷊iomaneng mukahioro kakindaghi u Mawu su Israel

14O Mawu, l᷊ukariko umati-U, umati ko nipile-U. I sire natana nahae su l᷊al᷊o ko mal᷊oahi, su tal᷊oara u tana ko matawa. Walate i sire makarea kang nguda u rindulu u Basan dang su Gilead kere su tempo horo.

15Pukoako kal᷊aherang guna ngi kami, o MawuU, kere ko seng nikoa-U ndahuwite su tempo ngu I Kau numbawa si kami nusumuwang bou Mesir. 16Manga bangsa sarung makawua hal᷊i e'e dang mamea ual᷊ingu nakatitong himoneu apang katatoghasi sire takoae mangal᷊enge sarang singkodo. I sire sarung kailangeng u akal᷊i hakiu ta makapudidato arako makaringihi. 17I sire sarung tumondo su tana kere katoang. Dingang u katataku l᷊au kakendenge i sire sarung musumuwang bou tampa i sire, bou e'e musumongo sarang koa-U, o Mawu Ruata ngi kami.

18Takoae Mawu Ruata kere I Kau, o Mawu, ko mangonggo u ampung su dosa ngu umati ko seng nipile-U ko nal᷊umbei. Wal᷊inge sarang kal᷊iwuenge I Kau muwawal᷊uang; kateho I Kau mal᷊uasi manode u kakindaghi-U ko takoae pondol᷊i. 19I Kau sarung mukumindaghi sau si kami dang mangonggo ampung si kami. Manga dosa ngi kami sarung il᷊al᷊indang-U dang iwahung-U sarang wal᷊ang u l᷊auri! 20Su umati-U, hintou ngi Abraham l᷊au i Yakub, I Kau sarung mupatode u kasasatia-U l᷊au kakindaghi-U ko takoae pondol᷊i kere ko seng nipudiandi-U su manga i upung i kami tempo horo.

Currently Selected:

MIKHA 7: PLT

Highlight

Copy