ይዃንስት ወንጌል 13

ፈወነ 13

እየሱስ ጝክንደጢዝ ልኵጣንድ ቓሰጘ

1ፈዝየ በልድም ችጝ ዊኑ፤ እየሱስም እን ኣልምድየንት በር ኣይር ትጐ ፊረው ግርየድ ችጘጘ ኣርቑ፤ እን ኣልሚል ፅበቍ፣ ጝቕምትቍም ኣቐቍ እቅድዛትም ቀኑ፤ ፍፅም ፍቅርዝም ቀኑ።

2ድረይም ዅጛ ሲጝቀ እየሱስት ዲቍስ ይዋንስ ማጥን ዳቪለውስ ስሙንት ዅር ኣስቈረትቱ ይዅዳት እዘኒል ጭቓ ኻሰቭ ጭሱ። 3እየሱስም ኣይር እጝቅ ስልጣንድየንት ጝጭስ ዲቍስ ይወጘ፣ እደረቲስም እፃሸጘ፣ እደረትልም ፊርጠጘ ኣርቕ ዊኑ። 4እንዝ ማጥን መዲስ ጕ ጝኣልቨድየንት እቝሩ፤ ዊልውለነው ፈውጠም ጝይዊል ከምሹ። 5እንዝ ግረም ቓረነይል ኣቝ ድው ጝክንደጢዝ ልኵጣንድ ቓሳ ከምር ዊነው ፈውጠይዝ ዊልውልጠ ኪርሙ።

6ስሙን ቢጥሮስትልም ተሩ፤ ጘጝም፦ «ኣደረወ! ክትመ ይልኵጣንድ ቓስተ?» ዩ። 7እየሱስም፦ «ያን ፃቨውድየንት ነን ኣርቓርም፤ እግረ ግን ኣስክስትር» ዩ። 8ቢጥሮስም፦ «ስሪስቅ ይልኵጣንድ ክት ቓሳርም» ዩ። እየሱስም፦ «ያን እቓሲቀውዝየመ ይጅቅ ኣቐነው እድል እጅረርም» ዩ። 9ስሙን ቢጥሮስም፦ «ኣደረወ! እደስለስ ይልኵድ ጭቝ ኣዪጘቀ ይናንድም ይኣውርድም ቓሽ» ዩ። 10እየሱስም፦ «ሰውነትድ ቓረው እጅር ጝዅለመነድቅ ንፅዅ ኣቓንስቅ ቓረነው በንዘውድ ልኵድ ጭቝ የጝ፤ ክትንም ንፁኻን የጝ፤ ዊገድ ግን ክታእጝቅቅም ንፁኻን ኣይርነቅ» ዩ። 11«ክታእጝቅቅም ንፅዃን ኣይርነቅ» የውድ ጝት ዲቍስ ይውጡድ ኣው ኣቐጘ ኣርቓ ዊናንስቅ የጝ።

12ጝታልኵጣንድም ቓስ ኻተት ግረ ጝኣልቨድ ሲር ዋጥር ጝጐይተይል ጐይ፦ «ያን ፃቨውድየንት ኣስክስርኑመ?#ሉቃ. 22፡27። 13ክትን ይት፦ ‹ክንሰተ› ‹ኣደረ› ይርነኵ፤ የይ፤ ያን ክንሰተም ኣደረም እቓንስቅ ይርነውድ እማን የጝ። 14ነስየ ያን ክታክንሰተም ክታኣደረም ኣቕ ፅባ ክታልኵጣንድ ቓሰውዝየ ክትንም እኒዝጘ ክታስ ክታይ ክታልኵጣንድ ቓሰቓስሽትትርነ ጥውሸኵ። 15ያን ክታጭስ ፃቨጘ ክትንም ክታስ ክታይ ፃቭርናንስ ማጥን ክታጭስ ተከ ነቅኩን። 16እማን እማን የኵን! ኣገልጋይ ጝኣደረይስ፣ እፃሸረም ጝት እፃቐዊስ ድቋውም።#ማቲ. 10፡24፤ ሉቃ. 6፡40፤ ይዃ. 15፡20። 17ነስየ እንዛት ኣርቕርነውዝየ ፋፅምርነውዝየም ቀቫሽርነቅ የጝ።

18«እኒንት ዊግጠውድ ክታእጝቅት ማጥንም ኣየው፤ ያን ማርፀቍድ ይቕም ኣርቐኵን፤ ዊገድ ግን፦ ‹ይሚድ ይጅቅ ዀውድ ጝልኵድየንት ይግል ጕዩ› ይሽት ፃፍሸው መፃፊዙ ቃልድ ፋፅምሽጠ ጥውሸኵ።#መዝ. 41፡9። 19እንቅ ኣቐት ግረ ያን ኣው ኣቐጘ ኣምንድርናንስ ማጥን ኣቐነዊስ በውገ ክታጭስ በውርስ ድቈኵን። 20እማን እማን የኵን! ያን እፃቐውድየንት ለምረውድቅ ይት ለምረኵ፤ ይት ለምረውድም ይት እፃቐውድየንት ለምረኵ።#ማቲ. 10፡40፤ ማር. 9፡37፤ ሉቃ. 9፡48፤ 10፡16።

