ይዃንስት ወንጌል 18

ፈወነ 18

እየሱስ ፃይሸጘ

(ማቲ. 26፡47-56፤ ማር. 14፡43-50፤ ሉቃ. 22፡47-53)

1እየሱስ እኒንት ዊግተት ግረ ጝክንደጢጅቅ ኣቕ ቀድረውን ጭልዋይዝ እጂል ከሩ፤ ጝግል ዊነው ኣታክልት ስፍረይልም ጝክንደጢጅቅ ጥዉ። 2እየሱስስመ ጝክንደጢዝ እክሰው ግርየ ጝግል ኣኽቭሽጛ ዊንጛንስቅ፣ ጝት ዲቍስ ይወው ይዅዳ ጘጝ ስፍረድየንት ኣርቐው ዊኑ። 3ይዅዳም ዊተድርዝመ ካኽነጣነ ኻልቅጢስ ፈሪሳኒስም እፃሸቍ መቅደስ ጝኒዝቍ ዊተድሪዝ ቲክንዝ ጘጝ ስፍረይል ተሩ። ጛይም ፋኑስ፣ ሺከ፣ ጠውርመሰሪም ፃይጝ ዊን። 4እየሱስም ጝግል ችጝጡድቅ ኣርቕ ጝታጐ ፍ፦ «ኣውት ደምዝርና?» የው ዋቕሩ። 5ጛይም፦ «ናዝሪትቱ እየሱስታ» ይ። ጘጝም፦ «ያን የጝ» ዩ። ጝት ዲቍስ ይወው ይዅዳም ጛጅቅ ችብር ዊኑ። 6እየሱስም፦ «ያን የጝ» ያንድ እግርገ ፊርጝ ዝቨይል ሊቭ። 7ሊጘትም፦ «ኣውት ደምዝርና?» የው ዋቕሩ። ጛይም፦ «ናዝሪትቱ እየሱስት የጝ» ይጝ ዊስ። 8ጘጝም፦ «ያን የጝ ቃል የርኩን፤ ይት ኣቐውዝየ ደምዝርነውድ እንዛት በጥን ፊርጝነ» ዩ። 9እንም፦ «እንዛይ ክት ነይረቊስ ላውድ እኳ ድሲቀርም» የው ዊግተው ቃልድ ፋፅምሻንስ ማጥን የጝ።

10ስሙን ቢጥሮስም ሰይፍ ፃይ ዊናንስቅ ጝሰይፍድ ምዝ ካኽነጣነ ኻልቀይዝ ኣገልጋይዙ ለወ ቀርዝድየንት ቀቭ ማሉ፤ ኣገልጋይዝ ሽድም ማልኰስ የነው ዊኑ። 11እየሱስ ግን ቢጥሮስት፦ «ከሰይፍድየንት ጝስፍረይል ዲ! ኣይር ነየው ፅወድየንት#18፡11 ፅወ ሚከረድ ጋልፀው ዘይቭየዙ ቃል የጝ። ዝቀቅመ?» ዩ።#ማቲ. 26፡39፤ ማር. 14፡36፤ ሉቃ. 22፡42።

እየሱስ ካኽነጣነ ኻልቀይል ኣልተጘ

12እንዝ ግረ ዊተድርድ ጝታኣዘተይዝመ መቅደስ ጝኒዝቍ ዊተድሪዝጅቅ ኣቕጝ እየሱስት ፃይጝ እፅቍ። 13በዊልም ቀያፈት ኣስን ዊነው ኻነትል ፊስ፤ ቀያፈም ጘጝ ኣምረይዝ ካኽነጣነ ኻልቀ ዊኑ። 14ጘጝም፦ «ላው እጅር ኽዝቪዝ ማጥን ክራን ቺዘኵ» የው ኣይዅዳንድዛት ማኽረውድ ዊኑ።#ይዃ. 11፡49-50።

ቢጥሮስ እየሱስት ኻድየጘ

(ማቲ. 26፡69-70፤ ማር. 14፡66-68፤ ሉቃ. 22፡55-57)

