ማርቈስት ወንጌል 12

ፈወነ 12

ወይን ኣታልቲዙቍ ኣርጪዝ ተከድ

(ማቲ. 21፡33-46፤ ሉቃ. 20፡9-19)

1እንዝ ግረም እንት ያⶖ ተከዝ ድቈነው ኪርሙ፦ «ላው እጅር ወይንዙ ኣታክልት ቲክሉ፤ ጝጅልወድየንትም ኻፅሩ፤ ወይን ድቝዘነው ቢም ፃሩ፤ ሊሚደነ ደዘም ኣስሉ፤ ጝዝ ግረም ኣርጭዝ ኣከራይዝ ላየ ኻግርል ፊሩ። 2ማፅወድ ችጛንድም ወይኒይዙ ፍረይስ ነስጛንስ የው ጝኣገልጋያኒስ ላውድየንት ኣርጪዝጐ እፃቑ። 3ጛይ ግን ጝት ፃይጝ ድድብⶖ፤ ጝባደው ናንም በርስ። 4እንደ ገነም ላየ ኣገልጋይ እፃቑ፤ ጝትም ኣውርድ ኪልጝ ኣዋርዝጝ ዊስⶖ። 5ነንም እንደ ገነ ላየ እፃቑ፤ እኒንትም ቍዉⶖ፤ እኒዝጘም ንቕፀቍድዛት እፃቓን ላው ላውድዛት ድድብⶖ፤ ላው ላውድዛት ቈሽ ቍዉⶖ። 6ነንም ገነ እፃሸው ላው እዳቕ ዊኑ፤ እንም ጝቀነው ጝዅርድ የጝ፤ ኣታክልቲዝ ወነድም፦ ‹ይዅርትስ ኪብርዝጥቍ› የው እጝቅት ግረ ጝት እፃቑ። 7ኣርጭድ ግን ጛስ ጛይ፦ ‹እንመ ዋነ ዊርሰተድ የጝ፤ ላቍጥን ቍዉነ፤ ጝርስትድም ይናው ኣጡ› ይⶖ፤ 8ጝዝለም ፃይጝ ቍዉⶖ፤ ኣታክልቲዙ ስፍረይስም ፊስጝ ማልⶖ።

9«ነስየ ኣታክልቲዝ ወነድ ወረጘ ፃቭጡ ተከኵ? ተርጡ፤ ኣርጭድዛትም ቍውጡ፤ ኣታክልቲዝ ስፍረድየንትም ላጥዝ ይውጡ። 10ቅዱሳን መፃፋኒዝ፦

‹ግምብኝጥድ ነቅጘው ቕርጘድ

ማይዘንዙ ኣውር ኣቑ፤#መዝ. 118፡22-23።

11ኣደረ እኒንት ፃቭኩ፤

እኒንም ይናእልጣኒዝ ዲንቅሰው የጝ?›

የው ዊግተው ቃልድየንት ኣንብቪርነቅመ?»

12ጛይም እኒን ተከድየንት ዊግተውድ ጝታቊዝ ኣቐጘ ኣርቕጛንስቅ ፃይጥጘ በንⶖ፤ ዊገድ ግን ኽዝቭድየንት ጐውትጛንስቅ በርጝ ፊርⶖ።

ግቭር ኪፍለነውዝቍዝ ኣልተው ዋቕረ

(ማቲ. 22፡15-22፤ ሉቃ. 20፡20-26)

13እንዝ ግረ ፈሪሳኒዝመ ኺረውድስት ዊግን ኣቐቍ ላው ላው እቅ እየሱስት ዊገዝ ፃውርጥጘ ጝጐ እፃሽⶖ። 14ጛይም ኣልትጝ፦ «ክንሰተወ! ክት እማንተው እጅር ኣረጘ ኣርቕነኵን፤ ኣውማውስቅ ኣድልዊጝቀ እጝቅትቅ እኵለዝ ቓልደር የጝ፤ እደረት ጒደነድም እማንዝ ክንስረኵ፤ እደስለ ቂሳርስ#12፡14 ቂሳር፦ ረውማነ ንጕሳኒዝ ዘውድዙ ሽ ኣቓንድ ጝትርጕምድ፦ «ንጕሳነ ንጕስ» የነት የጝ። ግቭር ኪፍለነው ጥውሸኵመ ጥውሻው? ይንስ ኪፍልነመ ዊንስ በርነ?» ይ።

