ይዃንስት ወንጌል 19
19
ፈወነ 19
እየሱስ ሲቅልሽጠ ፊርድሸጘ
(ማቲ. 27፡15-32፤ ማር. 15፡6-21፤ ሉቃ. 23፡13-25)
1እንዝ ግረ ቢላጠውስ እየሱስት ፊስ ጊርፍሱ። 2ዊተድርድም ኣሚዙ ኣክሊል ኣስልጝ እየሱስት ኣውሪል ደፋቕ፤ ሰረው ኣልቨም ሲስ። 3ጝጐም ኣልትጛ፦ «ኣይዅዳነ ንጕስወ! ሲለም ይነኵን!» ይጛ ጥፊዝ ጣዝጛ ዊን።
4ቢላጠውስም እንደ ገነ ቢዘይል ፍ፦ «እንወ ውርም ኣይንት በደል ቺጚቀር ኣቐጘ ኣርቕርናንስ ማጥን ጝት ቢዘይል ፊስጭር» ዩ። 5እየሱስም ኣሚዙ ኣክሊል ጝኣውሪል ደፋቕ ሰረው ኣልቨም ሲር ቢዘይል ፉ፤ ቢላጠውስም፦ «እንወ እጅርድየን!» ዩ። 6ካኽነጣነ ኻልቅጢዝመ ጝታዊተድሪዝም እየሱስት ቓልጛንድ፦ «ሲቀል! ሲቅል!» ይጛ ቓፅ። ቢላጠውስም፦ «ክታቕም ፊስርን ሲቅልጥን፤ ያነ ጝት ኪስሰው ውረውረ በደልም ችጚቀር» ዩ። 7ኣይዅዳንድም ይን ኽግ ፃይነቅ የጝ፤ ጝቕምት እደረት ዅር ፃቨውድቅ ይናኽጊዝ ሚስርቲዝ ክርጠ ጥውሸኵ» ይ።
8ቢላጠውስም እኒንት ወሻንድ ወሰገቨ ጐውቱ። 9ኻፅር ኣቒልም ጥው እየሱስት፦ «እፈ ክት ኣዊስ የጝ ተትረውድ?» የው ዋቕሩ። እየሱስ ግን ውረውረቅ ዊሲየውም። 10ቢላጠውስም፦ «እፈ ድቋርመ? ክት ሲቅልጨም እክስጨም ስልጣን ፃቀር ኣቐጘ ኣርቓርመ?» ዩ። 11እየሱስም፦ «እደረ ክጭስ ነዪየው ኣቓን ይግል ውረውረ ስልጣን እጅረርም ዊንዱ፤ እንዝ ማጥን ይት ክጭስ ዲቍስ ነየው እጅርድ ወሰው ኽጥያትኘ የጝ» ዩ።
12እንዝ ግረ ቢላጠውስ እየሱስት እክስጠ በኑ፤ ኣይዅዳንድ ግን፦ «እን እጅርድየንት እክስረውዝየ ቂሳርት ወደጅም ኣይረር፤ ጝቕምት ንጕስ ፃቨውድቅ ቂሳርት ተቃዋሚ የጝ!» ይጛ ቓፅ። 13ቢላጠውስም እኒንት ወሻንድ እየሱስት ቢዘይል ፊስ፦ «ጠፍጣፍ ቕርጘ» ይሽተው ስፍረይል ፍርድ ወምበርል ጐዩ፤ እኒን ስፍረድ እቭራይስጢዝ፦ «ገቨተ» ይሽተኵ። 14ግርየድ ፈዝየ በሊዝ ኣስልሸነው፣ ሰትድም ዋልጠ ሳ ኣጠ ዊኑ። ቢላጠውስም ኣይዅዳኒዝ፦ «እንወ ክታንጕስድ» ዩ። 15ጛይ ግን፦ «እለ እክልሽ! እክልሽ! ሲቅል!» ይጛ ቓፅ። ቢላጠውስም፦ «ውረ ክታንጕስድመ ሲቅልጫ?» ዩ። ካኽነጣነ ኻልቅጥድም፦ «ቂሳርትለ ላየ ንጕስም እጅነቅ» ይጝ ዊስ። 16ኻትሸነይዝም ቢላጠውስ እየሱስት ሲቅልጛንስ ማጥን ጛጭስ ዲቍስ ይዉ፤ ጛይም ጝት ፃይጝ ፊስ።
እየሱስ ሲቅልሸጘ
