JONE 5
5
1 Koe fakamoui e Jisu i he aho sabate ha toko taha nae mahaki i he ta‘u e tolugofulu ma valu. 10 Ka nae fakakikihi ai mo ia ae kau Jiu, o nau faka-laga ia. 17 Oku ne talia akinautolu, o ne valoki akinautolu, o fakaha be kohai ia i he faka-moni a ene Tamai, 32 ia Jone, 36 i he ene gaahi gaue, 39 bea i he gaahi tohi.
1HILI eni, nae ai ae katoaga ae kakai Jiu: bea nae alu hake a Jisu ki Jelusalema. 2Bea oku i Jelusalema, o ofi ki he mataba sibi, ae ano vai, oku ui i ihe lea faka‐Hebelu ko Beteseta, nae nima hono fale hala. 3Bea nae tatoka ai ae kakai mahaki toko lahi, koe kui, moe bibiki, moe mate, i he tatali ki he gau‘eue oe vai. 4He nae alu hifo ha agelo ki he ano i ha aho, o fakagau‘eue ae vai: bea ko ia e fuofua tuu ki he vai, hili hono fakagau‘eue, nae fakamoui ia mei hono mahaki kotoabe. 5Bea nae i ai ae tagata e taha nae moua e he mahaki i he ta‘u e tolugofulu ma valu. 6Ka kuo mamata a Jisu ki he ene tokoto, o ne ilo kuo fuoloa ene moua, nae fehui ia ki ai, Ko ho loto ke ke moui? 7Bea behe e he mahaki kiate ia, Eiki, oku ikai ha tagata, oka faka-gau‘eue ae vai, ke ne hiki au ki he ano: kae lolotoga eku alu, oku muomua hifo iate au ha taha kehe. 8Bea tala e Jisu kiate ia, Tuu hake, bea too ho mohega, o alu. 9Bea fakafokifa be kuo moui ae tagata, o ne too hono mohega, bea alu: bea koe aho koia koe sabate.
10Koia nae behe ai ae kakai Jiu kiate ia kuo fakamoui, Koe aho sabate eni: oku ikai gofua ke ke fua ho mohega. 11Bea talaage eia kiate kinautolu, Ko ia naa ne fakamoui au, ko ia be nae behe kiate au, Too ho mohega, o alu. 12Bea naa nau fehui ai kiate ia, Kohai ae tagata koia nae behe kiate koe, Too ho mohega, o alu? 13Bea ko ia kuo fakamoui nae ikai te ne ilo be kohai ia: he nae mahui mei ai a Jisu, he nae i ai ae toko lahi. 14Hili ia, nae ilo ia e Jisu i he fale lotu lahi, o ne behe kiate ia, Vakai, kuo fakamoui koe: oua naa ke toe fai agahala, telia naa to kiate koe ha kovi lahi hake. 15Bea alu ae tagata, o fakaha ki he kakai Jiu ko Jisu ia, naa ne fakamoui ia. 16Bea koia nae fakataga‘i ai a Jisu e he kakai Jiu, o nau fie tamate‘i ia, koeuhi ko ene fai ae mea ni i he aho sabate.
