ሉቃስት ወንጌል 3

ፈወነ 3

ጣምቀተ ይዃንስት ክንስንድ

(ማቲ. 3፡1-12፤ ማር. 1፡1-8፤ ይዃ. 1፡19-28)

1ቂሳር ጢቫሪወስ ኒግሰው ፅጭ ኣኰትረ ምቲዝ፦ በንጥየንቱ ቢላጠውስም ይዅዳት፣ ኺረውድስም ገሊለት፣ ጝዝን ፊልበውስም ኢጡርያስስመ ጥራኰኒደውስስ፣ ሊሳኒወስም ሳቪላኒስት ቅምጛ ሲጝቀ፣ 2ኻነስመ ቀያፈስም ካኽነጣነ ኻልቅጥ ኣቕጝ ፅብጛ፣ እደረት ቃልድ በራኸይል ፅበው ዘካርያስት ዅር ይዃንስ ትጐ ተሩ። 3ይዃንስም ዮርዳኖስት ዊርቨይዝ ጋቢል ፅበቍ ኻግራኒልቅ ጅልዋ፦ «ክታኽጥያቲስ ይቅር ይሽትንርነ ማጥን ንስኻ ጥውርና ጣምቅጭጥን» ያ ክንሳ ዊኑ። 4እንም ኣቐውድ፣ ነቭይ ይሳያስ፦

«እንወ በራኸይል ኣቕ፦

‹ኣደረት ጒደነድየንት ኣስልጥን፤

ጥርግየድየንትም ጭቅሽጥን።

5ጭልዋድም እቻነ፣

ኣበይዝመ ኵምብልተይዝም ዝጥቅ ይነ፤

ጠማም ጒደነድም ጭቅ የው፣

ሰስረው ጒደነድም ሊጨው ኣነ።

6እቀ ዚረድቅ እደረት ቓዝትድ ቓልነ›

የው ቓፀው እጅርዙ ድመ ተርጡ»

የው ፃፍ ዊናንስቅ የጝ።#እሳ. 40፡3-5።

7ይዃንስም ጣምቅሽጥጘ ጝጐ ተረቍ እቅድዛት እንት ያ ዊኑ፦ «እፈ ሲቭረይዝ ቝር ክታትርነ! ተረው እደረት ቍጣይስ ኣምልጥትርነ ማጥን ክታት ኣው ማኽሩ?#ማቲ. 12፡34፤ 23፡33። 8ነስየ ንስኻ ጥውርነጘ ኣራሰው ሰቭ ሰራጭጥንጚ ክታእዘኒዝ፦ ‹ይናኣይር ኣቭርኻም እኩ› ይርና ማክኽሽትርነ፤ እደረ እንዛይ ቕርጚስ ኣቭርኻምስ ዅል ይወነው ቸልጠጘድ ድቈኵን።#ይዃ. 8፡33። 9ነስየ ዘፍድየንት ጝስሪስ ቀቭ ማልጠ ባፅ ኣስልሽኩ፤ ኣቓንስቅም ቀሰው ፍር ፍርዛው ዘፍድቅ ቀቭሽት ልየል ማልሽትጡ።»#ማቲ. 7፡19።

10ኽዝቭድም፦ «እደስለ ወረጘ ሰራሽነ» ያ ይዃንስት ዋቕራ ዊኑ። 11ጘጝም፦ «ሊጘ ኣልብ ፃየውድ ላውድ እጀዊዝ ይውነ፤ ዀነው ፃየውድም እጀዊዝ ኣድልነ» ያ ዊኑ። 12ቀረጥ ቀቨቍም ጣምቅሽጥጘ ጝጐ ተርጝ፦ «ክንሰተወ! ይንሰ ወረጘ ሰራሽና?» ይ።#ሉቃ. 7፡29። 13ጘጝም፦ «ኣዚትርነዊስ ንየ ቈሽርን ኪፍልስትርነ» ዩ። 14ዊተድርድም ቈሽ፦ «ይንሰ ወረጘ ሰራሽና?» ይጝ ዋቕር፤ ጘጝም፦ «ቃብረ ጊንዝቭ ግፍዝ ቀምትርነ፤ እጅርም ኻሽትዝ ኪስትርነ፤ ክታምኻየድ ክታቕምስ ኣቐኵ» ዩ።

15ኽዝቭድም ክርስቶስት ተረነድ በንዝ ሊሚዳ ዊኑ፤ ይዃንስት ቓላንድም ጝእዘኒዝ፦ «እኒን ክርስቶስመ ኣጢ?» ያ ኻስቫ ዊኑ። 16ይዃንስም እጝቅዝቅ እንት የው ዊግቱ፦ «ያንስ ኣቝዝ የጝ ጣምቀውድ፤ ዊገድ ግን ይጊስ ዲቈው ላየ ተርጡ፤ ያንም ጝፃብጣንድ እኳ ፊስጨ በቃቐር ኣይቀም፤ ጘጝም ክታት መንፈስ ቅዱስዝመ ልየዝ ጣምቅጡ። 17ጝዊርነድ ዊር ሽጠ፣ ጝዚርወድም ጝቅፋነይል ድውጠ ማጥን መሽን ጝናኒል እኩ፤ ገለቨድየንት ግን ስተነ እጀው ልየዝ ቃጥልጡ።» 18ቈሽም ላየ ንቕፀቍ ምኽራንዝ ማኽራ ወንጌል ሲቭካ ዊኑ።

