JONE 4
4
1 Oku talanoa a Kalaisi moe fefine Samelia, mo ene fakailo ia kiate ia. 27 Oku ofo ene kau akoga. 31 Oku fakaha eia kiate kinautolu hono loto feiga ke ogoogo lelei ae Otua. 39 Oku tui kiate ia ae kau Samelia toko lahi. 43 Oku alu ia ki Kaleli, o ne fakamoui ae foha oe bule nae tokoto i Kabaneume.
1BEA koia, i he ilo e he Eiki kuo fanogo ae kau Falesi, oku ului bea babitaiso e Jisu ae kau akoga toko lahi ia Jone, 2(Ka nae ikai fai babitaiso e Jisu, ka ko ene kau akoga,) 3Nae mahui ia mei Jutea, bea toe alu ki Kaleli. 4Bea nae totonu ke alu atu i Samelia. 5Bea hoko ia ki ha kolo o Samelia, nae ui ko Saika, o ofi ki he botu fonua nae foaki e Jekobe ki hono foha ko Josefa. 6Bea nae i ai ae vai keli o Jekobe. Bea kuo hela a Jisu i he fonoga, bea nofo ia i he gutu vai: bea ko hono ono nai oe feituulaa. 7Mo ene aluage ha fefine Samelia ke utu vai: bea behe e Jisu kiate ia, Foaki mai kiate au keu inu. 8(He kuo alu ene kau akoga ki he kolo ke fakatau mea kai.) 9Bea beheage e he fefine Samelia kiate ia, Koe Jiu koe, bea oku fefe‘i hoo tala inu kiate au, koe fefine Samelia? he oku ikai feofoofani ae kakai Jiu moe kakai Samelia. 10Bea leaage a Jisu, o behe kiate ia, Ka ne ke ilo ekoe ae foaki ae Otua, bea mo ia oku behe kiate koe, Foaki mai kiate au keu inu; behe, kuo ke kole kiate ia, ka ne foaki kiate koe ae vai moui. 11Bea behe e he fefine kiate ia, Eiki, oku ikai hao mea ke utu aki, bea oku māulalo ae vai: bea oku ke ma‘u meife ae vai moui koia? 12Oku ke lahi koe i he e mau tamai ko Jekobe, aia nae foaki ae vai kiate kimautolu, bea nae inu ai ia, mo ene fānau, mo ene faga manu? 13Bea leaage a Jisu, o behe kiate ia, Ko ia oku inu i he vai ni, e toe fieinu ia: 14Ka ko ia e inu i he vai teu foaki kiate ia, e ikai aubito toe fieinu ia; ka koe vai teu foaki kiate ia e iate ia koe matavai mabunobuna hake ki he moui taegata. 15Bea behe e he fefine kiate ia, Eiki, foaki mai ae vai ni kiate au, ke oua naaku fieinu be ha‘u ki heni ke utu. 16Bea talaage e Jisu kiate ia, Alu, o ui ho unoho, bea ha‘u ki heni. 17Bea leaage ae fefine, o behe, Oku ikai haku unoho. Bea tala e Jisu kiate ia, Oku mooni hoo lea, Oku ikai haku unoho: 18He naa ke ma‘u ae unoho e toko nima; bea ko ia oku ke ma‘u ni, oku ikai ko ho unoho: i he mea koia kuo ke lea mooni. 19Bea behe e he fefine kiate ia, Eiki, kuou ilo ni koe balofita akoe. 20Nae hu e mau gaahi tamai i he mouga ko eni; ka oku behe ekimoutolu, oku i Jelusalema ae botu oku totonu ke fai ai e he kakai ae hu. 21Bea talaage e Jisu kiate ia, Fefine, tui mai kiate au, oku ha‘u ae aho, e ikai te mou hu ai ki he Tamai i he mouga ni, be i Jelusalema. 22Oku ikai te mou ilo aia oku mou hu ki ai: oku mau ilo aia oku mau hu ki ai: he oku mei he kakai Jiu ae fakamoui. 23Ka oku ha‘u ae aho, bea kuo hoko ni, e hu ai ki he Tamai ae kakai hu mooni i he laumalie moe mooni: he oku kumi e he Tamai ae kakai behe ke hu kiate ia. 24Koe Otua koe Laumalie: bea ko kinautolu oku hu kiate ia, oku totonu ke hu i he laumalie moe mooni. 25Bea behe e he fefine kiate ia, Oku ou ilo oku ha‘u ae Misaia (oku ui ko Kalaisi): bea ka ha‘u ia, te ne fakaha ae mea kotoabe kiate kimautolu. 26Bea talaage e Jisu kiate ia, Ko au ia oku ou lea kiate koe.
