ሉቃስት ወንጌል 4

ፈወነ 4

እየሱስ ዳቪለውስቲስ ፊትንሸጘ

(ማቲ. 4፡1-11፤ ማር. 1፡12-13)

1እየሱስም መንፈስ ቅዱስዝ እቻቕ ዮርዳኖስ ዊርቨይስ ዋጥሩ፤ በውዝም በራኸል ፊርጠ ማጥን መንፈስ ቅዱስ ሚርዩ። 2ጝጊስም ኣርቨ ግርቅ ዳቪለውስቲስ ፊትንሹ፤ ጛይ ግርቂዝም ውርም ዂየው፤ ግርቅድ ኣቢትጘጘም ግድርዱ።

3ዳቪለውስም፦ «ክት እደረት ዅር ኣረውዝየ እስቲ እን ቕርጘድ ኻበሸ ኣነ ይር ኣዝ» ዩ። 4እየሱስም፦ « ‹እጅር እደረት ቃልዝምጚ ሚዝ ጭቝ ፅባውም› ይሽት ፃፍሽኩ» የው ዊሱ።#ዘዳ. 8፡3።

5እንዝ ግረ ዳቪለውስ እየሱስት ኽየው ኣበል ፊስ ኣልሚዝ ምጝግስታንድቅ ሊንስ ቓሊስ በር፦ 6«እንዛይ ምጝግስታኒዙ ስልጣኒዝመ ክቭሪዝቅ ይጭስ ነይሽትኩ፤ ያንም ይበነዊዝቅ ይወር ኣቓንስቅ ክጭስ ነቅጭር። 7እንዝ ማጥን ይጭስ ሲግድራን እኒንቅ ኩ ኣጡ» ዩ። 8እየሱስም፦ « ‹ክኣምላክ ኣደረስ ጭቝ ሲግጭ፤ ጝት ጭቝም ኣምልክ› ይሽት ፃፍሽኩ» የው ዊሱ።#ዘዳ. 6፡13።

9እንዝ ግረ እየሩሳልየም ፊስ መቅደሲዝ ጕልላቲል ችብስ፦ «ክት እደረት ዅር ኣረውዝየ እስቲ እኒስ ቍልቍለ ሊቭ! 10ምላሰንድም፦ ‹ክት ሊሚድጥጘ ማጥን ጝመላካንድ ኣዝጡ።#መዝ. 91፡11። 11ክልኵጣንድም ቕርጘይዝ ፅጋራይጘጘ ጝታናንጣኒዝ ክት ጕይጝ ፃይጥቍ› ይሽት ፃፍሽኩ» ዩ።#መዝ. 91፡12። 12እየሱስም፦ « ‹ክኣምላክ ኣደረት ፊትንትንተ› ይሽት ፃፍሽኩ» የው ዊሱ።#ዘዳ. 6፡16። 13ዳቪለውስም ጝፊተነድ እጝቅትቅ ኻተት ግረ ላየ ሚቸው ግርየ ችጝጢስ ጝጊስ ቲት ፊሩ።

እየሱስ ገሊለስ ከንሰነው ኪርመጘ

(ማቲ. 4፡12-17፤ ማር. 1፡14-15)

14እየሱስም መንፈስ ቅዱስት ኻይልዝ ገሊለ ትጐ ዋጥሩ፤ ጝጂጘድም ኻግሪልቅ ወይሽቱ። 15ጘጝም ጝታምኵራቫኒልቅ ክንሳ ዊኑ፤ ኽዝቭድም ጝክንስኒዝቍዝ ሚዝየንዛ ዊኑ።

16እንዝ ግረ እዅርሽ ሊግዘው ጝኻግር ናዝሪት ፊሩ፤ ጝክንደጘም ቅዳምሲንቭት ግርየዝ ምኵራቪል ጥዉ፤ ኣንቭንቭጠም ጕ ችብሩ። 17ነቭይ ይሳያስት መፃፍድም ይው፤ ጘጝም መፃፍድ ጋልፃንድ፦

18«እደረት መንፈስድ ይግል እኩ፤

ጘጝም ድኺዝ ወንጌል ሲቭክጨ ማጥን፣

መራሸቊዝ እኪተነው፣

ኻርቨቊዝም ቓለነው ቸልጛንስ ኣውጅጨ ማጥን፣

ጥቒተቊድዛትም ኻርነይ ፊስጨ ማጥን ይት ይምኩ።

19እደረ ጝኽዝቭድ ኻርነይ ፊሰይ

ዚምንሸንትም ኣውጅጨ ማጥን ይት እፃቕኩ»#እሳ. 61፡1-2።

ይሽት ፃፍሸውድየንት ችጙ።

20እንዝ ግረ መፃፍድ ዲቭ እፈረይዝ ይው በር ጐዩ፤ ምኵራቪል ዊነቍድም ጝት ትክ ሽጝ ቓልጛ ዊን። 21ጘጝም፦ «እኒን ነን ወሽርነው መፅኻፊዙ ቃልድ ንጭ ፋፅምሹ» ዩ።

22እጝቅቅም ጝቍዝ ቀሰውድ ዊግትጛ ዊን፤ ጝምቸይስ ፈው ፃገዝ እቻቐው ቃሊዝቍዝም ጊርምሽጛ፦ «እኒን ዮሴፍት ዅር ኣየውቀ?» ይጛ ዊን።