17Ka nae talaage e Jisu kiate kinautolu, Oku kei gaue ni a eku Tamai, bea oku ou gaue foki. 18Koia nae ajili ai ae fie tamate‘i ia e he kakai Jiu, he nae ikai ke gata i he maumau‘i ae sabate, ka ko ene behe foki, koe Otua ko ene Tamai, o ne fakatatau ai ia ki he Otua. 19Bea leaage a Jisu, o ne behe kiate kinautolu, Koe mooni, koe mooni, oku ou tala kiate kimoutolu, Oku ikai faa fai e he Alo ha mea eia be, ka koia oku ne mamata oku fai e he Tamai: he koe mea kotoabe oku ne fai, oku fai ia e he Alo foki. 20He oku ofa ae Tamai ki he Alo, o ne fakaha kiate ia ae gaahi mea kotoabe oku ne fai: bea te ne fakaha kiate ia ae gaahi gaue lahi i he mea ni, ke mou ofo ai. 21He oku hage oku fokotuu mo fakaake e he Tamai ae mate; oku behe ae fakaake e he Alo aia kotoabe oku loto ia ki ai. 22He oku ikai fakamāu ha toko taha e he Tamai, ka kuo ne tuku ae fakamāu kotoabe ki he Alo: 23Koeuhi ke fakaabaaba kotoabe ki he Alo, o hage ko‘e nau fakaabaaba ki he Tamai. Ko ia oku ikai fakaabaaba ki he Alo, oku ikai fakaabaaba ia ki he Tamai naa ne fekau ia. 24Koe mooni, koe mooni, oku ou tala kiate kimoutolu, Ko ia oku fanogo ki he eku lea, o tui kiate ia naa ne fekau au, oku iate ia ae moui taegata, bea e ikai fakamalaia ia; ka kuo hao mei he mate ki he moui. 25Koe mooni, koe mooni, oku ou tala kiate kimoutolu, Oku ha‘u ae aho, bea ko eni ia, e fanogo ai ae mate ki he le‘o oe Alo oe Otua; bea ko kinautolu e fanogo te nau moui. 26He oku hage oku ma‘u e he Tamai ae moui iate ia be; bea oku behe be ene tuku ki he Alo, ke ne ma‘u ae moui iate ia be; 27Bea kuo ne tuku kiate ia ae bule ke aana ae fai oe fakamāu foki, koeuhi koe Alo ia oe tagata. 28Oua te mou ofo ai: he oku ha‘u ae aho, e fanogo ai ki hono le‘o akinautolu kotoabe oku i he gaahi tanuaga, 29Bea te nau alu atu; ko kinautolu nae fai lelei, ki he toetuu oe moui; mo kinautolu nae fai kovi, ki he toetuu oe fakamalaia. 30Oku ikai teu faa fai eau be ha mea: oku hage ko eku fanogo, a eku fakamāu: bea oku totonu eku fakamāu; koeuhi oku ikai teu fai ki hoku loto ooku, ka koe finagalo oe Tamai naa ne fekau au.
31Kabau teu fakamooni au eau be, ta oku ikai mooni eku fakamooni. 32Oku ai ha toko taha kehe oku ne fakamooni‘i au; bea oku ou ilo ko ene fakamooni kiate au oku mooni. 33Naa mou fekau kia Jone, bea naa ne fakamooni eia ki he mooni. 34Ka oku ikai aoga kiate au ae fakamooni mei he tagata: ka oku ou lea aki eni koeuhi ke mou moui. 35Koe māma vela mo ulo ia: bea naa mou loto o fuoloa jii be ke fiefia i hono māma.
36Ka oku ou ma‘u ae fakamooni lahi ia Jone: he koe gaahi gaue kuo tuku kiate au e he Tamai keu fai, koe gaue koia oku ou fai, oku fakamooni kiate au, kuo fekau au e he Tamai. 37Bea koe Tamai, aia naa ne fekau au, kuo ne fakamooni kiate au. Nae ikai te mou fanogo i ha kuoga ki hono le‘o, be mamata ki hono aga. 38Bea oku ikai nofoia akimoutolu e he ene folofola: he ko ia naa ne fekau, oku ikai te mou tui ki ai.
39Oku mou kumi lahi i he gaahi Tohi tabu koeuhi oku mou amanaki ke ma‘u ai ae moui taegata: bea koia ia oku fakamooni kiate au. 40Ka oku ikai te mou loto ke ha‘u kiate au, koeuhi ke mou moui. 41Oku ikai teu ma‘u ae fakamalo mei he tagata. 42Ka oku ou ilo akimoutolu, oku ikai iate kimoutolu ae ofa ae Otua. 43Kuou ha‘u au i he huafa o eku Tamai, bea oku ikai te mou ma‘u au: kabau e ha‘u ha taha i hono higoa oona, te mou ma‘u ia. 44E faa tui fefe akimoutolu, oku mou fetaliaki ae fefakamaloaki iate kimoutolu, ka oku ikai te mou kumi ki he fakamalo mei he Otua be? 45Oua naa mahalo teu talatalaaki akimoutolu ki he Tamai: oku ai oku ne talatalaaki akimoutolu, a Mosese, oku mou falala ki ai. 46He ka ne tui akimoutolu kia Mosese, behe, kuo mou tui kiate au: he nae tohi eia kiate au. 47Bea kabau oku ikai te mou tui ki he ene gaahi tohi, e fefe‘i hoo mou tui ki he eku gaahi lea?
Currently Selected:
JONE 5: TWB
Highlight
Share
Copy
Want to have your highlights saved across all your devices? Sign up or sign in
