ሉቃስት ወንጌል 2

ፈወነ 2

እየሱስ እዅርሸጘ

(ማቲ. 1፡18-25)

1ኣይንት ወርኻቲዝም ኣልሚዙ ኽዝቭድቅ ሚዝግቭሽ እጊጠ ማጥን ቂሳር#2፡1 ቂሳር፦ ረውምያነ ንጕሳኒዝ ዘውድዙ ሽ ኣቓንድ ጝትርጕምድ፦ «ንጕሳነ ንጕስ» የነት የጝ። ኣውግስጠውስቲስ ትዛዝ ፉ። 2እኒን ምዝጋቨድም ቀረኒወስ ሰውርየት ቅማንት ኰር ፃቭሽተው ኽዝቭዙ በውረ እግዘ የጝ። 3ኣይንድም ኽዝቭድቅ ሚዝግቭሽጠ ጝኻትመ ኻትመይል ፊሩ።

4ዮሴፍም እዅርሸውድ ዳዊትት ዚረይስ ኣቓንስቅ፣ ናዝሪት የነይ ገሊለት ኻትመየንቲስ ጕ ይዅዳት ኻግሪዝወ በተልኺም የነይ ዳዊትት ኻትመትል ፊሩ። 5ፊረውድም ጊዙትር ዊንደይ ጝወገነ ማርያም ጅቅ የጝ። 6ጝግልም ፅብጛ ጝርእዅረነ ግርየድ ችጙ። 7ጝርባር ዅርድየንትም እዅርች፤ ድድመድየንትም ፃርቀዝ ጥቅልች፤ ኣብን ጨነይስም ስፍረ ብራንስቅ መድርል ኽሪስች።

ምቕዝ መላከን እትልጘጘ

8ጘጝ ኻግሪልም ጝታቢቅድ ሊሚድጛ በራኸ ጨቍ ምቕ ዊን። 9ኣይንድም ኣደረት መላክ ተር ጝታጋቢል ችብሩ፤ ኣደረት ክቭርዙ ብርኻንም ጝታጅልወይል ኣቭርኹ፤ ጛይም ጭቕጘ ዳጝግፅ። 10መላክድም፦ «እንወ ኽዝቪዝቅ ኽየው ዲስተ ኣቐው ኣቭዝርተ ክታጭስ ድቍጨ የጝ ጐውትርነ። 11ንጭ ዳዊትት ኻትመይስ ክታጭስ ቓዘተ እዅርሽኩ፤ ጘጝም ኣደረ ክርስቶስ የጝ። 12ምልክትድም እኒን የጝ፦ ድድመ ፃርቀዝ ጥቅልሽ መድርል ኽርየጘ ችጝትርንቅ» ዩ።

13ድጝግትም ንቕፀቍ ሲመይት ሰራዊታን እደረት ሚዝየንዝጛ ጘጝ መላኪጅቅ እትል። 14ጛይም፦

«ሲመይስ እደረስ ክቭር፣

ዝቨይስም እደረት ቀነቍ እቂዝቅ ዲግተ ኣነ»

ይጛ ዊን። 15መላካንድ ጛጊስ ቲትጝ ሲመይትጐ ፊርጘት ግረ ምቕድ፦ «ኣደረ ኣምላክ ይናጭስ ጋልፀው እን ዊገድ ቓልነ ማጥን በተልኺም ፊርነ» ይ። 16በውዝም ፊርጝ ማርያምስመ ዮሴፍስ፣ ድድመድም መድርል ኽርየጘ ችጝ።

17ምቕድም እኒንትቅ ቓልጘት ግረ ኽፃኒዝቍዝ ጛጭስ ድቍሸውድየንትቅ ጂጝዝ። 18እኒንት ወሸውድቅ ምቕድ ድቍጘው ዊገይዝ ዲንቅሹ። 19ማርያም ግን እኒንትቅ ጝርእዘኒዝ ፃይር ሊሚድራ ዊንች። 20ምቕድም እጝቅትቅ ጛጭስ ድቍሽተጘ ኣቕ ችጛንስቅ እደረት ሚዝየንዝጛ ዋጥር።

