ይዃንስት ወንጌል 15

ፈወነ 15

ወይኒዙ ግንዲዝመ ጝጫፋኒዝ

1«እማንተው ወይኒዙ ግንድድ ያን የጝ፤ ኣርሸድም ይር የጝ። 2ጘጝም ይግል ፅበው፣ ፍርም ፍርዛው ጫፍድየንትቅ ቀቭ ማለኵ፤ ፍር ፍርዘው ጫፍድየንትቅ ግን ቐናዝ ፍርዛንስ ማጥን ጊርዘኵ#15፡2 «ጊርዘኵ» የው ግሪኪዙ ቃልድ፦ «ዊር ሸኵ» የው ትርጕም ፃየው የጝ።። 3ክትንም ያን ክታጭስ ድቈው ቃሊዝቍዝ ነን ንፅዃን የጝ። 4ክትን ይግል ፅብጥን፤ ያንም ክታግል ፅብጭር፤ ጫፍ ወይኒዙ ግንዲል ፅቢየውዝየ ጝለ ፍር ፍርዝጠ ቸላው ኣቐጘ ክትንም ይግል ፅቢርነውዝየ ፍር ፍርዝትርነ ቸላይርነቅም።

5«ያን ወይንዙ ግንድ የጝ፤ ክትንም ጫፋን የጝ፤ ኣውማውቅ ይግል ፅባን፣ ያንም ጝግል ፅባን፣ ጘጝ ንቕፀው ፍረ ፍርዝጡ፤ ዊገድ ግን ይት እጀው ውረውረቅ ፍርዝትርነ ችላይርነቅም። 6ይግል ፅባውድቅ ቢዘይል ሊቭ ይዘው ጫፊዝጘ ኣጡ፤ እነየቍ ጫፋንድ እቅ ጥቅልጝ ልየል ማልጥቍ፤ ቃጥልጥቍም። 7ይግል ፅብርናን፣ ይቃልድም ክታግል ፅባን፣ በንርነው ዊገድቅ ጨውርንሽ ችጝትርንቅ። 8ንቕፀው ፍረ ፍርዘነውዝ ይክንደጥ ኣቐነውድ ጋልፅርናን፣ እንዝ ይር ኪብርጡ።

9«ኣይር ይት ቀነጘ ያንም ክታት ቀንኩን፤ ይፍቅሪዝ ፅብጥን። 10ያን ይርት ትዛዝድ ፋፅም ጝፍቅሪዝ ፅባንትጘ ክትንም ይትዛዝድ ሊሚድርናን ይፍቅሪዝ ፅብትርንቅ። 11ይዲስተድ ክታግል ኣቓንስመ ክታዲስተድም እቻቐው ኣቓንስ ማጥን እኒንት ድቍኩን። 12ይትዛዝድም ያን ክታት ቀነጘ ክትንም ክታስ ክታይ ቀነ ቀንሽርናንስ የጝ።#ይዃ. 13፡34፤ 15፡17፤ 1ይዃ. 3፡23፤ 2ይዃ. 5። 13ጝወደጃኒዝ ቺ ጝርዅየድ ዲቍስን ይወነዊስ ዲቈው ፍቅር ኣውማውም እጀው። 14ያን ኣዘውድየንት ፋፅምርንሽ ክትን ይወደጃን የጝ። 15ምላሰንድም ኣገልጋይ ጝኣደረድ ፃቨውድየንት ኣርቓውም፤ ነስየይስ ክታት ኣገልጋያን የቅም፤ ዊገድ ግን ይርቲስ ወጨውድየንትቅ ክታጭስ ጋልፃንስቅ ይወደጃን የርኩን። 16ያን ክታት ማርፁንጚ ክትን ይት ማርፂርነቅም፤ ፊትርናንስ፣ ፍርም ፍርዝርናንስ፣ ክታፍረድም ፅበው ኣቓንስ ማጥን ክታት ይሙን፤ እንዝ ማጥንም ኣይር ይሽዝ ጨውርነውድየንትቅ ነይጡ። 17ያን ክታት ኣዘውድ ክታስ ክታይ ቀነቀንሽርናንስ ማጥን የጝ።»

ኣልም እየሱስት ክንደጥድዛት ሽክትጠጘድ

18«ኣልም ክታት ሽክትሽ ክታበዊል ይት ሽክተጘ ኣርቕጥን። 19ኣልሚስ ኣቕርናን፣ ኣልምድ ጝቕምትቊዝጘ ፃቭ ቀንጠ ዊኑ፤ ያን ክታት ኣልሚስ ቲዝ ማርፃንስቅ ክትን ኣልሚዝቍም ኣይርነቅ፤ ኣልም ክታት ሽክተውድም እንዝ ማጥን የጝ። 20‹ኣገልጋይ ጝኣደረይስ ዲቋውም› የር ድቈው ዊገድ ኣጅጥን፤ ይት ሲድሰቍ ኣጘውዝየ ክታትም ሲድስጥቍ፤ ይቃልድ ሊሚደቍ ኣጘውዝየ ክታቃልድየንትም ሊሚድጥቍ።#ማቲ. 10፡24፤ ሉቃ. 6፡40፤ ይዃ. 13፡16። 21ይት እፃቐውድየንት ኣርቓቍ ኣጛንስቅ ይሽⶔዝቍዝ እኒን ሚከረድየንትቅ ክታግል ችጝዝጥቍ። 22ያን ተጥ ድቊቀር ኣቓን፣ ጛጭስ ኽጥያት ኣጠም ዊኒየው፤ ነን ግን ጝታኽጥያቲዝ ምላሰነው ዊገም እጀቍ። 23ይት ሽክተውድቅ ይርትም ሽክተኵ። 24ላየ እጅር ፃቪየው ዊገድ ጝታማኽሊል ፃቪቀር ኣቓን፣ ጛጭስ ኽጥያት ኣጠም ዊኒየው፤ ነን ግን እንዛይ ታምራንዝቍ ምልክታንድዛት ቓልጝኵ፤ ኣቕሽም ይትም ይርትም ሽክትጝኵ። 25እንም ጝታኽጊዝ፦ ‹ይት ጊነ ሽክት› ይሽት ፃፍሸው ቃልድ ፋፅምሻንስ ማጥን የጝ።

26«ያን ኣይርቲስ ክታጐ እፃቐው እማንተው መንፈስድ ክታግል ተራንድ፣ ይማጥን ሚዝርድጡ፤ ጘጝም ኣይርቲስ ፈው ዲብሰተ የጝ። 27ክትንም በውገይስ ኪርምርን ይጅቅ ዊንድርነቅ ኣቕርናንስቅ ሚዝርድትርንቅ።»

Currently Selected:

ይዃንስት ወንጌል 15: ኽምጣኣኪ

Highlight

Copy