ይዃንስት ወንጌል 17

ፈወነ 17

እየሱስት ፀለውትድ

1እየሱስም እኒንት ዊግተት ግረ ንየ ጭቅ የው ሲመይ ቓላ እንት የው ፃልዩ፦ «ኣየወ! እንወ ሰትድ ችጝኩ፤ ክዅር ክት ኪብርዛንስ ማጥን ክትም ክዅርት ኪብርዝ። 2ምላሰንድም ክት ጝጭስ ይውረቊዝቅ ዘላልምዙ ርዅየ ይዋንስ ማጥን እጝቅ እጅርዝ ኒየይልቅ ጝጭስ ስልጣን ይውርኵሩ። 3ዘላልምዙ ርዅየድም ክት ጭቝ እማንተው ኣምላክ ኣረሪዝመ ክት እፃረው እየሱስ ክርስቶስት ኣርቐነው የጝ። 4ያን ክት ነይረው ሰቭድየንት ፋፅም ዝቨይስ ኪብርዙን። 5ኣየወ! ኣልም ፋጥርሺጝቀ ክጅቅ ፃቅ ዊነው ክቭሪዝ ነንም ክበዊዝ ኪብርዝ።

6«እንዛይ እን ኣልሚስ ነይረቍ እቂዝ ክሽድ ጋልፅኩን፤ ጛይ ክቍ ዊን፤ ክትም ይጭስ ነይሩ፤ ጛይም ክቃልድ ሊሚድጝኵ። 7ይጭስ ነይረውድቅ ክጊስ ኣቐጘ ነን ኣርቕጝኵ። 8ምላሰንድም ክት ይጭስ ነይረው ቃልድየንት ይውኩን፤ ጛይም ለምርጝኵ፤ ያንም ክጊስ ፍ ተጠጘ እርግጥ ኣርቕጝኵ፤ ይት እፃረርድ ክት ኣረጘም ኣርቕጝኵ። 9ጛይ ክቍ ኣጛንስቅ ጝታማጥን ፃልየኵን፤ እንዛይ ክት ይጭስ ነይረቍዝ፣ ክቍም ኣቐቊዝ ማጥንጚ፣ ኣልሚዝ ማጥን ፃልየቅም። 10ይው ኣቐውድቅ እጝቅ ኩ የጝ፤ ኩ ኣቐውድም እጝቅ ይው የጝ፤ ያንም ጝታቍዝ ኪብርኩን። 11ነስየይስ ያን ኣልሚል ዊነቅም፤ ጛይ ግን ኣልሚል ፅብጥጘ የጝ፤ ያን ክጐ ተጨ የጝ፤ ቅዱስ ኣየወ! ይን ላው ኣነጘ ጛይም ላው ኣጛንስ ማጥን ይጭስ ነይረው ክሽዝ ጛት ሊሚጭ።

12«ያን ጛጅቅ ፅባ ክት ነይረው ክሽⶔዝ ጛት ገርዱን፤ ሊሚጡንም፤ መፃፊዙ ቃልድ ፋፅምሻንስ ማጥን ድዘርዙ ዅር ኣቐው ላዊዝለ ጛጊስ ላውም ድዚየው። 13ነን ክጐ ተጨ የጝ፤ ዊገድ ግን ይዲስተድ ጛጭስ እቻቐው ኣቓንስ ማጥን ነን ኣልሚል ፅባ እኒንት ዊግጠኵን።#መዝ. 41፡9፤ ይዃ. 13፡18። 14ያን ክቃልድ ይውኩን፤ ያን ኣልሚስ ኣይቀር ኣቐጘ፣ ጛይም ኣልሚስ ኣየቍ ኣጛንስቅ፣ ኣልምድ ጛት ሽክትኩ። 15ክት ጨወውድም ጛት ጭቓይስ ሊሚድራንስ የጝጚ ኣልሚስ ፊስራንስም ኣየው። 16ያን ኣልሚስ ኣይቀር ኣቐጘ፣ ጛይም ኣልሚስም ኣየቍ። 17ክቃልድ እማን የጝ፤ ክእማኒዝ ጛት ቀድሽ። 18ክት ይት ኣልሚል እፃረጘ ያንም ጛት ኣልሚል እፃቕኩን። 19ጛይ እማንዝ ቀድስሽተቍ ኣጛንስ ማጥን ያን ጝታማጥን ይቕምት ቀድስኩን።

20«ጛይ ክንስጘው ክንድጝድ ለምርጝ ይት ኣምነቊዝቅጚ እንዛዝ ማጥን ጭቝም ኣየው ፃልየውድ። 21ኣየወ! እጝቅቅ ላው ኣጛንስ፣ ክት ይግል ፅብረጘ፣ ያንም ክግል ፀበጘ፣ ጛይም ይናግል ፅብጛንስ ማጥን ፃልየኵን፤ እንም ክት ይት እፃረጘ ኣልምድ ኣምናንስ የጝ። 22ይን ላው ኣነጘ ጛይም ላው ኣጛንስ ማጥን ይጭስ ነይረው ክቭርድየንት ጛጭስ ይውኩን። 23እንም ያን ጛግል ፅበጘ፣ ክትም ይግል ፅብረጘ፣ ጛይም ፍፅም ላው ኣጛንስ ማጥን የጝ፤ እኒዝጘም ክት ይት እፃረጘ፣ ይት ቀንደው ፍቅሪዝም ጛት ቀንደጘ ኣልምድ ኣርቓንስ ማጥን የጝ።

24«ኣየወ! እንዛይ ይጭስ ነይረቍድ ያን ፅበዊል ኣጛንስ ማጥን ኣልም ፋጥርሺጝቀ ይት ቀንዳንስቅ ክት ነይረው ይክቭርድየንት ቓልጥጘ በነኵን። 25«ፃድቅ ኣየወ! ኣልምድ ክት ኣርቒይሽም ያን ኣርቐኵን፤ እንዛይም ይት ክት እፃረጘ ኣርቕጥቍ። 26ክት ይት ቀንደው ፍቅርድ ጛግል ኣቓንስ፣ ያንም ጛግል ኣቓንስ ማጥን ክት ኣርቕጥጘ ፃቭኩን፤ ኣርቕጥጘም ፃቭጭር።»

Currently Selected:

ይዃንስት ወንጌል 17: ኽምጣኣኪ

Highlight

Copy