Markoos 6

Laŋki Yeese Ɓooyan Naajireete

(Maa. 13:53-58; Luk. 4:16-30)

1Ŋaarkiɓa Yeese saadi nɛ mɛlɛrki ɗooka nɛɛka a nomtaanak gɛɛŋk. 2Waawuy Sambatɛyoŋk tukeɓa rɔɔriyɔn godeey tolɛɛɗoŋk Ayuuduk. Geleewɛrgeeɗɓa joop a ɓɔɔkaaŋ nɛɓa reemɗi ɓayɛtun gɛŋk. Nɛɓa tonurgeeɗ kɛ, "Laŋki iɗit sini ola sigi baŋɛ eet? Gagiɗɛɛɓa ɗegerɔn ɛɛkoŋk kɛ jikon? Ijaag sɔɔriyɛ sigi ariit ɛk? 3A mokosu sini ijaagenkɔ kɛɛnoŋk, tɔɔn Maariyamuk? Moko manyaakak Yaykoob, a Yoosep, a Yuudaa, a Simion? Ma manyaakak sigɛ peetakik sɛɛg a eteŋk agut omoŋ seedi?" Nɛɓa darayɛr nɛ dakɛr a kir boŋiiɗ.

4Nɛɓa Yeese jumur sɛɛga kɛ, "Eemɛyɛɛ iɗit pɛrkaakoŋk nyonitaakɛ ɔgɔɔkɛ baŋɛ, mayakana daraayɛɛ ɗook nɛɛkɛ a sooy lak tekaaneer gɛɛŋk a joop wɛy nɛɛkkiŋ."

5Kiɓa oolɛ a ijaag sɔɔriyɛ saadiŋ. Riiɓeɓa ari nɛɛk gortaanakɛ sigɔɔgɛ tekerŋɔŋk dakɛɗa nɛ ebɔdɛ sɛɛgiŋ. 6Reemɗiɓa ɓayɛ nɛɛkɛ agut sinɔ kirɗi ŋaaditik.

Wosɛyɛ Yeese Wosɛytaanak Sigɛ Aarin A pɛɛyk

(Maa. 10:5-15; Luk. 9:1-6)

Nɛɓa weeweri Yeese sinɔɔnɛ mɛndɛr nɛɛk baŋɛk a rɔririyiiŋ. 7Riykɓa Yeese nomtaanak sigɛ aarin a pɛɛyk son lak sɛɛnik nɛ wosɛyɛ sɛɛg a pɛɛy pɛɛy, gaɓɛɓa sɛɛga ɓaŋkawuka kɛnɔ ɔɔyɛr wɛɛŋa sigɔ somkaanakik. 8Tonuɓa sɛɛga kɛ, "In diilɛɛ gumboy dakɛɗa gopɛ noŋk. Ma kat diilɛɛ ɗama, kɛygun kosɛ, kɛygun wori ɛ kɛygun teeɓɛɛ. 9In gaɓɛɛ saamɛyɛ deraka, ma kat gaɓɛɛ ɛɛka abii wonoyɛtoŋk om. 10Saakɔɔ guugunyarɗɔ godeya omaltaak, in beeɗɛɛ saadi nɔkɔɔ ŋaararkiɗɔɔ mɛndɛre saak. 11Ɔkɔn lakɛ nyon omalte iɗit sinɔ kɔnu ki boŋiiɗ maŋk ki kɔna geleewɛɛtkiŋ, nɛ in tɛntɛŋɛɛrɛ duudur sinɛ latukari derakɛk saa ŋaararkiɗɔ saadik. Dakɛkoy sɛɛga sini a misikiri rɔɔrɔkɔɔnoŋk."

12Nɛɓa wosɛytaanak gɛɛnɛ ŋaaraki saadi, nɛ rɔɔriyar joop baŋɛ kɛnɔ weeriik tikiyɛɛkɛ Waakoyota. 13Ɔɔyɛrkiɓa wɛɛŋa sigɔ somkaanakik a ɓɔɔkaaŋ, ɛɓa ebɔdɛr gortaanak a ɓɔɔkaaŋ a ɗonyɛr sɛɛg jɛyitii.

Rer Yowanis Sinɛ A'aadiik

(Maa. 14:1-12; Luk. 9:7-9)

14Ɗegerɛɛɓa ɔɔtɛ Yeeseek joope baŋɛ. Nɛɓa tiyɛ tapa sinɛ kɛ Herodisik agut sɛɛniŋ. Tonurɓa joop ɔgɔɔk kɛ, "Ŋaarkikɔ Yowanis sinɛ A'aadiik ret walasa. Agut sini ijaagɛɛ sɔɔriyɛ sigi baŋɛ Sɛɛne."

15Maɓa joop ɔgɔɔk tonur kɛ, "Ege sini Eliyaas."

Ma ɔgɔɔk tonur kɛ, "Ito ege sini joope pɛrkaakoŋk sigaagɛɓa jeemɛk om."

16Saaɓa tiyɛɗ Herodis sinik, nɛɓa tonu kɛ, "Ege sini Yowanis kan yawa ŋɔɗɔ nɛɛkik, ŋaarkikɔ ret walasa sɛɛn."

17Agut sinɔ gaamuɓa Herodis Yowanis nɛ gaɓɛ godeya korkoɗɔɔnoŋk agut jarti manyaak Pilipoosuk Herodiyadaa. 18Agut sinɔɓa toniiɗ Yowanis Herodisa kɛ, "Moko liki sinɛkɔ boŋiɗin jarti masookooŋkuk kɛɛɓaana pɛgɛdɛt." 19Ŋadiɓa Herodiyada agut sini nɛɓa ɗɛyɛ a ɓokotuguɗɛɛ Yowanis, yakanaɓa kiigeeɗ gayɛ. 20Agut sinɔ dɛnɛɓa Herodis Yowanis a iɗit sinɔ mentan taamɛkɛ Waakoyotoŋk ɛ geetitank, nɛɓa ɓureŋ a koorɛŋ. Saaɓa Herodis tiyɛɗ waasiyɛ Yowanisik, nɛɓa gelewugeeɗ yaakat. Yakanaɓa waasiyɛ gɛɛnɛ ooɗɛr sɛɛniŋ jɛt.

