MATIUS 13
13
Papinintu ngu singkatau mananawuhi
(Mrk. 4:1-9; Luk. 8:4-8)
1Su l᷊ou e'e l᷊ai I Yesus nul᷊umintu bou wal᷊e e'e nakoa sarang wiwihi u rano nukumaiang su se'e. 2#Luk. 5:1-3Maul᷊i kahingang taumata nukomol᷊i nahumbung su sindihang I Yesus, ual᷊ingu e'e i Sie tamai nukumaiang su sakaeng, arawe taumata ko maul᷊i e'e kararisi su apeng. 3Bou e'e I Yesus nanintiro ngu hal᷊i maul᷊i si sire dingang u papinintu.
“Singkatau mangangawuhi natarai nanawuhi sasuang,” kere'e I Yesus nanita u wuke-E. 4“Su tempo ngu kapanawuhi, pia sasuang ko nanawo su l᷊al᷊eng. Bou e'e nisongong u burung dang nukumang kaul᷊i u sasuang e'e. 5Pia l᷊ai nanawo su tampa ko mawatu, ko mahal᷊i tanange. Sasuang e'e singkakonda nutumuwo watu'u tanange manipi. 6Kitang suapang matangutiti nasahengke manga tumbal᷊i e'e nanita nal᷊obe, bou e'e nahango dang nate watu'u hamue ta tumaniu mal᷊al᷊ung. 7Pia l᷊ai sasuang nanawo su tal᷊oara ngu rindulu ko mal᷊ahoro. Rindulu ko mal᷊ahoro e'e nutumuwo dang nangumpisi manga tumbal᷊i e'e sarang nate. 8Katewe pia l᷊ai sasuang nanawo su tana ko matawa, bou e'e nuwua; pia ko mahasu, pia ko nungupul᷊o, dang pia l᷊ai ko tilumpul᷊o su sul᷊enge.”
9Bou nuwuke ngu papinintu e'e I Yesus nangul᷊i, “Boko pia tul᷊i, daringihe!”
Nakurawe I Yesus mupake u papinintu
(Mrk. 4:10-12; Luk. 8:9-10)
10Bou e'e manga tumatuhu I Yesus nusumongo dang nukina si Sie, “Nakurawe i Tuang mupake u papinintu boko mudidato dingang u taumata ko maul᷊i e'e?”
11I Yesus nusumimbahi, “Watu'u si kumu seng pia ghaghile tadeau makatitong rahasia ngu hal᷊i u kirapa Mawu Ruata mamarenta, arawe si sire takoae. 12#Mat. 25:29; Mrk. 4:25; Luk. 8:18, 19:26Watu'u su taumata ko seng pia, sau onggol᷊ang pakaul᷊i, dang si sie sarung mapal᷊iu. Arawe su taumata ko takoae apa-apa, kuteu ko ene si sie seng singkodo e'e mborong sau al᷊akeng. 13E'e sabapie Ia mupake u papinintu boko Ia mudidato dingang u taumata ko maul᷊i, ual᷊ing i sire makawua, kateho musul᷊ung u taumata ko ta nakawua; i sire mundaringihi, kateho musul᷊ung u taumata ko ta nakaringihi dang ta nakahingang. 14#Yes. 6:9-10Dingang u e'e naganapi ko niul᷊i i Nabi Yesaya,
‘Mawu Ruata nudidato:
I sire turusi mundaringihi
kateho mang ta makahingang,
I sire turusi mutuhung
kateho mang wugha apa ko nariadi.
15Watu'u sipirang i sire umati i'i seng matimomo,
tul᷊i ngi sire seng nawenggeli dang mata ngi sire seng nipakawuta.
Ii nipakariadi tadeau mata ngi sire kumbahang makawua,
tul᷊i ngi sire kumbahang makaringihi,
sipirang i sire kumbahang makahingang
dang kumbahang musul᷊e si Sia,
bou e'e Ia mupakaul᷊e ngi sire.’ ”
16 #
Luk. 10:23-24
“Arawe untung i kumu wal᷊inge ko dio,” angkung I Yesus su manga tumatuhu-E, “watu'u i kumu tinga-tingari seng nakawua dang nakaringihi. 17Putinaungte, maul᷊i nabi dang taumata ko matuhu su Mawu Ruata mo mutuhung apang ko nikawua ngi kumu su orasi i'i, kateho i sire mang ta makawua. I sire mo mundaringihi apang ko nikaringihi kumu su orasi i'i, kateho i sire mang ta makaringihi.”
