LUKAS 2

Pul᷊ahinding I Yesus

(Mat. 1:18-25)

1Su tempo e'e i Kaisari Agustus nuparenta tadeau kaul᷊i u kawanua ngu kararatuang u Roma pakiwohe arenge guna ngu irekeng. 2Rekenang kahimotongange i'i nikoa su tempo ngi Kirenius nakoa Gubernur su wanua ngu Siria. 3Kaul᷊i u taumata su tempo e'e l᷊awo napul᷊e tadeau pakiwohe arenge su soa ngu simbau – simbau. 4I Yusuf l᷊ai nuwua bou Nazaret su Galilea, nakoa sarang Betlehem su Yudea, tampa i Ratu Daud nipahinding; watu'u i Yusuf hintou ngi Daud. 5I Yusuf nakiwohe arenge dingang i Maria tunangange, ko seng pia kal᷊uwaenge. 6Su tempo i sire su Betlehem nuratingte tempo ngi Maria mahinding. 7I sie nahinding singkatau ana ko ese, ana ko iyakang. Ana e'e nipikung u wal᷊i, bou e'e nipilo su kal᷊omba ko kal᷊aumpahi u rahami; watu'u i sire ta nakarea tampa katikilang.

Gembala dingang u malaikati

8Su huwi e'e pia manga gembala su tampa ko mahumpughi rindulue kapudiagae domba ngi sire, su tampa e'e. 9Singkawua malaikati u Mawu nutingkaandaghi watangenge si sire, dang sinang ko masua bou Mawu nusuminang nupakasua si sire, dang i sire nataku kahingang. 10Kateho malaikati e'e nangul᷊i, “Kumbahang mataku! Watu'u ia sumongo mumbawa habari ko mapia guna ngi kumu, habari ko makal᷊uasi patiku taumata. 11Silou i'i su soa ngi Daud seng nipahinding Ratu Mananal᷊amati si kumu I Kristus, Mawu. 12I'i tatiange: I kumu sarung makahombang singkatau ana ko dio mapapikung u wal᷊i, dang kal᷊al᷊oka su kal᷊omba.”

13Singkawawua malaikati e'e nisongong u ghapang u malaikati ko wal᷊inge, kapundalonge Mawu Ruata. I sire nangul᷊i,

14“Dalo su Mawu Ruata su l᷊angi ko karangetange!

Dang su wawo u dunia, sal᷊amati su taumata ko nakal᷊uasi naung u Mawu!”

15Suapang manga malaikati nanintang i sire dang nusul᷊e sarang sorga, manga gembala e'e nangul᷊i simbau dingang ko wal᷊inge, “Maite i kite makoa sarang Betlehem mutuhung hal᷊i ko seng nariadi e'e, ko nihabariu u Mawu si kite.”

16I sire dingang natamai, bou e'e nusombang i Maria l᷊au i Yusuf dingang ana ko dio e'e ko kal᷊al᷊oka su kal᷊omba.

17Su tempo ngu manga gembala nakawua ana ko dio e'e, i sire nuwuke ngu apang ko nihabari u manga malaikati hal᷊i u ana ko dio e'e. 18Dang kaul᷊i u taumata naherang nakaringihi wuke ngu manga gembala e'e. 19Arawe i Maria nundeso kaul᷊ie e'e su l᷊al᷊ung u naunge dang nisipirie. 20Manga gembala e'e nusul᷊e sarang tampa ko mahumpughi rindulue apiru nundalo l᷊au namantughi Mawu Ruata, ual᷊ingu kaul᷊ie ko nikaringihi l᷊au nikawuang i sire, mang nuhino kere ko nihabari u malaikati.

I Yesus nionggol᷊ang u areng

21 # Im. 12:3; Luk. 1:31 Suapang umurie natimu wal᷊u l᷊ou, ana e'e nisunati. Dang i sire nusigho si sie areng-E I Yesus, areng ko seng nionggo u malaikati si Sie suhoro I Sie su kal᷊uwaeng i mama-Nge.

I Yesus nisarakang su Mawu su Wal᷊e ngu Mawu

22 # Im. 12:6-8 Seng nurating tempo ngi Yusuf sire rua ngi Maria mupal᷊al᷊eng u adati mupakasusi tumuhu atorang i Musa. Inau i sire rua numbawa Ana e'e sarang Yerusalem guna ngu isarakang su Mawu. 23#Sasu. 13:2, 12Ual᷊ingu su l᷊al᷊ung u atorang u Mawu kawawohe kiri'i, “Apang ana ko ese ko iyakang mambeng isarakang su Mawu.” 24I sire rua l᷊ai pia pandung mumbawa sasumba burung tarkuku simpari arako paluma makuda darua, musul᷊ung ko nitantu su l᷊al᷊ung u tita ngu Mawu.

