MATIUS 12

Kakina hal᷊i u l᷊ou ngu Sabati

(Mrk. 2:23-28; Luk. 6:1-5)

1 # Sau. 23:25 Pia su silou ngu Sabati, su tempo ngi Yesus nusumahe su anseri u gandung, manga tumatuhu-E nanita nanipo wuange, bou e'e nikang i sire watu'u seng nahutung. 2Suapang nikawua ngu tau Farisi, i sire nangul᷊i si Yesus, “Tuhungete manga tumatuhu-U nul᷊umawang atorang u agama ngi kite nukoa ko nilarang su l᷊ou ngu Sabati.”

3 # 1Sam. 21:1-6 I Yesus nusumimbahi, “I kumu mang mborong ta nubasa bou hal᷊i ko nikoa i Daud su tempo ngi sie dingang u taumatange nahutung? 4#Im. 24:9I Sie nusumu su Wal᷊e ngu Mawu; bou e'e nukumang boroti ko l᷊inau nisumba su Mawu Ruata. Boko mutuhu atorang u agama ngi kite, i sie dang l᷊ai taumatange, ta wotonge kumang boroti e'e – kitang u manga imam botonge. 5#Rek. 28:9-10Arako i kumu mang mborong ta nubasa su l᷊al᷊ung u torati Musa himoneu sintinia l᷊ou ngu Sabati manga imam ko kapuhal᷊ie su Wal᷊e ngu Mawu, nul᷊umawang atorang u l᷊ou ngu Sabati, Kateho mang ta nipunsal᷊a? 6Putuhung ko apang Daku niul᷊i i'i; si i mborong pia ko nangilebe l᷊abo bou Wal᷊e ngu Mawu. 7#Hos. 6:6; Mat. 9:13Su l᷊al᷊ung u Buki Susi kawawohe: Daku i kao, ko pukakindaghi wal᷊inge we binatang sasumba. Kiko i kumu tinga-tingari makahingang wisara e'e, nal᷊ahe i kumu ta mupunsal᷊a ngu taumata ko takoae sal᷊ae. 8Watu'u Ahusi Taumata mangawasa l᷊ou ngu Sabati.”

Taumata l᷊imange simbuka ko pepa

(Mrk. 3:1-6; Luk. 6:6-11)

9I Yesus nanintang u tampa e'e, bou e'e nakoa sarang wal᷊e pukakal᷊iomanengang. 10Su se'e pia tau l᷊imange simbuka ko pepa. Pira ngkatau taumata ko mundea pusansal᷊a I Yesus, nukina si Sie, “Apa wotonge mupakaul᷊e ngu taumata su l᷊ou ngu Sabati?”

11 # Luk. 14:5 I Yesus nusumimbahi, “Kiko pia singkatau bou tal᷊oara i kumu pia domba nge simbau, bou e'e su l᷊ou ngu Sabati domba e'e nanawo su l᷊ohange ko mal᷊al᷊ung; apa tataghuang u domba e'e ta mutawakal᷊i muhengke domba e'e bou l᷊al᷊ung u l᷊ohange e'e? 12Taumata nangilembo mahariga bou domba! Boko kere'e, takoae sal᷊ae mutul᷊ung taumata su l᷊ou ngu Sabati.” 13Bou e'e I Yesus nangul᷊i su tau l᷊imange ko pepa e'e, “Ul᷊uhite l᷊imau.”

Tau e'e nangul᷊uhi l᷊imange, dang l᷊imange e'e natoghasi kere l᷊imange simbuka. 14Arawe i sire tau Farisi nanintang u wal᷊e pukakal᷊iomanengang e'e, bou e'e nusingkanaung mamate si Yesus.

Raroi ko nipile ngu Mawu Ruata

15I Yesus matitong i sire tau Farisi pia naung i sire ko dal᷊ai si Sie. I Sie natamai bou tampa e'e dang maul᷊i taumata nutumuhu si Sie. Bou e'e i Sie nupakaul᷊e kaul᷊i u masasaki. 16Kateho i Sie nangul᷊i si sire kumbahang muwawuke ngu hal᷊i i Sie e'e su taumata ko wal᷊inge. 17Ual᷊ingu e'e nariadi apang ko nihabariu u Mawu Ruata bou mohong i Nabi Yesaya.

18 # Yes. 42:1-4 “Ii raroi-Ku ko daku nipile,

Taumata ko Daku ikukindaghi dingang ko nutatahino su naung-Ku.

Roh-Ku sarung Daku i onggo si Sie,

Kal᷊aadili-Ku sarung ihabari-E su kaul᷊i u kawanua.

