ማርቈስት ወንጌል 11

ፈወነ 11

እየሱስ ኽየው ክቭርዝ እየሩሳልየም ጥወጘ

(ማቲ. 21፡1-11፤ ሉቃ. 19፡28-40፤ ይዃ. 12፡12-19)

1ጛይም እየሩሳልየምት ጣቂል ደቭረ ዘይት ኣበይዝ ጋቢል ችጝሸቍ በተፋግየ ትጐስመ ቢታንየ ትጐስ ችጛንድ እየሱስ ጝክንደጢስ ሊጘድዛት፦ 2«ክታበዊል ችጝሸው ኪዊል ፊጥን፤ ጝግልም እጅር ድቃር ኣርቓው እወል እፅቍሽ ችጝትርንቅ፤ ጝትም እክስርን እንጐ ነስጥን። 3ኣውማው እጅር፦ ‹ወረጘ የጝ እኒንት ፃቭርነውድ?› የው ዋቕርሽ፦ ‹ኣደረ በናንስቅ የጝ፤ በውዝ ዊስ በርስጡ› ይርን ድቍጥን» የው እፃቑ።

4ጛይም ፊርⶖ፤ እወልድየንትም ጝን ሚረይዙ ጒደነይል እፅቍሽ ችጝጝ እክስⶖ። 5ጝግል ችብረቍ እቂስም ላው ላውድ፦ «ውርፃቭትርነ የጝ እወልድየንት እክስርነውድ?» ይⶖ። 6ጝክንደጥድም እየሱስ የውድየንት እቂዝ ድቍ፤ ጛይም ፊቅድⶖ። 7እወልድየንትም ጝጐ ነስጝ ጝታልቨድየንት ጝሲጊል ፃቭⶖ፤ እየሱስም ድቃሩ። 8ንቕፀቍ እቅም ጝታልቨድየንት ጒደነይል ወፃቕⶖ፤ ላጥድ ቈሽ በራኸይስ ለምለም ዘፍዙ ጫፍ ጫፍድየንት ጫንቕዝጛ ዝቨይል ጒዝጒዝⶖ። 9በዊል ቃውሰቍ እቂዝመ እግርግረይል ቲክነቍ እቂዝም ኽየው ድመዝ፦ «ዀሳይነ! ኣደረት ሽⶖዝ ተረውድ በርክሸው የጝ።#መዝ. 118፡25-26። 10ተትረይ ይናኣይር ዳዊትት ምጝግስትየን በርክሽረይ ጚ፤ ዀሳይነ#11፡10 ዀሳይነ፦ እቭራይስጥ ቋቈይዝ፦ «ኣደረወ! ነን ይናት ቓዝ» የነት የጝ። ኣርያምስ!» ይⶖ።

11እየሱስም እየሩሳልየም ችጙ፤ ጝዝ ግረም መቅደስ ጝኒል ጥው ጅልወይል ፅበውድየንትቅ ቓሉ፤ ግርየድም ኵን ዊናንስቅ ፅጭ ሊጘይጅቅ ኣቕ ቢታንየ ፉ።

እየሱስ መቅደስ ጝኒል ኒግረቍድዛት ጅግዘጘ

(ማቲ. 21፡18-19)

12ጝኣምርሲዝም ቢታኒየስ ፍጛንድ እየሱስ ግድርዱ። 13ኻፀ ፃይረይ በለስ ዘፍትም ከስ ቓል ምናልቫች ፍር ችጝሽረይ ኣርሸ የው ጝርጐ ፊሩ፤ ዊገድ ግን በለስዙ ወቅት ኣየው ኣቓንስቅ ኻፀዝለ ላየ ውረውረቅ ችጚየውም። 14ዘፍሸንትም፦ «ነንስ ኪርም ዘላልም ኣሽ ክጊስ ኣውማውቅ ፍር ዂነ» ዩ፤ ጝክንደጥድም እኒንት ዊግታንድ ወሽ።

15እየሩሳልየምም ዋጥር፤ መቅደስ ጝኒልም ጥው ጝግል ኣቕጝ ቅየቊዝመ ጅቨቊዝ ጅግዝጠ ኪርሙ፤ ቍርሻን ላውጠቊዙ ጠረቢዘይዝመ ርግቫን ቅየቊዙ ወምበሪዝ ጊልብርብሩ። 16ኣውማውድቅ ጐዝ መውር መቅደስ ጝኒዙ ኻፅር ኣቒል ዲቋየጘ ኪልክሉ። 17ክንሳንድም፦ « ‹ይጝንድ ኽዝቭዝቅ ፀለውትዙ ጝን ይሽተኵ!› ይሽት ፃፍሺየውመ? ክትን ግን ቓፅጘ ጭቭረነ ጋ ፃቭርኑ» ዩ።#እሳ. 56፡7፤ የር. 7፡11።

