ማቲወስት ወንጌል 24

ፈወነ 24

ኣልሚዝ ኻትሸነይዙ ምልክትድ

(ማር. 13፡1-2፤ ሉቃ. 21፡5-6)

1እየሱስም መቅደስ ጝኒስ ፍ ፊራንድ ጝክንደጥድዛይ ጝጐ ኣልትጝ፦ «እኒን መቅደስ ጝንድ ኣወይ ተሲተጘ ቓልደኵመ?» ይ። 2ጘጝ ግን፦ «እኒንትቅ ቓልድርነኵመ? እማንዝ የኵን፤ ቕርጘዝ ዲጊል ቕርጘ ኲንሸጘ ፋይሪጝቀ እዳቓውም» ዩ።

3ጘጝም ደቭረ ዘይት ኣበይል ጐይ ፅባ ጝክንደጥድ ጝታለ ጝጐ ኣልትጝ፦ «እስቲ ድቍ! እን ዊግትረውድቅ ኣቐው ግርየድ ኣውን የጝ? ክተረነይዝመ ኣልሚዙ ኻትሸነይዙ ምልክትድስ ወረጘ የጝ?» ይጝ ዋቕር። 4እየሱስም ዊስ እንት ዩ፦ «ኣውማውቅ ቀሳየጘ ጣጝቅቅጭጥን። 5ንቕፀቍ፦ ‹ያን ክርስቶስ የጝ› ይጛ ይሽዝ ተርጥቍ፤ ንቕፀቍድዛትም ቀስጥቍ። 6ኣጭነዝመ ኣጭነዙ ጂጘዝ ወሽትርንቅ፤ እንቅ ኣጠ ግድ የጝ፤ ዊገድ ግን ኻትሸነድ ገነ ኣቓንስቅ እንዝ ዳጝግፅርነቅ ጣጝቅቅጭጥን። 7ኽዝቭ ኽዝቭዝ ዲጊል ጕጡ፤ ምጝግስትም ምጝግስትዝ ዲጊል ጕጡ፤ ጝሉ ጝሉ ስፍረይልቅ ግድርዝመ ዝቨዙ ኒንቅሸነዝ ኣጡ። 8እንቅ ቅምትዙ ጭጝቅት ኪርምሸነ የጝ።

9«ኣይንድ ክታት ሚከረል ዲቍስጝ ይውጥቍ፤ ቁጥቍ፤ ይሽዝቍዝም እጅርዝቅ ሽክሽርነቅ ኣትርንቅ።#ማቲ. 10፡22። 10ኣይንድም ንቕፀቍድ ፅጋርጥቍ፤ ጛስ ጛይ ላውድ ላየድየንት ዲቍስ ይውጡ፤ ጛስ ጛይም ጐርትጥቍ። 11ንቕፀቍ ኻሽወጥ ነቭያታን ጕጥቍ፤ ንቕፀቍድዛትም ቀስጥቍ። 12ኣመፂዙ ንቕፀይስ ጐውም ንቕፀቍ እቅዙ ፍቅርድ ቓዝቕዝጡ። 13ኻትሸነይል ኣሽ ፀናቐው ግን ጘጝ ቓድጡ።#ማቲ. 10፡22። 14ኽዝቭዝቅ ሚዝር ኣቓንስ ማጥንም እኒን እደረት ምጝግስትዙ ወንጌልድ ኣልሚልቅ ሲቭክሽጡ፤ ጝዝ ግረም ኻትሸነድ ተርጡ።