ድድመ እየሱስት መቅደስ ጝኒል ፊስጘጘ

21ጊርዘነው ሰውጠትረ ግርየድ ችጛንድም፣ ገነ ጊዝውርሺጝቀ መላክድ ፊሰጘ ጝሽድ እየሱስ ይሽቱ።#ዘሊ. 12፡3፤ ሉቃ. 1፡31። 22ወሪትት ኽግዝ ኣዚተጘ፣ ላይ እውነ ዅር እዅርደት ግረ ዊር ይረቍ ግርቅድ ኻትሽጛንድ፣ ዮሴፍስመ ማርያምስ ኽፃንድየንት ኣደረስ ኣልስጥጘ እየሩሳልየም ፊስ።#ዘሊ. 12፡6-8። 23እኒንት ፃቭጘውድም፣ ኣደረት ኽግዝ፦ «ባር ኣቐው ግልወ ዅርድቅ ኣደረስ ይውሽተው ቅዱስ ኣጡ» ይሽት ፃፍሸውድየንት ፋፅምጥጘ የጝ።#ዘፀ. 13፡2፤ 12። 24ቈሽም፦ «ሊጘ ደበጥ፣ ዊንም ሊጘ ርግቫንዝቍ ጨጭን ምስዋይት ፃቭ ኣልስነ» ይሽት ፃፍሽ ዊኑ።

25ኣይንድም እየሩሳልየም ፅበው ስሙን ይሽተው ፃድቅ ትጉኽ እጅር ዊኑ፤ ጘጝም እስራየልት ዲብስሸተነድ ሊሚደው መንፈስ ቅዱስ ጨው እጅር ዊኑ። 26ጝጭስም መንፈስ ቅዱስ፦ «ኣደረት መሲኽድ ቓሊጝቀ ክራርም» የው ድቍ ዊኑ። 27ኣይንድም መንፈስ ቅዱስዝ ቃውሽ መቅደስ ጝኒል ፊሩ፤ ዮሴፍስመ ማርያምስም ኽጊዙ ስረቲዝጘ ፋፅምጥጘ ኽፃን እየሱስት ፃይጝ መቅደስ ጝኒል ጥውጛንድ፣ 28ስሙንም ድድመድ ለምር ኣቅቭ፦ እደረት እንት ያ ሚዝየንዝጠ ኪርሙ።

29«ኣደረወ! ነስየ ይጭስ ዊግትረው ክቃሊዝጘ፣

ያን ክኣገልጋይድ ዲግተዝ ሲነቭሽ፤

30-31እቅዝቅ በዊል ኣስልደው ክቓዝንድየንት፤

ይእልጣኒዝ ቓልኩን።

32ጘጝም ኣኽዛቫኒዝ እጝቅትቅ ጋልፀው ብርኻን፣

ክኽዝቭ እስራየልስ ቈሽ ክቭር የጝ።»

33ዮሴፍስመ ኽፃኒዝኘስም ጝቍዝ ዊግሸው ዊገይዝቍዝ ጊርምሽጛ ዊን። 34ስሙንም ጛት በርክ በር ኽፃኒዝኘ ማርያምት፦ «እን ኽፃንድ እስራየልስ ንቕፀቍድ ሊቭጛንስ፣ ንቕፀቍድ ቈሽ ጕጛንስ ማጥን ምላሰን ኣጡ፤ ጝት ተቃውምሸቊዝም ምልክት ኣጡ። 35እንዝም ንቕፀቍ እቅዝ እዘኒል ፅበው ስውር ኻለይድ ጋልፅሽትጡ፤ ክትም ክእዘንድ ኽዝንዙ ሰይፍዝ ሲቭሽጡ» ዩ።

