YOHANES 5
5
Kal᷊aul᷊e su rano Betesda
1Bou e'e pia sal᷊iwang u tau Yahudi, kuteu I Yesus natamai nakoa sarang Yerusalem. 2Su Yerusalem masandighi u “Tukari Domba” pia kuaghe simbau,#5:2: masandighi u “Tukari Domba” pia kuaghe simbau: arako masandighi u “Kuaghe u Domba” pia simbau tampa. ko su didato ngu Ibrani isigho “Betesda.”#5:2 Betesda: pira mbau wohe horo: Betzata. Su se'e pia poresi l᷊ima. 3Manga poresi e'e napene u taumata masasaki kal᷊al᷊oka; pia ko wuta, pia ko pengkadi, pia ko kesohi. [I sire kaul᷊ie kapangampal᷊i ake su kuaghe, e'e magholang. 4Watu'u tahaghisa malaikati u Mawu l᷊umintu su l᷊al᷊ung u kuaghe e'e dang munggolang ake e'e. Dang taumata masaki ko kahorokange l᷊umintu su kuaghe e'e su tempo pughagholang u ake sarung maul᷊e bou mutatahang haghi ngu saki.] 5Su tampa e'e pia tau ko ese singkatau ko seng tilumpul᷊owal᷊u su taunge l᷊iwuange masaki. 6I Yesus nakawua i sie kal᷊al᷊oka pai se'e, dang seng matitong himoneu i sie seng mal᷊iwue kahingang masaki; kuteu I Yesus nukina si sie, “Mo i kau maul᷊e?”
7Tau masaki e'e nusumimbahi, “Tuang, takoae taumata si'i ko mupal᷊intu sia sarang l᷊al᷊ung u kuaghe e'e su tempo ngu ake e'e magholang. Dang su tempo ngu ia mbuhue natamai sarang kuaghe e'e, taumata ko wal᷊inge seng nakahoro l᷊umintu.”
8Kuteu I Yesus nangul᷊i si sie, “Wangungte, hengke tupihiu dang l᷊al᷊engte.” 9Singkatempo e'e l᷊ai tau e'e naul᷊e. I sie nuhengke tupihie dang dingang nul᷊umal᷊eng.
Hal᷊i e'e nariadi su l᷊ou ngu Sabati. 10#Neh. 13:19; Yer. 17:21Ual᷊ingu e'e manga mangangawasa ngu tau Yahudi nangul᷊i su taumata ko mbuhue naul᷊e bou saki e'e, “L᷊ou i'i l᷊ou ngu Sabati; i kau ta botonge muhengke tupihi.”
11Kateho tau e'e nusumimbahi, “Taumata ko nupakaul᷊e ngu ia kanini nuparenta si sia puhengke tupihi dang nundoi u ia pal᷊al᷊eng.”
12“I sai I Sie ko nangoro si kau puhengke tupihi l᷊au pal᷊al᷊eng?” Kakina i sire.
13Kateho taumata ko naul᷊e e'e wugha i sai taumata e'e, ual᷊ing I Yesus nailang su tal᷊oara u taumata ko maul᷊i e'e.
14Bou e'e I Yesus nusuma u tau e'e su l᷊al᷊ung u Wal᷊e ngu Mawu; dingang nangul᷊i si sie, “Orasi i'i i kau seng naul᷊e bou sakiu. Kumbahang sau mukoa dosa, tadeau ta kahombangengu hal᷊i ko lebe dal᷊ai.”
15Kuteu tau e'e natamai nurumal᷊eng wuhue nuhabari su manga mangangawasa ngu tau Yahudi himoneu ko nupakaul᷊e si sie e'e ko I Yesus. 16Dang ual᷊ingu e'e i sire nanita nupakasusa ngi Yesus, watu'u I Sie nupakaul᷊e ngu taumata masaki su l᷊ou ngu Sabati.
17Kateho I Yesus nangul᷊i si sire, “I Yamang-Ku kapuhal᷊ie turusi sarang orasi i'i, dang Ia l᷊ai mambeng muhal᷊i.”
18Apang didato e'e kasaunge nakakoa apang manga mangangawasa ngu tau Yahudi mukakal᷊ika mundea l᷊al᷊enge mamate si Sie. E'e koateng i sire, wal᷊inge kitang ual᷊ing I Sie l᷊umawang atorang u agama hal᷊i u l᷊ou ngu Sabati, kateho ual᷊ing I Sie l᷊ai nangul᷊i uare Mawu Ruata e'e ko I Yamang-E; mangal᷊enge I Sie mupusul᷊ung u watangeng-E dingang u Mawu Ruata.
Kawasa ngu Ana
19I Yesus nusumimbahi kiri'i su manga taumata e'e, “Pangimangte Ana ta makakoa manga apa dingang u kawasange sisane. I Sie kitang mukoa apang ko nikawua-E, watu'u ko koateng I Yamang, e'e l᷊ai koateng u Ana. 20Watu'u I Yamang kumindaghi u Ana ringang mupatode u kaul᷊ie si Sie apa ko seng nikoa-E sisane. Katewe I Yamang sarung l᷊ai mupatode si Sie hal᷊i ko napal᷊iu l᷊abo, hakiu i kumu maherang. 21I Yamang e'e mupuwangung u taumata ko nate, l᷊au mangonggo u puwawiahi ko kahingang dang ko kakal si sire; kere'e l᷊ai Ana mangonggo u puwawiahi kakal su taumata ko mo ionggol᷊ang-E puwawiahi. 22I Yamang sisane ta muhukung si sai-sai. Kaul᷊i u kawasa muhukung seng nisarakang su Ahus-E. 23I Yamang nukoa e'e, tadeau apang taumata kaul᷊ie mangadati Ana kere i sire mangadati si Yamang. Taumata ko ta mangadati Ana ta mangadati l᷊ai si Yamang ko nundoi u Ana.
