ኻወርየታኒዙ ሰቭ 22
22
ፈወነ 22
1«ያቅልዝመ ይፅንዝ ክታችወ! ያን ኪስጨው ዊገይዝ ዊሰው ይዊገድየንት ወጭጥን» ዩ። 2ኽዝቭድም እቭራይስጥ ቋቈዝ ዊግታንድ ወሻንድ በውገት ሽ ዝም ዩ።
3ጘጝም እንት ዩ፦ «ያን ኪልቅየትወ ጠርሲስ የነይ ኻትመየትል እዅርጨር ኣይዅዳነው እጅር የጝ፤ ይሊግዘውድ ግን እንል እየሩሳልየም ኻትመይል የጝ፤ ይክንሰተድም ገማልያል የጝ፤ ይናኣቅሊዝ ኽግድ ጝልኲል ጐይ ጣጝቅቅ ክንጥኩን፤ ነን ክትን ፃቭርናንትጘ ያንም እደረስ ጭቕጘ መንፈሳዊ ቅናትዝ ቀንያ ዊኑን።#ኻወ. 5፡34-39። 4እውነ ግልወድቅ እፅቋ ወኽኒ ጝንል ዲቍስ ይዋጐስ እን እምንትድ ለምረቍድዛትቅ ክርጥጚስቅ ሲድሳ ዊኑን። 5እንዝም ካኽነጣነ ኻልቀይዝመ ሽመቅሊዝቅ ይጭስ ሚዝርድጥቍ፤ ደማስቈ ፅበቍ እን እቅድዛይቅ ቐፃሽጥጘ የር እየሩሳልየም ትጐ እፅቋ ነስጨ ማጥን ጝታቕምቲስ ደማስቈት ኣይዅዳኒዝ ፃፍጝ ነይጘው ደብዳቢድ ለምጥ ፊጣ ዊኑን።#ኻወ. 8፡3፤ 26፡9-11።
6«ደማስቈ ኻትመይል ችጝጨ ጓንድም፣ ቀትር ሰቲዝ ድጝግት ሲመይስ ኽየው ብርኻን ይብጣይል ምርቑ። 7ኣይንድም ዝቨይል ሊቩን፤ እግረም፦ ‹ሳውል! ሳውል! ውር ቃጥ የጝ ይት ሲድስረውድ?› የው ድመ ወጩን። 8ያንም፦ ‹ኣደረወ ክት ኣው የጝ?› ዩን፤ ጘጝም፦ ‹ያን ክት ሲድስረው ናዝሪትቱ እየሱስ የጝ› ዩ። 9ይጅቅ ዊነቍድ ግን ብርኻንድ ቓልጚ ይጅቅ ዊግተዊዙ ድመድ ወሺየቍም። 10ያንም፦ ‹ኣደረወ! ነን ውር ፃቭጨ በንረኵ› ዩን፤ ኣደረም፦ ‹ፈር ጕ! ደማስቈ ትጐ ፊጥ፤ ክት ፃቭተ ጥውሸውድየንትቅ ጝጊስ ድቍጥቍ› የው ዊግቱ። 11እድየን ብርኻንድ ጭቕጘ ምርቑዝ ቓለነ ባንስቅ ይጅቅ ዊነቍ እቅድ ይናንድ ፃይጝ ቃውጛ ደማስቈ ችጝዝ።
12«ደማስቈስም እደረት ኽግድ ኣዘጘ ቲግየዝ ፃልየው ጝግል ፅበቍ ኣይዅዳንድቅ ሚዝርድጘው ኻናንየ ይሽተው ላው እጅር ዊኑ። 13ጘጝ እጅርድም ይጐ ተሩ፤ ይጋቢልም ችብር፦ ‹ይዝን ሳውልወ! ክእልጣንድ ቓልጝነ!› ዩ፤ ያንም ኣይንድ በውዝ ጝት ቓሉን። 14ኻናንየም፦ ‹ይናኣቅሊዝ ኣምላክ ጝፍቃድድ ኣርቕተ ማጥን፣ ጝፅድቅድም ቓልተ ማጥን፣ ጝምቸይስም ጝቃልድ ወሽተ ማጥን በውርስ ማርፅኩ። 15እኒንትቅ ፃቨውድም ክቓልደዊዝም ኣነ ወሽረዊዝቅ እቀ በዊልቅ ጝሚዝር ኣተ ማጥን የጝ። 16እደስለ ውር ፃቭተም ደይራ? ጕ! ጝሽድ ጭጝራ ጣምቅጭ፤ ክኽጥያቲስም እቓጭ› ዩ።
