YouVersion Logo
Search Icon

ማርቈስት ወንጌል 13

13
ፈወነ 13
ኻትሸነይዙ ዚምኒዝ ምልክታንድ
(ማቲ. 24፡1-2ሉቃ. 21፡5-6)
1እየሱስ መቅደስ ጝኒስ ፋንድ ጝክንደጢስ ላውድ፦ «ክንሰተወ! ቕርጝድ ኣወየቍ ኣጘጘ፣ ኽንፀድም ኣወየው ሸገ ኣቐጘ ቓል» ዩ። 2እየሱስም ዊስ፦ «እንዛይ ኽየቍ ኽንፅጥድ ቓልድረኵመ? ላው ቕርጘድ ላዊል ኣቐጘ እዳቓውም፤ እጝቅቅ ፋይተው የጝ» ዩ።
3እየሱስም መቅደስ ጝኒዝ በውዝበው ደቭረ ዘይት ኣበይል ጐይ ፅባⶖ ቢጥሮስ፣ ያይቈቭ፣ ይዃንስ፣ እንድርያስ ጝጐ ተርጝ፦ 4«እኒን ኣውን ኣቐው ኣቐጘ ድቍ፤ እንቅ ፋፅምሽጠ ኣልተጘ ቓሊሰው ምልክትድ ወረጘ የጝ?» ይጝ ዋቕር።
5እየሱስም እንት ዩ፦ «ኣውማውቅ ቀሳየጘ ጣጝቅቅጭጥን። 6ንቕፀቍ እቅ፦ ‹ያን ክርስቶስ የጝ› ይጛⶖ ይሽዝ ተርጥቍ፤ ንቕፀቍድዛትም ቀስጥቍ። 7ኣጭነዝመ ኣጭነዙ ጂጘዝ ወሽርናንድ ዳንግፅትርነ፤ እንቅ ኣጠ ግድ የጝ፤ ኻትሸነድ ግን ገነ የጝ። 8ኽዝቭ ኽዝቪል፣ ምጝግስት ምጝግስቲል ጕጡ፤ ንቕፀቍ ስፍሊልም ዝቨዙ ኒንቀሸነዝመ ግድርዝ ኣጡ፤ እንዛይ እጝቅ ቅምትዙ ጭጝቅት ኪርመን ጛይ።
9«ክታቕምስ ጣጝቅቅጭጥን፤ እቅም ክታት ፍርድ ሸጐውል ዲቍስጝ ይውጥቍ፤ ምኵራቭ ጨቨቅም ክታት ጊርፍጥቍ፤ ይሚዝረጫንም ኣትርነ ማጥን ይቍዝ ቅመቊዝመ ነጕሳኒዝ በዊል ችብርትርንቅ።#ማቲ. 10፡17-20። 10በውርስ ግን ወንጌል ኣልሚዙ ኽዝቪዝቅ ሲቭክሽጠ ጥውሸኵ። 11ፃይሽርን ፍርድል ኣልትርናንድ ኣይንድ ክታጭስ ነይሽተውድየንት ዊግትጥንጚ፦ ‹ወረጘ ዊግጭር ኣጢ?› ይርን በውርስርን ጨጝቅሽትርነ፤ ዊግተውድ መንፈስ ቅዱስጚ ክትንም ኣይርነቅ። 12እጅር ጝዝንት፣ ኣይርም ጝዅርት ክርጘል ዲቍስ ይውጡ፤ ዅል ጝታኣቅሊል ኣምፅጥቍ፤ ቁጥቍም። 13ይቍዝም እቀ በዊልቅ ሽክሽርነቅ ኣትርንቅ፤ ዊገድ ግን ኻትሸነይል ኣሽ ፀናቐውድ ጘጝ ቓድጡ።#ማቲ. 10፡22።
14«ድዘርዙ ርኵስነድ ጝጭስ ጥውሻው ስፍረይል ችብር ቓልድርናንድ እኒንት ኣንቫቪድ ኣስክስነ፤ ኣይንድ ይዅዳ ኻግሪል ፅበቍድ ጅልወይዝጐ ሰይጝነ።#ዳን. 9፡27፤ 11፡31፤ 12፡11። 15ኽድም ዲግል ዊነውድም ጊሚነ፤ ጝንቭርትድም ፊስጠ ጝኒል ጥዊነ።#ሉቃ. 17፡31። 16ቺዝጝል ዊነውድም ጝኣልቨድየንት ፊስጠ ዋጥሪነ። 17እንዛይ ግርቂዝ ጊዙረቍዝመ ኒቭሰቍ መሉጅንጥዝ ወየው! 18እንቅ ጫረዝ ኣቓየጘ ፃልይጥን። 19ኣይንድ እደረ በውገ ፍጥርትድ ፋጥረው ግርየይስ ኪርም ነኳን ኣሽ እትሊየው፣ ነስየ ተረው ዚምኒዝም እትላው ኽየው ሚከረ ኣጡ።#ዳን. 12፡1፤ እት. 7፡14። 20ኣደረ ጛይ ግርቅድዛት እጅጝዚየው ኣቓን ኣውማውቅ ቓዳውም ዊኑ፤ ዊገድ ግን ማርፅሽተቍ እቂዝ ማጥን የው ግርቅድዛት እጅጝዝጡ። 