Markoos 7

Ɓooyu Yeese Ɔɔtɛ Ijaag Etoŋk

(Maa. 15:1-9)

1Kurakɓa joop Paarisik a rɔɔriytaanak higi Muuseek a omoŋ omoŋ Yorsaleema, nɛɓa tolɗi Yeesee tookɛɛta. 2Nɛɓa dɛnɛr nomtaanak Yeeseek a omoŋ omoŋ a ɗami ma kir aadi arin gɛŋk. 3Joop Paarisik a joop Ayuuduk baŋɛ koorɛrɓa barɛ bɔɔlɔŋeeroŋk nɛɓa kir ɗamiit ma kir aadi arin gɛŋk kɛ ɗɔm. 4Ɔkɔn kir aadi saa weeriikiɗ gabiyoykuŋ, nɛ kir ɗamiit. Koorɛrɓa barɛɗak a ɓɔɔkaaŋ ola sigɔ ito aadi any tuutoŋk a kebet a ola sigɔɓa ijaagɛɛ awɛytiirɛɛk, a aadi bɛɛroyoŋk, ɛɓa koorɛr barɛɗak ɔgɔ a ɓɔɔkaaŋ.

5Nɛɓa joop Paarisik a rɔɔriytaanak higi Muuseek kɔɔniyar Yeesee kɛ "Sɔɔkɛr noomtaanak goonɛk barɛ bɔɔlɔŋeerɔŋk nɛ ɗamar ɗama ma kir aadi arin gɛŋk agut jikon?"

6Nɛɓa sɛŋk jumur sɛɛga kɛ, "Iinak joop sigɔ gayar joop sigɔ mentaanaŋɔŋk! Eekeer any sinɛɓa tonu Isaayaas pɛrkaakɛ agut iinak kɛ,

'Eemɛyarti joop sigi ad nɛŋk dakɛɗa,

ma ɓayɛ nɛŋk yowɛɛɗ eeteeŋ.

7Ŋaadirti kanysɛya,

ege rɔɔriyɔn nɛŋk sekiyɛ etoŋk.'

8Agut sini ŋɔɗari sɔɔk nomɛ sekiyɛɛkɛ Waakoyotoŋk, ma nomɛrɗɔ rɔɔriyɔn barɛ etoŋk."

9Tonuɓa sɛɛga Yeese kɛkar kɛ, "Ŋɔɗari sekiyɛ Waakoyotoŋk agut koorɛɛt barɛ noŋkuk. 10Tonuɓa Muuse kɛ, 'Eemɛyi ŋaaŋa a ɓaaɓa, iɗit sinɔ nyɔɔn ɛmɛs maŋk ɛpɛnik, in ɓokotɛ.' 11Mayakana sɔɔk toniir kɛ ɔkɔn iɗit omaay tonu ɛpɛna maŋk ɛmɛsa kɛ, 'Any sinɛ gun kɔnu kɔnyɛɛɗak nɛkɔ gaɓa a tigi Waakoyota.' 12Nɛ ariir iɗit sinɛ a kiigeeɗ ɗɛyɛ a ijaag any om ɛmɛsa maŋk ɛpɛnaaŋ. 13Aalɛɛr sekiyɛ Waakoyotoŋk agut koorɛɛt barɛ noŋkuk. Ijaagiir ola sigɔ gayi a sigik a ɓɔɔkaaŋ."

Any Sinɛ Ari Iɗit A Somkank

(Maa. 15:10-20)

14Riykɓa Yeese joop gɛɛŋk kɛkar son lak sɛɛnik nɛ tonu sɛɛga kɛ, "Inta geleewɛɛ iinak baŋɛ, ɛ in koɓɛɛ. 15Any sinɛ ari iɗit a somkank sinɛ waasɛ ad nɛɛkɛkik ŋɛɛwɛnŋɔŋk, ma moko ɗama sinɛ gabɛ ada nɛɛkaakik." 16["Sisɔ iɗit sinɔ lak weena sinɔ tiiɗiŋɔŋk, in tiyɛɗ."]

17Saaɓa Yeese ŋɔrɗu joop sigɛ ɓɔɔkaaŋɔŋk nɛ guuguny godeyak, nɛɓa nomtaanak gɛɛnɛ kɔɔniyar agut rɔmɛ nɛɛk. 18Nɛɓa sɛŋk jumur sɛɛga kɛ, "In kiir koɓiiɗ nɔ mɛlɛɛɗa sisɔwa? Kiir ɗegerɔɔn kɛ ɗama sinɛ gaɓɛ iɗit adak baŋɛ kɛɛ any sinɔ ari sɛɛn a somkank? 19Agut sinɔ ɗama ki mɛlɛ ɓayaaya, ma ɗoyu sinɔɔnɛ amɗoŋk nɛ ŋaariri walasa." Yaaŋɛɓa Yeese sinɔ kɛ mentaana komoyɛ ɗamatoŋk baŋɛŋɔk.