(ማቲ. 27፡32-44፤ ማር. 15፡21-32፤ ሉቃ. 23፡26-43)
17እየሱስም ጝሲቅልሸነ ሚስቅልድየንት መውር፦ «ኣውር በወ» የነው ስፍረይል ፉ፤ እኒን ስፍረድ እቭራይስጢዝ፦ «ጐልጐተ» ይሽተኵ። 18ጛይም ጝት ጝግል ሲቅል፤ ጝጅቅም ሊጘ እቅ ላውድ ጝለዊዝ፣ ሊጘትረድ ጝፃግቪዝ እየሱስትም ጝታማኽሊል ፃቭጝ ሲቅል። 19ቢላጠውስም፦ «ናዝሪትቱ እየሱስ ኣይዅዳነ ንጕስ» ይሽት ፃፍሸው ፅፈሽ ነስ እየሱስት ሚዝቅሊዙ ኣውሪል እቝሩ። 20እየሱስ ሲቅልሸው ስፍረድ ኻትመይዝ ጣቂል ኣቓንስቅ ፅፈሽድየንት ንቕፀቍ ኣይዅዳን ኣንቭቭ፤ ፃፍሸውድም እቭራይስጥዝ፣ ላቲንዝ፣ ግሪክዝ ዊኑ። 21እንዝ ማጥን ኣይዅዳኒዝቍ ካኽነጣነ ኻልቅጥድ ቢላጠውስት፦ «ጝቕም፦ ‹ያን ኣይዅዳነ ንጕስ የጝ ዩ› ይር ፃፍጚ ክት፦ ‹ኣይዅዳነ ንጕስ› ይር ፃፍተ» ይ። 22ቢላጠውስ ግን፦ «ነስየ ፃፈውድየንት ፃፍኩን» ዩ።
23ዊተድርድም እየሱስት ሲቅልጘት ግረ ጝኣልብድ ፊስጝ ጝታይተእጝቅዝቅ ችጛንስ ማጥን ሲዘትል ኣድል፤ ጝናንጣነው ኪተድየንትም ፊስ፤ ናንጣነው ኪተድም ሳነ እጀው ላው ፃቭን ተስኑ ዊኑ። 24ጛይም፦ «እኒንትስ እፀ ማልን ጝችጘዊልቅ ችጝነጚ ቀዳይነቅም» ይ። እንም ኣቐውድ፦ «ይኣልቨድ ኣድልድልሽ፤ ይናንጣነው ኪተይልም እፀ ማል» የው መፃፊዙ ቃልድ ፋፅምሻንስ ማጥን የጝ፤ ዊተድርድም እኒንት ፃቭ።
25እየሱስት ሚስቅሊዝ ጋቢልም ጝኘስመ ጝኘት ስንስ፣ ቀለየውበት እውነ ማርያምስመ መግደላዊት ማርያምስ ኣቕጝ ችብርጝ ዊን።#መዝ. 22፡18። 26እየሱስም ጝኘስመ ጘጝ ቀነው ክንደተይዝ ጝጋቢል ችብርጝ ቓላንድ፣ ጝኘት፦ «እውነ ክተ! እንወ ክዅርት!» ዩ። 27ክንደተየንትም፦ «እንወ ክኘት!» ዩ። ጘጝ ክንደተድም ጚ ሰትሸንቲስ ኪርም ጝርት ጝጝን ፊሱ።
እየሱስ ክረጘ
(ማቲ. 27፡45-56፤ ማር. 15፡33-41፤ ሉቃ. 23፡44-49)
28እንዝ ግረ እየሱስ እጝቅቅ ኻትሸጘ ኣርቕ መፃፊዙ ቃልድ ፋፅምሻንስ ማጥን፦ «ዝቛንጡን» ዩ።#መዝ. 69፡21፤ 22፡15። 29ጝግልም ዃምጥጠው ወይንዙ ሚዝ እቻቐው ጭን ዊኑ፤ ጛይም ዃምጥጠው ወይንድ ሰፍነግ#19፡29 ሰፍነግ ፦ ባኽሪል ቢቊለው እስበውጂዝጘ ኣቝ ማጥ ፃየው ተክል የጝ። እቻዝጝ ኺሰውብ ዚግዝ#19፡29 ኺሰውብ፦ ቀጥ የው ሊግዘው ቍጥቋጠ ተክል የጝ። ፃቭጝ ጝምቸይል ኣልስ። 30እየሱስም ዃምጥጠው ወይንዙ ሚዘድ ጣም በር፦ «ፋፅምሹ!» ዩ። ጝኣውርድየንትም ሳ ዘምበል ሹ፤ ኣይንድም ጝፈውጥድ ፍ።
