YOHANES 6

I Yesus nupakang taumata l᷊imahiwu su kataunge

(Mat. 14:13-21; Mrk. 6:30-44; Luk. 9:10-17)

1Pira ngkatempo bou e'e I Yesus natamai sarang simbuka ngu rano Galilea, ko nisigho l᷊ai rano Tiberias. 2Su sasongoe pai se'e, maul᷊i taumata nutumuhu si Sie, watu'u i sire seng mbuae nakawua kaul᷊i u ko makal᷊aherang ko nikoa-E su hal᷊i u mupakaul᷊e ngu manga taumata masaki. 3I Yesus natarai nusumaka sarang wul᷊uri, bou e'e nukumangiang rasi se'e dingang u manga tumatuhu-E. 4Tempo e'e seng masandighi L᷊ou ngu Paska ngu Yahudi 5Su tempo ngi Yesus katuhunge tamai-mai su sindihang-E, I Sie nakawua taumata maul᷊i-ul᷊i nutumuhu sarang koa-E. Kuteu I Sie nangul᷊i si Filipus, “Su apa i kite makarea pul᷊uangeng kang tadeau kaul᷊i u taumata i'i makakang?” (6I Yesus seng matitong apa ko sarung koateng-E, katewe I Sie nangul᷊i kere'e watu'u I Sie mo manuka si Filipus)

7I Filipus nusumimbahi, “Boroti hariga ngu duahasu doi sal᷊aka#6:7: doi sal᷊aka: Doi sal᷊aka simbau ko wawaehi silou su singkatau mul᷊ahal᷊i: (putuhung Mat. 20:2) sarung ta makataung su manga taumata i'i, maning singkatau kitang makarea pusingkodo.”

8I Andreas singkatau tumatuhu I Yesus ko wal᷊inge, ko ana u singkatau ngi Simon Petrus nangul᷊i, 9“Su si'i pia ana ko ese dingang u boroti l᷊ima mbau l᷊au kina dua mbua. Kateho apa mangal᷊enge e'e su taumata kere i'i kaul᷊ie?”

10I Yesus nangul᷊i, “Roiko apang taumata e'e pakangiang,” Su tampa e'e napene u rindulu, inau manga taumata e'e nukumangiang su rindulu – kaul᷊ie patehang pia ko manga l᷊imahiwu su kataunge ko ese. 11Bou e'e I Yesus nangal᷊a boroti e'e, wuhue nutarimakase su Mawu Ruata. Bou e'e I Sie namahia u boroti e'e su taumata maul᷊i. Bou e'e I Sie namahia u kina e'e, dang i sire nukumang sarang nasahe-sahe. 12Suapang kaul᷊ie nukumang sarang nal᷊aeri, I Yesus nangul᷊i su manga tumatuhu-E, “Komol᷊iko l᷊umbei ngu kang e'e; kumbahang sarang pia ko magholo.” 13Bou e'e i sire nangomol᷊i l᷊umbeinge mborong mapul᷊odua su wawewekang napene bou l᷊ima mbau ko nikang u taumata ko maul᷊i e'e.

14Suapang taumata maul᷊i e'e nakawua kal᷊aherang ko nikoa I Yesus, i sire nangul᷊i, “Mang tingari i'i nabi#6:14: Nabi: Putuhung 1:21.ko l᷊uharapeng sumongo su dunia!” 15I Yesus matitong i sire sumongo manihasa si Sie pakakoa ratu ngi sire. Watu'u e'e I Sie tamai nutingkaghea nakoa sarang wul᷊uri.