20Tonuɓa Yeese kɛkar kɛ, "Ma any sinɛ waasɛk ŋɛɛwɛnŋɔŋk ŋaarkiɗ ɓayaayk sinɛ ari iɗit a somkank sɛɛn sini. 21Sigɛ ŋaararki ete ɓayaayk, koɓi sinɔ ŋɛɛwɛnŋɔŋk, ruunyikeen, agɛy, ɓokotiit etoŋk, 22ibe, golɛ, ŋɛɛwɛnka, raamiyɛ, molkotɔn, epɛɛran, sɔɔkiyɛ tiriya etoŋkuk, ɓɔŋgɔɔrɛɛt ɛɛkoŋk, dɔɔtɛyikeen. 23Ola sigi somkanakik baŋɛ ŋaararki ɓayaay etoŋk nɛ arir iɗit a somkan."

Ŋaadiyɛ Jarti Om Sinɔ Moko Ayuudenkaayk

(Maa. 15:21-28)

24Ŋaarɓa Yeese saadi nɛ kɛɛ mɛndɛra sinɔɔna ar katamɛɛ Tiiroosuk jɔkuk. Nɛɓa guuguny godeya omalta a ɗɛyɛ a kat lakɛ iɗit sinɔ ɗeger ɓɛɛl nɛɛk saadik, yakanaɓa kiigeeɗ gayɛ a dugiɗiiŋ. 25Lakɛɓa jarti sinɔɓa gaamur tɔɔn nɛɛk sinɔ peetik wɛɛŋa sigɔ somkaanakik. Nɛɓa tiyɛ ɔɔtɛ Yeeseek, nɛɓa kus sisa nɛ ɗiiri sɛɛne taamɛkɛ. 26Mokoɓa jarti sinɛ Ayuudenkaay, maɓa Girikenkaay sinɔ komoy Pinisiyaak, ɗoo Siropiniyaak. Nɛɓa sɛŋk kalɛyi Yeesee kɛnɔ ɔɔyku wɛɛŋa sigɔ somkaanakik toomoy nɛɛkɛk. 27Nɛɓa Yeesee tongeeɗ kɛ, "In tɛɛnan ɗami tɔɔmɔk nɔ ɓooɗorar. Agut sinɔ ki gayɛ a boŋɛɛ ɗama tɔɔmɔkoŋk sinɔ geetitank nɔ gaɓɛɛ wartuna."

28Nɛɓa sɛŋk jarti sinɛ jumurgeeɗ kɛ, "Eekeer, Suumi naakɛ. Ɗamar wartun kootaayɔ sigɛ ɗiiɗirark lɔkɔyk tɔɔmɔkɛ ɗookak."

29Nɛɓa Yeese tongeeɗ kɛ, "Jumurunkɔta any sinɔ mentanŋɔŋk. Ŋaari nyaka nookaak. Ŋaararkɔ wɛɛŋa sigɛ somkaanakik toomoy nookɛŋ."

30Weeriɓa jarti sinɛ nyaka nɛɛka nɛ kɛɛ laŋki tɔɔn nɛɛk a kɔ ŋɔɗar wɛɛŋa sigɛ somkaanakik a ɗuɗuŋɗe bɛɛroy raŋk a ɓɛɛlɛ bɔdɛɛɗ.

Ebɔdɛ Yeese Iɗit Sinɔ Ki Tiiɗitik Ɛ Ki Tonɗiitik

31Ŋaarɓa Yeese ɗook Tiiroosuk nɛ kɛɛ Sidoonaa. Nɛ ɗoyu sinɔɔnɛ Katamɛɛ sigɔ Aarink nɛ mɛlɛ gɔrɔwa sinɔɔna obiiŋɔŋk Gɛlilaak. 32Nɛɓa saadi ɗɔkarki joop iɗit sinɔ ki tiiɗitik ɛ ki tonɗiitik son lak sɛɛnik, nɛɓa kalɛyir kɛnɔ riiɓeeɗ ari raŋk kɛnɔ bɔdɛɗ. 33Nɛɓa Yeese pakati iɗit sinɛ joope gɛɛnɛk mowan nɛ diile nɛ kɛɛ gageeɗ pɔlpɔlɛ weena, nɛ topaayɛ ɗeewa gɛɛŋk, nɛ kumeeɗ kaɗa nɛɛk. 34Nɛ ɓɔŋgɔɔrɛ taamɛ dariya nɛ orku Wɛɛŋa nɛ tonu eta sinaana kɛ, "Epata!" wooran nɛɛk sini kɛ, "Tayaak." 35Nɛɓa iɗit sinɛ sisa tiiɗi ɛ tonɗi kɛ ɗɔm.

36Nɛɓa Yeese tonu joopa gɛɛna kɛnɔ kat lakɛ iɗit sinɔ yaaŋɛrgeeɗ any sinik. Yakanaɓa waasɛr a obiiŋ, a ɛtɛ oko sinɛɓa toniiɗɛ sɛɛga kɛnɔ kat yaaŋɛrk. 37Reemɗiɓa ɓayɛtun joop sigɛɓa tiyɛrk baŋɛ nɛ tonur kɛ, "Mentan any sinɛkɔ ijaag Yeesee baŋɛkiŋ. Ijaag joop sigɔ kir tiiɗitik a tiiɗiŋ, ma sigɛ kir tonɗiitik tonɗiiŋ."

Currently Selected:

Markoos 7: KSTM

Highlight

Copy