LUKAS 1

Panitakenge

1Teofilus ko mapia,

Seng maul᷊i taumata nutawakal᷊i namohe pakapia hal᷊i u apang ko seng nariadi su tal᷊oara i kite. 2I sire namohe mang musul᷊ung kere ko niwuke si kite bo i sire ko nakawua sisane apang ko nariadi e'e mborong bou titae, dang bou e'e nangeke ngu habari e'e. 3Suapang ia mbuae namariksa maudupi kaul᷊ie e'e bou titae, ia nusipiri mapia boko mamohe simbau buki pakaudupi guna ngi Tuang. 4Ia nukoa e'e, tadeau I Tuang matitong himoneu apang ko mbuae nitintiro si Tuang mang tingari.

Pul᷊ahinding i Yohanes Mananahani nihabari

5 # 1Taw. 24:10 Su tempo ngi Herodes nakoa ratu ngu Yudea,#1:5: Yudea: Didato i'i manibo su kaul᷊i u tana Palestina. pia singkatau imam, arenge i Zakharia. I sie nataho su komol᷊ang u manga imam Abia. Kawinge arenge i Elisabet, l᷊ai bou hintou ngu imam. 6Puwawiahi sire rua singkawingang e'e makal᷊uasi naung u Mawu Ruata. I sire rua tutuhu kaul᷊i u parenta dang tita ngu Mawu dingang kal᷊abo u naung. 7I sire takoae ana, watu'u i Elisabet ko wanto dang i sire rua kaul᷊ie seng maghurang.

8Pia su sil᷊ou, su tempo komol᷊ang i Abia nakarea bahageange, i Zakharia nupal᷊al᷊eng u hal᷊i u imam su saruang u Mawu Ruata 9Dingang u undi, ko narange i koa u manga imam, i Zakharia nikatibo guna ngu sumu su Wal᷊e ngu Mawu l᷊au manutung kamania. 10Tintal᷊a kapanutunge kamania, taumata maul᷊i kapukal᷊iomanenge su l᷊ikuri. 11Su tempo e'e malaikati u Mawu nutingkaandaghi watangenge si Zakharia. Malaikati e'e kararisi su simbuka kuaneng u meda tampa pananutungang u kamania. 12Suapang i Zakharia nakawua Malaikati e'e, i sie nubingo dang nataku. 13Kateho malaikati e'e nangul᷊i, “Kumbahang mataku, Zakharia! Mawu Ruata seng nundaringihi kal᷊iomanengu. Kawingu i Elisabet sarung mahinding simbau ana ko ese. I kau mambeng pusigho arenge i Yohanes. 14I kau sarung mal᷊uasi kahingang dang maul᷊i taumata sarung l᷊umiaghi boko ana e'e seng nipahinding! 15#Rek. 6:3I sie sarung makoa taumata ko l᷊abo tumuhu kao u Mawu, dang i sie sarung ta manginung anggori arako inung makabukang. Bou nipahinding i sie sarung ikawasa ngu Roh u Mawu Ruata. 16Maul᷊i tau Israel sarung ahakenge pusul᷊e su Mawu Ruata, Mawu ngi sire. 17#Mal. 4:5-6I sie sarung makoa raroi u Mawu ko matoghasi l᷊au makawasa kere i Elia. I sie sarung mupurame ngu iyamang dingang ana. Dang taumata ko ta tumatuhu sarung ahakenge sau pusul᷊e su l᷊al᷊ung u sipirang ko mutatahino. Dingang kere'e i sie manadia ngu simbau umati ko seng sadia guna ngu Mawu,”

18“Kirapa ia matitong u hal᷊i i'i sarung mariadi?” Kakina i Zakharia su Malaikati e'e. “Ia seng maghurang, dang kawingku l᷊ai seng maghurang.”

19 # Dan. 8:16, 9:21 Malaikati e'e nusumimbahi, “Ia i'i i Gabriel, ia ko paparentang u Mawu Ruata dang i Sie nundoi si sia puhabari Habari Mapia i'i si kau. 20Apang ko daku ihabari, sarung mariadi su temponge. Kateho ual᷊ing i kau ta mangimang, i kau sarung ta makadidato; i kau sarung makoa ko bobo sarang apa ko daku nihabari i'i mariadi.”

21Tintal᷊a e'e, manga taumata mang kapangampal᷊i si Zakharia. I sire naherang nakurawe i sie mal᷊iwue kahingang su l᷊al᷊ung u Wal᷊e ngu Mawu. 22Dang su tempo ngi sie nusumuwang, i sie seng ta nakapudidato si sire. I sie kitang nangonggo tatia dingang u l᷊imange, dang nabobo turusi. Kuteu i sire l᷊ai seng natitong ko i sie nakawua pia simbau kal᷊al᷊ahe su l᷊al᷊ung u Wal᷊e ngu Mawu.