23ጘጝም፦ « ‹ጥላ ጕርየ ክቕምንት ቓዝ› ይሽተው ተከድ ጣቅስትርነጘድ ጥርጥርም እጀር፤ ቈሽም፦ ‹ቅፍርናዀምቲስ ፃቭረውድቅ ወሽነጘ እንል በገዘ ክኻግሪልም ፃቭ› ይትርንቅ» ዩ። 24እንደ ገነ ቈሽ እንት ዩ፦ «እማንዝ የኵን፤ ነቭይ በገዘ ጝኻግሪስ ኪብራውም።#ይዃ. 4፡44። 25እማንተውድ ድቍጨር ወጭጥን፦ ይልያስት ዚምኒዝ ሻቘ ምትዝመ ግቨርዝ ሲመይስ ስወ ኪልክልሻንስቅ ኻግርድቅ ግድርድ ዊናንት ኰር#1ነገ. 17፡8-16። እስራየል ኻግሪል ንቕፀቍ ልጀጊርዳን ዊን። 26ይልያስ ግን ጛጊስ ላይሸንትጐም እፃሺየው፤ ዊገድ ግን ሲዱነት ኻግሪል ስራብተ ይሽትረይ ኪውትል ፅብረይ ላይ ልጀጊርድትል የጝ እፃሸውድ። 27ነቭይ የልሳት ዚምኒዝም እስራየል ኻግሪል ንቕፀቍ ለምፃማን ዊን፤ ዊገድ ግን ሰውርየቱ ንማንቲስለ ጛጊስ ላው እጅርም ቓዲየው» ዩ።#2ነገ. 5፡1-14።

28ምኵራቪል ዊነቍድም እጝቅቅ እኒንት ወሽጛንድ ጭቕጘ ቈጣሽ። 29ጐይጝ ዊንጘዊስም ጕጝ ኻትመይስ ቢዘ ፊስ፤ ጝትም ቍልቍለ ማልጥጘ በንጝ ጝታኻትመየን ተሲትር ዊንደው ኣበይዝ ገመይል ፊስ። 30ጘጝ ግን ጝታማኽሊዝ ቀድ ፊሩ።

እየሱስ ላው እጅሪስ ጋኒን ፊሰጘ

(ማር. 1፡21-28)

31እንዝ ግረ እየሱስ ገሊለት ኣውራጀይዝወ ቅፍርናዀምትል ፊሩ፤ ጝጊስም ቅዳምሲንቭት ግርየዝ ኽዝቭድ ክንስጠ ኪርሙ። 32ክንሳ ዊነውድም ስልጣን ጕርየይዝጘ ኣቓንስቅ ጝቃሊዝቍዝ ጊርምሻ ዊኑ።#ማቲ. 7፡28-29። 33ምኵራቪልም ጭቓ ጋኒን ጨው እጅር ዊኑ፤ ጘጝም ጝድመድ ኣጕስ ሸው ቓፁ። 34«ወየው ናዝሪትቱ እየሱስወ! ክጅቅ ውር ውላ ፃይነቅ? ይናት ድስተመ ተትረውደ? ክት ኣው ኣረጘ ቃል ኣርቕኩን፤ ክት ቃል እደረት ቅዱስድ የጝ» ዩ። 35እየሱስም፦ «ዝም ይር እን እጅሪስ ፍ» የው ጋስፁ። ጋኒንድም እጅርድየንት ኽዝቪዝ ማኽሊል ማል በር ውርም ጒድዪይጝቀ ሊቅ ፊሩ።

36እቅድም እጝቅቅ ጊርምሽ፤ ጛስ ጛይም፦ «እን እጅርድ ኣወየው ትዛዝ የጝ ኣዘውድፈ? ስልጣንዝመ ኻይልዝ ጋኒናንድዛት ኣዘኵ፤ ጛይም ኣዚትጝ ፍጘኵ» ይ። 37ጝጂጘድም ጛይ ኻግራኒልቅ ወይሽቱ።

እየሱስ ንቕፀቍ ፅውዝጅንጥ ቓዘጘ

(ማቲ. 8፡14-17፤ ማር. 1፡29-34)

38እንዝ ግረ እየሱስ ምኵራቪስ ፍ ስሙንት ጝኒል ጥዉ፤ ስሙንት ጣስንም ኻይሉ ብረዝ ፅዊትር ዊንች፤ እየሱስትም ጝርት ቓዝጠ ማጥን ጭው። 39ጘጝም ጝርጐ ኣልት የው ችብር ብረድየንት፦ «ሊቅ» የው ዊግቱ፤ ብረድም ጝርጊስ ሊቁ፤ ጚይም ጕር ኣቭንውዘነው ኪርምች።

40ኰረድ ጥውጠ ጓንድም ጝሉ ጝሉ ፅውዘዝ ፃይሽቍ ፅውዝጅንጥ እቅድቅ ጝጐ ነስ፤ ጘጝም እጝቅትቅ ጝናኒዝ ዳቓ ቓዙ። 41ጋኒናንድም፦ «ክት እደረት ዅር የጝ!» ይጛ ቓፅጛ ንቕፀቍ እቂስ ፍ፤ ጘጝ ግን ጋስፁ፤ ጘጝ ክርስቶስ ኣቐጘ ኣርቕጝ ዊንጛንስቅ ዊግትጥጘ ማጥን ፊቅዲየውም።

42ቅሻንድም እየሱስ እጅር እጀው ገለል የው ስፍረል ፊሩ፤ እቅድዛይም ደምዝጛ ዊን፤ ጝጐም ተርጝ ጛጊስ ቲት ፊራየጘ ኪልክልጥጘ በን። 43ጘጝ ግን፦ «ላጥ ኻትምጢልም ፊጥ እደረት ምጝግስቲዙ ወንጌልድ ሲቭክጨ ጥውሸኵ፤ ምላሰንድም ያን እፃጨውድ እንዝ ማጥን የጝ» ዩ። 44ኣቓንስቅም ገሊለት ምኵራቫኒልቅ ጅልዋ ክንሳ ዊኑ።

Currently Selected:

ሉቃስት ወንጌል 4: ኽምጣኣኪ

Highlight

Copy