MATIUS 17

I Yesus nipakawantughi

(Mrk. 9:2-13; Luk. 9:28-36)

1 # 2Ptr. 1:17-18 Nungu l᷊ou tuhue I Yesus numbawa si Petrus dingang i Yakobus sire rua ngu tuaringe i Yohanes nutingkahae sarang simbau wul᷊uri ko marange. 2Su tingo ngi sire, ghahi I Yesus nuwal᷊u: Pahesi-E nusuminang kere matangutiti l᷊au pakeang-E mawira kukerong. 3Bou e'e tumatuhu-E sire tilu e'e nakawua si Musa l᷊au i Elia kapudidatonge dingang I Yesus. 4Bou e'e i Petrus nangul᷊i si Yesus, “Mawu, matemang kahingang i kite su si'i. Boko Mawu mo, ia mukoa selo tatilu su si'i: simbau guna ngu Mawu, simbau guna ngi Musa l᷊au simbau guna ngi Elia,”

5 # Kar. 22:2; Sau. 18:15; Mzm. 2:7; Yes. 42:1; Mat. 3:17, 12:18; Mrk. 1:11; Luk. 3:22 Su tempo ngi Petrus kapudidatonge, pia winawa ko masua-sua nul᷊iwung si sire, bou e'e pia tingihi bou l᷊al᷊unge kapuhabari, “I'i Ana-Ku ko Daku ikukindaghi. I Sie nakal᷊uasi naung-Ku. Raringihi i Sie!”

6Su tempo manga tumatuhu I Yesus nakaringihi tingihi e'e, i sire nataku kahingang hakiu nansu su tana. 7Bou e'e I Yesus nusumongo dang nanuhung si sire. “Wangungte,” angkung-E. “Kumbahang mataku!” 8Suapang i sire nutuhung, i sire seng ta nakawua si sai-sai kitang I Yesus sisanenge.

9Su tempo I Yesus karusunge bou wul᷊uri e'e, I Yesus nangonggo ingati si sire, “Kumbahang muwuke si sai-sai apang ko nikawua ngi kumu kanini, su horo u Ahusi Taumata ipuwangung bou papate.”

10 # Mal. 4:5 Manga tumatuhu-E nukina si Sie, “Nakurawe manga meteri agama nangul᷊i uare i Elia mambeng sumongo horo?”

11I Yesus nusumimbahi, “Tingari i Elia ruminta dang sarung mungganapi apang ko koateng. 12#Mat. 11:14Katewe Ia muhabari si kumu, i Elia seng mbuae nusumongo, katewe manga taumata ta nakakil᷊al᷊a si sie; i sire nukoa si sie numbatu kao i sire. Dang kere'e l᷊ai i sire sarung mukoa Ahusi Taumata.”

13Mbuhue manga tumatuhu-E nakahingang himoneu I Yesus ko kapuhabari u hal᷊i i Yohanes Mananahani.

I Yesus nupakaul᷊e ngu dario ko nikasukang u roh ko dal᷊ai

(Mrk. 9:14-29; Luk. 9:37-43a)

14Su tempo I Yesus l᷊au tumatuhu-E tatilu nusul᷊e sarang taumata ko maul᷊i e'e, pia tau ko ese singkatau, nusumongo nusuba su saruang I Yesus, 15dang nangul᷊i, “Tuang, kindaghite ko anaku. I sie pia saki u wawi. Sakie boko rumating kere'e kabuhae, hakiu kasaunge manawo su putung, arako su ake. 16Ia seng mbuae numbawa si sie sarang koa u manga tumatuhu I Tuang, kateho i sire ta nakaul᷊e si sie.”

17I Yesus nusumimbahi, “Wal᷊inge gampang i kumu i'i! I kumu mang tinga-tingari taumata ko mal᷊al᷊awang l᷊au ta mangangimang. Sarang kangereng Ia mambeng matana dingang i kumu dang musabari su tingo ngi kumu? Wawae mai ana e'e!” 18Bou e'e I Yesus nuparenta roh ko dal᷊ai su dario e'e pasuwang. Roh ko dal᷊ai e'e nusumuwang, dang singkatempo e'e l᷊ai dario e'e naul᷊e.

19Bou e'e manga tumatuhu-E singkatau-singkatau nusumongo nukina si Sie, “Tuang apa sabapie i kami i'i ta makauseri roh ko dal᷊ai e'e?”

20 # Mat. 21:21; Mrk. 11:23; 1Kor. 13:2 I Yesus nusumimbahi, “Watu'u ko dio pangangimang i kumu. Putinaungte! Boko i kumu pia pangangimang kere kal᷊abo u watu ngu sawi, i kumu makaul᷊i su wul᷊uri i'i, ‘Pakaal᷊ingte tamai!’ Nal᷊ahe wul᷊uri e'e maenso. Takoae hal᷊i simbau ko sarung ta makoa si kumu! [21Arawe roh ko dal᷊ai kere i'i, kitang botonge ikauseri u kal᷊iomaneng l᷊au mupuasa.]”

I Yesus sau nangul᷊i hal᷊i u papate-Nge

(Mrk. 9:30-32; Luk. 9:43b-45)

22Su tempo ngu manga tumatuhu I Yesus nukomol᷊i su Galilea, I Yesus nangul᷊i si sire, “Seng maehong l᷊ai, Ahusi Taumata sarung isarakang su kawasa ngu taumata. 23I Sie sarung pateng, kateho su l᷊ou katilunge i Sie sarung ipuwangung.”

Kuteu manga tumatuhu-E nasusa takoae sul᷊unge.

Wawaehi balasteng Wal᷊e ngu Mawu

24 # Sasu. 30:13, 38:26 Su tempo ngi Yesus l᷊au manga tumatuhu-E nahumpa su Kapernaum, i sire mananuntu balasteng Wal᷊e ngu Mawu nusumongo si Petrus dang nukina, “Meteri kumu mamaehi balasteng Wal᷊e ngu Mawu arako ta?”

25I Petrus nusumimbahi, “Mamaehi!”

Su tempo ngi Petrus napul᷊e, I Yesus nukina horo, “Simon, kirapa si kau? I sai mambeng mamaehi bea arako balasteng su manga ratu ngu dunia i'i? Ana u kawanua arako tau raghi?”

26“Tau raghi,” nisimbahi Petrus.

“Boko kere'e,” angkung I Yesus, “Ana u wanua tawahal᷊uasi mamaehi balasteng. 27Kateho kumbahang i kite mupakataturu naung u manga taumata e'e. Inau dakoko tamai pangopasi sarang rano. Al᷊ako kina ko kahorokange maal᷊a si kau. Su mohonge pia doi ko botonge makawaehi balasteng i karua. Al᷊ae doi e'e dang waehi si sire balasteng i kite guna ngu Wal᷊e ngu Mawu.”

Currently Selected:

MATIUS 17: PLT

Highlight

Copy