MATIUS 15
15
Narang u manga i upung
(Mrk. 7:1-13)
1Singkomol᷊ang u tau Farisi l᷊au pirangkatau meteri agama bou Yerusalem nusumongo si Yesus. I sire nukina si Sie, 2“Nakurawe tumatuhu-U l᷊ul᷊awang narang u manga i upung i kite? Su tempo ngu kumang i sire ta manguhasi l᷊ima ngi sire horo tumuhu atorang!”
3I Yesus nusumimbahi, “Nakurawe i kumu l᷊ai l᷊umawang parenta ngu Mawu Ruata, kitang ual᷊ingu tumuhu adati manga i upung i kumu? 4#Sasu. 20:12, 21:17; Im. 20:9; Sau. 5:16Watu'u Mawu Ruata nangul᷊i, ‘Pangadati si papa ngu l᷊au si mamangu,’ dang ‘I sai-sai ko mangane si papange l᷊au si mamange, mambeng ihukung pakapate.’ 5Arawe i kumu manintiro: Boko taumata mangul᷊i su ghaghurange, ‘Apa ko hinonge daku ionggo si papa l᷊au si mama, seng daku nisumba su Mawu Ruata,’ 6inau tau e'e seng kuhaete mangadati ghaghurange.#15:6: ghaghurange: pira mbau wohe horo: i papa arako i mamange Inau, ual᷊ingu adati manga i upung i kumu, i kumu mamala didato ngu Mawu Ruata. 7I kumu mang taumata ma pal᷊antikari! Mang nuhino kahingang apang ko niul᷊i i Yesaya bou hal᷊i i kumu, ko kiri'i,
8 #
Yes. 29:13
‘Kiri'i nihabariu u Mawu Ruata:
Manga umati e'e kitang manumba si Sia dingang u didato,
arawe naung i sire marau bou Ia.
9Takoae gunange i sire manumba si Sia,
watu'u atorang u taumata nitintiro ngi sire
nikoa kere e'e ko l᷊aatori-Ku.’ ”
Kaul᷊i u hal᷊i ko makal᷊amuhu taumata
(Mrk. 7:14-23)
10Bou e'e I Yesus nukumui manga taumata dang nangul᷊i si sire, “Raringihiko tadeau makahingang! 11Apang ko mataho su mohong ta makal᷊amuhu taumata; kitang apang ko mal᷊ua bou mohonge, e'e makal᷊amuhu si sie.”
12Bou e'e manga tumatuhu I Yesus nusumongo nangul᷊i si Sie, “I Tuang matitong i sire tau Farisi e'e namansa su tempo ngi Tuang nangul᷊i kere'e?”
13I Yesus nusumimbahi, “Apang sasuang ko ta nisuang i Yamang-Ku su sorga sarung isawu. 14#Luk. 6:39Kuhaete musumpi tau Farisi e'e. I sire e'e ko mangangaha ko wuta; boko tau ko wuta mangaha tau ko wuta i sire rua sarung manawo su goti.”
15I Petrus nangul᷊i, “Tul᷊ungko pakal᷊ahe si kami papinintu e'e Tuang!”
16I Yesus nusumimbahi si sire, “Apa i kumu mborong ta nakahingang l᷊ai? 17I kumu ko wugha, apang ko masu su mohong maturusi sarang l᷊al᷊ung u tiang, bou e'e sau masuwang? 18#Mat. 12:34Arawe ko mal᷊ua bou mohong, e'e sumuwang bou naung; dang e'e makal᷊amuhu taumata. 19Watu'u bou l᷊al᷊ung u naung tumimbul᷊i sipirang ko dal᷊ai sarang makakoa taumata mamate, mawuang, musundal᷊i, manako, musaksi l᷊eo, dang muhinakang. 20Ko e'e kaul᷊ie makal᷊amuhu taumata, wal᷊ingewe ual᷊ingu kumang ta manguhasi l᷊ima.”
Pangangimang singkatau kowawine ngu Kanaan
(Mrk. 7:24-30)
21Bou e'e I Yesus nanintang u tampa e'e nakoa sarang tampa ko masandighi u soa ngu Tirus l᷊au Sidon. 22Singkatau kowawine ngu Kanaan bou wanua e'e, nusumandighi si Yesus dingang kakuinge “Ahusi Daud, kindaghite ko ia! Anaku kowawine nikasukang u roh ko dal᷊ai, kakakoae mabuha kahingang.”
