KARARIADI 17

Sunati kere tatia pudadiandi

1Su tempo ngi Abram umurie siompul᷊osio su taunge, Mawu nutingkaandaghi watangeng-E si sie dang nuhengetang, “Ia Mawu Ruata ko Tumaniu Makawasa. Pundaringihi si Sia dang koa sintinia kao-Ku. 2Ia sarung mangiki pudadiandi dingangu dang mangonggo si kau hintou ko maul᷊i.” 3Bou e'e i Abram nusuba, mbuhue Mawu Ruata nuhengetang, 4-5#Rm. 4:17 “i'i pudadiandi ko Daku nikoa dingangu: Ia mudiandi himoneu i kau sarung makoa i upung u haghi ngu bangsa. Ual᷊ing u e'e areng u wal᷊inge l᷊ai i Abram, kateho i Abraham. #17:4-5: I Abraham: Areng i'i su wahasa ngu Ibrani raringihang kere didato ko mangal᷊enge: “I upung u patiku bangsa”. 6Ia sarung mangonggo ana pung maul᷊i si kau, dang bou tal᷊oara i sire sarung pia ko makoa manga ratu. Hintou ngu sarung kere'e kaul᷊ie, hakiu i sire sarung makoa haghi ngu bangsa.

7 # Luk. 1:55 Ia sarung mungganapi diandi-Ku si kau, dang su hintou ngu, mul᷊al᷊ahaweng, dang pudadiandi-Ku e'e ko sarang kal᷊iwuenge. Ia sarung makoa Mawu Ruata ngu dang Mawu Ruata ngu hintou ngu. 8#Wuk. 7:5Ia sarung mangonggo si kau dang su hintou ngu, tana i'i, ko su orasi i'i nikatanakeng u kere tau raghi. Kal᷊abo u tana Kanaan sarung mariadi koa u ana pung u sarang kal᷊iwuenge, dang Ia sarung makoa Mawu Ruata ngi sire.”

9Mawu Ruata sau nuhengetang si Abraham, “I kau l᷊ai mambeng pakasatia su pudadiandi i'i, mbaeng i kau arako l᷊ai hintou ngu mul᷊al᷊ahaweng. 10I kau l᷊au kaul᷊i u hintou ngu kol᷊aese mambeng pakisunati.#Wuk. 7:8; Rm. 4:11 11-12Manita bou orasi i'i i kau mambeng panunati dario ko ese ko dadio ko umurie wal᷊u l᷊ou, nasu manga l᷊ang ko nipahinding su Wal᷊e ngu arako ko nil᷊uangeng u. Sunati e'e sarung makoa tatia bou pudadiandi su tal᷊oara u Ia l᷊au i kumu. 13Apang taumata mambeng pakisunati, dang e'e sarung makoa tatia ko ikawua ko mupakal᷊ahe himoneu pudadiandi-Ku dingang u e'e ko sarang kal᷊iwuenge. 14Apang ko ese ko ta nisunati ta irekeng kere tataho u umati-Ku ual᷊ing u i sie ta nuhinggo su pudadiandi e'e.”

15Bou e'e Mawu Ruata nuhengetang si Abraham, “I kau kumbahang l᷊ai mukui kawingu i Sarai; manita bou orasi i'i arenge i Sara. 16Ia sarung mangal᷊amati si sie dang i sie sarung mahinding singkatau ana ko ese ko sarung Daku ionggo si kau. Ore, Ia sarung mangal᷊amati si Sara, dang i sie sarung makoa i upung kowawine patiku bangsa. Bou tal᷊oara u hintounge sarung pia ko makoa manga ratu.”

17Bou e'e i Abraham nusuba, kateho i sie nul᷊umighei su tempo ngu nusipiri, “Maniewe singkatau ko ese ko umurie seng mahasu su taunge mborong makahombang ana? Maniewe i Sara mahinding su umuri siompul᷊o su taunge?” 18Mbuhue i sie nudidato su Mawu Ruata, “Mapiang we i Ismael sisane makoa mul᷊al᷊ahinggo pusakaku.”

19Kateho Mawu Ruata nuhengetang, “Ta, i Sara kawingu sarung mahinding singkatau ana ko ese dang i kau sarung musigho si sie i Ishak.#17:19: I Ishak: Areng i'i su wahasa ngu Ibrani mangal᷊enge: “I sie kal᷊igheinge”. Ia tatapi satia su pudadiandi-Ku dingang u ana e'e l᷊au dingang u hintounge sarang kal᷊iwuenge. 20Kateho Ia manarima l᷊ai ndo u hal᷊i i Ismael. Ual᷊ingu e'e i sie sarung Daku al᷊amating dang Daku onggol᷊ang hintou pakaul᷊i. I sie sarung makoa i upung u tumbonang u suku mapul᷊odua, dang hintounge sarung Daku i koa simbau bangsa ko l᷊abo. 21Arawe pudadiandi-Ku sarung Daku ikitang dingang i Ishak, ana u ko sarung ipahinding i Sara, taung mai e'e pari su tempo kere i'i.” 22Suapang nasue nuhabari kere'e, Mawu Ruata nanintang i Abraham.

23Su l᷊ou e'e l᷊ai, i Abraham nutumuhu parenta ngu Mawu Ruata nanunati si Ismael anae, dang kaul᷊i u taumata ko ese su wal᷊enge, nasu manga l᷊ang ko nipahinding su wal᷊enge arako ko nil᷊uangenge. 24I Abraham umurie siompul᷊osio su taunge su tempo ngu i sie nisunati 25dang i Ismael anae, umurie mapul᷊otilu su taunge. 26I sire nisunati su l᷊ou ko musul᷊ung, 27singkahindo dingang u kaul᷊i u l᷊ang i Abraham.

Currently Selected:

KARARIADI 17: PLT

Highlight

Copy