15እየሱስም ጝታተክዘንድ ኣርቕ፦ «ወረጘ የጝ ይት ፊትንድርነውድ? እስቲ ላው ዲናር ነስጥን ቓልጨር» ዩ። 16ጛይም ነስⶖ፦ «እኒን ኣውት ምስል የጝ? ፅፈሽድስ ኣውቱ የጝ?» ዩ፤ ጛይም፦ «ቂሳርቱዋ» ይⶖ። 17እየሱስም፦ «እደስለስ ቂሳርትውድ ቂሳርስ፣ እደረትውድ እደረስ ይውጥን» ዩ፤ ጛይም ጝቍዝ ዲንቅሽⶖ።

ክርጘይስ ጐነዝቍዝ ኣልተው ዋቕረ

(ማቲ. 22፡23-33፤ ሉቃ. 20፡27-40)

18እንዝ ግረ ሰዱቃን ጝጐ ተር፤ ሰዱቃንድ ክርጘይስ ጐነዝ ኣምናቍም ዊን።#ኻወ. 23፡8። 19ጛይም፦ «ክንሰተወ! ሙሴ፦ ‹ላው እጅር እውነት ድው ዅር እዅሪጝቀ ክርሽ ጝዝንድ እውነየንት ድው ክረው ጝዝኒዝ ዚረ ቲኪነ› የው ፃፍኩ።#ዘዳ. 25፡5። 20እደስለ ላጝጠ ዚን ዊንⶖ፤ በውረድ እውነት ድው ዚረ ቲኪዪጝቀ ክሩ። 21ሊጘትረድም እውነየንት ድው ጘጝም ዚረ ቲኪዪጝቀ ክሩ፤ ሸወትረድም እኒዝጘ ኣቑ። 22ላጝጠድቅ ድውⶖ፤ ዚረ ግን ቲክዪየቍም፤ ኻትሸነይዝም እውነየን ክርች። 23ነስየ ላጝጠድቅ ድውጛንስቅ ክርጘስ ጐነይዝ ኰር እኝቸን እውነየን ኣዊዝ እውነ ኣተጚ?» ይጝ ዋቕር።

24እየሱስም እንት የው ዊሱ፦ «ቀትርነውድ ቃል ቅዱሳን መፃፋኒዝመ እደረት ኻይሊዝ ኣርቓይርነቅ ኣቕርናንስቅ የጝ። 25ክረቍድ ጕጛንድ ሲመይት መላካኒዝጘ ኣጘኵጚ ድዋቍም፤ ገባሻቍምም። 26ክርጘይዝ ጐነዝቍዝ ግን ሙሴት መፃፊዝ እንም ቍጥቋጠይዝቍዝ ድቍሽተው ክፍሊዝ እደረ፦ ‹ያን ኣቭርኻምት ኣምላክ፣ ይሳቅት ኣምላክ፣ ያይቈቭት ኣምላክ የጝ› የውድየንት ኣንቭቪርነቅመ?#ዘፀ. 3፡6። 27እደረ ፅበቍዝ ኣምላክጚ ክረቍዝ ኣምላክም ኣየው፤ ክትን ግን ጭቕጘ ቀትርንኵርኑ።»

እጝቂስቅ ኽየው ትዛዝድ

(ማቲ. 22፡34-40፤ ሉቃ. 10፡25-28)

28ወሪትት ኽግ ክንሰጢስም ላውድ ተር ተከራክርሽጛንድ ወሹ፤ እየሱስ ጝግል ኣልተው ዋቕረዝቍዝ ጥውሸው ዊሰ ይወጘ ኣስክስ፦ «ኣየውጚ ትዛዛኒስቅ ዲቈው ትዛዝድ ኣውየን የጝ?» የው ዋቕሩ።#ሉቃ. 10፡25-28። 29እየሱስም፦ «እጝቂስቅ ዲቈው ትዛዝድ፦ ‹እስራየልወ! ወጭ፤ ኣደረ ይናኣምላክድ ላው ኣደረ የጝ።#ዘዳ. 6፡4-5። 30ክትም ክኣደረ ኣምላክት ክዘኒዝ፣ ክኒፍሲዝ፣ ክኻሰቪዝ፣ ክኻይሊዝም ምሉ በምሉዝ ቀን› የውድ የጝ። 31ሊጘትረድ ቈሽ፦ ‹ክፃምረድየንት ክቕም ትጘ ፃቭር ቀን› የውድ የጝ፤ እንዛይስ ዲቈው ላየ ትዛዝም እጀው» ዩ።#ዘሊ. 19፡18።