25Su tempo e'e su Yerusalem pia singkatau arenge i Simeon. I sie singkatau ko mapia, ko mataku Mawu Ruata dang tintal᷊a kapangampal᷊i temponge Mawu Ruata manal᷊amati Israel. Roh u Mawu Ruata mahundingang si sie, 26dang Roh u Mawu Ruata seng nangul᷊i si sie uare i sie tangkeng mate suhoro makawua Ratu Mananal᷊amati ko nidiandi ngu Mawu. 27Roh u Mawu Ruata nangaha si Simeon nusumu su Wal᷊e ngu Mawu. Su tempo e'e I Yusuf sire rua ngi Maria numbawa si Yesus, ko mborong ko dio e'e nusumu guna ngu mukoa hal᷊i ko niparenta ngu atorang u agama. 28Kuteu i Simeon nangal᷊a ana e'e dang nisaruru-E, bou e'e nundalo Mawu Ruata,

29“Orasi i'i, Mawu, i kau seng nupakariadi diandi-Ngu

walate l᷊ang-U i'i manintang u dunia dingang purarame

30Watu'u dingang u mataku sisane ia seng nakawua

Mananal᷊amati ko bo I Kau

31Mananal᷊amati e'e seng nisadia-U

guna ngu kaul᷊i u bangsa:

32 # Yes. 42:6, 49:6, 52:10 Musul᷊ung kere sua ko nakasua l᷊al᷊eng u manga bangsa ko wal᷊inge

guna ngu sumongo si Kau;

sua ko makawawa pangangadati

su umati-U Israel.”

33I papa dang i mama ngu Ana e'e naherang nakaringihi apang ko nihabari Simeon hal᷊i u Ana i sire rua. 34I Simeon nangal᷊amati si sire dang nangul᷊i si Maria, i mama ngu Ana e'e, “Ana i'i seng nipile ngu Mawu Ruata guna ngu mupakawinasa dang manal᷊amati maul᷊i tau Israel. I sie sarung makoa tatia bou Mawu Ruata, ko sarung rokateng u taumata maul᷊i, 35dang dingang kere'e nikatitonang tataho u naung i sire. Kasasusa sarung manusu naungu musul᷊ung u pera ko mahoro.”

36Pia l᷊ai singkatau nabi kowawine ko seng maghurang kahingang. Arenge i Hana, ana i Fanuel, bou hintou ngi Asyer. Pitu taung bou nukawing, 37I Hana nawal᷊u, dang i'i umurie seng wal᷊umpul᷊opa su taunge.#2:37: su orasi i'i umurie wal᷊umpul᷊o pa su taunge: arako i sie nawal᷊u seng wal᷊umpul᷊opa su taunge. Ta paghisa i sie nanintang u Wal᷊e ngu Mawu. L᷊ou huwi i sie mutahamawu su Mawu Ruata se'e dingang mukal᷊iomaneng dang mupuasa. 38Nusuma su tempo e'e l᷊ai i sie nusumongo, bou e'e nundalo Mawu Ruata dang nudidato hal᷊i u Ana e'e su kaul᷊i u taumata ko kapangampal᷊i temponge Mawu Ruata mupakal᷊iwiri Yerusalem.

Nusul᷊e Sarang Nazaret

39 # Mat. 2:23 Suapang i Yusuf sire rua ngi Maria seng mbuae nukoa kaul᷊i u apang ko nituntu su l᷊al᷊ung u atorang u Mawu, I sire rua napul᷊e sarang Nazaret su Galilea. 40Ana e'e kal᷊al᷊aboe dang katatoghasi. I Sie ko pande kahingang dang kere'e kal᷊aboe kakindaghi u Mawu Ruata si Sie.

I Yesus su Wal᷊e ngu Mawu

41 # Sasu. 12:1-27; Sau. 16:1-8 Sintinia taunge ghaghurang I Yesus makoa sarang Yerusalem guna ngu musal᷊iwang L᷊ou ngu Paska. 42Dang su tempo I Yesus natimu mapul᷊odua su taunge, i sire nakoa sarang sal᷊iwang e'e kere narang i sire. 43Nasue sal᷊iwang e'e i sire napul᷊e, arawe I Yesus, Ana e'e, mborong natintang su Yerusalem, dang i papa mama-Nge wugha. 44Su naung i sire i sie nutumuhu dingang u taumata maul᷊i. Hindo seng silou kal᷊al᷊enge mbuhue i sire rua nundea si Sie su tal᷊oara u manga ana u simbau dang apang taumata ko matitong i sire. 45Kateho i sire rua ta nakarea si Sie, inau i sire rua sau nusul᷊e sarang Yerusalem nundea si Sie. 46Saritau tilu l᷊ou kapundeae, i sire rua nakahombang si Sie su l᷊al᷊ung u Wal᷊e ngu Mawu. I Sie kakangiang kapundaringihi manga meteri agama dang kapukinae. 47Kaul᷊i u taumata ko nakaringihi si Sie naherang ual᷊ingu manga sasimbahi-E kere'e kahinonge. 48Ghaghurange l᷊ai naherang nakawua si Sie. I mamange nangul᷊i si Sie, “Yamang, nakurawe i Kau nukoa i'i si kami? I kami rua ngi papa-Ngu su ghaghawangeng kapundeae si Kau!”

49I Yesus nusumimbahi, “Nakurawe i papa l᷊au i mama mundea si Sia? Apa i papa l᷊au i mama wugha ko Ia mambeng ene su l᷊al᷊ung u wal᷊e Yamang-Ku?” 50Kateho i sire rua ta nakahingang sasimbahi Yesus.

51Bou e'e I Yesus napul᷊e dingang i sire rua sarang Nazaret, dang nundaringihi si sire rua. Kaul᷊i u hal᷊i e'e nireso i mama-Nge su l᷊al᷊ung u naunge. 52#1Sam. 2:26; Sas. 3:4I Yesus kal᷊al᷊aboe dang kapapandenge, l᷊au nikindaghi u Mawu Ruata dang nikao u taumata.

Currently Selected:

LUKAS 2: PLT

Highlight

Copy