WUKE NGU MANGA RASULI 14

Su Ikonium

1I Paulus l᷊au i Barnabas nakapundang hal᷊i ko musul᷊ung su Ikonium. I sire natamai l᷊ai sarang wal᷊e pukakal᷊iomanengang u tau Yahudi dang nakapudidato mapia su se'e hakiu maul᷊i tau Yahudi l᷊au taumata ko su l᷊ikuri tau Yahudi nangimang si Yesus. 2Arawe manga tau Yahudi ko mandi mangimang, naniti manga taumata ko wal᷊inge tau Yahudi hakiu i sire nubinsi manga taumata ko mangimang si Yesus. 3Ual᷊ingu e'e i Paulus l᷊au i Barnabas natana mal᷊iwue su se'e. Dang dingang wahani i sire nudidato hal᷊i u Mawu. Kuteu Mawu l᷊ai nupakal᷊ahe himoneu habari sire hal᷊i u kakindaghi-E e'e tingari. I Sie nangonggo si sire kawasa guna ngu mukoa manga ko makal᷊aherang dang manga hal᷊i ko takoae sihinge. 4Arawe tataho u soa e'e nuraroka simbau dingang ko wal᷊inge; pia ko nanimbuka su manga tau Yahudi dang pia l᷊ai ko nanimbuka su manga rasuli e'e.

5Bou e'e manga tau Yahudi dingang u manga pangahae singkahindo dingang u manga taumata ko wal᷊inge tau Yahudi nughaghighili guna ngu mupakasusa dang mamal᷊o u watu su manga rasuli e'e. 6Kateho manga rasuli e'e matitong hal᷊i e'e, bou e'e nutingkaghea sarang Listra dang Derbe, ko manga soa su Likaonia, dang sarang tampa su sindihange. 7Pai se'e i sire l᷊ai nuhabari Habari Mapia e'e.

Su Listra l᷊au su Derbe

8Su Listra pia singkatau ko ese l᷊aeri ko kesohi mangki bou gandongang, hakiu i sie ta makal᷊al᷊eng, watu'u l᷊aeri tumaniu ko l᷊ome. 9Tau e'e kakangiang pai se'e kapundaringihi si Paulus kapudidatonge. I Paulus nakawua tau e'e nangimang dang ual᷊ingu e'e i sie botonge ipakaul᷊e. Kuteu i Paulus nutumaeri si sie. 10Dang dingang u tingihi ko mauha i Paulus nangul᷊i, “Darisie pakatei!” Taumata e'e nul᷊uminso nurumarisi bou e'e nul᷊umal᷊eng. 11Suapang taumata maul᷊i e'e nakawua apa ko nikoa i Paulus, i sire nukumiha su l᷊al᷊ung u wisara Likaonia, “Manga dewa seng nul᷊umintu su dunia nusumu su badang u taumata.” 12Bou e'e i Barnabas nisigho ngi sire si Zeus, dang i Paulus nisigho ngi sire si Hermes, watu'u i sie ko nudidato. 13Imam u Dewa Zeus, ko kuile su tingo ngu soa, nusumongo numbawa manga sapi ko ese dingang u manga bungang sarang tukari u soa. I sie mo mutumuhu dingang u taumata maul᷊i e'e mangonggo sasumba su manga rasuli e'e.