36ኣይንድም ኣሲርት ዊግኒዝወ ፋኑየልት ቝረ፦ «ኻነ» የነይ ላይ ጭቕጘ ጊንደይ ነቭይ እውነ ጝግል ዊንች፤ ጚይም ጝርመሉሲጝቀት ግልወይጅቅ ላጘጠ ምት ፅብር ዊንች። 37ጝዝለም ጝርእድሚድ ሰውጥርጝን ሲዘ ኣጢስቅ ፃምዝመ ፀለውትዝ ኻር ጊርቅ ኣግልግልዳ መቅደስ ጝኒስ ቲቲጝቀ ልጀጊርድ ኣቕር ፅብች። 38ጚይም ኣይንድ ዮሴፍስመ ማርያምስታጐ ኣልትር እደረት ሚዝየንዝንተ ኪርምች፤ ኽፃኒዝቍዝም እየሩሳልየምት ኻርነይ ፈነ ግርየድ ቲስፈዝ ሊሚደቍ እቂዝቅ ዊግትራ ዊንች።

39ጝኣቅልድም እደረት ኽግድ ኣዘጘ እጝቅትቅ ፋፅምጘት ግረ ገሊለት ኣውራጀይዝወ ጝታኻትመ ናዝሪትል ዋጥር።#ማቲ. 2፡23። 40ኽፃንድም ሊግዛ ጣጝክራም ፊሩ፤ ጥቨቭኘም ኣቑ፤ እደረት ፃገድም ጝግል ዊኑ።

እየሱስ መቅደስ ጝኒል ፊረጘ

41ዮሴፍስመ ማርያምስም ኣምረ ኣምረዝ ፈዝየ በልድ ኪብርዝጥጘ እየሩሳልየም ፊርጛ ዊን።#ዘፀ. 12፡1-27፤ ዘዳ. 16፡1-8። 42እየሱስ ፅጭ ሊጘ ምት እቻቓንድም በሊዙ ስረቲዝጘ እየሩሳልየም ፊር። 43በሊዝቍ ግርቅድ ኻትሽጝ ጝታኻግር ዋጥርጛንድም፣ እፈረ እየሱስ እየሩሳልየም እዳቕ ዊኑ፤ ዮሴፍስመ ማርያምስ ግን እዳቐጘ ኣርቒየቍም ዊን። 44ጒደንቊጅቅ እኩ ተኩዝ ላው ግሪ ጒደነ ፊር፤ ጝዝለ ጝታዚምዳኒል ጝታፃምጢልቅ ደምዘነው ኪርም። 45ጛጊስ ብጛንድም ደምዝጛ እየሩሳልየም ዋጥርጝ ፊር።

46ሻቘ ግርቅዝ ግረም ክንሰጢዝ ማኽሊል ጐይ ወሻ ዋቕራም መቅደስ ጝኒስ ችጝ። 47ጝግል ዊነቍድም ጝኣስክሰነዊዝመ ጝዊሰው ዊገይዝ ወሽጛ ጊርምሽጛ ዊን። 48ጝኣቅልድም ጝት ቓልጛንድ ጭቕጘ ጊርምሽ፤ ጝኘም፦ «ይዅር ቈደይ! ውረ ይናት እነየው ዊገ ፃቭሩ! ውረ ኪርስመ ይስ ጨጝቅሽን ደምዝናቀ ሳብጢነቅ» ይች። 49ጘጝም፦ «ውር ፃቭትርነ ደምዝርኑ? ይርት ጝኒል ጐይጨ ጥውሽጠጘ ኣርቒርነቅመ?» ዩ። 50ጛይ ግን ጘጝ ዊግተው ዊገድየንት ኣስክሲየቍም።

51እንዝ ግረ ላብጠ ጛጅቅ ናዝሪት ዋጥሩ፤ ጛጭስም ኣዚታ ዊኑ፤ ጝኘ ግን እን ዊገድቅ ጝርእዘኒዝ ፃይር ሊሚድራ ዊንች። 52እየሱስም እደረት በዊል፣ እቀ በዊልም ጥቨቭዝ፣ ግርማ መጐስዝመ ሊግዝዝቅ ሊግዛ ዊኑ።#1ሳሙ. 2፡26፤ ምሳ. 3፡4።

Currently Selected:

ሉቃስት ወንጌል 2: ኽምጣኣኪ

Highlight

Copy