WUKE NGU MANGA RASULI 15

Komol᷊ang su Yerusalem

1 # Im. 12:3 Pia taumata pirangkatau bou Yudea nusumongo su Antiokhia dang nanintiro manga taumata ko mangimang su Antiokhia e'e uare boko i sire ta isunati tumuhu atorang i Musa i sire ta masal᷊amati. 2I Paulus l᷊au i Barnabas nundoka kahingang tintiro ngu manga taumata e'e. Panginsuenge nitantu i sire tadeau i Paulus dingang i Barnabas l᷊au pirangkatau taumata bou Antiokhia patamai sarang Yerusalem guna ngu mudidato ngu hal᷊i e'e dingang u manga rasuli dang manga pangaha pai se'e.

3Jamaati su Antiokhia nangunturi si sire sarang l᷊ikuru soa, bou e'e i sire nul᷊umal᷊eng nul᷊umiu Fenisia l᷊au Samaria. Pai se'e i sire nuwuke ngu kirapa manga taumata ko wal᷊inge tau Yahudi ko seng nanarakang u watangeng i sire su Mawu Ruata. Habari e'e tinga-tingari nakal᷊uasi manga taumata ko mangimang su se'e. 4Suapang i sire nurating u Yerusalem, i sire nisomaheng u jamaati dingang u manga rasuli l᷊au u manga pangaha kere'e kapiange. Bou e'e i sire nuwuke su manga taumata e'e kaul᷊ie ko seng nikoa u Mawu Ruata si sire. 5Kateho pia pirangkatau taumata ngu Farisi ko seng nangimang, nurumarisi dang nangul᷊i, “Manga taumata bou bangsa ko wal᷊inge ko seng nangimang e'e mambeng pakisunati dang mambeng putuhu atorang i Musa.”

6Bou e'e manga rasuli dang manga pangaha nukomol᷊i guna ngu mudidato ngu hal᷊i e'e. 7#Wuk. 10:1-43Mal᷊iwue kahingang i sire nutatukari sipirang. Panginsuenge I Petrus nurumarisi dang nangul᷊i, “Manga ana u simbau, i kumu kaul᷊ie seng matitong su tempo nal᷊iu Mawu Ruata seng namile si sia bou tal᷊oara i kumu guna ngu muhabari Habari Mapia e'e su manga taumata ko wal᷊inge tau Yahudi, tadeau i sire l᷊ai makaringihi dang mangimang. 8#Wuk. 2:4, 10:44Dang Mawu Ruata ko matitong u naung u taumata seng nanibo himoneu I Sie nanarima i sire; I Sie nanibo hal᷊i e'e dingang nangonggo si sire Roh u Mawu Ruata musul᷊ung kere ko seng nionggo-E l᷊ai si kite. 9Mawu Ruata ta nupakahae ngi kite dingang i sire. I Sie nupakasusi naung i sire, watu'u i sire nangimang. 10Inau, nakurawe i kumu mo l᷊umawang Mawu Ruata su orasi i'i dingang mangonggo wawaneng ko mabuha su manga tumatuhu i'i, sumbal᷊i i upung i kite l᷊au i kite l᷊ai ta makakoa e'e? 11Sul᷊enge, i kite mangimang dang nipakasal᷊amati ual᷊ingu kakindaghi u Mawu Yesus; kere'e l᷊ai i sire.”

12Kuteu kaul᷊i u taumata ko nukomol᷊i su se'e turusi narumasi. Bou e'e i sire nundaringihi si Barnabas l᷊au i Paulus sau nuwuke ngu kaul᷊i u ko makal᷊aherang l᷊au manga hal᷊i ko takoae sihinge ko seng nikoa u Mawu Ruata bou pul᷊ahal᷊i i sire rua su tal᷊oara u manga bangsa ko wal᷊inge, ko su l᷊ikuri tau Yahudi. 13Suapang i sire nasue didatonge, i Yakobus nangul᷊i, “Manga ana u simbau! Kenang pundaringihi si sia. 14I Simon mang mbuhue nunggile kasasua si kite kirapa Mawu Ruata mborong su horo pai nupandung manga taumata ko wal᷊inge tau Yahudi, dingang u pandung namile bo i sire manga taumata ko wal᷊inge ko sarung makoa umati-E. 15E'e nuhino dingang ko seng niul᷊i u manga nabi. Watu'u pia ko kawawohe kiri'i,

16 # Am. 9:11-12 ‘Bou e'e Ia sarung sau sumongo,’ angkung u Mawu,

‘Ia sarung sau mupararisi wal᷊e ngi Daud ko seng naghoghahi,

dang mupakapia ngu manga ko naopehi

mbuhue sau ipakatei;

17tadeau kaul᷊i u taumata ko nal᷊umbei e'e mundea Mawu,

singkahindo dingang u kaul᷊i u bangsa ko wal᷊inge e'e su l᷊ikuri tau Yahudi ko seng Daku nikuiang guna ngu makoa koa-Ku.’

Kere'e angkung u Mawu,

18ko seng nuhabari hal᷊i e'e mangki ndahuwite.”

19“Inau tumuhu titongku,” angkung i Yakobus, “I kite tawe wotonge mupakasusa ngu manga taumata ko wal᷊inge tau Yahudi e'e ko seng nanarakang u watangeng i sire su Mawu Ruata. 20#Sasu. 34:15-17; Im. 17:10-16, 18:6-23Kateho i kite mambeng manurati si sire dang mangonggo sasasa si sire tadeau i sire kumbahang kumang kang ko mal᷊amuhu ko seng l᷊inau nisumba su barhala, arako kumina binatang ko nate nikile, arako kumang daha. Dang l᷊ai tadeau mutiho watangeng i sire bou manga kakanoa ko mal᷊umuhu. 21Watu'u atorang i Musa seng mangki ndahuwite taghunang ibasa sintinia su l᷊ou ngu Sabati su manga wal᷊e pukakal᷊iomanengang dang taghunang ihabari su kaul᷊i u soa.”

