E MATIU 27
27
1 Koe tuku a Kalaisi kuo ha‘i kia Bailato. 5 Koe malafaietagata a Jutasi. 19 Oku valoki a Bailato e hono unoho, 24 oku fanofano hono nima: 26 o ne tukuage a Balabasa. 29 Kuo tatā aki a Kalaisi ae akau talatala, 34 koe tutuki ia ki he akau, 40 kuo manuki‘i ia, 50 kuo bekia ia, bea tanu: 66 oku buluji‘i hono fonualoto, bea leohi ia.
1BEA kuo bogibogi hake, bea fealeleaaki ae kau taulaeiki lahi kotoabe moe kau mātua oe kakai kia Jisu, ke tamate‘i ia: 2Bea hili e nau ha‘i ia, naa nau toki ave ia kia Bonito Bailato koe bule.
3Bea ko Jutasi, aia naa ne lavaki‘i ia, i he ene mamata kuo fakamāu ia ke mate, nae fakatomala ia, o ne toe omi ae koga siliva e tolugofulu ki he kau taulaeiki lahi moe kau mātua, 4O ne behe, Kuou fai agahala i he eku lavaki‘i ae toto maonioni. Bea nau behe, Koeha ia kiate kimautolu? vakai be ekoe. 5Bea li eia ae gaahi koga siliva ki lalo i he fale lotu lahi, o ne alu atu o nooua ia. 6Bea too mai e he kau taulaeiki lahi ae gaahi koga siliva, o nau behe, Oku ikai gofua ke ai ia ki he buha koloa, he koe totogi ia oe toto. 7Bea naa nau fakakaukau, bea toki fakatau aki ia ae goue ae tufuga gaohi ibu, ke tanu ai ae kakai muli. 8Koia nae ui ae goue koia, Koe goue oe toto, o a‘u ki he aho ni. 9Bea fakamooni ai ia aia nae lea aki e he balofita, ko Jelemaia, o behe, Bea naa nau too ae koga siliva e tolugofulu, ko hono totogi o ia nae fakatau, aia nae fakatatau ia ki ai e he fānau a Isileli; 10O totogi aki ia ae goue ae tufuga gaohi ibu, o hage koe fekau a Jihova kiate au. 11Bea tuu a Jisu i he ao oe bule: bea fehui ae bule kiate ia, o behe, Koe tu‘i koe oe kakai Jiu? Bea talaage e Jisu kiate ia, Koia be. 12Bea i he talakovi‘i ia e he kau taulaeiki lahi moe kau mātua, nae logo be ia. 13Bea toki lea a Bailato kiate ia, Ikai te ke fanogo ki he gaahi mea lahi ni oku nau fakailo iate koe? 14Ka nae ikai aubito lea ia ki ai; koia nae ofo lahi aubito ai ae bule. 15Bea koe mea nae fai e he bule i he katoaga koia, koe vete o tuku atu ki he kakai ha bobula e toko taha, naa nau loto ki ai. 16Bea naa nau ma‘u i he gaahi aho koia ae bobula ogoogo, nae ui ko Balabasa. 17Koia i he katoa fakataha akinautolu, nae behe ai e Bailato kiate kinautolu, Kohai oku mou loto keu tuku atu kiate kimoutolu? a Balabasa, be ko Jisu aia oku ui ko Kalaisi? 18He naa ne ilo koe mea i he meheka kuo nau tuku atu ai ia.
19Bea kuo nofo ia i he nofoaga fakamāu, bea fekau e hono unoho kiate ia, o behe, Oua naa ke kau i ha mea ki he tagata maonioni na: he naaku mamahi lahi he aho ni koeuhi ko ia i he eku miji. 20Ka nae ue‘i ae kakai e he kau taulaeiki lahi moe mātua ke nau kole a Balabasa, kae tamate‘i a Jisu. 21Bea lea ae bule, o beheage kiate kinautolu, Kohai iate kinaua oku mou loto teu atu kiate kimoutolu? Bea nau behe, Ko Balabasa. 22Bea behe e Bailato kiate kinautolu, Bea koeha teu fai kia Jisu aia oku ui ko Kalaisi? Bea nau behe kotoabe, Tuku ia ke tutuki ki he akau. 23Bea behe e he bule, He koeha, koeha ha kovi kuo ne fai? Ka nae ajili ai e nau kalaga, o behe, Tuku ia ke tutuki ki he akau.