I Yesus nul᷊umal᷊eng su wawo u ake

(Mat. 14:22-23; Mrk. 6:45-52)

16Suapang seng kal᷊ahuwinge manga tumatuhu I Yesus natanae sarang rano. 17Bou e'e i sire nusumake sakaeng nul᷊imiu rano e'e makoa sarang Kapernaum. L᷊ou seng masunaughi kateho I Yesus mang tarie nasongo sarang koa i sire. 18Tintal᷊a e'e rano seng manita muwawuntal᷊i ual᷊ingu kasikile anging. 19Seng kasakaenge patehang l᷊ima arako nungu kilo su meteri raunge i sire nakawua I Yesus kasandighi sakaeng kal᷊al᷊enge su wawo u ake. I sire nataku kahingang. 20Arawe I Yesus nangul᷊i si sire, “Ariwe kataku, Ia i'i!” 21Bou e'e dingang u l᷊iaghi i sire nupasake ngi Sie su l᷊al᷊ung u sakaeng, dang su tempo e'e l᷊ai sakaeng i sire nawuna su tampa ko kal᷊ol᷊ongang i sire.

Manga taumata nundea si Yesus

22Ndai nal᷊ou taumata maul᷊i ko natintang su simbuka ngu rano, mbuhue natitong himoneu horo kitang pia sakaeng singgisa su se'e. I sire matitong manga tumatuhu I Yesus seng nuwua su sakaeng e'e, arawe I Yesus ta nutumuhu. 23Bou e'e sakaeng pirang gisa bou soa ngu Tiberias nasongo dang namal᷊ango su sindihang u tampa u taumata maul᷊i e'e nukumang boroti suapang Mawu mbuae nuputarimakase. 24Su tempo taumata maul᷊i e'e nakawua himoneu maneng I Yesus dang l᷊ai manga tumatuhu-E seng tarie'e su se'e, i sire l᷊ai nusumake sakaeng e'e dingang natamai nakoa sarang Kapernaum mundea si Yesus.

Yesus, boroti ko nangonggo u puwawiahi

25Suapang i sire manga taumata e'e nusuma si Yesus su simbuka ngu rano, i sire nukina si Sie, “Tuang Guru kangereng I Tuang nurating u i'i?”

26I Yesus nusumimbahi, “Tingari, i kumu kapundeae si Sia wal᷊ingewe i kumu seng nakahingang mangal᷊eng u ko makal᷊aherang ko Daku nikoa, kateho ual᷊ing i kumu mbuae nukumang sarang nal᷊aeri. 27Kumbahang muhal᷊i guna ngu mundea kang ko masue dang mal᷊al᷊ai. Puhal᷊ie guna ngu mundea kang ko ta mabuhu dang ko mangonggo u puwawiahi ko kahingang dang ko kakal. Kang e'e sarung inggile u Ahusi Taumata si kumu, watu'u I Sie seng nihengke u Mawu Ruata I Yamang.”

28Bou e'e i sire nukina si Sie, “Apa hinonge koateng i kami tadeau mukoa kao u Mawu Ruata?”

29I Yesus nusumimbahi, “Ko ikao u Mawu Ruata bo i kumu; pangimangte si Sie ko niroi u Mawu Ruata.”

30“Boko kere'e,” angkung i sire, “Apa tatiange ko ikaonggo I Tuang tadeau i kami makawua dang mangimang si Tuang? Apa ko koateng I Tuang? 31#Sasu. 16:4, 15; Mzm. 78:24I upung i kami#6:31: I kami: arako i kite.nukumang manna su tana l᷊inggi, kere kawawohe su l᷊al᷊ung u Buki Susi, ‘I Sie nunggile u kang boroti si sire bou sorga.’ ”

32Bou e'e I Yesus nangul᷊i si sire, pangimangte, “Wal᷊inge i Musa, kateho I Yamang-Ku ko nunggile si kumu#6:32: Wal᷊inge i Musa … si kumu: arako apang ko nionggo i Musa si kumu wal᷊inge. boroti e'e ko tingari bou sorga. 33Watu'u boroti ko nionggo u Mawu Ruata e'e ko I Sie ko seng nul᷊umintu bou sorga dang nangonggo u puwawiahiu taumata su dunia.”

34I sire nangul᷊i, “Tuang” Onggoko sintinia si kami boroti e'e.

