ኻወርየታኒዙ ሰቭ 23

ፈወነ 23

1ባውሎስም ሸጐውድየንት ትክ የው ቓል፦ «ይፅን ክታችወ! ያን ነኳን ኣሽ እደረት በዊል ይጊዝውድ ንፅዅ ኣቐጘ የጝ ፅበውድ» ዩ። 2ካኽነጣነ ኻልቀ ኻናንየ ግን፦ «ጝምቸድ ሽጥንፈይ» የው ባውሎስት ጋቢል ዊነቍ እቅድዛት ኣዙ። 3ኣይንድም ባውሎስ ካኽነጣነ ኻልቀድየንት፦ «ኑረዝ ሊስንሽረር ግድግደ ክተ! ክት ቈሽ እደረ ጣዝጡ፤ ኽግዝ ሚስርትዝ ፊርድተ ጐይር ፅብራመ ኽግ እጀው ጣዝጥን ይር ኣዝራ?» ዩ።#ማቲ. 23፡27-28። 4ጝግል ዊነቍ እቅድም፦ «እፈ እደረት ካኽነጣነ ኻልቀድየንትመ እነሽር ዛሽራ?» ይ። 5ባውሎስም፦ «ይፅን ቈደይ ካኽነጣነ ኻልቀ ኣቐጘ ኣርቒቀርም፤ ምላሰንድም፦ ‹ክኽዝቪዝ ኻልቀይል ጭቓ ዊገ ዊግተ› ይሽት ፃፍሽኩ» ዩ።#ዘፀ. 22፡28።

6ባውሎስም ጝግል ዊነው ኽዝቭድየን ግቨርድ ሰዱቃን ግቨርድ ቈሽ ፈሪሳን ኣቐጘ ኣርቓንስቅ፦ «ይፅን ክታችወ! ያን ፈሪሳነዊስ እዅርጨር ፈሪሳነው እጅር የጝ፤ ነን ፍርድል ኣልጠውድም ክረቊዝ ጐነድ ቲስፈ ፃቫንስቅ የጝ» የው ሸጐዊዝ በዊል ቓፁ።#ኻወ. 26፡5፤ ፍልብ. 3፡5። 7እኒንት ዊግታንድም ፈሪሳኒዝመ ሰዱቃውያኒዝ ማኽሊል ኣምበጐሮ ጕይሽ ሸጐውድ ሊጘትል ቲተቲቱ። 8ምላሰንድም ሰዱቃንድ፦ «ክርጘይስ ጐነም፣ መላክም፣ መንፈስም፣ እጀውም» የቍ ጛይ፤ ፈሪሳንድ ግን፦ «እንዛይቅ እኵ» ይጝ ኣምነቍ ዊን።#ማቲ. 22፡23፤ ማር. 12፡18፤ ሉቃ. 20፡27። 9ኣይንድም ኽየው ቒቒተ ኣቑ፤ ፈሪሳነ ዊግኒስም ላው ላው ወሪትት ኽግ ክንሰጥድ ጕጝ፦ «ይን እን እጅሪስ ውረውረ ጭቓ ዊገም ችጚነቅ፤ መንፈስ ዊንም መላክመ ጝጭስ ዊግቱ ኣጢ? ይን ውር ኣርቕነቅ?» ይጛ ተከራክርሽ። 10ጐርድም ጭቕጘ ኪራ ፊራንድ ዊተድሪዝ ኣዘተድ ባውሎስት ብጭቅጭቃይጘጘ ጐውት ዊተድርድዛት፦ «ጊምጥን ባውሎስት እቂዝ ማኽሊስ ፍስርን ጠውሪዝ ሰፈሪል ድውጥን» የው ኣዙ።

11ጛምርሲዝም ኻሪዝ ኣደረ ባውሎስት ጋቢል ችብር፦ «ኣይዝዀች! እየሩሳልየምስ ይማጥን ሚዝርድረጘ ረውምየስም ሚዝርድትር» ዩ።

ኣይዅዳንድ ባውሎስት ቁጥጘ ቃጥርጘጘ

12ቅሻንድም ኣይዅዳንድ ኣኽቭሽጝ፦ «ባውሎስት ቍዊጝቀ ኣረ ጣማይነቅም፤ ኣቝም ዝያይነቅም» ይጝ ፃረፃርሽት። 13እኒን ቅጥረይዝ ቲስመመቍድም ኣርቨይስ ንቕፀቍ እቅ ጛይ። 14ጛይም ካኽነጣነ ኻልቅጢዝመ ሽመቅሊዝጐ ፊርጝ፦ «ባውሎስት ቍዊጝቀ ዃይነጘ ዝያይነጘ ፃረ ፃርሽትንኵኑን። 15እንዝ ማጥን ክትን ሸጐዊጅቅ ቲስመምርን ኪው ሽርን ሚርምርድርነው ላየ መረጀ ፃይርነቅ ተክርን ባውሎስት ክታጐ በርስጠ ማጥን ዊተድሪዝ ኣዝተይል ኣምልክትጥን፤ ይንም እንል ችጚጝቀ ጒደነይስ ቁነ ኣስልሽንኵኑን» ይ።