19I Sie sarung ta murarendehi arako muheang,

arako mamohang su manga l᷊al᷊eng ko l᷊abo.

20Kiaeng ko nawae sarung ta ibareng-E

sol᷊o ko kate l᷊ido henange sarung ta ipateng-E.

I Sie sarung manahusu sarang kal᷊aadili kareakeng;

21Kaul᷊i u kawanua muharapi si Sie.”

I Yesus dang Beelzebul

(Mrk. 3:20-30; Luk. 11:14-23)

22Bou e'e pia singkatau ko wuta mborong l᷊ai bobo, nikasukang u roh ko dal᷊ai niwawa sarang koa I Yesus. I Yesus nupakaul᷊e ngu tau e'e sarang i sie nakapudidato dang nakawua. 23Kaul᷊i u taumata naherang dingang nangul᷊i, “Botonge mariadi i Sie i'i Ahusi Daud ko nipudiandi e'e?”

24 # Mat. 9:34, 10:25 Suapang tau Farisi nakaringihi e'e, i sire nusumimbahi, “Taumata i'i makauseri roh ko dal᷊ai ual᷊ingu Beelzebul pangaha u roh ko dal᷊ai nunggile kawasa si Sie.”

25I Yesus matitong naung u tau Farisi e'e. Kuteu i Sie nangul᷊i si sire: “Boko simbau negara mapahia pirang kamonang ko kapurarokae, negara e'e ta mataeri. Dang soa simbau arako singgetang mutal᷊ei l᷊au musudu simbau dingang ko wal᷊inge sarung maghoghahi. 26Kere'e l᷊ai su kararatuang u setang; boko komol᷊ang simbau manguseri komol᷊ang ko wal᷊inge, kuteu kararatuang u setang napahia dang sarung maghoghahi. 27I kumu mangul᷊i Ia manguseri roh ko dal᷊ai ual᷊ingu kawasang u Beelzebul. Boko kere'e dingang u kawasa ngi sai manga ringangu manguseri roh ko dal᷊ai. Manga ringangu sisane nupakal᷊ahe himoneu i kumu nunsal᷊a! 28Arawe Ia manguseri roh ko dal᷊ai bou kawasa ngu Roh u Mawu Ruata. Dang e'e mangal᷊enge Mawu seng manita nuparenta su tal᷊oara i kumu.

29Kirapa taumata makasu su wal᷊e ngu taumata ko matoghasi guna ngu mamal᷊aho rarotonge, boko i sie ta muhapusi horo taumata ko matoghasi e'e? Mbuhue i sie botonge makapamal᷊aho rarotonge.

30 # Mrk. 9:40 Taumata ko ta manimbuka si Sia, seng nal᷊ahe mundoka si Sia. Dang taumata ko ta musumbala si Sia, nal᷊ahe sarung munggoghahi hal᷊i-Ku! 31Ual᷊ingu e'e, katitongte, boko taumata mubardosa dingang mangul᷊i u l᷊ahinakang,#12:31: mangul᷊i u l᷊ahinakang: arako mangul᷊i u l᷊ahinakang su saruang u Mawu Ruata. i sie mang mborong kaonggol᷊ang u ampunge! Arawe boko i sai muhinakang Roh u Mawu Ruata, i sie seng ta kaampungang! 32#Luk. 12:10Boko taumata mudidato ngu haghi-haghi mundoka Ahusi Taumata, i sie mborong kaonggol᷊ang u ampunge, arawe boko i sie muhinakang Roh u Mawu Ruata, i sie seng ta kaampungang, su orasi i'i kere'e l᷊ai su l᷊ou panginsuenge!”

Kau dingang u Wuange

(Luk. 6:43-45)

33 # Mat. 7:20; Luk. 6:44 “Tadeau makahombang wuange ko mapia, kaunge mambeng matuwo. Boko kaunge ta matuwo, wuange l᷊ai ko dal᷊ai. Tatuwo ngu kau mapia arako dal᷊ai ikakiral᷊ang bou wuange. 34#Mat. 3:7, 15:18, 23:33; Luk. 3:7, 6:45I kumu taumata ko dal᷊ai, kirapa i kumu makaul᷊i manga hal᷊i ko mapia boko i kumu ko dal᷊ai? Apang ko i ul᷊i u mohong, e'e sumuwang bou l᷊al᷊ung u naung! 35Taumata ko mapia mupasuwang u didato bou hal᷊i ko mapia, watu'u i sie napene u ko mapia. Arawe taumata ko dal᷊ai, mupasuwang u didato bou hal᷊i ko dal᷊ai, watu'u i sie napene u ko dal᷊ai.

