ይዃንስት ወንጌል 16

ፈወነ 16

1«እኒንትቅ ድቈውድ ፅጋራይርነጘ የጝ። 2ክታት ጝታምኵራቪስ ፊስጥቍ፤ እንዲያውም ክታት ቍወውድቅ፦ «እደረት ኣግልግለኵን» የው ኻስቨው ግርየ ተርጡ። 3እኒንትቅ ፃቭጘውድም ይትም ኣይርትም ኣርቓቍ ኣጛንስቅ የጝ። 4እኒንትቅ ነን በውርስ ድቈውድ እግረ ግርየድ ችጛንድ ኣጅርናንስ ማጥን የር የጝ፤ ክታጅቅ ዊናንስቅ እኒንት እንዝ ሚቅ ክታጭስ ዲቊቀርም።»

መንፈስ ቅዱስት ሰቭድ

5«ነን ግን ይት እፃቐዊዝጐ ፊጨ የጝ፤ ኣነጚ ክታጊስ፦ ‹ፊትረውድ ኣውል የጝ?› የው ዋቕረውም እጀው። 6እኒንት ዊግጣንስቅም ክታእዘንድ ጭቕጘ ኻዝንኩ። 7ዊገድ ግን እማን እማን የኵን! ክታጭስ ያን ፊጣን ቺዘኵ፤ ያን ፊጢቀውዝየ ዲብሰተድ ክታግል ተራውም፤ ፊጠውዝየ ግን ጝት ክታጐ እፃጭር። 8ጘጝም ተራንድ ኣልምድየንት ኽጥያዝቍዝ፣ ፅድቅዝቍዝ፣ ፍርድዝቍዝም ዊቅስጡ። 9ኽጥያትዝቍዝ ዊቅሰውድ፣ እቅ ይት ኣምናቍ ኣጛንስቅ የጝ። 10ፅድቅዝቍዝ ዊቅሰውድ፣ ያን ኣይርትል ፊጠር ኣቓንስቅ፣ ክትንም ነስየ ይት ቓላይርነቅ ኣቕርናንስቅ የጝ። 11ፍርድዝቍዝ ዊቅሰውድም፣ እን ኣልሚዙ ቅመተድ ፊርድሻንስቅ የጝ።

12«ገነ ክታጭስ ድቍጨ በነው ንቕፀው ዊገ ዊኑ፤ ዊገድ ግን ነን መውርትርነ ቸላይርነቅም። 13እማንዙ መንፈስድ ተራንድ ክታት እማኒልቅ ሚሪጡ፤ ጘጝ ጝቕምቲስ ዊግታውም፤ ወሸውድየንት ጭቝ ዊግትጡ፤ ነስየይስ ኣጡድየንትም ድቍጡ። 14ጘጝ ክታጭስ ድቈውድ ይው ኣቐዊስ ፊስ ኣቓንስቅ ይት ኪብርዝጡ። 15ኣይርቱ ኣቐውድቅ ይው የጝ፤ እንዝ ማጥን የጝ፦ ‹ጘጝ ክታጭስ ድቈውድ ይው ኣቐዊስ ፊስ የጝ› የውድ።»

ኽዝን ዲስተዝ ላውጥሽጠጘድ

16«ዊቱ ግርየዝ ግረ ይት ቓላይርነቅም፤ ኣነጚ ዊቱ ግርየዝ ግረ ቈሽ ቓልትርንቅ።» 17ጝክንደጢስም ላው ላውድ፦ «ዊቱ ግርየዝ ግረ ይት ቓላይርነቅም፤ ኣነጚ ዊቱ ግርየዝ ግረ ቈሽ ቓልትርንቅ» እኒዝጘም፦ «ኣይርትል ፊጠር ኣቓንስቅ» የውድ ወረጘ የነት የጝ?» 18ዊቱ ግርየ የነውድስ ወረጘ የነት ኣጢ? ጘጝ ዊግተው ዊገድ ኣርቒነቅም» ይጛ ጛስ ጛይ ዋቕረዋቕርሽ።