16ዊገድ ግን ባውሎስስ ጝስንት ዅር እኒን ዊገድ ወሻንስቅ በውዝ ዊተድሪዙ ሰፍረይል ጥው ባውሎስስ ድቁ። 17ባውሎስም ላዝ ኻልቅጢስ ላውድየንት ጭጝ፦ «እኒን እፈረድ ዊተድርዝ ኣዘተይዝ ዊግተው ዊገ ፃይኩ ፊስር ዲምቅ» ዩ። 18ላዝ ኻልቀድም ዊተድሪዝ ኣዘተይል ፊስ፦ «እፁሸው ባውሎስ እኒን እፈረድ ዊተድሪዝ ኣዘተይዝ ድቈነው ዊገ ፃየው የጝ፤ ፊስርቀ ዲምቅሳር የው ይት ጨዉ» ዩ። 19ጘጝም እፈረይዝ ናንድ ፃይ ገለል የው ስፍረል ፊስ፦ «ይጭስ ድቍተ በንረው ዊገድ ወረጘ የጝ?» የው ዋቕሩ። 20እፈረድም፦ «ኣይዅዳንድ ባውሎስት ኪው ሽጝ ሚርምረቍ ተክጝ ኣምር ሸጐዊል ኣልስተ ማጥን ክት ጨውጥጘ ቲስመምጝኵ። 21ክት ግን ቀሰው ይተ፤ ምላሰንድም ኣርቨይስ ንቕፀቍ እቅ፦ ‹ጝት ቁዊጝቀ ዃይነቅም ዝያይነቅም› ይጝ ፃረፃርሽትጝ ጝት ቁጥጘ ጒደነይል ጭቭርጝኵ፤ ነንም ኣስልሽጝ ክዊሰድየንት የጝ ሊሚድጘውድ» ዩ። 22ዊተድሪዝ ኣዘተድየንም እኒንት ወሽ በር እፈረድየንት፦ «እኒንት ይጭስ ድቍረጘ ኣውማውስቅ ጋልፅረር» የው ኣዝ ሲነቭሱ።

ባውሎስት ቂሳርየ ፊስጘጘ

23እንዝ ግረ ዊተድሪዝ ኣዘተድ ላዝ ኻልቅጢስ ሊጘድ ጭጝ፦ «ኵኑ ሻቘ ሳይዝ ቂሳርየ ፊረቍ ሊጘ ላ ዊተድር፣ ላጝጥርጝን ፈረስኝጥዝመ ሊጘ ላ ኣጭነ ዊርውረቍ ዊተድርዝ ኣስልጥን። 24ባውሎስስም ፊርዘ ኣስልድርን ቂሳርየት ቅመተ ፊልክስትል ዳኽነዝ ችጝዝጥን» ዩ። 25ፊልክስስም እንት የው ደብዳቢ ፃፉ።

26«ቀላውዲወስ ሉሲወስቲስ እፃሽተው ደብዳቢ፤ ኪብርደር ኻግር ቅመተ ፊልክስስ ችጝነ! ዳኽነ እኵሩመ? 27እኒን እጅርድየንት ኣይዅዳንድ ፃይጝ ቁጥጘ በንጝ ዊን፤ ያን ግን ረውምየት ዘይገ ኣቐጘ ኣርቕ ዊናንስቅ ይዊተድሪጅቅ ችጝ ቓዙን። 28ጝት ኪስጘዊዙ ምላሰንድም ኣርቕጨ በን ጝታሸጐዊል ኣልስ ዊኑን። 29ዊገድ ግን ጝታኽጊዝቍዝ ተከራክርሸነውጚ ክርጘልም ኣነ እፁሸነውል ችጝዘው ላየ ዊገ ችጚቀርም። 30ኣይዅዳንድ ግን እኒን እጅርድየንት ቁጥጘ ቃጥርጘጘ ወጫንድ በውዝ ክጐ በርሱን፤ ጝኪሰትድዛትም ጝታዊገድየንት ክጭስ ኣልስጥጘ ማጥን ኣዙን፤ ዳኽነዝ ኣቕ።»

31ዊተድርድዛይም ኣዚትጘጘ ባውሎስት ኻር ፊስጝ ኣንቲባጥሪስ ችጝዝ። 32ጛምርሲዝም ፈረስኝጥድዛት ባውሎስት ችጝዝጥጘ ፃቭጝ ላጥድ ጝታጠውር ሰፈሪል ዋጥር። 33ፈረስኝጥድም ባውሎስት ቂሳርየ ችጝዝጝ ደብዳቢድ ኻግር ቅመተይዝ ይው፤ ባውሎስትም ጝበዊል ችብስ። 34ኻግር ቅመተድም ደብዳቢድ ኣንቭቭ በር ባውሎስት፦ «ኣውየን ኣውራጀይል የጝ ክኻግርድ?» የው ዋቕሩ፤ ኪልቅየቱ እጅር ኣቐጘ ኣርቓንድም፦ 35«ክኪሰጥድ ኣልትጛንድ ክዊገድ ቓልጭር» ዩ፤ ኺረውድስት ግቢል ኣቕም ሊሚድሽጠ ማጥን ኣዙ።

Currently Selected:

ኻወርየታኒዙ ሰቭ 23: ኽምጣኣኪ

Highlight

Copy