ይዃንስት ወንጌል 21
21
ፈወነ 21
እየሱስ ላጝጠ ክንደጢዝ እትለጘ
1እንዝ ግረ እየሱስ ጥቭርያደውስ ባኽሪዝ#21፡1 ጥቭርያደውስ ባኽር ይሽተውድ ገሊለቱ ባኽር ይሽተውድ የጝ። ጋቢስ እንደ ገነ ጝክንደጢዝ እትሉ፤ እትለውድም እኒዝጘ ዊኑ፦ 2ስሙን ቢጥሮስ፣ ዲድመስ ይሽተው ተውማስ፣ ቃነ ዘገሊለቱ ናትናየል፣ ዘቭዲወስት ቝርስመ ክንደጢስ ላጥ ሊጘድ ኣቕጝ ላብጠ ዊን። 3ስሙን ቢጥሮስም፦ «ኻዘ ፃውርጨ ፊጨ የጝ» ዩ። ጛይም፦ «ይንም ክጅቅ ተርነ የጝ» ይ። ፊርጝም ታኰይል ጥው፤ ዊገድ ግን ጘጝ ኻሪዝ ላው ኻዘም ፃዪየቍ።#ሉቃ. 5፡5።
4ቅሻንድም እየሱስ ባኽር ደዪይል ችብሩ፤ ክንደጥድ ግን እየሱስ ኣቐጘ ኣርቒየቍም። 5እየሱስም፦ «እፈሪነ! ኻዘ ፃይርንኵርኑመ?» ዩ፤ ጛይም፦ «እጅነቅም» ይ። 6ጘጝም፦ «መረቭድየንት ታኰይዝ ለዊዝጐቱ ማልጥን፤ ችጝትርንቅ» ዩ። ጛይም መረቭድ ባኽሪል ማል፤ ንቕፀው ኻዘም ፃይሻንስቅ መረቭድየንት ዊትረነ ብ።#ሉቃ. 5፡6። 7ኣይንድ እየሱስ ቀነው ዊነው ክንደተድ ቢጥሮስት፦ «ኣደረቃል የጝ» ዩ። ስሙን ቢጥሮስም፦ «ኣደረቃል የጝ» የነውድ ወሻንድ ጭውዝ ዊነው ጝኣልቨድየንት ሲር ባኽሪል ጥዉ። 8ላጥ ክንደጥድ ግን ባኽሪስ እክልድጘውድ ሊጘ ላ ቈሪ ጭቝ ኣቓንስቅ ኻዘ እቻቐው መረቭድየንት ዊትርጛ ታኰይዝ ተር።
9ዝቨይል ጊምጛንድም ልየ ኻኽመዝመ ሚዝ ቓል፤ ኻኽመይዝ ዲጊልም ኻዘ ዊኑ። 10እየሱስም፦ «ነን ፃይርነው ኻዘይስ ነስጥን» ዩ። 11እንዝ ማጥን ስሙን ቢጥሮስ ታኰይል ፍ ላዝ ኣኵርጝን ሻቘ ኽየቝ ኻዝ ፃየው መረቭድየንት ሳ ዝቨይል ዊትሩ፤ መረብድየን እንቝጠ ኻዘ ፃይሽም እኳ ቀድሺየውም። 12እየሱስም፦ «ላቝጥን ዅጥን» ዩ። ጝክንደጢስም፦ «ክት ኣው የጝ?» የው ዋቕርጠ ዲፍረው ኣውማውም ዊኒየው፤ ምላሰንድም ኣደረ ኣቐጘ እጝቅቅ ኣርቕጝ ዊን። 13እየሱስም ተር ሚድየንት ጒ ይዉ፤ እኒዝጘም ኻዘድየንት ይዉ። 14እየሱስ ክርጘይስ ጐት ግረ ጝክንደጢዝ እትላንድ እኒን ሸወትረ ግርየ የጝ።
እየሱስ ቢጥሮስስ ይወው ኽድርድ
15ዅጝ ኻትጘት ግረ እየሱስ ስሙን ቢጥሮስት፦ «የውነት ዅር ስሙንወ! እንዛጊዝ ዲቍስር ይት ቀንደኵመ?» ዩ። ጘጝም፦ «ኣደረወ! የያ! ያን ክት ቀነር ኣቐጘ ክቕም ኣርቕረኵ» ዩ። እየሱስም፦ «ይኻጅድ ዀሽ» ዩ። 16እየሱስም ሊጘት፦ «የውነት ዅር ስሙነወ! እማን ይት ቀንደኵመ?» ዩ። ጘጝም፦ «ኣደረወ! የያ! ያን ክት ቀነር ኣቐጘ ክቕም ኣርቕረኵ» ዩ። እየሱስም፦ «ይቢቅድ ሊምጭ» ዩ። 17ሸወትም፦ «የውነት ዅር ስሙንወ! ይት ቀንደኵመ?» ዩ። ቢጥሮስም ሸውን፦ «ይት ቀንደኵመ?» የው ዋቕሩዝ ኻዝን፦ «ኣደረወ! ክት እጝቅትቅ ኣርቕረኵ፤ ያን ክት ቀነር ኣቐጘም ክቕም ኣርቕረኵ» ዩ። እየሱስም፦ «ይቢቅድ ዀሽ። 18እማን እማን የኵን! ክት ውርጋጠ ዊንዳንድ ክኣልቨድ ክቕም ከምሽር ክት ሸዊዝጐቅ ፊትራ ዊንዱ፤ ሽሚር ኣራንድ ግን ክናንድ ዘርጋትር፤ ላየድም ተር ከምስ ክት ፊርተ በናይረዊዝጐ ፊስጡ» ዩ። 19እየሱስ እኒንት የውድ ቢጥሮስ ኣወይን ክረነውዝ እደረት ኪብርዝጠጘድ ቓሊስጠ የጝ። እንዝ ግረ ቢጥሮስት፦ «ለው ቲክን!» ዩ።
20ቢጥሮስም እግርገ ብሩ ያንድ፣ እየሱስ ቀነው ዊነው ክንደተድ ጛት ቲክና ቓሉ፤ እኒን ክንደተድ በውገ ድረይ ዅጛንድ እየሱስትል ኣልት፦ «ክት ዲቍስ ይውጡድ ኣው የጝ?» የው ዋቕረውድ የጝ። 21ቢጥሮስም ጝት ቓላንድ፦ «ኣደረወ! እኒንሰ ኣወይጣ?» ዩ። 22እየሱስም፦ «ያን ዋጥርጪስቅ ጘጝ ርዅየዝ ዊናንስ ክውር ግድ? ክት ግን ይት ቲክን» ዩ። 23እንዝ ምላሰንዝ፦ «እኒን ክንደተድ ክራውም» የነው ጂጘ ክንደጢል ጂጚቱ። ዊገድ ግን እየሱስ፦ «ያን ዋጥርጪስቅ ጘጝ ርዅየዝ ዊናንስ ክውር ግድ?» ዩጚ፦ «ጘጝ ክራውም» ዪየውም።
24እንዛይዝቍዝ ሚዝርደውድ፤ እንዛትም ፃፈውድ እኒን ክንደተድ የጝ፤ ጝሚዝርነይድም እማን ኣቐጘ ኣርቕነኵን።
25እየሱስ ፃቨቍ ላጥ ንጭፀቍ ዊቅም እኵ፤ እጝቅ ላውዝ ላው ፃፍሻን፣ ፃፍሸቍ መፃፋንድዛት ኣልምድ ጝቕም መውረነው ቸልጠም ዊኒየው ተከኵ።
Currently Selected:
ይዃንስት ወንጌል 21: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