24Bea i he ilo e Bailato oku ikai jii felave ene lea, kae tubu be ae maveuveu, nae too eia ae vai, o fanofano hono nima i he ao oe kakai, o ne behe, Oku ou maa au i he toto oe tagata agatonu ni: mou vakai ki ai. 25Bea lea ae kakai kotoabe, o behe, Ke iate kimautolu mo e mau fānau hono toto.
26Bea toki tukuage ai eia a Balabasa kiate kinautolu; bea hili ene kauimaea a Jisu, naa ne tukuage ia ke tutuki ki he akau. 27Bea toki ave a Jisu e he kau tau oe bule ki he fale lahi, bea fakataha kiate ia ae kau tau kotoa. 28Bea nau too hono kofu, o ai kiate ia ae bulubulu kulaahoaho.
29Bea hili e nau lalaga ae tatā aki ae akau talatala, naa nau ai ia ki hono fofoga, moe vaa kaho i hono nima toomatau: bea nau tuulutui i hono ao, o manuki‘i ia, o behe, Jiotoofa, tu‘i oe kakai, Jiu! 30Bea nau aanu kiate ia, o too ae vaa kaho, o ta‘i aki hono fofoga. 31Bea hili e nau manuki‘i ia, naa nau too ae bulubulu meiate ia, kae toe ai hono kofu oona kiate ia, o taki atu ke tutuki ki he akau. 32Bea i he e nau hu kituaa, naa nau ilo ai ae tagata Sailine, ko Saimone hono higoa: bea nau bule‘i ia ke ne fua hono akau.
33Bea kuo nau hoko ki he botu nae ui ko Kolokota, ko hono uhiga, koe botu oe uluboko, 34Naa nau atu kiate ia ae vai mahi kuo hui aki ae ahu ke ne inu: bea naa ne kamata ia, kae ikai te ne inu. 35Bea naa nau tutuki ia ki he akau, bea nau vahevahe hono gaahi kofu i he talotalo: koeuhi ke fakamooni aia nae lea aki e he balofita, Naa nau tufa hoku gaahi kofu kiate kinautolu, mo nau talotalo ki hoku kofu tua. 36Bea nau nofo ki lalo, o leohi ia; 37Bea naa nau ai i oluga i hono fofoga hono talakovi‘i kuo tohi, KO JISU ENI KOE TU‘I OE KAKAI JIU. 38Bea nae tutuki ki he akau fakataha mo ia ae ogo kaihaa e toko ua, koe taha ki hono nima toomatau, moe taha ki hono toohema.
39Bea nae manuki‘i ia ekinautolu nae fealuaki ai, mo kalokalo ho nau ulu, 40O nau behe, Akoe oku ke fakaauha ae fale lotu lahi, mo toe laga ia i he aho e tolu, fakamoui koe. Kabau koe Alo koe oe Otua, alu hifo mei he akau. 41Bea manuki‘i foki ia e he kau taulaeiki lahi, moe kau tagata tohi, moe mātua, o nau behe, 42Naa ne fakamoui ae niihi; ka oku ikai te ne faa fakamoui ia. Kabau koe Tu‘i ia o Isileli, oku lelei ke alu hifo ia mei he akau, bea te tau tui kiate ia. 43Nae falala ia ki he Otua; oku lelei ke ne fakamoui ni ia, o kabau oku ne ofa kiate ia: he nae behe eia, Koe Alo au oe Otua. 44Bea koe ogo kaihaa, nae tutuki ki he akau mo ia, nae behe foki e na manuki‘i ia. 45Bea nae fakabouli ae fonua kotoa, mei hono ono oe feituulaa o a‘u ki hono hiva oe feituulaa. 46Bea hokojia hono hiva oe feituulaa, bea tagi le‘o lahi a Jisu, o behe, Ilai, Ilai, lama sabakatani? ko hono uhiga, Ko hoku Otua, ko hoku Otua, koeha kuo ke liaki ai au? 47Bea i he fanogo ki ai ae niihi nae tutuu i ai, naa nau behe, Oku ui ae tagata ni kia Ilaija. 48Bea lele leva ho nau toko taha, ke too mai ae oma. o fakabito ia i he vai mahi, o ne ai ia ki he vaa kaho, bea o hake ke ne inu. 49Ka nae behe e he niihi, Tuku ai be, ka tau vakai be ha‘u ai a Ilaija ke fakamoui ia.