32ወሪትት ኽግ ክንሰተድም እየሱስት፦ «ክንሰተወ! ቀሰው ይሩ፤ እደረ ላው የጝ፤ ጝዝለ ላየ ኣምላክም እጀው፤ እማን የጝ ዊግትረውድ፣#ዘዳ. 4፡35። 33ጝትም እዘንዝ፣ ኣይምረውዝ፣ ኒቭስዝ፣ ኻይልዝ ምሉ በምሉዝ ቀነነው፣ እኒዝጘም ጛፃምረድየንት ጛቕምትጘ ፃቭን ቀነነው፣ ቃጥልሸው መስዋቲስቅ፣ ላየ ምስዋቲስቅም ዲቈኵ» ዩ።#ዀስ. 6፡6። 34እየሱስም ኣስትውል ዊሰጘ ቓል፦ «ክት እደረት ምጝግስትየንቲስ እክልድረርም ኣይረር» ዩ፤

እንዝ ግረ ጝት ዋቕርጠ ዲፍረው ኣውማውም ዊኒየው።

ክርስቶስ ኣውት ዅር ኣቐጘ?

(ማቲ. 22፡41-46፤ ሉቃ. 20፡41-46)

35እየሱስም መቅደስ ጝኒል ክንሳⶖ ሲጝቀ እንት የው ዋቕሩ፦ «ወሪትት ኽግ ክንሰጥድ ኣወይጝ የጝ ክርስቶስ ዳዊትት ዅር ይጘውድ? 36ዳዊት መንፈስ ቅዱስት ኣማካይነትዝ ዊግታንድ፦

‹ኣደረ ይኣደረት፦

<ክፃለታንድዛት ክልኲዝ ደደነ ፃቭጪስቅ

ይለዊል ጐይ> ዩ›

የኵ።#መዝ. 110፡1። 37እደስለ ዳዊት ጝቕም፦ ‹ኣደረ› የውዝየ፣ ኣወይ የጝ ዋጥር ጝዅር ኣጠ ቸለውድ?» ንቕፀው ኽዝቭም ዲስተዝ ወሻⶖ ዊኑ።

38ክንሳንድም፦ «ወሪትት ኽግ ክንስጢስ ጣጝቅቅጭጥን፤ ዘፈፍየው ቅምስ ሲርጝ ጅልወነው ቀንጘኵ፤ ኣሪ ጨቨቅም ክቭርዙ ሲለምተ በንጘኵ። 39ምዅራቭ ጨቨቅም ኽየው ወምበር፣ ጭጝሽጝ ፊርጘዊስም ኪብረው ስፍረ በንጘኵ። 40ጝታፀለውትድ ሊጊሰነውዝ ልጀጊርዳኒዙ ጝንድየንት ባደው እዳዝጘኵ፤ እንዛይ ወሰው ፍርድ ለምርጥቍ» ዩ።

ድኻ ልጀጊርድ ይውረው ሚቨድ

(ሉቃ. 21፡1-4)

41እየሱስ ምፅዋት ይወነ ሳፁኒዝ በውዝ በው ጐይ፣ ንቕፀቍ እቅ ጝታሚቨድየንት መቅደሲዙ ሚቨ ማለነ ሳፁኒል ድውጛንድ ቓላⶖ ዊኑ፤ ንቕፀቍ ኻፍታማንም ንቕፀው ጊንዝቭ ድውⶖ። 42ላይ ድኻ ልጀጊርድ ግን ሊጘ ሳንቲም ኣቐው ናስዙ ሳንቲም ነስር ድውች።

43እየሱስም ጝክንደጥድዛት ጭጝ፦ «እማንዝ የኵን፤ እኝቸን ድኻ ልጀጊርድሸን ሳፁኒል ድወቍ ላጥ እቂስቅ ዲቈው ይውች። 44ላጥድ እጝቅቅ ይውጘውድ ጝታፃይጘው ኻፍቲስ ቲርፈውድየንት የጝ፤ እኝቸን ግን ድኻ ኣቕር ፅብራⶖ ውረውረቅ ዳዚጝቀ ጝርፃይረውድየንት እጝቅትቅ ይውች» ዩ።

Currently Selected:

ማርቈስት ወንጌል 12: ኽምጣኣኪ

Highlight

Copy