15ስሙን ቢጥሮስስመ ላው ላየ ክንደተዝም ኣቕጝ እየሱስት ቲክንጛ ዊን፤ እኒን ላየ ክንደተድም ካኽነጣነ ኻልቀይዝ ኣርቕሽተው ዊናንስቅ፣ እየሱስ ጅቅ ካኽነጣነ ኻልቀይዝ ኻፅሪል ጥዉ። 16ቢጥሮስ ግን ቢዘ ኻፅር ሚረይል ችብር ዊኑ፤ እድየን ካኽነጣነ ኻልቀይዝ ኣርቕሽተው ዊነው ክንደተድም ዋጥር ፊር ሚረድ ሊሚድረይ ጊርድሸንስ ድቍ ቢጥሮስት ኣቒ ድውሱ። 17ሚረድ ሊሚድረይ ጊርድሸንም ቢጥሮስት፦ «ክት እን እጅሪዝ ክንደጢስ ላውድ ኣይረርቀ?» ይች። ጘጝም፦ «ኣይቀርም» ዩ። 18ወቅትድ ኪበ ዊናንስቅ ኣገልጋያኒዝመ ዊተድሪዝ ልየ ኻውሽጝ ኻኽም ደዪል ችብርጝ ቃውርጛ ዊን፤ ቢጥሮስም ጛጅቅ ችብር ቃውራ ዊኑ።

እየሱስ ካኽነጣነ ኻልቀይዝ ሚርምርሸጘ

(ማቲ. 26፡59-66፤ ማር. 14፡55-64፤ ሉቃ. 22፡66-71)

19ኣይንድ ካኽነጣነ ኻልቀድ እየሱስት ጝክንደጢዝቍዝመ ጝክንስኒዝቍዝ ዋቕሩ። 20እየሱስም፦ «ያን ኣልሚዝ ግልፅዝ ዊግጥኩን፤ ኣዅዳንድ ኣኽቭሽጘው ምኵራቪል፣ መቅደስ ጝኒልም ዊትርቅ ክንስኩን፤ ስውርዝ ዊግጠው ዊገም እጀው። 21እደስለ ወረጘ ይት ዋቕርዳ? ዊግጣንድ ወሸቍድዛት ዋቕር፤ ያን ዊግጠውድየንት ጛይ ኣርቕጘኵ» ዩ። 22እየሱስ እኒንት ዊግታንድ፣ ጝጋቢል ችብርጝ ዊነቊ ዊተድሪስ ላውድ፦ «ካኽነጣነ ኻልቀይዝመ እነሽር ዊስራ?» የው ጥፊዝ ጣዙ። 23እየሱስም፦ «ኻቨረ ዊገ ዊግጥ ፅብሽ፣ ጭቓ ዊግጠጘ ሚዝርጭ፤ ያን ዊግጠውድ እማን ኣቕሽ ግን ውር ቃጥ የጝ ጣዝረውድ?» ዩ። 24እንዝ ግረ ኻነ እየሱስት እፁሸጘ ካኽነጣነ ኻልቀ ቀያፈትል በርሱ።

ቢጥሮስ እየሱስት እንደ ገነ ኻድየጘ

(ማቲ. 26፡71-75፤ ማር. 14፡69-72፤ ሉቃ. 22፡58-62)

25ስሙን ቢጥሮስም ችብር ልየ ቃውራ፦ «ክትስ ጝክንደጢስ ላውድ ኣይረርቀ?» ይ። ጘጝም፦ «ኣይቀርም» የው ኻድዩ። 26ቢጥሮስ ቀርዝድ ቀቨው እጅሪዝ ዚምድ ኣቐው ካኽነጣነ ኻልቅጢዝ ኣገልጋያኒስ ላውድ፦ «ኣታክልት ስፍረይስ ክት ጝጅቅ ቓሊቀርቀ?» ዩ። 27ቢጥሮስም እንደ ገነ ኻድዩ፤ በውዝም ጅርወ ዋቑ።