I Yesus nupakal᷊ahe mangal᷊eng u papinintu
(Mrk. 4:13-20; Luk. 8:11-15)
18“Daringihe apa mangal᷊enge papinintu hal᷊i u mananawuhi e'e. 19Sasuang ko nanawo su l᷊al᷊eng, musul᷊ung u manga taumata ko nakaringihi habari hal᷊i u kirapa Mawu Ruata mamarenta, kateho ta nakahingang. I sie ko kal᷊al᷊aikange nusumongo nangaho apang ko seng nisuang su l᷊al᷊ung u naung i sire. 20Sasuang ko nanawo su tana ko mawatu, musul᷊ung u manga taumata ko nundaringihi habari e'e, dang turusi nanarima dingang u naung mal᷊uasi. 21Kitang habari e'e ko ta nuhamu su l᷊al᷊ung u naung i sire, hakiu ta nataeri mal᷊iwue. Kere'e i sire nakapundang u susa arako siksa ual᷊ingu habari e'e, i sire turusi nusunial᷊i. 22Sasuang ko nanawo su rindulu mal᷊ahoro musul᷊ung u manga taumata ko nundaringihi habari e'e, kateho ghumagha ngu puwawiahi i sire dang mo muwiahi marange, ual᷊ingu e'e habari bou Mawu Ruata, nahepesi su l᷊al᷊ung u naung i sire hakiu ta nuwua. 23Dang sasuang ko nanawo su tana ko matawa musul᷊ung u manga taumata ko nundaringihi habari e'e dang nakahingang. I sire nuwua maul᷊i, pia ko mahasu, pia ko nungupul᷊o dang pia ko tilumpul᷊o su sul᷊enge hasili.”
Papinintu hei su tal᷊oara ngu gandung
24I Yesus nuwuke ngu l᷊ai simbau papinintu su taumata ko maul᷊i angkung-E, “Boko Mawu Ruata mamarenta, kakakoae mang musul᷊ung u papinintu i'i: Singkatau mangangawuhi nanawuhi sasuang ko mapia su anseri. 25Pia sihuwi, su tempo taumata kaul᷊ie seng katikie, musu ngu mangangawuhi e'e nusumongo nanawuhi sasuang hei su tal᷊oara ngu gandung e'e, bou e'e napul᷊e. 26Tempo sasuang e'e nutumuwo dang nanita nuhowa, hei e'e seng nikawua l᷊ai. 27Bou e'e taumata ngu mangangawuhi nusumongo sarang koa u tataghuange dingang nangul᷊i, ‘Tuang, i Tuang wal᷊ingewe nusuang u sasuang ko mapia su l᷊al᷊ung u anseri Tuang? Kirapa hakiu nakoa pia hei su l᷊al᷊unge?’ 28Mangangawuhi e'e nusumimbahi, ‘E'e hal᷊i u musu.’ Bou e'e taumata ngu mangangawuhi e'e sau nukina, ‘I Tuang mo i kami tarai manawu apang hei e'e?’ 29‘Kumbahang,’ nisimbahie, ‘watu'u boko hei e'e isawu, ntihang sarang gandung mawuwul᷊i l᷊ai. 30Walate tatuwonge hei dingang u gandung sarang tempo ngu manipo. Hindo ia muhabari su taumata ko manipo: Komol᷊i horo apang hei, wukisi, mbuhue tutung. Bou e'e gandunge komol᷊i dang reso su tampae.’ ”
Papinintu watu ngu sawi
(Mrk. 4:30-32; Luk. 13:18-19)
31I Yesus nuwuke ngu l᷊ai simbau papinintu su taumata ko maul᷊i, angkung-E, “Boko Mawu Ruata mamarenta, kakakoae mang musul᷊ung u papinintu i'i: Simbau watu ngu sawi#13:31: sawi: Sawi i'i ko sasuang ko botonge tumuwo range'e patehang manga tilu meteri. nial᷊a u singkatau, bou e'e nisuang su anseri. 32Watu ngu sawi ko simbau bibiti ko kadiokange. Kateho boko seng mul᷊aesi makoa kau ko kal᷊abokange, hakiu manga burung musal᷊ehi su lelange.”
Papinintu ngu ragi
(Luk. 13:20-21)
33Pia l᷊ai simbau papinintu ko wal᷊inge niwuke ngi Yesus su taumata ko maul᷊i. “Boko Mawu Ruata mamarenta, mang musul᷊ung u ragi ko nial᷊a u singkatau kowawine, bou e'e nil᷊au dingang u tapong paupul᷊o su literi sarang nutumuwo kaul᷊ie!”
Nakurawe I Yesus nupake papinintu
(Mrk. 4:33-34)
34Kaul᷊ie nitintiro i Yesus su taumata ko maul᷊i dingang nupake u papinintu. 35#Mzm. 78:2Dingang u e'e nariadi apang ko nihabari u nabi,
“Ia mupake u papinintu boko mudidato dingang i sire;
Ia sarung mangul᷊i hal᷊i ko mborong kawawuni bou tita u karariadi ngu dunia i'i.”
I Yesus nupakal᷊ahe papinintu hal᷊i u hei su tal᷊oara u gandung
36Bou e'e I Yesus nanintang u taumata maul᷊i e'e, nusumu su wal᷊e. Manga tumatuhu-E nusumongo dang nangul᷊i, “Kenangko i Tuang pupakal᷊ahi si kami mangal᷊eng u papinintu hei su tal᷊oara u gandung e'e.”