27Bea feouga mo ia, kuo ha‘u ene kau akoga, o nau ofo i he ene talanoa moe fefine: ka nae ikai behe e ha taha, Koeha oku ke kumi? be, Koeha oku ke talanoa ai mo ia? 28Bea nae tuku e he fefine ene hina vai, bea alu ki he kolo, o ne behe ki he kakai, 29Ha‘u, o mamata ki ha tagata, kuo ne tala kiate au ae mea kotoabe naaku fai: koe Kalaisi eni be ikai? 30Bea naa nau alu ai mei he kolo, o ha‘u kiate ia.
31Bea lolotoga ia, nae fakakolekole ene kau akoga kiate ia, o behe, Labai, ke ke kai. 32Ka nae behe eia kiate kinautolu, Oku ai eku mea ke kai oku ikai te mou iloa. 33Koia nae febeheaki ai ae kau akoga, Kuo omi e ha tagata haane mea ke kai? 34Bea talaage e Jisu kiate kinautolu, Ko eku mea kai koe fai ae loto o ia naa ne fekau au, bea fakaoji ene gaue. 35Ikai oku mou behe, Koe mahina e fa, bea hoko ae ututa‘u? vakai, oku ou tala kiate kimoutolu, Haga hake ho mou mata, o vakai ki he gaahi goue; he oku hina ia ki he ututa‘u. 36Bea ko ia oku tuuji oku ma‘u ae totogi, o ne tanaki ae fua ki he moui taegata: koeuhi ke fiefia fakataha aia oku tutui mo ia oku tuuji. 37Bea i he mea ni oku mooni ai ae tala koia, Oku tutui e he toko taha, kae tuuji e ha taha kehe. 38Naaku fekau akimoutolu ke tuuji aia nae ikai te mou gaue ki ai: nae gaue ae kau tagata kehe, bea oku mou ma‘u e nau gaue.
39Bea nae tui kiate ia ae toko lahi oe kakai Samelia i he kolo koia, koe mea i he lea ae fefine, i he ene behe, Naa ne tala kiate au ae mea kotoabe naaku fai. 40Bea i he ha‘u ae kakai Samelia kiate ia, naa nau fakakolekole kiate ia ke ne nofo mo kinautolu: bea nae nofo ai ia i he aho e ua. 41Bea tui ae toko lahi kehe koe mea i he ene lea aana; 42O nau behe ki he fefine, Ko eni oku mau tui, ka oku ikai i hoo lea: he kuo mau fanogo ekimautolu, bea mau ilo koe Kalaisi mooni eni, koe Fakamoui o mamani.
43Bea hili ae aho e ua, nae alu ia mei ai, o fonoga ki Kaleli. 44Ka nae fakamooni e Jisu, oku ikai ha balofita oku ne ma‘u ae fakaabaaba i hono fonua. 45Bea i he ene hoko ki Kaleli, nae ma‘u ia e he kakai Kaleli, he naa nau mamata ki he gaahi mea kotoabe naa ne fai i Jelusalema i he katoaga: he naa nau alu foki ki he katoaga. 46Bea nae toe ha‘u a Jisu ki Kena o Kaleli, naa ne liliu ai ae vai koe uaine. Bea nae i ai ae eiki nae mahaki hono foha i Kabaneume. 47Bea i he ene fanogo kuo ha‘u a Jisu mei Jutea ki Kaleli, ne ne alu ki ai, o ne fakakolekole kiate ia ke ne alu hifo, o fakamoui hono foha: he kuo ofi ene mate. 48Bea tala e Jisu, kiate ia, Kabau oku ikai te mou mamata ki he gaahi fakailoga, moe mea fakaofo, e ikai te mou tui. 49Bea talaage e he tagata eiki kiate ia, Eiki, ke ta o hifo, naa mate hoku foha. 50Bea behe e Jisu kiate ia, Alu koe; oku moui ho foha. Bea tui ae tagata ki he lea kuo lea aki e Jisu kiate ia, bea alu ia. 51Bea i he ene kei alu, nae fakafetaulaki mai kiate ia ene kau tamaioeiki, o nau tala kiate ia, o behe, Oku moui ho foha. 52Bea fehui ai ia kiate kinautolu ki he feituulaa nae kamata moui ai ia. Bea nau behe kiate ia, Aneafi i hono fitu oe feituulaa nae mahui ae mofi iate ia. 53Bea nae ilo e he tamai koe feituulaa be koia nae behe ai e Jisu kiate ia, Oku moui ho foha: bea nae tui ai ia, bea mo hono fale kotoabe. 54Ko hono ua eni oe mana nae fai e Jisu, i he ene ha‘u mei Jutea ki Kaleli.
Currently Selected:
JONE 4: TWB
Highlight
Share
Copy
Want to have your highlights saved across all your devices? Sign up or sign in