እየሱስ ቢላጠውስትል ኣልተጘ

(ማቲ. 27፡1-2፤11-14፤ ማር. 15፡1-5፤ ሉቃ. 23፡1-5)

28እንዝ ግረ ኣይዅዳንድ እየሱስት ኻግር ቅመተይል ፊስ፤ ሰትድም ግረቨዝ ዊኑ፤ ኣይዅዳንድም ፈዝየ በሊዙ ቢገድ ዅጛንስ ማጥን ኣርክሽታይጘጘ ኻግር ቅመተይዙ ኻፅሪል ጥዊየቍም። 29እንዝ ማጥን ቢላጠውስ ጝታጐ ፍ፦ «እን እጅርድየንት ኪስርነውድ ወረጝዝ የጝ?» የው ዋቕሩ። 30ጛይም፦ «እን እጅርድ ወኝጀለኘ ኣየው ኣቓን ክጐ ነስነም ዊኒነቅ» ይጝ ዊስ። 31ቢላጠውስም፦ «ክትን ክታቕም ፊስርን ክታኽጊዝጘ ፊርድጥን» ዩ። ኣይዅዳንድም፦ «ይንመ ኣውማውትቅ ቍወነው መቭትም እጅነቅ» ይ። 32እንም ኣቐውድ ኣወየው ክርጘዝ ክርጠጘድ እየሱስ ዊግት ዊነው ቃልድ ፋፅምሻንስ ማጥን የጝ።#ይዃ. 3፡14፤ 12፡32።

33ቢላጠውስም ጝኻፅር ኣቒል ዋጥር እየሱስት ጭጝስ፦ «ክት ኣይዅዳነ ንጕስመ?» ዩ። 34እየሱስም፦ «ክት እኒንት ዊግትረውድ ክቕምቲስ ፊስርመ? ዊንስ ላጥ እቅ ይማጥን ክጭስ ድቍ?» ዩ። 35ቢላጠውስም፦ «ያን ኣይዅዳነውመ ውረ? ክት ይጭስ ዲቍስጝ ነየቍድ በገዘ ክዊግን ኣይዅዳንድ ኣየቍቋ? ኣየውጚ ፃቭረው ዊገድ ወረጘ የጝ?» ዩ። 36እየሱስም፦ «ይምጝግስትድ እን ኣልሚልም ኣየው፤ እን ኣልሚል ኣቓንመ ኣይዅዳኒዝ ናኒል ሊቫይቀጘ ይኣገልጋያንድ ጋጥምጥጘ ዊን፤ ዊገድ ግን ይምጝግስትድ እንልም ኣየው» ዩ። 37ቢላጠውስም፦ «እደስለመ ክት ንጕስ የጛ!» ዩ። እየሱስም፦ «ያን ንጕስ ኣቐጘ ክት ዊግትሩ፤ ያን እዅርጨውድ፣ እን ኣልሚልም ተጠውድ እማንዝ ማጥን ሚዝርድጨ የጝ፤ እማኒስ ኣቐውድቅ ይቃልድ ወሸኵ» ዩ። 38ቢላጠውስም፦ «እማን ወረጘ የጝ?» ዩ። እንዝ ግረ እንደ ገነ ኣይዅዳኒዝጐ ፍ፦ «ያን ጝት ኪስሰው ላው በደልም ችጚቀር።

39ዊገድ ግን ኣምረ ኣምረዝ ፈዝየ በሊዝ ላው እፁሸው እጅር እክስን ነየነው ልምድ እኩ፤ እንዝ ማጥን ኣይዅዳነ ንጕስድየንት እክስጨ በንርነኵመ?» ዩ። 40ጛይ ኣጛንድ፦ «በርቫንት እክሽጚ እኒንት እክስረር» ይጛ ቓፅ። በርቫን ግን ወምበዲ ዊኑ።

Currently Selected:

ይዃንስት ወንጌል 18: ኽምጣኣኪ

Highlight

Copy