37I Yesus nusumimbahi, “Taumata ko nanawuhi sasuang mapia e'e ko Ahusi Taumata. 38Anseri e'e ko dunia i'i. Sasuang ko mapia e'e ko manga taumata nakoa umati Mawu Ruata. Hei e'e manga taumata ko su simbuka ngu setang. 39Musu ko nusuang u hei e'e ko setang. Tempo manipo e'e L᷊ou Kiamati, dang mananipo e'e apang malaikati. 40Kere hei nikomol᷊i l᷊au tutungang su putung, kere'e l᷊ai su L᷊ou Kiamati. 41Ahusi Taumata sarung mundoi malaikati-E pangomol᷊i bou tal᷊oara u umati-E apang ko nakakoa taumata nukoa dosa, dang kaul᷊ie taumata ko wal᷊inge ko nukoa ko dal᷊ai. 42I sire kaul᷊ie sarung irume su l᷊al᷊ung u sunggili ko pia putunge karilie; pai se'e i sire sarung mumpal᷊ehe dang mutatahang u siksa. 43Dang manga taumata ko nukoa kao u Mawu Ruata sarung kumerong kere matangutiti su dunia ngu Mawu Ruata ko wuhu, I Yamang i sire. Inau boko pia tul᷊i, daringihe!”
Papinintu kakakala ko mal᷊aambung
44“Boko Mawu Ruata mamarenta, kakakoae mang musul᷊ung u papinintu i'i: Pia kakakala mal᷊aambung su tana ko nikarea u singkatau, bou e'e sau niambunge su tana. Watu'u l᷊iaghi, tau e'e natamai nuwal᷊u apang rarotonge, mbuhue nusul᷊e nul᷊uang tana e'e.”
Papinintu mutiara ko masidada
45“Boko Mawu Ruata mamarenta, kakakoae musul᷊ung u papinintu i'i: Singkatau mudadagang kapundeae apang mutiara ko mal᷊al᷊ighari. 46Suapang i sie nakarea simbau mutiara ko kasidadakenge, i sie masahawu natamai nuwal᷊u apang rarotonge, mbuhue sau nusul᷊e nul᷊uang mutiara simbau e'e.”
Papinintu ngu soma
47“Boko Mawu Ruata mamarenta, kakakoae mang musul᷊ung u papinintu kere soma nipilo su rano, nakasaung haghi ngu kina. 48Suapang napene tahoe, soma e'e niwol᷊eng u mananoma sarang l᷊ul᷊unge. Mbuhue i sire nukumaiang dang nuhae apang kina e'e: Ko mapia nitaho su l᷊al᷊ung u bunsari dang ko dal᷊ai nirume. 49Kere'e kakakoae su L᷊ou Kiamati; manga malaikati sarung muhae ngu taumata ko dal᷊ai bou taumata ko nukoa kao u Mawu Ruata. 50Mbuhue manga taumata ko dal᷊ai e'e irume su sunggili ko kahenange. Su se'e i sire sarung mumpal᷊ehe dang mutatahang u singsara.”
Barang ko wuhu dingang u barang ko tuwei
51“Apa kaul᷊i u tamai e'e seng nikanang i kumu?” kakina I Yesus.
“Nakana, Tuang!” nisimbahi sire.
52I Yesus nangul᷊i, “Ko e'e sabapie manga meteri agama ko seng nakoa umati u Mawu Ruata, musul᷊ung u tataghuang u wal᷊e ko nupasuwang bou pundaresokang u rarotonge barang ko wuhu dingang u barang ko tuwei.”
I Yesus ta nitarima su Nazaret
(Mrk. 6:1-6; Luk. 4:16-30)
53Saritau I Yesus nasue bou nuwuke ngu kaul᷊i u papinintu e'e, I Sie nanintang u tampa e'e, 54bou e'e nusul᷊e sarang wanuange. Pai se'e i Sie nanintiro su wal᷊e pukakal᷊iomanengang, dang manga taumata ko kapundaringihi si Sie se'e kaul᷊ie naherang. I sire nangul᷊i, “Bou apa taumata i'i nakarea titonge kere'e? Bou apa l᷊ai i Sie nakarea kawasa mukoa tatia ko makal᷊aherang? 55I Sie wal᷊ingewe ana i Yusuf base u kau e'e? Wal᷊ingewe i Maria mama-Nge; dang ana u singkatau-E i Yakobus sire ngi Yusuf, i Simon dingang i Yudas? 56Dang wal᷊ingewe manga wawinenge-E natana l᷊ai su si'i? Bou apa i Sie nakarea kaul᷊ie tamai e'e?” 57#Yoh. 4:44Kuteu i sire ta nanarima si Yesus. Bou e'e I Yesus nangul᷊i si sire, “Singkatau nabi adateng su apang tampa, su l᷊ikuru wanuange dang su wal᷊enge sisane.” 58Inau u e'e I Yesus ta nukoa haghi ngu tatia ko makal᷊aherang su se'e watu'u i sire ta nangimang.
Currently Selected:
MATIUS 13: PLT
Highlight
Share
Copy
Want to have your highlights saved across all your devices? Sign up or sign in