14Suapang i Barnabas l᷊au i Paulus nakaringihi hal᷊i ko koateng u manga taumata e'e, i sire rua nungganggehe l᷊aku i sire rua apiru nutumal᷊ang sarang tal᷊oara u taumata maul᷊i e'e, bou e'e nukumiha, 15#Sasu. 20:11; Mzm. 146:6“Ei nakurawe i kumu nukoa hal᷊i i'i? I kami i'i ko taumata l᷊ai musul᷊ung i kumu! I kami ene su si'i guna ngu muhabari Habari Mapia si kumu tadeau i kumu manintang u manga hal᷊i ko takoae gunange i'i dang ruminta sarang koa u Mawu Ruata ko wiahi, ko nundiadi l᷊angi l᷊au dunia, dang l᷊auri l᷊au patiku ko ene su l᷊al᷊unge. 16Su tempo nal᷊iu Mawu Ruata namala ngu manga bangsa puwiahi patuhu kao i sire singkatau-singkatau. 17Kateho I Sie ta nal᷊iwuhi nangonggo u manga tatia ngu watangeng-E, nukoa ko mapia. I Sie nangonggo si kumu tahiti bou l᷊angi dang l᷊ua ngu tana su temponge. I Sie nangonggo kang si kumu dang nupakasanang u naung i kumu.” 18Kateho maning dingang u didato e'e mborong susa l᷊ai manga rasuli e'e mundiaga manga taumata e'e mangonggo sasumba si sire.

19Pira ngkatau taumata ngu Yahudi nusumongo sarang Listra dang Antiokhia su Pisidia dang bou Ikonium naniti taumata maul᷊i e'e hakiu taumata maul᷊i e'e nanimbuka si sire. I sire namal᷊o u watu si Paulus bou e'e namol᷊eng si sie sarang l᷊ikuru soa. Su naung i sire i sie seng nate, 20Kateho suapang manga taumata ko mangimang su se'e nurumarisi nul᷊iku si sie, i sie nuwangung dang sau nusumu su soa. Ndai mal᷊ou i sie nakoa sarang Derbe dingang i Barnabas.

I Paulus l᷊au i Barnabas nusul᷊e sarang Antiokhia

21Su Derbe i Paulus l᷊au i Barnabas nuhabari Habari Mapia e'e dang maul᷊i taumata nangimang si Yesus. Bou e'e i sire nusul᷊e sarang Listra, mbuhue sarang Ikonium, bou e'e sarang Antiokhia su Pisidia. 22Suapang soa e'e i sire nupakatoghasi naung u manga tumatuhu I Yesus dang nungonggo sasasa su manga tumatuhu e'e tadeau tatapi mangimang si Yesus. “I kite mambeng mutatahang u singsara horo, mbuhue i kite makatemang kal᷊al᷊uasi u Dunia ngu Mawu Ruata Ko Wuhu,” kere'e manga rasuli e'e nanintiro su manga tumatuhu I Yesus su manga soa e'e. 23Dang suapang jamaati i Paulus l᷊au i Barnabas nuhengke manga pangaha u apang jamaati e'e. Bou e'e dingang nukal᷊iomaneng l᷊au nupuasa, i sire nanarakang manga pangaha e'e su Mawu ko ipangimaneng i sire e'e.

24Bou e'e i Paulus l᷊au i Barnabas nanurusi l᷊al᷊al᷊eng i sire nul᷊umiu wanua ngu Pisidia dang nurating u Pamfilia. 25Dang suapang i sire nuhabari didato ngu Mawu Ruata su Perga, i sire nakoa sarang Atalia. 26Bou e'e i sire sau namundal᷊i sarang Antiokhia. E'e soa tampa i sire horo nisarakang su al᷊amatiu Mawu Ruata, tadeau i sire mupal᷊al᷊eng u hal᷊i ko su orasi i'i seng nikoa i sire.

27Suapang nurating u Antiokhia, i sire nangomol᷊i manga taumata bou jamaati e'e, mbuhue nuwuke ngu kaul᷊ie ko seng nikoa u Mawu Ruata bou pul᷊ahal᷊i i sire. I sire l᷊ai nuwuke ngu kirapa Mawu Ruata seng namuka l᷊al᷊eng tadeau manga taumata ko wal᷊inge tau Yahudi mangimang si Yesus. 28Su soa e'e i Paulus l᷊au i Barnabas natana mal᷊iwue dingang u manga taumata ko mangimang.

Currently Selected:

WUKE NGU MANGA RASULI 14: PLT

Highlight

Copy