21ኣይንድ ኣውማውቅ፦ ‹እንወ ክርስቶስ እንል የጝ!› ዊንም፦ ‹እንወ እቲል የጝ!› ይሽ ኣምንትርነ። 22ኻሰትኝጥ ክርስተውሳንዝመ ኻሰተኝጥ ነቭያታንዝ ተርጥቍ፤ ዲንቅሰቍ ምልክታንዝመ ታምራንዝ ፃቭጛⶖ ቸልጛንስ ማርፅሸተቍድዛት እኳ ቀስጥቍ። 23እንዝ ማጥን ጣጝቅቅጭጥን፤ ግርየድ ችጚጝቀ እጝቅትቅ ድቍኩን።
24«ኣይንድ እን ሚከረይዝ ግረ፦ ‹ኰረየን ጥምትቲ፤ ኣርቨየንም ጝርብርኻንድ ይዋይም።#እሳ. 13፡10፤ ኽዝ. 32፡7፤ እዩ. 2፡10፤31፤ 3፡15፤ እት. 6፡12። 25ፅግልውጥድም ሲመይስ ኣርግፍሽጥቍ፤ ሲመይ ፅበቍ ኻይላንድም ተናውጥሽጥቍ።›#እሳ. 34፡4፤ እዩ. 2፡10፤ እት. 6፡13። 26ኣይንድ እጅር ዅር ኽየው ኻይልዝመ ግርመዝ ድምነዝ ፃቭ ተራንድ ቓልሽትጡ።#ዳን. 7፡13፤ እት. 1፡7። 27ጘጝም ጝመላካንድ እፃቕ ኣልሚዝቍ ሲዘ ማእዘናኒስ ዝቨት ደርቸይስ ኪርም ሲመይት ደርቸይል ኣሽ ጝማርፅሽተቍድዛት ኣኽቭጡ።
28«ተከድየንትም በለስ ዘፍሸንቲስ ክንድጥን፤ ጝርጫፋንድ ጭጭቭጛንድ፣ ጝርኻፅድም ሊልምድጛንድ ኣይንድ እየ ችጘጘ ኣርቕትርንቅ። 29እኒዝጘም ክትን እንቅ እጝቅ ኣቐጘ ቓልድርናንድ እጅር ኵር ተረው ግርየድ ኣልተጘ፣ ሚረይልም ኣቐጘ ኣርቕጥን። 30እማንዝ የኵን፤ እንዛይ ዊቅድ ፋፅምሽጥጚስቅ እን ዅለድ ዲቋውም። 31ሲመይስመ ዝቨስ ዲቍጥቍ፤ ይቃልድ ግን ስሪስቅ ዲቋውም።»
ኣደረት ተረነ ግርየይዝመ ሰቲዝ ኣርቕሽታው ኣቀጘ
(ማቲ. 24፡36-44)
32«እቸን ግርየየንስመ ሰትሸንስ ግን ኣይር ኣቕሽጚ ሲመይ ፅበቍ መላካንድም ኣጝሽ ዅርም ኣቕሽ ኣውማውቅ ኣርቓውም።#ማቲ. 24፡36። 33እንዝ ማጥን ግርየድ ኣውን ኣቐጘ ኣርቓይርነቅም፤ ኣቓንስቅም ጣጝቅቅጭጥን፤ ቲጊይጥን፤ ፃሊጥንም።#13፡33 ላው ላው ኽፅምትቍ ብራንጥድ፦ «ፃልይጥን» የው ቃልድ እጀቍም። 34እንም ጝንድየንት በር እክል ኻግርል ፊረው እጅርድ ተከኵ፤ ጘጝም ጛኣገልጋያንድዛት እጝቅትቅ ጝታይተሰቭል ውላዙ፤ ዘቨኘድም ነቃቕ ሊሚዳንስ ኣዙ።#ሉቃ. 12፡36-38። 35ነስየ ጝኒዝ ወነድ ድልሚዝ፣ ኻረ ግቨሪዝ፣ ጂሩ ዋኒዝ ዊንም ቢየድ ፋንድ ተርጠጘ ኣርቓይርነቅም፤ ኣቓንስቅም ቲግይርን ሊሚድጥን። 36ድጝግት ተራንድ ኽርይርን ችጛየጘ ቲጊጥን። 37ክታጭስ ድቈውድየንት ላጢዝም እጝቅዝቅ፦ ‹ቲግይርን ሊሚድጥን› የር ድቈኵን።»

Highlight

Share

Copy

None

Want to have your highlights saved across all your devices? Sign up or sign in

Videos for ማርቈስት ወንጌል 13