23Suapang nasue tempo ngu pul᷊ahal᷊ie su Wal᷊e ngu Mawu i Zakharia napul᷊e sarang wal᷊e. 24Ta nal᷊iwue bou e'e i Elisabet kawinge pia kal᷊uwaenge bou e'e nanguhung badange su wal᷊e l᷊ima wul᷊ang l᷊iwuenge. 25I sie nangul᷊i, “Samuringe Mawu nutul᷊ung u ia dang nangumu meaku.”

Pul᷊ahinding I Yesus nihabari

26Su tempo ngi Elisabet seng nungu wul᷊ang pia kal᷊uwaenge, Mawu Ruata nundoi malaikati Gabriel sarang Nazaret simbau soa su Galilea. 27#Mat. 1:18I Gabriel niroi sarang koa u singkatau mahua, arenge i Maria. Dario mahua e'e seng pia tunangange singkatau umbaseng arenge i Yusuf, hintou ngi Ratu Daud. 28Malaikati e'e nusumongo si Maria dang nangul᷊i, “Sal᷊amati, si kau ko seng nial᷊amateng ko kapiange bou Mawu. Mawu mahundingang i kau!”

29Nakaringihi didato ngu malaikati e'e i Maria nahuwi, hakiu nakoa kakina su naunge apa mangal᷊enge adati e'e. 30Kuteu malaikati e'e nangul᷊i si sie, “Kumbahang mataku, Maria, watu'u i kau nutatahino su naung u Mawu Ruata. 31#Mat. 1:21I kau sarung pia kal᷊uwaeng dang sarung mahinding singkatau ana, ko mambeng i kau pusigho arenge I Yesus. 32#2Sam. 7:12, 13, 16; Yes. 9:6I sie sarung mawantughi, dang sarung isigho Ahusi Mawu Ruata Ko Karangetange. Mawu Ruata sarung mukoa si Sie musul᷊ung i Ratu Daud, i upung-E. 33Dang i Sie sarung mamarenta kere Ratu su tal᷊oara hintou ngi Yakub sarang kal᷊iwuange. Kararatuange sarung ta mahupusi.”

34“Kateho ia i'i mborong mahua,” angkung i Maria su malaikati e'e, “Kirapawe hal᷊i e'e wotonge mariadi?”

35Malaikati e'e nusumimbahi, “Roh u Mawu Ruata sarung sumongo si kau, l᷊au kawasa ngu Mawu Ruata sarung manirung si kau. E'e sabapie ana ko sarung ipahinding e'e sarung isigho ko Susi, Ahusi Mawu Ruata. 36Putinaung: I Elisabet, gheu e'e pia kal᷊uwaenge seng nungu wul᷊ang, maning i sie seng maghurang dang taumata mangul᷊i i sie ko wanto. 37#Kar. 18:14Watu'u su Mawu Ruata takoae ko ta mariadi.”

38Bou e'e i Maria nangul᷊i, “Ia i'i l᷊ang u Mawu; kariadite si sia sintuhu ko niul᷊iu.” Bou e'e malaikati e'e natamai nanintang i Maria.

I Maria nutiwo si Elisabet

39Ta mal᷊iwue bou e'e, i Maria nakoa sarang soa simbau su Yudea su wul᷊uri. 40I sie nakoa sarang wal᷊e ngi Zakharia, dang suapang nasu, i sie nangadati si Elisabet. 41Dang kere'e i Elisabet nakaringihi l᷊aadati Maria, ana ko su l᷊al᷊ung u kal᷊uwaeng i Elisabet e'e nukumanoa. Kuteu I Elisabet nikawasa ngu Roh u Mawu Ruata, 42bou e'e nukumiha, “I kau ko seng nial᷊amateng nangilebe bou tal᷊oara u apang kowawine! Kasasal᷊amati su ana ko sarung ipahinding e'e! 43Ko i sai ia hakiu i mama ngu Mawu nusumongo si sia? 44Suapang ia nakaringihi si kau nangonggo u adati, ana su kal᷊uwaengku nukumanoa u l᷊al᷊iaghi. 45Kasasal᷊amati si kau, ual᷊ingu mangimang himoneu apang ko nihabariu u Mawu si kau e'e sarung mariadi!”

Kakal᷊iomaneng tatarima kase i Maria

46 # 1Sam. 2:1-10 I Maria nangul᷊i,

“Naungku mundalo Mawu,

47Dang jiwaku kal᷊iaghi

watu'u Mawu Ruata Mananal᷊amatiku.

48 # 1Sam. 1:11 I sie nakatinaung si sia, l᷊ang-E ko dal᷊ai!

Manita bou tempo i'i kaul᷊i u wanua

muhabari ia su l᷊al᷊ung u kal᷊al᷊uasi.

49Ual᷊ingu Mawu Ruata ko nangilebe Makawasa

nukoa manga hal᷊i ko l᷊abo si sia

Areng-E ipakasusi.

50Pul᷊ahintou sarang pul᷊ahintou

Mawu mang mukumindaghi

su taumata ko mataku i Sie.