19ገሊለት ቅመው ኺረውድስት ግን ጝዝን ፊልበውስት እውነ ኺረውድያደት ድዋንስቅ፣ ላየ ኻቨረ ዊገም ሰራሻ ዊናንስቅ ቃርሹ። 20ኺረውድስ ግን እንዝ ዲጊል ላየ ጭቕትም ቈሽ፣ ይዃንስት ወኽኒ ጝንል ድዉ።#ማቲ. 6፡17-18።

እየሱስት ጣምቀሸነይዝመ ጝዚረይዝ እግዝትድ

(ማቲ. 3፡13-17፤ ማር. 1፡9-11)

21ኽዝቭድቅ ጣምቅሸት ግረ እየሱስ ቈሽ ጣምቅሹ፤ ፃልያ ሲጝቀም ሲመይ ቢቱ። 22መንፈስ ቅዱስም እርግቨት ተክ ኣካልዝ ጝግል ጊሙ፤ ሲመይስም፦ «ያን ቀነው ይዅርድ ክት የጝ፤ ክቍዝ ዲስ የኵን» የው ድመ ተሩ።#ዘፍ. 22፡2፤ መዝ. 2፡7፤ እሳ. 42፡1፤ ማቲ. 3፡17፤ ማር. 1፡11፤ ሉቃ. 9፡35።

23እየሱስም ክንስጠ ኪርማንድ ጝእድሚድ ሰውርጝን ምት ኣጠ ኣቕ ዊኑ፤ ኽዝቪዝም እየሱስ ዮሴፍት ዅር ተካ ዊኑ፤ ዮሴፍም የሊት ዅር፤ 24የሊ ማቲት ዅር፣ ማቲ ለዊት ዅር፣ ለዊ ሚልኪት ዅር፣ ሚልኪ የውነት ዅር፣ የውነ ዮሴፍት ዅር፤ 25ዮሴፍ ማታትዩት ዅር፣ ማታትዩ ኣሙፅት ዅር፣ ኣሙፅ ናዀምት ዅር፣ ናዀም የስሊምት ዅር፣ የስሊም ናጊት ዅር፤ 26ናጊ ማኣትት ዅር፣ ማኣት ማታትዩት ዅር፣ ማታትዩ ስምየት ዅር፣ ስምየ ዮሴፍት ዅር፣ ዮሴፍ የውደት ዅር፤ 27የውደ የውናንት ዅር፣ የውናን ርየስት ዅር፣ ርየስ ዘሩቫቪልት ዅር፣ ዘሩቫቪል ሰላትያልት ዅር፣ ሰላትያል ነሪት ዅር፤ 28ነሪ ሚልኪት ዅር፣ ሚልኪ ኻዲት ዅር፣ ኻዲ ቈሳምት ዅር፣ ቈሳም የልሙዳምት ዅር፣ የልሙዳም የርት ዅር፤ 29የር የውሲት ኵር፣ የውሲ የሊዛርት ዅር የሊዛር የውራምት ዅር፣ የውራም ማጣትት ዅር፣ ማጣት ለዊት ዅር፤ 30ለዊ ስሙንት ዅር፣ ስሙን ይዅዳት ዅር ይዅዳ ዮሴፍት ዅር ዮሴፍ የውናንት ዅር፣ የውናን የልያቂምት ዅር፤ 31የልያቂም መልየት ዅር፣ መልየ ማይናንት ዅር፣ ማይናን ማጣትት ዅር፣ ማጣት ናታንት ዅር፣ ናታን ዳዊትት ዅር፤ 32ዳዊት እስየይት ዅር፣ እስየይ እየቪድት ዅር፣ እየቪድ በዊዝት ዅር፣ በዊዝ ሳልመንት ዅር፣ ሳልመን ናሰውንት ዅር፤ 33ናሰውን ኣሚናዳቭት ዅር፣ ኣሚናዳቭ ራምት ዅር፣ ራም ኣርኒት ዅር፣ ኣርኒ የስረምት ዅር፣ የስረም ፋሪስት ዅር፣ ፋሪስ ይዅዳት ዅር፣ ይዅዳ ያይቈቭት ዅር፤ 34ያይቈቭ ይሳቅት ዅር፣ ይሳቅ ኣቭርኻምት ዅር ኣቭርኻም ታረት ዅር፣ ታረ ናኰርት ዅር፤ 35ናኰር ሰሩግት ዅር፣ ሰሩግ ረኡት ዅር፣ ረኡ ፋሊቅ ዅር፣ ፋሊቅ ኣቭየርት ዅር፣ ኣቭየር ሳላት ዅር፤ 36ሳላ ቃይንምት ዅር፣ ቃይንም ኣርፋክሳድት ዅር፣ ኣርፋክሳድ ስየምት ዅር፣ ስየም ነዅት ዅር፣ ነዅ ላሚኽት ዅር፤ 37ላሚኽ ማቱሳለት ዅር፣ ማቱሳለ ኺነኵት ዅር፣ ኺነኵ ያርየድት ዅር ያርየድ መላልየልት ዅር፣ መላልየል ቃይናንት ዅር፤ 38ቃይናን ኺነውስት ዅር፣ ኺነውስ ሰይትት ዅር፣ ሰይት ኣዳምት ዅር ኣዳም እደረት ዅር የጝ።

Currently Selected:

ሉቃስት ወንጌል 3: ኽምጣኣኪ

Highlight

Copy