እየሱስ ዲቍሽት ይውሽትጠት በውርስ ድቈጘ

(ማቲ. 26፡20-25፤ ማር. 14፡17-21፤ ሉቃ. 22፡21-23)

21እየሱስ እኒንት ዊግተት ግረ ጝመንፈሲዝ ጨጝቅሽ፦ «እማን እማን የኵን! ክታጊስ ላውድ ይት ዲቍስ ይውጡ» የው ግልፅዝ ዊግቱ። 22ጝክንደጥድም እኒንት ዊግተውድ ኣውት ማጥን ኣቐጘ ኣርቐነ ብጛንስቅ ግራ ጥውጝ ጛስ ጛይ ቓለ ቓሊሽት። 23ጛጊስ ላውድ እየሱስ ቀነው ዊነው ክንደተድ እየሱስትል ኣልት ጐይ ዊኑ። 24ስሙን ቢጥሮስም ጝት ምልክትዝ ጣቅስ፦ «ኣውት ማጥን ኣቐጘ ዋቕር» ዩ። 25ጘጝም እየሱስትል ኣልት የው፦ «ኣደረወ! ክት ዲቍስ ይውጡድ ኣው የጝ?» የው ዋቕሩ።

26ኣየሱስም፦ «ያን እኒን ቈርሽተው ሚድ ዳቕስ ይወው እጅርድ የጝ» ዩ። ቈርሽተው ሚድም ጒ ዳቕስ ስሙንት ዅር ኣስቈረትቱ ይዅዳስ ይዉ። 27ይዅዳም ሚድ ለምረጘ በውዝ ሲጣን ጝግል ጥዉ፤ እየሱስም፦ «ፃቭተ በንረድየንት ቃዝይር ፃቭ» ዩ። 28መዲል ጐይጝ ዊነቍድ ግን ውር ማጥን እነይ ዊግተጘ ኣርቒየቍም። 29ላው ላውድም ቍርሻንድ ፃየውድ ይዅዳ ኣቓንስቅ፦ «በሊዝ ኣስለነውድየንት ጅቭ» ዊንም፦ «ድኺዝ ምፅዋት ይይ» የው ተኩ። 30ይዅዳም ሚድ ለምረጘ በውዝ ፍ ፊሩ፤ ሰትድም ኻር ዊኑ።

ኣይር ትዛዝ

31ይዅዳ ፈት ግረ እየሱስ፦ «ነን እጅር ዅር ኪብሩ፤ እደረም ጝቍዝ ኪብሩ። 32ነስየ እደረ ጝቍዝ ኪብረውዝየ እደረም ጝት ጝቕምትዊዝ ኪብርዝጡ፤ በውዝም ኪብርዝጡ። 33ይቝርወ! ክታጅቅ ዊነውድ ዊትቍ ግርቅ የጝ፤ ክትንም ይት ደምዝትርንቅ፤ ኣይዅዳኒዝ፦ ‹ያን ፊጠዊል ክትን ተርትርነ ቸላይርነቅም› የር ዊግጠጘ ክታጭስም እኒንት ዊግጠኵን።#ይዃ. 7፡34። 34ኣይር ትዛዝ ነቀኵን፤ እንም ክታስ ክታይ ቀነቀንሽርናንስ ማጥን የጝ፤ ያን ክታት ቀነጘ ክትንም ክታስ ክታይ ቀነቀነሽትጥን።#ይዃ. 15፡12፤ 17፤ 1ይዃ. 3፡23፤ 2ይዃ. 5። 35ክታስ ክታይ ቀነቀንሽርነውዝየ እጅር እጝቅ ይክንደጥ ኣቕርነጘ እንዝ ኣርቕጡ» ዩ።

እየሱስ ቢጥሮስ ጝት ኺዲጠጘ በውርስ ዊግተጘ

(ማቲ. 26፡31-35፤ ማር. 14፡27-31፤ ሉቃ. 22፡31-34)

36እንዝ ግረ ስሙን ቢጥሮስ እየሱስት፦ «ኣደረወ! ኣውል የጝ ፊትረውድ?» ዩ። እየሱስም ያን ፊጠዊል ነን ቲክንተ ቸላርም፤ እግረ ግን ቸልትር» ዩ። 37ቢጥሮስም፦ «ኣደረወ! ነን ቲክንጨ ቸላይቀውድ ወረጘ የጝ? ክማጥን ይርዅየሸንት እኳ ዲቍስ ይውጭር» ዩ። 38እየሱስም፦ «እማን ክርዅየሸንት ይማጥን ዲቍስር ይውታ? እማን እማን የኵን! ጅርወ ዋቒጝቀ ይት ሸውን ኻዲትር» ዩ።

Currently Selected:

ይዃንስት ወንጌል 13: ኽምጣኣኪ

Highlight

Copy