51Dingang u l᷊ima-E ko matoghasi

I Sie nuputal᷊ei ngu taumata ko maoboti

dang nundusa kirou ngi sire.

52 # Ayb. 5:11, 12:19 Manga Ratu nipal᷊intu-E bou kararatuange

dang tau ko susa nipakarange-E.

53Taumata ko nahutung nipakal᷊aeri-E dingang u kaul᷊i u kapapia,

ko kala nitokol᷊i dingang u l᷊ima mapul᷊o.

54I Sie mutul᷊ung u Israel l᷊ang-E

tumuhu diandi ko nikoa-E

dingang i upung i kite.

55 # Kar. 17:7 Mawu ta mul᷊iwuhi diandi-Nge

naung-E mal᷊ondo si Abraham

l᷊au hintounge sarang kal᷊iwuenge.”

56Manga tilu wul᷊ang l᷊iwuenge i Maria natana dingang i Elisabet, mbuhue i sie napul᷊e sarang wal᷊enge

Pul᷊ahinding i Yohanes Mananahani

57Seng nurating temponge i Elisabet mahinding. I sie nahinding singkatau ana ko ese. 58Manga l᷊ampung dingang u manga ghe'e nakaringihi kere'e kapiange Mawu Ruata nukoa si Elisabet, i sire nahul᷊uasi dingange.

59 # Im. 12:3 Su tempo umuri ana e'e natimu wal᷊u l᷊ou, i sire nusumongo guna ngu manunati si sie. I sire mo mangonggo arenge ana e'e i Zakharia ituhu su areng i papange, 60Kateho i mamange nangul᷊i, “Ta! I sie mambeng isigho si Yohanes.”

61“Takoae sarang singkatau bou gheu ko pia areng kere'e,” angkung i sire si sie. 62Bou e'e i sire nungonggo tatia si Zakharia, nukina si sie minsang apa areng ko ionggo su ana e'e.

63I Zakharia nundo batulei, bou e'e namohe, “Arenge i Yohanes,” I sire kaul᷊ie naherang. 64Su tempo e'e l᷊ai i Zakharia seng sau nakapudidato dang nundalo Mawu Ruata. 65Manga l᷊ampunge kaul᷊ie nataku, dang habari e'e nakeke su kaul᷊i u tampa su sindihang u wul᷊uri u Yudea. 66Kaul᷊ie ko nakaringihi hal᷊i e'e nukina su naung i sire, “Sarung makoa apa ana e'e mai-mai?” Watu'u Mawu mahundingang i sie.

I Zakharia nuhabari habari bou Mawu

67I Zakharia, i papangu ana e'e, nikawasa ngu Roh u Mawu Ruata hakiu i sie nuhabari tatanata ngu Mawu. I sie nangul᷊i,

68“Maite i kite mundalo Mawu,

Mawu Ruata ngu tau Israel!

I sie seng nusumongo nutul᷊ung umati-E

dang nul᷊iwiri sire. 69I sie nangonggo u mananal᷊amati ko matoghasi si kite

hintou ngi Daud, l᷊ang-E.

70Su tempo horo bou manga nabi ko nipile-E,

Mawu seng nangonggo diandi-E

71Guna ngu mul᷊iwiri kite bou roka i kite

dang bou kawasa ngu manga taumata ko mubinsi i kite.

72Guna ngu mupakal᷊ahe kakindaghi u naung-E su manga i upung i kite,

diandi-Nge ko susi e'e sarung ipakaganapi-E.

73-74I Sie nutewa su tingo ngi Abraham iyamang i kite,

dang nudiandi mul᷊iu ngi kite bou roka i kite,

tadeau i kite ta mataku mutangkiang si Sie.

75Sintinia mutahamawu si Sie

dang mupakal᷊uasi naung-E

su kanandu puwawiahi kite.

76 # Mal. 3:1 I Kau, anaku, sarung isigho nabi ngu Mawu Ruata Ko Karangetange.

I Kau niroi pangihoro Mawu

guna ngu pamuka l᷊al᷊eng-E,

77guna ngu mupakatitong su umati-E i sire sarung ipakasal᷊amati,

boko Mawu Ruata seng nangampung manga dosa ngi sire.

78Mawu ngi kite mal᷊ondo l᷊au makindaghi;

guna ngu manal᷊amati si kite i Sie nusumongo.

Kere matangutiti

nusuminang mal᷊ukari,

79 # Yes. 9:1 kere'e l᷊ai i Sie mangonggo sua-Nge su patiku taumata

ko muwiahi su l᷊al᷊ung u kararundung dang katataku.

I Sie mangaha si kite su l᷊al᷊eng

makoa sarang purarame.”

80Ana i Zakharia e'e mang kal᷊al᷊aboe dang roh nge mang katatoghasi. I sie natana su tana l᷊inggi, sarang nurating temponge i sie mupakal᷊ahe u watangenge su tau Israel.

Currently Selected:

LUKAS 1: PLT

Highlight

Copy