ይዃንስት ወንጌል 20
20
ፈወነ 20
እየሱስ ክርጘይስ ጐጘ
(ማቲ. 28፡1-8፤ ማር. 16፡1-8፤ ሉቃ. 24፡1-12)
1ሸወጪዙ በወትረ ግርየይዝ#20፡1 ዊንም ኽየሲንቭት። ግረቨዝ ወገግ ያንድ፣ መግደላዊት ማርያም መቃቭሪል ፊርች፤ መቃቭርድ ዲቭሽት ዊነው ቕርጘድም ጊልብርሽ ዊኑ። 2እንዝ ማጥን ስሙን ቢጥሮስስመ እየሱስ ቀነው ዊነው ክንደተይል ውጢራ ፊትር፦ «ኣደረት፣ መቃቭሪስ ፊስጝኵ፤ ኣውል ፊስጘጘም ኣርቓይነቅም» ይች።
3ቢጥሮስስመ ላየ ክንደተይዝም በውዝ ጕጝ መቃቭሪል ፊር። 4ጝታቪልም ላብጠ ውጢጛ፣ እድየን ላየ ክንደተድ ቢጥሮስት ቃውስ መቃቭሪል ችጙ። 5ጘጝም ፍጥ የው መቃቭርድየንት ቓላንድ ፃረው ኻር ኣልቨድ ጝግል ፅበጘ ቓሉ፤ ኣነጚ ኣቒ ጥዊየውም። 6ስሙን ቢጥሮስም ቲክን መቃቭሪል ችጙ፤ መቃቭሪልም ጥዉ። ጘጝም ሚግንዚዙ ፃረው ኻርድ ጝግል ፅበጘ ቓሉ። 7እየሱስት ኣውሪል ጣጥምሽ ዊነው ኣልቨድም ሚግንዚጅቅ ኣዪጝቀ ላየ ስፍረል ጝለ ጥቅልሽ ዊነጘ ቓሉ። 8እንዝ ግረ እድየን ቃውስ መቃቭሪል ችጘው ክንደተድ መቃቭሪል ጥዉ፤ ቓልም ኣምኑ። 9እንም ክርጘይስ ጕጠ ጥውሸው ኣቐጘ ዊግተው መፃፊዙ ቃልድየንት ገነ ተረድሺየቍ ዊንጛንስቅ የጝ። 10እንዛይ ሊጘ ክንደጥድም ዋጥርጝ ጝታጝን ፊር።
እየሱስ መግደላዊት ማርያምስ እትለጘ
(ማቲ. 28፡9-10፤ ማር. 16፡9-11)
11መግደላዊት ማርያም ግን መቃቭሪዝ ቢዘይል ችብትር ሊዝራ ዊንች፤ ሊዝራም ፍጥ ይር መቃቭርድ ቓልች። 12ፃረው ኣልቨ ሲረቍ ሊጘ መላካንም እየሱስት እርሸድ ዊነው ስፍረይል ላውድ ኣውርገይል፣ ሊጘትረድ ቈሽ ልኰጐይል ጐይጝ ቓልች። 13ጛይም፦ «እውነ ክተ! ውር ቃጥ የጝ ሊዝረውድ?» ይ፤ ጚይም፦ «ይኣደረት ፊስጝኵ፤ ኣውል ፊስጝ እቝርጘጝም ኣርቐቅም» ይች። 14እኒንት ይርም እግርገ ብሩ ይራንድ እየሱስት ችብር ቓልች፤ ጘጝ እየሱስ ኣቐጘ ግን ኣርቒረይም።
15እየሱስም፦ «እውነ ክተ! ወረጘ ኣቕር የጝ ሊዝረውድ? ደምዝረውድስ ኣውት የጝ?» ዩ፤ ጚይም ኣታክልት ሊሚደተ ተኩዝ፦ «ይኣደረወ! ክት ፊስር ኣቕሽ ኣለቀይ ፊስጨር እቝርደው ስፍረድ ድቍ!» ይች። 16እየሱስም፦ «ማርያም!» ዩ፤ ጚይም እግርገ ብሩ ይር እቭራይስጥ ቋቈዝ፦ «ረቡኒ» ይች፤ ጝትርጕምድም፦ «ክንሰተወ!» የነት የጝ። 17እየሱስም፦ «ገነ ይርትል ኣርጊቀርምነ ዳቕተ፤ ዊገድ ግን ይፅንትል ፊትር፦ ‹ያን ይርትል ክታይርትልም፣ ይኣምላክትል ክታኣምላክትልም ኣርግጭር የውኩ› ይር ድቍ» ዩ። 18መግደላዊት ማርያምም ክንደጢል ፊትር፦ «ኣደረትቃል ቓሉን» ይች፤ ጘጝ የውድየንትም ጛጭስ ድቍች።