19እየሱስም ጝት ዋቕርጥጘ በንጘጘ ኣርቕ እንት ዩ፦ «ያን፦ ‹ዊቱ ግርየዝ ግረ ይት ቓላይርነቅም፤ ኣነጚ ዊቱ ግርየዝ ግረ ቈሽ ቓልትርንቅ› ያንስቅመ ወረጘ የነት ኣቐጘ ክታስ ክታይ ዋቕረዋቕርሽርና? 20እማን እማን የኵን! ክትን ሊዝትርንቅ፤ ኻዝንትርንቅም፤ ኣልምድ ግን ጭቕጘ ዲስ ይጡ፤ ክትን ግን ኻዝንትርንቅ፤ ኣነጚ ክታኽዝንድ ዲስተዝ ላውጥሽጡ። 21እውነ እዅርተ ጕራንድ ጝርቅምት ግርየድ ችጛንስቅ ጨጝቅሸች፤ እዅርደት ግረ ግን ኣልሚል ድድመ እዅርሻንስቅ፣ ጭቕጘ ዲስ የች፤ ጝርሚከረድም ትዝ ያይም። 22እኒዝጘም ክትን ነን ኻዝንትርንቅ፤ ኣነጚ እንደ ገነ ሊጘት ቓለር ኣቓንስቅ ክታእዘንድ ዲስ ይጡ፤ ክታዲስተድየንትም ፊሰውም እጀው። 23ኣይንት ግርየይዝ ይጊስ ውረውረም ጨዋይርነቅ፤ እማን እማን የኵን! ኣይር ይሽዝ ጨውርነውድየንትቅ ነይጡ። 24ነኳን ኣሽ ይሽዝ ውረውረቅ ጨዊርነቅም፤ ጨውጥን፤ ለምርትርንቅ፤ ክታዲስተድም እቻቐው ኣጡ።

25«ነኳን ኣሽ ክታጭስ ድቈውድ ተከዝ ኣቕሽም እኳ፣ ነስየ ግን ኣይርት ክታጭስ ተከዝ ኣዪጝቀ ግልፅዝ ድቈው ግርየ ተርጡ። 26ኣይንት ግርየይዝ ይሽዝ ጨውትርንቅ፤ ያንም፦ ‹ክታማጥን ኣይርት ጨውጭር› የቅም። 27ምላሰንድም ክትን ይት ቀንድርናንስቅ ያን እደረቲስ ፈጘም ኣምንድርናንስቅ ኣይር ጝቕም ክታት ቀንጡ። 28ኣይርቲስ ፍ ኣልሚዝጐ ተጥኩን፤ ነን ግን ኣልምድ በጥ ኣይርትል ፊጨ የጝ።»

29ጝክንደጥድም ኣይንድ፦ «እንወ ነን ተከዝ ኣዪጝቀ ግልፅዝ ዊግትሩ። 30ክት እጝቅትቅ ኣርቕረር ኣረጘ፣ ኣውማውቅ ክት ዋቕርጠም በንዛው ኣቐጘ ነን ኣርቕኑን፤ ኣቓንስቅም ይን ክት እደረቲስ ፍረጘ ኣምነኵን» ይ። 31እየሱስም ዊስ፦ «ነን ኣምንድርኑ የነትመ? 32እንወ ክታይታእጝቅቅ ክታይታጝንል ቢትንሽርነው፣ ይትም ይለ በትርነው ግርየ ተርጡ፤ ጘጝ ግርየድም ነን ችጝኩ፤ ዊገድ ግን ኣይር ይጅቅ ኣቓንስቅ ይለም ኣይቀር። 33ይቍዝ ዲግተ ፃይርነቅ ኣቕርናንስ ማጥን እኒንት ድቍኩን፤ ኣልሚል ፅብርናንድ ሚከረ ፃይርነቅ የጝ፤ ዊገድ ግን ኣይዝዀጥን፤ ያን ኣልምድየንት ኻቕኩን» ዩ።

Currently Selected:

ይዃንስት ወንጌል 16: ኽምጣኣኪ

Highlight

Copy