ኻወርየታኒዙ ሰቭ 1

ፈወነ 1

እየሱስ ኣርገጘ

1ቲወፍለውስወ! እየሱስ ሰራሽጠዝመ ክንስጠዝ ኪርመው ጝሰቭድቅ በውረ ይመፃፊዝ ፃፍኩን።#ሉቃ. 1፡1-4። 2እንም ሲመይ ኣርገው ግርየይል ኣሽ ጝቕም ማርፀቍ ኻወርየታኒዝ መንፈስ ቅዱስት ኣመካይነትዝ ይወው ጝትዛዝድ የጝ። 3ቈሽም ንቕፀው ሚከረ ለምር ክረት ግረ፣ ፅበው ኣቐጘ ንቕፀው ማስረጀዝ ጛጭስ እትሉ፤ ኣርቨ ግርቅም ጛጭስ እትላ እደረት ምጝግስትድየንት ክንሱ። 4ጛጅቅም መድል ጐይ ፅባ፦ «እየሩሳልየምስ ፍርነቅ! ያን ድቋንድ ወሽርነው ኣይር ነየው ቲስፈድየንት ሊሚድጥን።#ሉቃ. 24፡29። 5ይዃንስ ኣቝዝ ጣምቃ ዊኑ፤ ክትን ግን ዊትቍ ግርቅዝ ግረ መንፈስ ቅዱስዝ ጣምቅሽትርንቅ» የው ኣዙ።#ማቲ. 3፡11፤ ማር. 1፡8፤ ሉቃ. 3፡16፤ ይዃ. 1፡33።

6ጛይም ሊንስ ኣኽቭሽጝ ፅብጛ፦ «ኣደረወ! እስራየልት ምጝግስትየንት ዊስቱ ግርየድ ንጭመ?» ይጝ ዋቕር። 7ጘጝም፦ «ኣይር በገዘ ጝስልጣኒዝ ዊስነው ዚምኒዝመ ግርየይዝ ኣርቐነው ክታጭስ ነይሽቲየውም። 8ዊገድ ግን መንፈስ ቅዱስ ክታግል ጊማንድ፣ ኻይል ለምርትርንቅ፤ ኣይንድም እየሩሳልየምስ፣ እጝቅ ይዅዳስ፣ ሰማርየስመ ዝቨት ደርቸይልቅ ኣሽ ይሚዝረጫን ኣትርንቅ» ዩ።#ማቲ. 28፡19፤ ማር. 16፡15፤ ሉቃ. 24፡47-48። 9እኒንት ዊግት በር ጛይ ቓልጛ ንየ ትጐ ንየስ ንየስ ያ ሲመይ ኣርጉ፤ ድምነም ለምር ጝታእልጣኒስ ሲውሩ።#ማር. 16፡19፤ ሉቃ. 24፡50-51። 10ጛይም ጘጝ ፊራንድ ሲመይ ትጐ ትክ ይጝ ቓልጛ ሲጝቀ ፃረቍ ኣልብ ሲረቍ ሊጘ እቅ ተርጝ ጝታባጊል ችብርጝ፦ 11«እፈ ገሊለት እቅ ክታትርነ! ውር ቃጥ የጝ ሲመይ ሲመይ ቓልድርና ችብትርን ፅብርነውድ? እኒን ሲመይ ኣርጋንድ ቓልድርነው እየሱስ ኣቕሽ ሲመይ ፊራንድ ቓልድርነጘ ዊስ ሲመይስ ዋጥር ተርጡ» ይ።

ይዅዳት ፊንተዝ ማትያስ ማርፅሽተጘ

(መዝ. 109፡8)

12እንዝ ግረ ደቭረ ዘይት ኣበይስ እየሩሳልየም ትጐ ዋጥር፤ ደቭረ ዘይት ኣበድ እየሩሳልየምስ እክልደውድ ቅዳምሲንቭት ጒደነይዝ ቝጠ የጝ።#1፡12 ቅዳምሲንቭት ጒደነ የነውድ ላው ኪለው ሚትር ኣጠ ጒደነ የጝ። 13እየሩሳልየምም ዋጥርጝ ጝታፅብጘው ዲቭሪል ጥው፤ እንዛይም፦ ቢጥሮስ፣ ይዃንስ፣ ያይቈቭ፣ እንድርያስ፣ ፊልበውስ፣ ተውማስ፣ በርተለሚወስ፣ ማቲወስ፣ እልፊወስት ዅር ያይቈቭ፣ ቀንየተ ይሽተው ስሙንስመ ያይቈቭት ዅር ይዅዳስ ጛይ።#ማቲ. 10፡2-4፤ ማር. 3፡16-19፤ ሉቃ. 6፡14-16። 14እንዛይም ላጥ እቍን ጅቅ፣ እየሱስትኘ ማርያምስመ ጝፅንስ ጅቅም ኣቕጝ ላብጠ ቲግይጝ ፃልይጛ ዊን።