36Putinaungte; su L᷊ou Kiamati, singkatau-singkatau mambeng sadia sumimbahi suapang didato ngu ko takoae mangal᷊enge. 37Watu'u didato ngu sisane sarung mamonesi, i kau nunsal᷊a arako ta.”

Tau Farisi nundo si Yesus pukoa tatia ko makal᷊aherang

(Mrk. 8:11-12; Luk. 11:29-32)

38 # Mat. 16:1; Mrk. 8:11; Luk. 11:16 Bou e'e pirangkatau meteri agama dingang u tau Farisi nangul᷊i, “Tuang i kami mo mutuhung si Tuang mukoa tatia ko makal᷊aherang.”

39 # Mat. 16:4; Mrk. 8:12 “Wal᷊inge gampang kal᷊al᷊aie dang kadurhakae taumata ngu tempo i'i!” nisimbahi I Yesus. “I kumu mundo Ia pukoa tatia ko makal᷊aherang? I kumu ta ionggol᷊ang u tatia ko makal᷊aherang, su l᷊ikuri tatia ko makal᷊aherang i Nabi Yunus. 40#Yun. 1:17I Yunus nutatahang tilu l᷊ou tilu huwi su l᷊al᷊ung tiang u kina ko l᷊abo. Kere'e l᷊ai Ahusi Taumata sarung mutatahang tilu l᷊ou tilu huwi su l᷊al᷊ung u tana. 41#Yun. 3:5Su L᷊ou Kiamati kawanua ngu Ninewe sarung muwangung dingang u taumata su orasi i'i dang mangantang si sire. Watu'u taumata ngu Ninewe seng nutobati bou dosa ngi sire, su tempo ngi Yunus nunasi si sire. Arawe su si'i su orasi i'i mborong pia ko nangilebe l᷊abo bou i Yunus! 42#1Mar. 10:1-10; 2Taw. 9:1-12Su L᷊ou Kiamati, Ratu bou soa su simbuka ngu Timuhi sarung muwangung dingang u taumata su orasi i'i dang mangantang si sire. Watu'u mundea tadeau sarang makaringihi tintiro ngi Salomo ko pande e'e, Ratu rimal᷊eng kere'e karaunge bou pondol᷊i u dunia. Arawe si'i su orasi i'i pia ko nangilebe l᷊abo bou i Salomo!”

Pusasul᷊e ngu roh ko dal᷊ai

(Luk. 11:24-26)

43“Boko roh ko dal᷊ai manintang u singkatau, roh e'e rumal᷊eng mul᷊iku apang tampa ko mamara, mundea tampa pangindul᷊enge, kateho i sie mang ta nakarea. 44Ual᷊ingu e'e, i sie nangul᷊i, ia sau musul᷊e sarang wal᷊e ko daku nitintang. Su tempo ngi sie nasongo su se'e, wal᷊e e'e seng takoae taunge, mabursi dang mal᷊aatori. 45Bou e'e i sie tamai numbawa si sire pitu roh ko wal᷊inge ko mborong nangilebe dal᷊aie bou i sie. Bou e'e i sire nusumu su taumata e'e, dang natana su se'e. Panginsuenge taumata e'e nakoa nangilebe kal᷊al᷊aie bou horo. E'e l᷊ai sarung mariadi su taumata ko dal᷊ai su orasi i'i.”

Mama ngi Yesus dingang ana u singkatau-E

(Mrk. 3:31-35; Luk. 8:19-21)

46Su tempo ngi Yesus mborong kapudidatonge dingang u taumata maul᷊i, nasongo i mama-Nge dingang u manga ana u singkatau-E. I sire kararisi su l᷊ikuri apiru kapundeae si Sie tadeau makapudidato dingang-E. 47Singkatau bou taumata ko maul᷊i e'e nangul᷊i si Yesus, “Tuang, i mama dingang ana u singkatau ngi Tuang pai su l᷊ikuri. I sire mo mudidato dingang I Tuang.”#12:47: Su l᷊al᷊ung u pira mbau wohe horo takoae ayeti kapaupul᷊opitunge.

48Bou e'e I Yesus nusumimbahi, “Ko i sai i mama-Ku? I sai l᷊ai ana u singkatau-Ku?” 49I Sie nanibo su manga tumatuhu-E dingang nangul᷊i, “Ii i mama-Ku dang ana u singkatau-Ku. 50Taumata ko mukoa kao i Yamang-Ku su sorga, i sie e'e ana u singkatau-Ku ko ese, ana u singkatau-Ku kowawine, dang i mama-Ku.”

Currently Selected:

MATIUS 12: PLT

Highlight

Copy