35I Yesus nangul᷊i si sire, “Ko Ia boroti ko makaonggo puwawiahi. Taumata ko sumongo sarang koa-Ku seng ta sau mahutung sarang kal᷊iwuenge. Dang taumata ko mangimang si Sia seng ta marou sarang kal᷊iwuenge.

36Arawe musul᷊ung kere ko seng Daku nihabari si kumu, maneng i kumu seng mbuae nakawua si Sia, i kumu mang ta mangimang. 37Kaul᷊i u taumata ko nisarakang I Yamang si Sia sarung sumongo sarang koa-Ku. Ia ta manolaki. I sai ko sarung sumongo sarang koa-Ku. 38Watu'u Ia nul᷊umintu bou sorga, wal᷊ingewe tadeau mukoa kao-Ku sisane, kateho ko kao I Sie ko nundoi u Ia. 39Dang ko i'i kao I Sie ko nundoi u Ia: tadeau bou kaul᷊i u taumata ko seng nionggo si Sia, takoae sarang simbau ko mailang; kateho tadeau Ia mupuwangung i sire su L᷊ou Kiamati. 40Mang tingari ko i'i kao I Yamang-Ku: tadeau kaul᷊i u apang ko nakawua Ahusi e'e l᷊au mangimang si Sie pia puwawiahi ko kahingang dang ko kakal, dang sau Daku ipuwiahi su L᷊ou Kiamati.”

41Manga taumata ngu Yahudi nanita nukarubu si Yesus, watu'u I Sie nangul᷊i, “Ia boroti ko nul᷊umintu bou sorga.” 42I Sire nangul᷊i, “I Sie i'i wal᷊ingewe I Yesus, ana i Yusuf? I kami matitong i mama papa-Nge! Kirapawe I Sie botonge nangul᷊i I Sie nul᷊umintu bou sorga?”

43Bou e'e I Yesus nangul᷊i si sire, “Kumbahang mukarubu. 44Takoae sarang singkatau ko makasongo sarang koa-Ku, boko I Yamang ko nundoi u Ia, ta mumbawa si sie sarang koa-Ku; dang i sai ko sumongo, sarung Daku ipuwangung su L᷊ou Kiamati. 45#Yes. 54:13Su l᷊al᷊ung u Buki u manga nabi pia mawawohe kiri'i: ‘Kaul᷊i u taumata sarung tintirong u Mawu Ruata.’ Inau apang taumata ko mundaringihi si Yamang dang mangundung bo I Sie, sumongo sarang koa-Ku. 46Mangal᷊enge e'e wal᷊ingewe ko seng pia taumata mbuae nakawua si Yamang. Kitang I Sie ko nusumongo bou Mawu Ruata, seng nakawua si Yamang.

47Katitongte: taumata ko mangimang, pia puwawiahi ko kahingang dang ko kakal. 48Ia i'i boroti ko mangonggo u puwawiahi. 49I upung i kumu nukumang manna su tana l᷊inggi dang i sire mang l᷊ai nate. 50Kateho su boroti ko bou sorga wal᷊ingewe kere'e; taumata ko kumang boroti e'e seng ta sarung mate. 51Ia i'i boroti ko nul᷊umintu bou sorga – boroti ko mangonggo u puwawiahi. Taumata ko kumang boroti e'e i sie sarung muwiahi sarang kal᷊iwuenge. Boroti ko Daku ionggo guna ngu puwawiahiu taumata su dunia e'e ko ghisi-Ku.”

52Manga taumata ngu Yahudi ko nakaringihi e'e nurarendehi i sire l᷊au i sire, “Kirapa su taumata i'i I Sie mangonggo u ghisi-Nge tadeau pakikang si kite?” angkung i sire.

