ይዃንስት ወንጌል 14

ፈወነ 14

እየሱስ ኣይር ትጐ ችጝዘው ጒደነ ኣቐጘ

1እየሱስም ጝክንደጢዝ፦ «ክታዘንድ ጨጝቅሺነ፤ እደረት ኣምንጥን፤ ይትም ኣምንጥን። 2ይርት ጝኒል ንቕፀው ስፍረ እኩ፤ እኒን ኣየው ኣቓንመ ድቍጨ ዊኑን፤ ፊጠውድም ክታጭስ ስፍረ ኣስልጨ የጝ። 3ፊጥ ክታጭስ ስፍረ ኣስለት ግረ ያን ፅበዊል ክትንም ፅብርናንስ ማጥን እንደ ገነ ተጥ ፊስጭር። 4ያን ፊጠው ስፍረይል ችጝዘው ጒደነድየንትም ኣርቕርትርንቅ።» ዩ።

5ተውማስም፦ «ኣደረወ! ኣውል ፊርተጘ ኣርቒነቅም፤ እደስለ ኣወይን የጝ ክት ፊትረው ጒደነድየንት ኣርቕነውድ?» ዩ። 6እየሱስም፦ «ጒደነድ፣ እማንድ፣ ርዅየድም ያን የጝ፤ ይጐቱ ኣየውዝየ ኣይርትል ተረው እጀውም። 7ይት ኣርቕርናን ይርትም ኣርቕትርነ ዊንድርኑ፤ ነንስ ኪርምርን ግን ጝት ኣርቕትርንቅ፤ ቓልድርንምኵርኑ» ዩ።

8ፊልበውስም፦ «ኣደረወ! ይናጭስ ኣይርት ቓሊሽነ ኣጥጘች» ዩ። 9እየሱስም እንት ዩ፦ «እፈ ፊልበውስ! እንቝጠ ግርየ ክታጅቅ ፅባመ ነኳን ኣሽ ይት ኣርቒረረ? ይት ቓለውድ ኣይርት ቓልኩ፤ እደስለ ወረጘ የጝ፦ ‹ኣይርት ቓሊሽ› ይረውድ? 10ያን ኣይርትል ፅበጘ፣ ኣይርም ይግል ፅበጘ ኣምናርመ? ያን ክታጭስ ደቈው ቃልድ ይቕምቲስም ኣየው፤ ዊገድ ግን ሰቭድየንትቅ ሰራሸውድ ይግል ፅበው ኣይር የጝ። 11ያን ኣይርትል ፅበጘ፣ ኣይርም ይግል ፅበጘ ኣምንጥን፤ ኣለዝየ ይሰቪዝቍዝ ኣምንጥን። 12እማን እማን የኵን! ይት ኣምነውድቅ ያን ሰራጨው ሰቭድ ሰራሽጡ፤ እንዲያውም ያን ኣይርትል ፊጠር ኣቓንስቅ ጝጊስ ዲቈው ሰቭ ሰራሽጡ። 13ኣይርም ዅርት ምላሰንዝ ኪብራንስ ማጥን ይሽⶔዝ ጨውርነውድየንትቅ ያን ፃቭጭር። 14ኣውማው ዊገድቅ ይሽⶔዝ ጨውርነውዝየ ያን ጝት ፃቭጭር።»

እየሱስ መንፈስ ቅዱስ ተርጠጘ ይወው ቲስፈድ

15«ይት ቀንድርነቅ ኣርነውዝየ ይትዛዝድ ሊሚድጥን። 16ያን ኣይርት ጨውጭር፤ ጘጝም ዘላልም ክታጅቅ ፅበው ላየ ዲብሰተ ክታጭስ ነይጡ። 17ጘጝም እማንዙ መንፈስ የጝ፤ ኣልምድ ጝት ቓላው ኣቓንስቅ፣ ኣርቓው ኣቓንስቅም ጝት ለምርጠ ቸላውም፤ ክትን ግን ጘጝ ክታጅቅ ኣቓንስቅ፣ ክታኣቒልም ፅበው ኣቓንስቅ ጝት ኣርቕትርንቅ። 18ኣቅል እጀቍ ዅሊዝጘ ክታለ በጠቅም፤ ዋጥር ክታጐ ተጭር። 19ዊቱ ግርየዝ ግረ ኣልም ይት ቓላውም፤ ክትን ግን ቓልትርንቅ፤ ያን ፅበር ኣቓንስቅ ክትንም ፅበቍ ኣትርንቅ። 20ያን ኣይርትል ፅበጘ፣ ክትንም ይግል ፅብርነጘ፣ ያንም ቈሽ ክታግል ፅበጘ ኣይንድ ኣርቕትርንቅ። 21ይት ቀነውድ ይትዛዝድ ለምር ሊሚደውድ የጝ፤ ይት ቀነውድየንትም ይር ቀንጡ፤ ያንም ቀንጭር፤ ይቕምትም ጝጭስ ጋልፅጭር።» 22ኣይንድም ኣስቈረትትውድ ኣየው ላየ ይዅዳ፦ «ኣደረወ! እደስለ ክቕምት ኣልሚዝ ኣዪጝቀ ይናጭስ ጋልፅረውድ ኣወሽር የጝ?» ዩ።

23እየሱስም እንት ዩ፦ «ይት ቀነው ፅብሽ ይቃልድ ሊሚድጡ፤ ይርም ጝት ቀንጡ፤ ይንም ጝጐ ተርንቅ፤ ጝጅቅም ፅብንቅ። 24ይት ቀናውድ ይቃልድየንት ሊሚዳውም፤ እኒን ወሽርነው ቃልድ ኣይርቱ የጝጚ ይውም ኣየው። 25ነን ክታጅቅ ፅባ እኒንትቅ ድቍኩን። 26ኣይር ይሽዝ እፃቐው ዲብሰተ ኣቐው መንፈስ ቅዱስ ግን እጝቅትቅ ክታጭስ ክንስጡ፤ ያን ክታጭስ ድቈውድየንትም ኣጅስጡ። 27ዲግተ ክታግል በጭር፤ ይዲግተድየንትም ነቅጭር፤ ያን ክታጭስ ነቀውድ ኣልምድ ነየውድ ተከውም ኣየው፤ ክታእዘንድ ጨጝቅሺነ፤ ጐውቲነም።

28« ‹ያን ፊጭር፤ ዋጥርም ክታጐ ተጭር› የጘ ወሽርንኵርኑ፤ ይት ቀንድርናንስ ይጊስ ኣይር ዲቈው ኣቓንስቅ ያን ኣይርትል ፊረነዊዝ ዲስ ይትርነ ዊንድርኑ። 29ነን ያን ድቈውድየን እግረ ፋፅምሻንድ ኣምንድርናስ ማጥን በውርስ ድቍኩን። 30እን ኣልሚዙ ቅመተድ ተራ ኣቓንስቅ ነስየ ክታጅቅ ንቕፀቍ ዊግጠቅም፤ ጘጝም ይግል ውረውረ ስልጣንም እጀው። 31ዊገድ ግን ያን ኣይርት ቀነር ኣቐጘ ኣልም ኣርቓንስ ማጥን ኣይር ይት ኣዘውድየንትቅ ፋፅምጭር፤ ነስየ ጕጥን እኒስ ፊርነ።»

Currently Selected:

ይዃንስት ወንጌል 14: ኽምጣኣኪ

Highlight

Copy