50Bea kuo hili ae toe tagi le‘o lahi a Jisu, naa ne tuku hake hono laumalie. 51Bea vakai, kuo mavaeua leva ae buibui oe fale lotu lahi, mei he botu i oluga o a‘u ki lalo; bea galulu ae fonua, bea mafahifahi ae gaahi maka; 52Bea matoo ae gaahi tanuaga; bea tuu hake ae jino oe kau maonioni niihi nae mohe, 53O nau ha‘u mei ho nau gaahi tanuaga i he hili ene toetuu, o alu ki he kolo tabu, o fakaha akinautolu ki he toko lahi. 54Bea kuo mamata ae eiki tau, mo kinautolu nae iate ia, ke leohi a Jisu, ki he mofuike, moe gaahi mea koia nae fai, naa nau ilifia lahi, o nau behe Ta koe mooni koe Alo eni oe Otua. 55Bea nae ai ae kau fefine toko lahi, nae tutuu mei he mamao o vakai, naa nau muimui ia Jisu mei Kaleli, o nau tauhi ia: 56Ko ho nau niihi ko Mele Makitaline, mo Mele koe fa‘e a Jemesi mo Jose, moe fa‘e ae fānau a Sebeti. 57Bea hokojia ae efiafi, bea ha‘u ae tagata koloaia mei Alematea, ko Josefa hono higoa, koe akoga foki ia a Jisu: 58Bea nae alu ia kia Bailato o ne kole ae jino o Jisu. Bea toki fekau ai e Bailato ke atu ae jino. 59Bea kuo ma‘u e Josefa ae jino, naa ne fakakoloa aki ia ae tubenu mahuiga mo maa, 60O ne fakatokoto ia i hono fonualoto foou, aia naa ne ta i he loto maka: bea filifilihi eia ae maka lahi ki he mataba oe fonualoto, bea toki alu ia. 61Bea nae nonofo ai, o hagatonu mai ki he fonualoto, a Mele Makitaline, bea moe Mele e taha.
62Bea i he bogibogi, aia nae feholoi moe aho teuteu, nae ha‘u fakataha kia Bailato ae kau taulaeiki lahi moe kau Falesi, 63O nau behe, Eiki, oku mau manatu nae lea ae kākā na i he ene kei moui, Ka hili ae aho e tolu teu toetuu hake. 64Koia ke ke fekau ke leohi mau ae fonualoto, o hoko ki hono aho tolu, telia naa ha‘u ene kau akoga i he bo, o kaihaaji ia, bea nau tala ki he kakai, Kuo toetuu ia mei he mate: bea e kovi lahi ai ae kākā ki mui ni i he uluaki. 65Bea behe e Bailato kiate kinautolu, Oku ai hoo mou kau leo: mou o, o faiteliha ki hono gaohi ke mau. 66Bea naa nau alu, o gaohi ke mau ae fonualoto, o buluji ae maka, bea fakanofo ae leo.
Currently Selected:
E MATIU 27: TWB
Highlight
Share
Copy
Want to have your highlights saved across all your devices? Sign up or sign in