15ኣይንት ግርቂዝም፣ ቢጥሮስ ላዝ ለርን ኣቐቍ ጝፃምጢዝ ማኽሊስ ጕ ችብር እንት ዩ፦ 16«ይፅንወ! እየሱስት ፃየቍ እቂዝ ቃወተ ኣቐው ይዅዳት ማጥን መንፈስ ቅዱስ በውገ ዳዊትት ምቸይዝ ዊግተው መፃፊዙ ቃልድ ፋፅምሽጠ ጥውሸው ዊኑ። 17ጘጝ እጅርድ ይናጅቅ ላው ኣቕ እጊት እኒን ኣግልግለውትድ ኣግልግለነው እድል ችጝ ዊኑ። 18ኣነጚ እን እጅርድ ጝሰራሸው ጭቓ ሰቪዝ ቃጥ ወየ ፃቭን ይውንቍ ቍርሻኒዝ ቺዝጝ ጅቩ፤ ጘጝም ጝግል ጝግምባሪዝ ደፋሽ ሊቭ ጝሰውነትድ ሊጘትል ብጥቕ ዩ፤ ጝዝለማጠድም ዚርግፍሹ#ማቲ. 27፡3-8።። 19እን ዊገድም እየሩሳልየም ፅበቊዝቅ ኣርቕሽቱ፤ ኣቓንስቅም እድ ዝቨድ ጝታቋቈይዝ፦ ‹ኣኪልዳመ› ይሽት ጭጝሹ፤ ጝትርጕምድም፦ ‹ብረዙ ዝቨ› የነት የጝ። 20እንም ኣቐውድ መዝሙርዙ መፃፊዝ፦

«ጝፅብጘድ ድር ኣነ፣

ጐየው እጅርም ችጝሺነ፤

ጝይምትድየንትም ላየ እጅር ፊስነ»

ይሽት ፃፍሽ ዊናንስቅ የጝ።#መዝ. 69፡25፤ 109፡8። 21ኣቓንስቅም ኣደረ እየሱስ ይናማኽሊል ዋጥርጥራንድቅ ይናጅቅ ዊነቊስ፣ 22ቈሽም ጣምቀተ ይዃንስቲስ ኪርምጝ ኣደረ እየሱስ ሲመይ ኣርግጢስቅ ኣሽ ይናጅቅ ዊነቊ እንዛይ እቂስ ላውድ ይናጅቅ ኣደረት ክርጘይስ ጐነይዝ ሚዝር ኣጠ ጥውሸኵ።»#ማቲ. 3፡16፤ ማር. 1፡9፤ 16፡19፤ ሉቃ. 3፡21፤ 24፡51።

23እንዝ ግረ ኢየስጠውስ ይጘው በርስያን የነው ዮሴፍመ ማትያስስ ኣልስ። 24ጝዝለም፦ «ኣደረወ! ክት እጅርዝ እዘንድቅ ኣርቕረር የጝ፤ እንዛይ ሊጘ እቂስ ክት ማርፅረውድየንት ይናጭስ ቓሊሽ። 25ይዅዳ በገዘ ጝስፍረይል ፊራንድ ማል በረው እኒን ኣግልግለውቲዝመ ኻወርየነቲዝ ለምረው እጅርድየንት ክት ክቕም ይም» ይጝ ፃልይ። 26እነይጝ ፃልይጘት ግረ እፀ ማል፤ እፀድም ማትያስትል ችጙ፤ ጘጝም ፅጭ ለው ኻወርየታኒጅቅ እጊቱ።

Currently Selected:

ኻወርየታኒዙ ሰቭ 1: ኽምጣኣኪ

Highlight

Copy