Surati suapang bangsa ko wal᷊inge ko seng nangimang

22Manga rasuli l᷊au manga pangaha, singkahindo dingang u kaul᷊i u tataho u jamaati e'e nughaghighili namile pirangkatau taumata bo i sire ko sarung iroi sarang Antiokhia pahundingang i Paulus l᷊au i Barnabas. Kuteu i sire namile si Silas l᷊au i Yudas ko isusigho l᷊ai si Barsabas. I sire rua i'i ko taumata mapapia ngu jamaati su tal᷊oara u manga taumata ko mangimang su Yerusalem. 23Singkahindo dingang u manga raroi e'e i sire l᷊ai nundoho surati ko tatahoe kiri'i,

“Su kaul᷊i u ana u simbau ko asal᷊ie bou manga bangsa ko wal᷊inge su l᷊ikuri tau Yahudi, ko natana su Antiokhia, Siria dang Kilikia. Tabea bo i kami, manga rasuli l᷊au manga pangaha, ko manga ana u simbau i kumu. 24I kami nakaringihi pia pirangkatau bou tal᷊oara i kami ko seng natamai sarang koa i kumu nupugara dang nupubingo si kumu dingang u manga tintiro ngi sire. Sumbal᷊i i kami ta nundoi si sire pukoa e'e. 25E'e sabapie i kami seng mbuae nughaghighili dang kaul᷊ie singkanaung guna ngu mamile pirangkatau dang nundoi i sire patamai sarang koa i kumu. I sire matamai singkahindo dingang i Barnabas l᷊au i Paulus ko ikukindaghi i kami. 26I sire rua i'i taumata ko seng nanarakang puwawiahi sire rua ual᷊ingu Mawu ngi kite I Yesus Kristus. 27Inau, i kami nundoi si Yudas l᷊au i Silas patamai sarang koa i kumu. Hindo i sire rua i'i mangul᷊i manga ko kawawohe su l᷊al᷊ung u surati i'i l᷊ai si kumu. 28Roh u Mawu Ruata seng nupakawala – dang i kami l᷊ai mupakawala – tadeau kumbahang i kumu onggol᷊ang manga wawawaneng ko lebe mabuha bou manga wawawaneng ko seng hinonge i'i: 29Kumbahang kumang kang ko seng mbuae nisumba su barhala; kumbahang kumang daha, kumbahang kumina ghisi ngu binatang ko nate nikile, dang putiho bou manga kakanoa ko mal᷊amuhu. Boko i kumu mutiho u watangeng i kumu bou kaul᷊i u hal᷊i e'e, i kumu seng nukoa ko mapia. Sarang i'i, sal᷊amati!”

30Suapang seng mbuae nuparamisi, i sire ko niroi e'e nuwua sarang Antiokhia. Pai se'e i sire nukui kaul᷊i u tataho u jamaati pukomol᷊i bou e'e surati e'e nisarakang. 31Suapang jamaati nubasa surati e'e, i sire mal᷊uasi kahingang su tataho u surati e'e ko nakahibori naung i sire. 32I Yudas l᷊au i Silas, ko nabi l᷊ai, mal᷊iwue nudidato dingang u manga ana u simbau ko mangimang su Antiokhia e'e guna ngu nangonggo wawahansang dingang u kawawahani si sire. 33Suapang i Yudas l᷊au i Silas natana pai se'e pira ngkatempo, manga taumata ko mangimang su Antiokhia e'e nundoi si sire pusul᷊e dang nutumanata si sire pangul᷊i u tabea i sire su manga taumata ko nundoi si sire. 34[Kateho i Silas namutusi guna ngu tatapi matana su Antiokhia.]

35I Paulus l᷊au i Barnabas l᷊ai natana pira ngkatempo su Antiokhia. Pai se'e i sire nanintiro dang nuhabari didato ngu Mawu singkahindo dingang u taumata maul᷊i ko wal᷊inge.

I Paulus l᷊au i Barnabas nutal᷊ei

36Ta nal᷊iwue bou e'e i Paulus nangul᷊i si Barnabas, “Maite i kite sau mutiwo manga ana u simbau ko mangimang si Yesus su kaul᷊i u soa ko l᷊inau mbuae nipuhabareng u didato ngu Mawu; tadeau i kite makawua kirapa kakakoa i sire.” 37I Barnabas mo mumbawa si Yohanes Markus, 38#Wuk. 13:13Kateho i Paulus nupundang ko dal᷊ai mumbawa si Markus, ko mandi muhal᷊i singkahindo dingang i sire dang nanintang i sire su Pamfilia 39Kuteu i Paulus l᷊au i Barnabas nurarendehi kahingang-hingang hakiu panginsuenge i sire rua nutal᷊ei: I Barnabas namaringang i Markus dang namundal᷊i dingange sarang Siprus. 40I Paulus namile si Silas bou e'e nuwua dingange suapang manga ana u simbau su Antiokhia e'e nanarakang i sire su al᷊amatiu Mawu. 41I sire nul᷊iku Siria l᷊au Kilikia, pai se'e i sire nupakatoghasi manga jamaati.

Currently Selected:

WUKE NGU MANGA RASULI 15: PLT

Highlight

Copy