24Tinga-tingari apang didato-Ku i'i: Taumata ko musumpi u manga didato-Ku, dang mangimang si Sie ko nundoi si Sia, pia puwawiahi ko kahingang dang ko kakal. I sie sarung ta ihukung; i sie nal᷊iu bou papate dang makahombang puwawiahi. 25Pangimangte: Sarung sumongo temponge dang – seng nurating temponge – taumata ko nate sarung makaringihi tingihi Ahusi Mawu Ruata. Dang taumata ko makaringihi e'e sarung muwiahi. 26Musul᷊ung I Yamang sisane ko pung u puwawiahi, I Sie nukoa Ahus-E l᷊ai pung u puwawiahi. 27I Sie seng nangonggo su Ahus-E e'e haki guna ngu muhukung, watu'u I Sie ko Ahusi Taumata. 28I kumu kumbahang maherang makaringihi hal᷊i i'i, watu'u sarung sumongo temponge himoneu apang taumata ko seng nate makaringihi tingihi-E, 29#Dan. 12:2bou e'e sumuwang bou l᷊al᷊ung u kubul᷊i. Taumata ko seng nukoa ko mapia sarung muwangung guna ngu muwiahi. Arawe taumata ko nukoa ko dal᷊ai sarung muwangung tadeau ihukung.”
Kal᷊al᷊ahe u hal᷊i I Yesus
30“Ia ta makakoa manga apa bou kao-Ku sisane. Ia kitang muhukung tumuhu apang ko niparenta ngu Mawu Ruata. Dang putusang-Ku ko adili, watu'u Ia ta mukoa tumuhu kaoku sisane, kateho kao I Yamang ko nundoi u Ia.
31Boko andenge ia mangonggo kasaksiang hal᷊i u watangengku sisane, kasaksiang e'e ta ipangimaneng. 32Kateho pia taumata ko wal᷊inge musaksi ngu Ia, dang Ia matitong kasaksiange e'e tingari. 33#Yoh. 1:19-27, 3:27-30I kumu seng nundoi u taumata patamai sarang koa i Yohanes, dang i sie nangonggo u kasaksiang ko tingari bou hal᷊i u Ia. 34Ia muhabari hal᷊i i'i, wal᷊inge ual᷊ingu ia mundea kasaksiang bou taumata; kateho tadeau i kumu ipakasal᷊amati. 35I Yohanes e'e musul᷊ung kere sol᷊o ko kahenange dang mupasinang u suange. Su l᷊al᷊ung u singkodo tempo i kumu l᷊umiaghi manarima u kasasuange e'e. 36Arawe kasaksiang-Ku lebe l᷊abo bou kasaksiang i Yohanes. Apang daku koateng su orasi i'i, e'e ko hal᷊i niparentang I Yamang si sia, mupakal᷊ahe himoneu I Yamang seng nundoi u Ia. 37#Mat. 3:17; Mrk. 1:11; Luk. 3:22Dang Yamang ko seng nundoi u Ia, seng nusaksi ngu Ia l᷊ai. I kumu mborong ta nakaringihi tingihi-E arako nakawua ghahi-E 38Apang didato-Nge ta nireso su l᷊al᷊ung u naung i kumu watu'u i kumu ta mangimang si Sia ko niroi-E. 39I kumu nangundung Buki Susi watu'u i kumu manika ual᷊ingu e'e i kumu managhuang puwawiahi ko kahingang dang ko kakal. Dang Buki Susi sisane e'e nangonggo kasaksiang hal᷊i u Ia. 40Kateho i kumu mandiri sumongo sarang koa-Ku tadeau makahombang puwawiahi ko kakal.
41Ia ta mundea dadalo bou taumata. 42Ia makakil᷊al᷊a si kumu. Ia matitong i kumu ta kumindaghi u Mawu Ruata su l᷊al᷊ung u naung i kumu. 43Ia nusumongo dingang u kawasa ngi Yamang-Ku, kateho i kumu ta manarima u Ia. Arawe boko taumata ko wal᷊inge nusumongo dingang u kawasange sisane, i kumu mo manarima i sie. 44Kirapawe i kumu makapangimang, boko i kumu mundea dadalo bou sinsul᷊ungu, dang ta mutatitehi mundea dadalo bou Mawu Ruata ko mang simbau? 45Kumbahang manika u Ia mo mupunsal᷊a ngi kumu e'e su saruang I Yamang. Arawe ko sarung mupunsal᷊a ngi kumu ko i Musa, i sie puharapeng i kumu. 46Boko andenge i kumu mangimang si Musa, i kumu mangimang si Sia, ual᷊ing i sie namohe hal᷊i u Ia. 47Arawe boko i kumu ta mangimang su ko niwohe i Musa, kirapawe i kumu makapangimang apang ko Daku iul᷊i?”
Currently Selected:
YOHANES 5: PLT
Highlight
Share
Copy
Want to have your highlights saved across all your devices? Sign up or sign in
