MALEAKHI 3

1 # Mat. 11:10; Mrk. 1:2; Luk. 1:76, 7:27 Sasimbahi Mawu Ko Makawasa, “Ia sarung mundoho ngu raroi-Ku guna ngu manadia l᷊al᷊eng-Ku. Kuteu singkahuwi u Ia, Mawu ko kahireakeng i kumu, sarung musumongo sarang Wal᷊e-Ku. Raroi-Ku ko kahiampal᷊eng i kumu e'e sarung musumongo dang mamohang pudadiandi-Ku.”

2 # Yl. 2:11; Kl᷊h. 6:17 Kateho i sai makatahang su l᷊ou ngu Mawu musumongo dang mutingkaandaghi u watangeng-E? Watu'u I Sie kere putung u tahapunggora logam, dang kere sabong u tahapangunsa. 3I Sie musumongo guna ngu mamariksa, kere taumata ko mamursi l᷊au munggora sal᷊aka. Kere singkatau kipung munggora wul᷊aeng l᷊au sal᷊aka, ko kere'e l᷊ai raroi u Mawu sarung mupakabursi manga imam tadeau i sire manumba ngu manga korbang dingang u kakanoa ko mutatahino su Mawu. 4Kuteu ko kere'e su tempo horo, Mawu sarung mupahumbang su manga korbang ko isumba ngu umati Yehuda l᷊au Yerusalem si Sie.

5Hengetang u Mawu Ko Makawasa, “Ia sarung musumongo sarang koa i kumu guna ngu mamariksa. Ia sarung maehong makoa saksi su manga tahapul᷊iku mata, manga taumata ko nawuang, ko musaksi l᷊eo, ko ta matul᷊iri su l᷊al᷊ung u mamaehi taumata ko mul᷊ahal᷊i, ko manira ko wawal᷊u, ana ko kasisi, l᷊au tau raghi, su kaul᷊i u taumata ko ta mangadati si Sia.”

Sasumba simbahageang mapul᷊o

6“Ko Ia Mawu, dang Ia ta muwal᷊u. Ual᷊ingu e'e i kumu, hintou ngi Yakub, ta ipakawinasa. 7Kere manga i upung i kumu horo, i kumu kaul᷊ie seng nul᷊enga bou manga tita-Ku dang ta masatia nupal᷊al᷊eng u e'e.

Pusul᷊ete sarang koa-Ku, kuteu Ia l᷊ai sarung musul᷊e sarang koa i kumu. Kateho i kumu nakina, ‘Apa ko mambeng koateng i kami guna ngu musul᷊e sarang koa-U?’ 8Orasi i'i Ia makina si kumu: Apa botonge taumata mangakal᷊i Mawu? Tantu ta. Kateho i kumu nangakal᷊i si Sia l᷊ai. I kumu nakina, ‘Kirapa?’ Sasimbahi-Ku: Su l᷊al᷊ung u hal᷊i mamaehi simbahageang mapul᷊o l᷊au mangonggo sasumba. 9Kaul᷊i u bangsa seng nangakal᷊i si Sia, kuteu i kumu kaul᷊ie nikahino ngu kutoki.

10 # Im. 27:30; Rek. 18:21-24; Sau. 12:6, 14:22-29; Neh. 13:12 Wawako sasumbau simbahageang mapul᷊o kaul᷊ie sarang wal᷊e-Ku tadeau pia kang mapene pai se'e. Sukateko Ia, kuteu i kumu sarung makawua himoneu Ia mamuka manga tukari u sorga dang mupakapene si kumu dingang u apang ko mapapia. 11Ia sarung ta mamala ngu manga binatang mundusa suke ngu tanau; manga kau anggoriu sarung mapene wuange. 12Kuteu i kumu sarung ihabari kaul᷊i u bangsa mal᷊uasi, watu'u wanua ngu makoa tampa ko mapia guna ngu ikatanakeng.”

Mawu Ruata nudiandi ngu kakindaghi

13 Mawu nuhengetang, “Manga didato ngu tingari nuhinakang si Sia.” “Kateho i kumu nakina, ‘Ko apa niul᷊i i kami hal᷊i I Kau?’ 14I kumu nangul᷊i, ‘Takoae mangal᷊enge mutahamawu su Mawu Ruata. Apa gunange mukoa hal᷊i i kite su saruang u Mawu Ko Makawasa, arako manode si Sie himoneu i kite nusisili u pusansal᷊a ngi kite?. 15I kite nakawua sisane himoneu manga taumata ko maoboti mal᷊uasi. Taumata ko dal᷊ai wal᷊inge kitang natamba nakala, kateho boko i sire manuka pusasabari Mawu Ruata dingang mukoa ko dal᷊ai, i sire mal᷊iwiri l᷊ai.’ ”

16Bou e'e manga taumata ko mataku u Mawu nuhabari simbau su ko wal᷊inge. Mawu nundaringihi dang nupandung apa ko nihabari sire. Manga taumata ko mangadati si Sie dang mataku si Sie, niwohe arenge su l᷊al᷊ung u buki simbau ko ene su saruang-E.

17 Mawu Ko Makawasa nuhengetang, “I sire sarung makoa umati-Ku. Su l᷊ou Ia mukumanoa, i sire sarung mariadi koa-Ku ko ikukindaghi. Ia sarung mukumindaghi i sire, kere singkatau iyamang ko mukumindaghi u anae ko maringihi si sie. 18Umati-Ku sarung makawua l᷊ai putatintangenge su tal᷊oara u sisipi taumata ko mapia l᷊au taumata ko dal᷊ai, su tal᷊oara u taumata ko mutahamawu si Sia dingang ko ta.”

Currently Selected:

MALEAKHI 3: PLT

Highlight

Copy