53Bou e'e I Yesus nangul᷊i si sire, “Pangimangte: boko i kumu ta kumang ghisi ngu Ahusi Taumata dang ta manginung daha-E, i kumu ta sarung tinga-tingari muwiahi. 54Taumata ko kumang bou ghisi-Ku dang manginung daha-Ku kuteu si Sie pia puwawiahi ko kahingang dang ko kakal dang Ia sarung mupuwangung i sie su L᷊ou Kiamati. 55Watu'u ghisi-Ku ko tingari kang, dang daha-Ku e'e ko tingari inung. 56Taumata ko kumang bou ghisi-Ku dang manginung daha-Ku, i sie sarung tatapi masimbau dingang-Ku, dang Ia dingange. 57I Yamang ko wiahi e'e nundoi u Ia dang Ia l᷊ai muwiahi bo I Yamang. Kere'e l᷊ai taumata ko kumang ghisi-Ku sarung muwiahi bou Ia. 58I'i ko boroti nul᷊umintu bou sorga; wal᷊inge kere boroti ko seng nikang i upung i kumu. Watu'u bou kumang boroti e'e, i sire mang l᷊ai nate. Arawe taumata ko kumang boroti i'i sarung muwiahi sarang kal᷊iwuenge.”

59Kaul᷊i u e'e niul᷊i I Yesus su tempo I Sie kapanintironge su l᷊al᷊ung u wal᷊e pukakal᷊iomanengang su Kapernaum.

Manga didato ko mangonggo u puwawiahi ko kahingang dang ko kakal

60Suapang seng nakaringihi apang didato ngi Yesus e'e, maul᷊i bou tal᷊oara i sire manga tumatuhu-E nangul᷊i, “Tatintiro i'i tumaniu mabuha. I sai ko botonge makatarima e'e!”

61I Yesus sisane seng matitong u manga tumatuhu-E kapukarubue hal᷊i e'e. Kuteu I Sie nangul᷊i, “Apa i kumu nupundang ual᷊ingu manga didato e'e? 62Kirapa kakakoae boko i kumu sarung makawua Ahusi Taumata sau mahengke sarang tampa-E ko horo? 63Ko makapuwiahi taumata e'e ko Roh u Mawu Ruata. Katatoghasi u taumata takoae mangal᷊enge. Manga didato ko Daku ipudidato si kumu i'i e'e ko didato ngu Roh u Mawu Ruata dang manga didato ko munggile u puwawiahi. 64Kateho mang pia l᷊ai su tal᷊oara i kumu ko ta mangimang.” (I Yesus seng matitong mborong bou titae i sai-sai ko mandi mangimang si Sie, dang i sai ko sarung musingking si Sie). 65Bou e'e I Yesus sau nangul᷊i, “E'e sabapie Ia muhabari si kumu himoneu takoae sarang singkatau makasongo sarang koa-Ku boko i sie ta ipakawala ngi Yamang.”

66Nanita bou orasi e'e maul᷊i tumatuhu-E nanintang I Sie, dang seng mandiri sau tumuhu si Sie. 67Bou e'e I Yesus nukina su manga tumatuhu-E mapul᷊odua, “Apa i kumu l᷊ai mo manintang u Ia?”

68 # Mat. 16:16; Mrk. 8:29; Luk. 9:20 I Simon Petrus nangul᷊i si Sie, “Mawu sarang koa i sai tamaing i kami? Didato ngu Mawu mangonggo u puwawiahi ko kahingang dingang ko kakal. 69I kami seng mangimang dang mangaking himoneu I Kau Mawu ko raroi ko susi bou Mawu Ruata.”

70I Yesus nusumimbahi, “Wal᷊ingewe Ia seng namile si kumu mapul᷊odua i'i? Kateho singkatau bou tal᷊oara i kumu e'e ko setang!” 71Pandung I Yesus ko i Yudas ana i Simon Iskariot. Watu'u maneng i Yudas singkatau bo i sire mapul᷊odua tumatuhu I Yesus, i sie sarung musingking si Yesus.

Currently Selected:

YOHANES 6: PLT

Highlight

Copy