ማቲወስት ወንጌል 23

ፈወነ 23

እየሱስ ፈሪሳኒዝመ ወሪትት ኽግ ክንሰጢዝዛት ዊቅሰጘ

(ማር. 12፡38-39፤ ሉቃ. 11፡43-46፤ 20፡45-46)

1እንዝ ግረ እየሱስ ኽዝቪዝመ ጝክንደጢዝ እንት የው ዊግቱ፦ 2«ወሪትት ኽግ ክንሰጢዝመ ፈሪሳኒዝ ሙሴት ወምበሪል ጐይጝኵ። 3እንዝ ማጥን ጛይ ክታት ኣዝጘውድየንትቅ ፃቭጥን፤ ሊሚድጥንም፤ ዊገድ ግን ጛይ ዊግትጛንትጘ ሰራሻቍምነ ጝታግቭሪዝጘ ፃቭትርነ። 4ቸልሻው ኻይሉ መውር እፅቍጝ እቀ ጅውሪል መውስጘኵ፤ ጝታቕም ግን ጝታናኒዙ ዘፍርነይዝ እኳ ዳቓቍም። 5እቅ ጛት ቓልጛንስ ማጥን ይጝ ጝታሰቭድቅ እቀ በዊል ሰራሽጘኵ፤ ጝታኽተቭድ ኽየው ፃቭጘኵ፤ ጝታኣልቨይዙ ዘርፍድየንትም ሊጊስጘኵ።#ማቲ. 6፡1፤ ዘዅ. 15፡38፤ ዘዳ. 6፡8። 6ድግስ ጭጝሽጛንድ ኪብረው ስፍረ ፃየነው ቀንጘኵ፤ ምኵራቪስም በውዝ በዊዙ ወምበርድ ፃየነው ቀንጘኵ። 7እኒዝጘ ቈሽ ኣሪ ስፍረይስ እጅርድቅ ጛት ሲለም ያንስመ፦ ‹ክንሰተ!› የው ጭጛንስ በንጘኵ።

8«ክትን ግን ክታክንሰተድ ላውድ ጭቝ ኣቓንስቅ፣ ክትንም ክታስ ክታይ ዚን ኣቕርናንስቅ፦ ‹ክንሰተ!› ይሽትርን ጭጝሽትርነ። 9ቈሽም ክታይርድ ላው ሲመይ ፅበውድ ጭቝ የጝ፤ ኣቓንስቅም ዝቨት ዲጊስ ኣውማውትቅ፦ ‹ኣየ› ይርን ጭጝትርነ። 10ክታሊቅድ ላው ክርስቶስ ጭቝ ኣቓንስቅ፦ ‹ሊቃውንት!› ይሽትርን ጭጝሽትርነ። 11ክታማኽሊስ ክታጊስ ኽየውድ ክታኣገልጋይ ኣጡ።#ማቲ. 20፡26-27፤ ማር. 9፡35፤ 10፡43-44፤ ሉቃ. 22፡26። 12ጝቕምት ንየስ ንየስ ሸውድቅ ዝጥቅ ይጡ፤ ጝቕምት ዝጥቅ ሸውድቅ ግን ንየስ ይጡ።#ሉቃ. 14፡11፤ 18፡14።

13«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! እጅር ጥዋየጘ ምጝግስተሰማያትትት ሚረድየንት ዲቭርነኵ፤ ክትንም ጥዋይርነቅም፤ ጥውጥጘ በነቍድዛትም ኪልክልድርነኵ። 14እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ታይተዝ ፃቭርነው ክታፀለውትድ ሊጊስርና ልጀጊርዳኒዝ ጝንጥድ ቢዝብዝርነኵ፤ እንዝ ማጥን ክትን ወሰው ፍርድ ለምርትርንቅ። 15እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ላው እጅርዝ ክታኻይማነውትድ ኣምንስትርነ ባኽርዝመ ዝቨዝ ጅልውርነኵ፤ ኣምነት ግረ ግን ክታጊስ ሊን ወሰው ገኻነምት ዅር ፃቭርነኵ።

16«እፈ ኻርቭርነቅ ቃወጥ ክታትርነ! ወየው! ‹መቅደስ ጝኒዝ ፃረው ኣውማው እጅርድቅ ውርም እጀው፤ መቅደስ ጝኒዙ ዊርቀይዝ ፃረውድ ግን ጝፃርድ ችጝጡ› ይርነኵ። 17እፈ ኻርቭርነቅ ኻጘፃን ክታትርነ! ዊርቀይስመ ውርቀድየንት ቀድሰው መቅደስ ጝኒስ ኣውየን የጝ ዲቈውድ? 18እኒዝጘም፦ ‹መሰውየዝ ፃረው ኣውማው እጅርድቅ ውርም እጀው፤ መሰውየይዝ ዲጊዙ ሚቨይዝ ፃረውድ ግን ጝፃርድ ችጝጡ› ይርነኵ። 19እፈ ኻርብ ክታትርነ! ሚቨይስመ ሚቨድየንት ቀድሰው መሰወየይስ ኣውየን የጝ ዲቈውድ? 20እንዝ ማጥን መሰዊየይዝ ፃረውድቅ፣ መሰዊየይዝመ ጝዲጊል ፅበዊዝቅ ፃረኵ። 21መቅደስ ጝኒዝ ፃረውድም መቅደስ ጝኒዝመ ጝግል ዘላልም ፅበው እደረስ ፃረኵ። 22ሲመይዝ ፃረውድም እደረት ዙፋኒዝመ ጝዲጊል ጐየዊዝ ፃረኵ።#እሳ. 66፡1፤ ማቲ. 5፡34።