17«እድዝ ግረ እየሩሳልየም ዋጥር መቅደሲል ኣቕ ፃልያ እትለዝ ቓላ፦ 18ኣደረ፦ ‹ክት ይቍዝ ሚዝርደውድየንትቅ ወሻቍም ኣቓንስቅም እየሩሳልየምስ ቃዝየዝ ፍ› የው ዊግታንድ ወጩን። 19ያንም ኣደረወ! ክት ኣምነቍድዛትቅ እፅቋ ድድብጨ ምኵራቫኒልቅ ጅልዋ ዊነጘ ኣርቕጘኵ፤ 20ክሚዝር እስጢፋነውስት ብርድ ቅብስጛንድም ያንም ጛጅቅ ቲስመም ጝታጋቢል ችብጥ ቍወቊ እቂዝ ኣልብድ ሊሚዳ ዊኑን ዩን።#ኻወ. 7፡58። 21ኣደረም እለ እክልል ፅበቍ ኣኽዛቫኒል እፃጭር፤ ነንም ኣሽ ጕር ፊጥ ዩ።»
22ኽዝቭድም እን ዊገይል ኣሽ ባውሎስት ዊገድ ወሻ ዊኑ፤ እንዝ ግረ ግን ጝቃልድ ኣጕስ ሸው፦ «እን እጅርድየንት እለ ዝቨይስ ድሽ፤ እነየው እጅር ዝቨት ዲጊል ፅብጠ ጥውሻውም» ያ ቓፁ። 23ኽዝቭድም ቓፃ ጝኣልብድም ንየ ዊርውራ ብጥድዛትም ንየ ቡል ሻ ዊኑ። 24ዊተድሪዝ ኣዘተድም እኒንትቅ ቓላንድ ባውሎስት ዊተድሪዝ ስፍረይል ድውጝ ኽዝቭድ ወረጘዝ እነይጛ ቓፅጘዊዝ ምላሰንድየንት ጊርፍሻ ሚርምርሽጠ ማጥን ኣዙ። 25ባውሎስም ጝት ኣኽርዝ ጊትርጝ ጊርፍጥጘ ጕጛንድ ቓል፣ ጝጋቢል ችብር ዊነው ላዝ ኻልቀድየንት፦ «ረውምየት ዘይገድየንት ፍርድ እጀው ጊርፈነው ፍቃድ ኣዊስ ችጝርኑ?» ዩ።
26ላዝ ኻልቀድም እኒንት ወሻንድ ዊተድሪዝ ኣዘተይል ፊር፦ «ክፃቭተ በንረዊስ ቋጥቭጭፈ! እን እጅርድ ኣቕሽ ረውምየት ዘይገ የጛ» ዩ። 27ዊተድሪዝ ኣዘተድም ባውሎስት፦ «እስቲ ድቍፈ! ክት ረውምየት ዘይገመ?» የው ዋቕሩ፤ ጘጝም፦ «የያ» ዩ። 28ዊተድሪዝ ኣዘተድም፦ «ያን እኒን ዘይግነትድ ችጘውድ ንቕፀቍ ጊንዝቫን ኪፍል የጝ» ዩ፤ ባውሎስም፦ «ያንስ እዅርጫንድ ኪርም ረውምየት ዘይገ የጝ» ዩ። 29እንዝ ማጥን ሚርምርጥጘ ኣስልሽጝ ዊነቍድዛይ በውዝ ጝጊስ እክልድ፤ ዊተድሪዝ ኣዘተድም ባውሎስ ረውምየት ዘይገ ኣቐነውድ ወሻንድ ሰንሰለትዝ እፁስ ዊናንስቅ ጐውቱ።
ባውሎስ ኣይኽዳኒዝ ሸጐዊል ኣልተጘ
30ጛምርሲዝም ዊተድሪዝ ኣዘተድ ኣይዅዳንድ ባውሎስት ኪስጘዊዝ ምላሰንድ ወረጘ ኣቐጘ እርግጥድ ኣርቕጠ በን እክሱ፤ ካኽነጣነ ኻልቅጢዝመ ሸጐዊዝ ኣቫላንድም እጝቅቅ ኣኽቭሽጥጘ ማጥን ኣዙ፤ ባውሎስትም ደረጀይስ ጊምዝ ጝታበዊል ችብሱ።
Currently Selected:
ኻወርየታኒዙ ሰቭ 22: ኽምጣኣኪ
Highlight
Share
Copy
Want to have your highlights saved across all your devices? Sign up or sign in