18ካኽነጣነ ኻልቅጢዝመ ወሪትት ኽግ ክንሰጢዝም እኒንት ዊግታንድ ወሽ፤ ኽዝቭድም እጝቅ ጝክንስኒዝ ጊርምሻ ዊናንስቅ ጐውትⶖ፤ እንዝ ማጥን ጝት ኣወሽጝ ድስጥጘጘ መለ ደምዝነው ኪርም። 19ኵናንድም እየሱስስመ ጝክንደጢዝ ኻትመይስ ፍጝ ፊርⶖ።

እየሱስ እፀይ በለስ ዘፍሸን

(ማቲ. 21፡20-22)

20ጝኣምርሲዝም ግረቨዝ ጒደነይዝ ዲቍጛንድ በለስሸን ጝርስሪስ ኪርምር ይዝር ቓልⶖ። 21ቢጥሮስም ዊገድ ትዝ የው እየሱስት፦ «ክንሰተወ! እንወ እፅረይ በለስ ዘፍሸን ይዝርኵች» ዩ።

22እየሱስም ዊስ እንት ዩ፦ «እደረት ኣምንጥን። 23እማንዝ የኵን፤ ኣውማው እጅር እን ኣበድየንት፦ ‹እኒስ ኒቅልሽር ባኽሪዝጐ ዊርውርጭ› ያን፣ እንም ኣጠጘ ጝዘኒዝ ተጠራጥርሺጝቀ ኣምናን ጝጭስ ኣጡ።#ማቲ. 17፡20፤ 1ቈረ. 13፡2። 24እንዝ ማጥን ፀለውትዝ ጨውርነውድየንትቅ ለምትርነጘ ፃቭርን ኣምንድርናን ጘጝ ክታጭስ ፃቭሽትጡ የኵን። 25እኒዝጘም ፀለውትዝ ችብትርናንድ ሲመይቱ ክታይር ክታኽጥያትድየንት ይቅር ያንስ ማጥን ክትንም እጅርል ፃይርነውድየንት እጝቅትቅ ይቅር ይጥን።#ማቲ. 6፡14-15። 26ክትን ይቅር ያይርነቅ ኣርነውዝየ ግን ሲመይቱ ክታይርድ ክታኽጥያትድ ይቅር ያውም።»

እየሱስት ስልጣኒዝቍዝ ኣልተው ዋቕረ

(ማቲ. 21፡23-27፤ ሉቃ. 20፡1-8)

27እንደ ገነም እየሩሳልየም ተርⶖ፤ እየሱስም መቅደስ ጝኒዙ ኻፅር ኣቒል ጅልዋንድ፣ ካኽነጣነ ኻልቅጥድ፣ ወሪትት ኽግ ክንስጥድ፣ ሽመቅልድም ጝጐ ኣልትጝ፣ 28«እንዛይ ዊቅድዛት ፃቭረውድ ወረጘዙ ስልጣኒዝ ይጝ? እንዛት ፃቭተስ እን ስልጣንድ ክጭስ ነየውድ ኣው የጝ» ይⶖ። 29እየሱስም፦ «እስቲ ያንም ላው ዋቕረ ዋቕርጨ፤ ክትንም ዊስጥን፤ ያንም እንዛይ ዊቅድዛት ወረጘዙ ስልጣንዝ ፃቨር ኣቐጘ ድቍጭር። 30ይዃንስት ጥምቅትድ ተረውድ ሲመይስመ ዊንስ እጅሪስ ዊኑ? እስቲ ዊስጥን» ዩ። 31ጛይም ጛስ ጛይ፦ « ‹ሲመይስ የጝ› ይናን፦ ‹እደስለ ውረ ጝት ኣምኒርነቅ?› ይጡ፦ 32‹እጅሪስ የጝ› ይናንሳ?» እኒንት ያይጘጘ ኽዝቭድ እጝቅ ይዃንስት እማንተው ነቭይ ኣቐጘ ኣምናⶖ ዊናንስቅ ጐውትⶖ። 33እንዝ ማጥን፦ «ኣርቓይነቅም» ይጝ ዊስⶖ፤ እየሱስም፦ «እደስለስ ያንም እንዛይ ዊቅድዛት ወረጘዙ ስልጣንዝ ፃቨር ኣቀጘ ድቈቅም» ዩ።

Currently Selected:

ማርቈስት ወንጌል 11: ኽምጣኣኪ

Highlight

Copy