23«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ኣዝሙድ፣ እንስላል፣ ከሙን፣ የነቍ ቅመማኒስ እደረስ ኣስራት ይውርነኵ፤ ዊገድ ግን ኽጊል ፅበቍ ዋንጥድ የነትም ጭቅ የው ፍርድ ፊርደነውድ፣ ስቝርት ፃቨነውድ፣ ኣምንሽተነውድ፣ እንዛትቅ በትርንኵርኑ፤ እዛት በሪጝቀ እንዛት ፃቭትርነ ጥውሸው ዊኑ።#ዘሊ. 27፡30። 24እፈ ኻርቭርነቅ ቃወጥ ክታትርነ! ክታዝይርነዊስ ብወረት ዊር ሽርን ማልድርነኵ፤ ግምለድ ግን ዝርቕ ሽርነኵ።

25«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ፅወይዝመ ድስቲዝዙ ዲግድየንት ዊርሽርነኵ፤ ኣቒድየን ግን ቀመነውዝመ ስቭርየዝ እቻቕኩ። 26እፈ ኻርቨ ፈሪሳነው ክተ! በውገ ፅወይዝመ ድስቲዝዙ ጝኣቒድየንት ዊር ሽ፤ ኣይንድ ዲግድም ዊር ይጡ።

27«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ጝታዲግድ ነጭመረቅዝ ሊልቅሽጝ ቀሰቍ ኣቕጝ እትለቍ መቃቭራን ተክርነኵ፤ ጛይ ጝታኣቒድ ክረቍዙ ጛፅዝመ ስኽፍሸው ዊገዝቅ እቻቐቍ ጛይ።#ኻወ. 23፡3። 28ክትንም ቢዘድ ፃድቃን ተክርነኵ፤ ክታኣቒድ ግን ተክዘነውዝመ ጭቕትዝ እቻቕኩ።

29«እፈ ተክዘጥ ወሪትት ኽግ ክንሰጥዝመ ፈሪሳንዝ ክታትርነ! ወየው! ነቭያታኒዝ መቃቭርድ ተስርና፣ ፃድቃኒዝ መቃቭርድም ገይፅስርና፦ 30‹ኽፅም ይናኣቅለ ዚምኒዝ ዊናን ነቭያታኒዝ ብርድ ቅብሰነውዝ ይናኣቅሊጅቅ ተቫቭርሻይነቅም ዊኑን› ይርነኵ። 31እንዝም ነቭያታንድዛት ቍወቍ እቂዝ ቝር ኣቐነውድ ክታቕም ሚዝርድርነኵ። 32እደስለመ ክትንም ክታኣቅልድ ኪርመጘውድየንት ፋፅምጥና! 33እፈ ሲቭረይዝ ቝር ሳብል ክታትርነ! ግኻነምት ፍርዲስ ኣወይርን ኣምልጠነው ቸልትርንቅ?#ማቲ. 3፡7፤ 12፡34፤ ሉቃ. 3፡7። 34እንዝ ማጥን ነቭያታን፣ ጥቨቭኝጥ፣ ክንሰጥ፣ ክታጐ እፃጭር፤ እንዛጊስም ላው ላውድ ቁትርንቅ፤ ላው ላውድ ሲቅልትርንቅ፣ ላው ላውድ ክታምኵራቪል ጊርፍትርንቅ፣ ኻትመዝ ኻትመም ጅግዝትርንቅ። 35ኣቓንስቅም ፃድቅ ኣቭየልቲስ ኪርም መቅደስ ጝኒዝመ መሰወየይዝ ማኽሊል ቍውርነው በራክዩት ዅር ዘካርያስት ብሪል ኣሽ ዝቨይል ቅብስርነው ፃድቃኒዙ ብረይዝቅ ክትን ዋቕርሽርነቅ የጝ።#ዘፍ. 4፡8፤ 2ዚመ. 24፡20-21። 36እማንዝ የኵን፤ እንዝቍዝቅ እን ዅለድ ዋቕርሽጡ።

37«እየሩሳልየም! እየሩሳልየም! ነቭያታንድዛት ቁረር ክተ! ክጐ እፃሸቝድዛትም ቕርጘዝ ድድብረር ክተ! ጅርወ ጝርጨጭንድዛት ጝርኪፊዝ ኣቍልዳንትጘ ክቝርድዛት ኣኽቭጨ ዋቐን በን ዊኑን? ክትን ግን በኒርነቅም። 38ነስየ እንወ! ክታጝንድ በድመ ኣቕ እዳጡ።#የር. 22፡5። 39እንዝ ማጥን፦ ‹ኣደረት ሽዝ ተረውድ በርክሸው የጝ› ይትርኒስቅ ይት ሊጘት ቓላይርነቅም የኵን።»#መዝ. 118፡26።

Currently Selected:

ማቲወስት ወንጌል 23: ኽምጣኣኪ

Highlight

Copy