31ጘጝ ግርየድ ቅዳምሲንቭትስ ኣስልሸነው ግርየ ዊኑ፤ ኣይዅዳንድም ሲቅልሸቍ እቂዙ እርሸድ ሚስቅልል ሲቅልሽ ግርያየጘ፣ ጘጝ ግርየድም ኽየው በል ኣቓንስቅ፣ ሲቅልሸቍ እቅድዛት ጝታዲብ ዲብድ ኪልጝ እርሸድየንት ሚስቅሊስ ጊማንስ ቢላጠውስት ጨው። 32እንዝ ማጥን ዊተድርድ ተርጝ እየሱስ ጅቅ ሲቅልሽጝ ዊነቊድዛት ጝታዲብ ዲብድ ኪል። 33እየሱስ ትጐ ተርጛንድ ግን፣ ጘጝ ክር ዊናንስቅ ጝዲብድ ኪልየቍም። 34ዊገድ ግን ዊተድሪስ ላውድ ጝጒድንድየንት ኣጭነዝ ሲቩ፤ ኣይንድ ጝጒድኒስ ብርዝመ ኣቝዝ ፍጝ ቅብር። 35እኒንት ቓለው እጅርድ ጝሚዝርነይድ ይውኩ፤ ጝሚዝርነይድም እማን የጝ፤ እማን ዊግትጠጘም ኣርቐኵ፤ ክትንም ኣምንድርናንስ ማጥን ሚዝርደኵ። 36እንም ኣቐውድ መፃፍ፦ «ጝጛፂስ ላውቅ ኪልድሻውም» የው ዊግተው ቃልድ ፋፅምሻንስ ማጥን የጝ።#ዘፀ. 12፡46፤ ዘዅ. 9፡12፤ መዝ. 34፡20፤ ዘካ. 12፡10፤ እት. 1፡7። 37ላየ መፃፍዝም፦ «ጘጝ ሲቭጘውድየንት ቓልጥቍ» ይሽት ፃፍሽኩ።
እየሱስ ዲቭሽተጘ
(ማቲ. 27፡57-61፤ ማር. 15፡42-47፤ ሉቃ. 23፡50-56)
38እንዝ ግረ ኣይዅዳንድዛት ጐውታንስቅ ስውርዝ እየሱስት ክንደተ ዊነው ኣርማትያስቱ ዮሴፍ፦ «ኣለቀይ እየሱስት እርሸድየንት ነቅ» የው ቢላጠውስት ጨዉ፤ ቢላጠውስም፦ «ፊሽ» የው ፊቅዱ፤ ጘጝም እርሸድየንት ጊምዝ ፊሱ። 39እንዝ ሚቅ ኻርዝ እየሱስትል ፊር ዊነው ኒቈዲመስም ሰውርጝን ሲዘ ኪለው ግራም ዲቭልቅሸው ከርቭየዝመ ኣውሸረዝ ፃይ ዮሴፍ ጅቅ ፊሩ።#ይዃ. 3፡1-2። 40ጛይም እየሱስት እርሸድ ፊስጝ ኣይዅዳኒዙ ጊንዘነ ስረቲዝጘ ሽቱ ጅቅ ፃረው ኻር ኣልቨዝ ጊንዝ። 41እየሱስ ሲቅልሽ ዊነውዊልም ኣታክልት ስፍረ ዊኑ፤ ኣታክልት ስፍረይልም ኣውማውቅ ዲቭሽቲየው ኣይር መቃቭር ዊኑ። 42ግርየድ ቅዳምሲንቭትስ ኣስልሸነ ግርየ ዊናንስቅ፣ መቃቭርድም ጣቀት ዊናንስቅ እየሱስት ጝግል ዲቭ።
Currently Selected:
ይዃንስት ወንጌል 19: ኽምጣኣኪ
Highlight
Share
Copy
Want to have your highlights saved across all your devices? Sign up or sign in