23I Yesus ta nusumimbahi su kowawine e'e. Bou e'e manga tumatuhu I Yesus nusumandighi dang nundo si Sie, “Tuang roie tau kowawine e'e pakapul᷊e. I sie kitang kapugarae su l᷊ikuri kite!”
24I Yesus nusumimbahi, “Ia nioro kitang guna ngu tau Israel, kitang si sire apang ko napal᷊iri.”
25Tau kowawine e'e nusumimbahi nusuba su saruang I Yesus dang nangul᷊i, “Tul᷊ungko ia Tuang.”
26I Yesus nusumimbahi, “Ta makahino mangal᷊a kang u manga rario bou e'e i teleri su kapuna.”
27“Tingari, Tuang,” nisimbahi tau kowawine e'e, “Kateho kapuna l᷊ai mang kumang manga l᷊umbei ko nanawo bou meda ngu mawunge.”
28Bou e'e I Yesus nangul᷊i si sie, “Ma, mang tingari ko l᷊abo pangangimangu! Pakariadite apang ko ikaou!” Singkatempo e'e l᷊ai ana kowawine e'e naul᷊e.
I Yesus nupakaul᷊e ngu maul᷊i taumata ko masasaki
29I Yesus nanintang u tampa e'e bou e'e nul᷊umal᷊eng nusumilei bou wiwihi u apeng u rano Galilea. Bou e'e i Sie nusumaka sarang wul᷊uri dang nukumaiang su se'e. 30Maul᷊i taumata nusumongo si Sie numbawa manga taumata ko pengkadi, ko wuta, ko kesohi, ko bobo, dang maul᷊i l᷊ai ko masasaki ko wal᷊inge. I sire namilo manga taumata e'e su saruang I Yesus, dang i Sie nupakaul᷊e ngu manga taumata e'e. 31Taumata maul᷊i ko ene su se'e naherang suapang nakawua tau ko bobo nakapudidato, ko pengkadi naul᷊e, tau ko kesohi nakal᷊al᷊eng dang tau ko wuta nakawua. Bou e'e i sire nundalo Mawu Ruata ngu tau Israel.
I Yesus nupakang u taumata pauhiwu su kataunge
(Mrk. 8:1-10)
32Bou e'e I Yesus nukumui manga tumatuhu-E dang nangul᷊i, “Ia kumindaghi su taumata maul᷊i i'i. Seng tilu l᷊ou i sire ringang-Ku, dang su orasi i'i i sire seng takoae kang. Ia mandi mamala ngi sire mapul᷊e nahutung, tihang i sire mapinsang su l᷊al᷊eng.”
33Bou e'e manga tumatuhu-E nukina si Sie, “Su apa i kite botonge makarea kang su tampa ko nahae i'i guna ngu taumata maul᷊i i'i?”
34“Pira mbau boroti si kumu?” I Yesus nukina si sire.
“Pitu,” angkung i sire, “dang kina ko dadio pira mbua.”
35Inau I Yesus nangoro si sire pakaiang su tana. 36Bou e'e i Sie nangal᷊a boroti pitu dang kina e'e, mbuhue nutarimakase su Mawu Ruata. Nasue e'e i Sie nangangompeng boroti l᷊au kina e'e dingang u l᷊ima-Nge, mbuhue i Sie nunggile e'e su manga tumatuhu-E. Dang i sire namahia su taumata ko maul᷊i e'e. 37Kaul᷊i u taumata e'e nukumang sarang nal᷊aeri. Nasue e'e manga tumatuhu I Yesus nangomol᷊i l᷊umbei ngu wiahi e'e. Kaul᷊ie mborong pitu mbawewe napene. 38Kaul᷊i u ko ese nukumang su tempo e'e pauhiwu su kataunge, su l᷊ikuru manga kowawine dingang u manga rario.
39Bou e'e I Yesus nangoro taumata maul᷊i e'e pakapul᷊e. Arawe i Sie sisanenge nusumake sakaeng singgisa nakoa sarang wanua Magadan.
Currently Selected:
MATIUS 15: PLT
Highlight
Share
Copy
Want to have your highlights saved across all your devices? Sign up or sign in
