MATIUS 14

Papate ngi Yohanes Mananahani

(Mrk. 6:14-29; Luk. 9:7-9)

1Su tempo e'e i Herodes mangangawasa soa ngu Galilea, nakaringihi hal᷊i I Yesus. 2I Herodes nangul᷊i su manga ringange, “Nal᷊ahe i'i mang i Yohanes Mananahani sau nuwiahi! E'e sabapie i Sie pia kawasa mukoa ko makal᷊aherang.”

3 # Luk. 3:19-20 Watu'u su horo u e'e i Herodes nangoro paname si Yohanes dang pangiki si sie mbuhue nipasue su tutupang. I Herodes nukoa hal᷊i e'e ual᷊ing i Herodias kawing i Filipus tuaringe sisane. 4#Im. 18:16, 20:21Watu'u i Yohanes bou nangul᷊i si Herodes kiri'i: “Ta wotonge i kau mukawing si Herodias!” 5Su hinonge i Herodes ko mo mamate si Yohanes, kateho i sie mataku u taumata, watu'u i sire mutuhung si Yohanes kere nabi.

6Su tempo ngi Herodes kapusal᷊iwang u hari jadie, ana i Herodias ko mahua nusal᷊ai su tingo ngu sake. Sal᷊ainge e'e nakapia uha i Herodes, 7hakiu i Herodes nudiandi si sie dingang nutewa, apang ko ipundokange, sarung ionggoe si sie.

8Ual᷊ingu nil᷊okeng i mamange, ana mahua e'e nangul᷊i, “Ia mundo timbo i Yohanes Mananahani onggo si sia su orasi i'i taho su baki!”

9Nakaringihi ndo e'e i Herodes nasusa kahingang naunge. Katewe ual᷊ing i sie seng nutewa su tingo ngu sake'e, i sie nuparenta tadeau ndo u ana mahua e'e pakituhuke. 10I sie nuparenta taumata patamai sarang tutupang pamoto timbo i Yohanes. 11Bou e'e timbo i Yohanes niwawa sarang l᷊al᷊unge mapapilo su baki dang nionggo su ana ko mahua e'e. Bou e'e niwawa sarang koa i mamange. 12Bou e'e manga tumatuhu i Yohanes nusumongo nangal᷊a mayati Yohanes dang nil᷊uwing. Mbuhue i sire tamai nuhabari hal᷊i e'e si Yesus.

I Yesus nupakang taumata l᷊imahiwu su kataunge

(Mrk. 6:30-44; Luk. 9:10-17; Yoh. 6:1-14)

13Su tempo ngi Yesus nakaringihi habari e'e, i Sie nusakaeng sisanenge nanintang u tampa e'e, nakoa sarang tampa simbau ko mal᷊umpi. Suapang nikaringihi u taumata, i sire nanintang u soa ngi sire tamai nul᷊umingang nutumuhu si Yesus. 14Su tempo ngi Yesus nal᷊intu bou sakaeng dang nakawua taumata maul᷊i e'e, I Sie nukumindaghi si sire. Bou e'e i Sie nupakaul᷊e ngu taumata masasaki su tal᷊oara i sire.

15Seng kawawul᷊aenge, manga tumatuhu I Yesus nusumongo dang nangul᷊i si Sie, “Seng wawul᷊aeng dang tampa i'i ko nahae. Mapiang i Tuang pangoro manga taumata i'i pal᷊al᷊eng, tadeau makapuluang kang i sire su manga soa.”

16“Tawahal᷊uasi i sire pal᷊al᷊eng,” angkung I Yesus, “I kumute pupakang si sire.”

17“Si kami kitang pia boroti l᷊ima mbau l᷊au kina dua mbua!” sasimbahi manga tumatuhu I Yesus e'e.