15«ነስየ ነቭይ ዳንየል ዊግተው ድዘርዙ እርኵስነድ ቀድስሽተው ስፍረይል ችብር ቓልድርናንድ ኣንቭቨው እጅርድ ኣስክስነ።#ዳን. 9፡27፤ 11፡31፤ 12፡11። 16ኣይንድ ይዅዳ ፅበቍድ ኣብቒዝጐ ሰይጝነ። 17ኽድም ዲጊል ዊነውድም ጝን ኣቒዝቍ ጝጐዝድ ፊስጠ ጊሚነ።#ሉቃ. 17፡31። 18ቺዝጝል ዊነውድም ጝኣልቨድ ጕይጠ እግርገ ዋጥሪነ። 19ኣይንትቍ ግርቂዝ ጊዙረቍዝመ ኒቭሰቍ መሉጅንጥዝ ወየው። 20ዊገድ ግን ክታሰይተድ ጫረዝ ዊንም ቅዳምሲንቭት ግርየዝ ኣቓየጘ ፃልይጥን። 21ኣይንድ ኣልም ፋጥርሸት ኪርም ነኳን ኣሽ ኣቕ ኣርቓው፣ ነስየይስቅም ጝት ተከው ተራው ኽየው ሚከረ ኣጡ። 22ጛይ ግርቅድ እጅጛቍ ኣጛን ላው እጅርም ቓዳው ዊኑ፤ ዊገድ ግን ጛይ ግርቅድ ማርፅሽተቍ እቂዝ ማጥን እጅጝጥቍ።

23«ኣይንድ ኣውማው እጅር፦ ‹እንወ ክርስቶስ እንል እኩ› ዊንም፦ ‹እድል እኩ› ይሽ ኣምንትርነ። 24ኻሰትኝጥ ክርስቶሳንዝመ ኻሽወጥ ነቭያታንዝ ጕጥቍ፤ ጛጭስ ቸልሻንስ ማርፅሽተቍድ እኳ ቀስጛንስ ማጥን ዲንቅሰቍ ታምራንዝመ ምልክታንዝ ቓሊስጥቍ።#ዳን. 12፡1፤ እት. 7፡14።

25ነስየ እኒንትቅ በውግስ ድቍኩን። 26«እንዝ ማጥን፦ ‹እንወ በራኸይል እኩ› ይጝሽ ፍትርነ፤ ‹እንወ እትላው ስፍረይል እኩ› ይጝሽም ኣምንትርነ።#ሉቃ. 17፡23-24። 27መቭረቅ ምስራቂስ ፍ ምእራቪል ኣሽ ኣቭርኻንትጘ እጅር ዅርት ተረነድም ጘጝት ኣጡ። 28ቢድን ፅበዊል ኣሞጥ ኣኽቭሽጘኵ።#ሉቃ. 17፡37።

29ጛይ ሚከረዝቍ ግርቂዝ ግረ በውዝ

‹ኰረየን ጥምትቲ፤

ኣርቨየንም ጝርብርኻንድ ይዋይም፤

ፅግልውጥድም ሲመይስ ሊቭጥቍ፤

ሲመይ ፅበቍ ኻይላንድም ተናውጥሽጥቍ።›#እሳ. 13፡10፤ 34፡4፤ ኽዝ. 32፡7፤ እዩ. 2፡10፤31፤ 3፡15፤ እት. 6፡12-13።

30ጝዝ ግረ እጅር ዅርት ምልክትድ ሲመይስ እትልጡ፤ ኣይንድም ዝቨት ዊግንድቅ ዋይ ዋይ ይጛ ሊዝጥቍ፤ እጅር ዅርም ኻይልዝመ ኽየው ክቭርዝ ኣቕ ሲመይቱ ድምነዝ ተራንድ ቓልጥቍ።#ዳን. 7፡13፤ ዘካ. 12፡10-14፤ እት. 1፡7። 31ኽየው መለከትዙ ድመ ወይሰቍ ጝመላካንድዛትም እፃጡ፤ ጛይም ኣልሚዝቍ ሲዘ ማይዘናኒስ ሲመይት ደርቸይስ ኪርምጝ ላየ ደረችይል ኣሽ ጝማርፅሸተቍ እቅድዛት ኣኽቭጥቍ።

32«እን ዊገድየንት ተረድሽትርናንስ ማጥን በለስ ዘፍ ተከ ኣቕርነ፤ ጝርኝጫፋንድ ጭጭቭጛንድ ጝርኻፅድም ሊልምድጛንድ ኣይንድ እየ ችጘጘ ኣርቕርነኵ። 33እኒዝጘም እንዛትቅ ቓልድርናንድ እጅር ዅርት ተረነድ ችጘጘ ኣርቕጥን። 34እማንዝ የኵን፤ እንቅ ኣጢስ ኣሽ እን ዅለድ ዲቋውም። 35ሲመይስመ ዝቨስ ዲቍጥቍ ይቃልድ ግን ስሪስቅ ዲቋውም።»