እየሱስ ጝክንደጢዝ እትለጘ
(ማቲ. 28፡16-20፤ ማር. 16፡14-18፤ ሉቃ. 24፡36-49)
19ጘጝ ሸወጪዙ በወትረ ግርየይዝ ኵኑ ክንደጥድ ኣይዅዳንድዛት ጐውትጛንስቅ ቢለድ ቘልፍጝ ጝን ኣቒል ጐይጝ ፅብጛ፣ እየሱስ ተር ጝታማኽሊል ችብር፦ «ዲግተ ክታጅቅ ኣነ!» ዩ። 20እኒንት የውም፣ ጝናንጣኒዝመ ጝጒድኒዝ ቓሊሱ፤ ክንደጥድም ኣደረት ቓልጛንድ ጭቕጘ ዲስ ይ። 21እየሱስም እንደ ገነ፦ «ዲግተ ክታጅቅ ኣነ፤ ኣይር ይት እፃቐጘ ያንም ክታት እፃጭር» ዩ። 22እኒንት የት ግረ ጝታግል እፍ ዩነ፦ «መንፈስ ቅዱስት ለምጥን፤ 23እቂዝ ጝታኽጥያትድ ይቅር ይርንሽ ይቅር ይሽትጡ፤ ይቅር ዪይርንሽ ግን ይቅር ይሽታውም» ዩ።#ማቲ. 16፡19፤ 18፡18።
እየሱስ ተውማስስ እትለጘ
24ኣይንድ ፅጭ ሊጘይስ ላውድ ኣቐው ዲድመስ የነው ተውማስ እየሱስ ተራንድ ጛጅቅ ዊኒየውም። 25ላጥ ክንደጥድም፦ «ኣደረትቃል ቓልኑን» ይ። ተውማስ ግን ጛት፦ «ምስማርዝ ሲቭሸቍ ጝናንጣኒዙ ምልክትድ ቓሊቀውዝየ፣ ይዘፍርነድም ምስማራንድ ጥውጘዊል ድው ቓሊቀውዝየ፣ ይናንድም ጝጒድኒል ድው ቓሊቀውዝየ ኣምነቅም» ዩ።
26ሰውጠ ግርቅዝ ግረም እንደ ገነ ክንደጥድ ጝን ኣቒል ዊን፤ ተውማስም ጛጅቅ ዊኑ፤ ቢልድም ዲቭሽትጝ ፅብጛጝ እየሱስ ተር ጝታማኽሊል ችብር፦ «ዲግተ ክታጅቅ ኣነ» ዩ። 27እንዝ ግረ ተውማስት፦ «ክናንድ ይጐ ነሽ፤ ይናንጣንድም ቓል፤ ክናንድም ዘርጋቕር ይጒድኒል ዲ፤ ኣምንጚ ተጠራጥርሽተ» ዩ። 28ተውማስም፦ «ይኣደረ! ይኣምላክም!» ዩ። 29እየሱስም፦ «ቓልዳንስቅ ኣምንድርኵሩ፤ ቓሊጝቀ ኣምነቍድ ግን ቀቫሸቍ ጛይ» ዩ።
ይዃንስ እኒን መፃፍድ ፃፈው ምላሰንድ
30እየሱስ እኒን መፃፊል ፃፍሺየቍ ንቕፀቍ ምልክታንዝቍ ታምራን ጝክንደጢዝ በዊል ፃቭኩ። 31ዊገድ ግን ክትን እየሱስ፣ ጘጝም ክርስቶስ እደረት ዅር ኣቐጘ ኣምንድርናንስ፣ ኣምንድርንም ጝሽⶔዝ ርዅየ ችጝርናንስ ማጥን እኒን ፃፍሽኩ።
Currently Selected:
ይዃንስት ወንጌል 20: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