18“Wawae mai,” angkung I Yesus. 19Bou e'e I Sie nangoro taumata maul᷊i pakangiang su rindulu. Bou e'e I Sie nangal᷊a boroti l᷊ima mbau l᷊au kina dua mbua, bou e'e nul᷊umingara sarang l᷊angi nuputarimakase su Mawu. Nasue bou e'e I Sie nangangompeng boroti e'e dingang u l᷊ima-Nge dang nangonggo su manga tumatuhu-E pakipahia su taumata ko maul᷊i e'e. 20I sire kaul᷊ie nukumang sarang nal᷊aeri. Bou e'e manga tumatuhu I Yesus nangomol᷊i l᷊umbei ngu kang e'e; mborong pia mapul᷊odua su wawewekang napene. 21Taumata ko nukumang su tempo e'e patehang l᷊imahiwu su kataunge kaul᷊ie su l᷊ikuru manga kowawine l᷊au manga rario.

I Yesus nul᷊umal᷊eng su wawo u ake

(Mrk. 6:45-52; Yoh. 6:16-21)

22Bou e'e I Yesus nuparenta manga tumatuhu-E pasake su sakaeng dang puhoro pal᷊iu rano, I Sie nundoi taumata maul᷊i e'e pakapul᷊e. 23Suapang manga taumata maul᷊i e'e seng nasue napul᷊e, I Yesus nusumaka sisanenge sarang wul᷊uri simbau nukal᷊iomaneng. Sarang nurating u huwi, I Yesus mang mborong se'e sisanenge. 24Su tempo e'e sakaeng ko nisakenang u manga tumatuhu I Yesus, seng tasae mal᷊auri su tal᷊oara u rano. Sakaeng e'e taghunang mansa nipunang u l᷊ua, musomahu anging. 25Su wula u pukul᷊i tatilu l᷊au pukul᷊i nung mal᷊ukari, I Yesus nusumandighi si sire, kal᷊al᷊enge su wawo u ake. 26Suapang manga tumatuhu-E nakawua si Sie kal᷊al᷊enge su wawo u ake, i sire nahuwi dal᷊ai-l᷊ai. “Himukuri!” i sire kakihae nataku.

27Arawe I Yesus nusumimbahi, “Pakatatapi! Ia i'i I Yesus. Ari kataku!”

28Bou e'e i Petrus nangul᷊i, “Boko i Kau ko I Yesus, parentaite ia pal᷊al᷊eng su wawo u ake.”

29“Maite” nisimbahi Yesus. Inau i Petrus nul᷊umintu bou sakaeng, nul᷊umal᷊eng su wawo u ake nusumandighi si Yesus. 30Suapang i Petrus nakawua kal᷊auhae anging su rano, i sie nataku dang nanita kawawontol᷊e. “Mawu, tul᷊ungko!” i sie kakihae.

31I Yesus dingang nangul᷊uhi l᷊imange dang naname si sie, dang nangul᷊i, “Petrus, Petrus, singkodo pangangimangu. Nakurawe i kau sal᷊a ta mangimang si Sia?”

32Bou e'e i sire rua nusumake su sakaeng e'e, dang anging dingang nal᷊enehi. 33Manga tumatuhu-E nusuba nanumba si Sie. I sire nangul᷊i, “Mang tingari Mawu ko Ahusi Ruata!”

I Yesus nupakaul᷊e ngu taumata masasaki su Genesaret

(Mrk. 6:53-56)

34Su tempo I Yesus nahumpa su simbuka ngu rano, i sire nutumul᷊i su Genesaret. 35Su tempo taumata su se'e nakawua I Yesus nusumongo, i sire namombeng habari e'e suapang tampa masandighi u soa e'e. Bou e'e manga taumata masasaki niwawa sarang koa I Yesus 36I sire nundo si Sie tadeau makapanuhung kakingkaeng-E, maning kitang pondol᷊i. Bou e'e kaul᷊ie ko nakasuhung kakingkaeng-E nasue naul᷊e.

Currently Selected:

MATIUS 14: PLT

Highlight

Copy