ኣደረት ተረነ ግርየድ ኣርቕሽታው ኣቐነውድ

(ማር. 13፡32-37፤ ሉቃ. 17፡26-30፤34-36)

36«እቸን ግርየየንስመ ሰትሸንት ግን ኣይር ኣሽጚ ሲመይ ፅበቍ መላካንድም ኣጝሽ ዅርም ኣቕሽ ኣውማውቅ ኣርቓውም። 37ልክ ነዅት ዚምኒዝ ኣቐጘ እጅር ዅርት ተረነይዝም ጘጝት ኣጡ።#ዘፍ. 6፡5-8። 38ድሰው ኣቘድ ተረነዊስ በውገ ነዅ ሚርክቪል ጥወው ግርየይል ኣሽ እቅድ ዅጛ፣ ዚይጛ፣ ድውጛ፣ ገባሽጛ ዊን። 39ኣይንትል ኣሽ ውርቅ ተርጠጘ ኣርቒጝቀ ድጝግት ድሰው ኣቘድ ተር ፃርግ ፊሰጘ፣ እጅር ዅርት ተረነድም ጘጝት ኣጡ።#ዘፍ. 7፡6-24። 40ኣይንት ግርየይዝ ሊጘ እቅ ላው ቺዝጝል ላው ኣቕጝ ውላጥቍ፤ ላውድ ፊስሽትጡ ሊጘትረድ እዳጡ። 41ሊጘ እቍን ላው ኣቕጝ እጕ ዛጥቍ፤ ላይሸን ፊስሽትቲ ሊጘትረየን እዳቲ። 42ነስየ ክታኣደረት ተረነ ግርየድ ኣርቓይርነቅ ኣቕርናንስቅ ነቃቕርን ሊሚድጥን። 43«ዊገድ ግን እኒንት ኣርቕጥን፦ ቓፅጘ ኻሪዝ ኣውየን ሰትዝ ተርጠጘ ወነድ ኣርቓን ነቃቕ ሊሚድጠ ዊኑ፤ ጝጝንድም ዲፍርሽጢስቅ በራውም ዊኑ። 44እጅር ዅር ተረውድ ኻስቪርነው ግርየይዝ ኣቓንስቅ ክትንም ኣስልሽርን ፅብጥን።#ሉቃ. 12፡39-40።

45«ጝታዅረድየንት ጝሰት ጝሰቲዝ ይዋንስ ማጥን ወነድ ጝበተሰቪል ይመው ኣምንሸው ብልኽ ኣገልጋይድ ኣው የጝ? 46ወነድ ተራንድ እነይ ጝውላድየንት ፋፅማ ችጝሸው እድየን ኣገልጋይድ ቀቫሸው የጝ። 47እማንዝ የኵን፤ ወነድየን ጝት ጝንቭርቲልቅ ይምጡ። 48ዊገድ ግን እድየን ኣገልጋይድ ጭቓ ኣቓን፣ ‹ይኣደረድ፤ ደይጡ፤ ነን ተራውም› የው ኻስቫን፣ 49ላጥ ኣገልጋያን ጝፃምጥድዛትም ጣዝጠ ኪርማን፣ ራቐጢጅቅም ዃን ዚያን፣ 50ጘጝ ኻስቪየው ግርየይዝመ ኣርቒየው ሰቲዝ ጝኣደረድ ተር፣ 51ጝት ሊጘትል ቀቭ ማልጡ፤ ጝእድል ፊንተድም ተክዘጢጅቅ ፃቭጡ፤ ጝግልም ሊዝዝመ እርቍጣን ገጫዘው ሚከረዝ ኣጡ።»

Currently Selected:

ማቲወስት ወንጌል 24: ኽምጣኣኪ

Highlight

Copy