21Pediya mɛlkiɓa ɓɛɛnyɔ sinɔ mentanŋɔŋk Herodisa. Ɓeny sinaanɛɓa eemɛyɗi Herodis ɓɛɛnyɔ sinɛɓa ɓartɛɗɛɛ sɛɛnik, ijaagɓa wɔɔr suumiyɛɛka maŋgistiyoŋk a ɔɗɔweera amaasiniyɛɛkoŋk a joopa sigaaga boobɛrk ɗegerɛɛ sɛɛg ɗook Gɛlilaak. 22Nɛɓa tɔn Herodiyadaak sinɔ peetik kɛɛ nyona wɔɔroŋk a duubuyeŋ nɛ ari Herodis a joop sigɛɓa wɔɔrɛɛk sigɛɓa sɛɛg a sɛɛnik a yaa sɛɛgaŋ. Nɛɓa tonu tapaɗ sinɛ tɔɔna sinaana kɛ, "Gaɓa kɔɔna, any sinɛ ɗɛyink baŋɛ." 23Nɛɓa kuumɗigeeɗ kɛ, "Gaɓakɔɔna, any sinɛkɔɔte kɔɔniyink baŋɛ, kɛygun aasi ɗoo naak gɔɔ om!"

24Nɛɓa sɛŋk kɛɛ son lak ɛmɛsik nɛ kɛɛ tongeeɗ kɛ, "Kalɛya jikon?" Nɛɓa ɛmɛsa jumurgeeɗ kɛ, "Kalɛyi ɔɗɔ Yowanis sinɛ A'aadiik."

25Nɛɓa tɔn sinɛ mur sisa a gorgorŋ son lak tapaɗ sinɛk nɛ kɛɛ tongeeɗ kɛ, "Ɗɛya ata gaɓɛɛ ɔɗɔ Yowanis sinɛ A'aadiik sise a ar lɔkɔy."

26Nɛɓa tapaɗ sinɛ reemɗi ɓayɛ nɛɛkɛ jɛt agut any sini, yakana agut sinɔɓa kuumɗiiɗ joope sigaagɛɓa wɔɔrɛɛk taamɛkɛk, kiɓa oolɛ a ɓaar ant sinaanɛɓa kalɛyikiŋ. 27Nɛɓa tapaɗ sinɛ sisa wosɛyɛ amaasini nɛɛk om, kɛnɔ kɛɛ yawuku ɔɗɔ Yowanisik nɔ ɗɔkuɗ. Nɛɓa amaasini sinɛ kɛɛ godeya korkoɗɔɔnoŋk nɛ kɛɛ yawuku ɔɗɔ Yowanisik, 28nɛ ɗɔku lɔkɔy, nɛ gaɓɛ tɔɔna sinaana, nɛ tɔn sinɛ gaɓɛ ɛmɛsa. 29Saaɓa nomtaanak Yowanisik tiyɛrɗi sinik, nɛɓa kurak diiler buusɛ nɛɛk nɛ kaar kɔwarŋ.

Gije Yeese Ɗama Joop Sigɔ Kumɛɛ Tuulk

(Maa. 14:13-21; Luk. 9:10-17; Yow. 6:1-14)

30Murarkiɓa nomtaanak saadiɓa sɛɛg wosɛygiɗɛɛk nɛ kurak tolɗi taamɛkɛ Yeeseek, nɛ tonurgeeɗ any sinɛkɔ ijaagirk a sinɛkɔ rɔɔriyaaɗik baŋɛ. 31Nɛɓa sɛŋk tonu sɛɛga kɛ, "In kɛɛɗɛ nyona omalta sinɔɔna ɓɛɛlɛ mowank iinak mowan, nɔ kɛɛɗɛ imiinyɛɛ a balaaŋ." Nɔɓa toniiɗ sinik kurakɓa joop a ɓɔɔkaaŋ son lak sɛɛgik, aɓa aasi kir oolɛ a laŋir ɔɔtɛ sinɔ ɗamiiɗŋɔŋkuŋ. 32Nɛɓa kaar emɗ soona ɓɛɛlɛ mowank kɛnɔ sɛɛg mowan.

33Saaɓa kaarɗik dɛnɛrɓa sɛɛg joop a ɓɔɔkaaŋ nɛ ɗegerar sɛɛgiŋ, nɛ ŋaaŋarark sinɔɔnɛ katamɛɛkoŋk baŋɛ, nɛɓa reerir derakɛ nɛ mɛlɛr sɛɛge ɔɗɔɔkɛ. 34Saaɓa Yeese worworiikiɗ emɗ nɛɛkɛkik nɛɓa dɛnɛ joop a ɓɔɔkaaŋ a ito jiŋkuyɛ sigɔ kɛɛ sɛɛge irtank, nɛɓa sanɗigeeɗiŋ. Nɛɓa rɔɔriy sɛɛg olaatɛ sigɔɔgɛ ɓɔɔkaaŋɔŋk. 35Ɛnyɛnyɛɓa ɔɔtɛ nɛɛkɛ a kɔjujururuŋ, nɛɓa nomtaanak gɛɛnɛ wideetar ɛɛk son lak sɛɛnik nɛ tonurgeeɗ kɛ, "Ege nyon nɛɛkɛ paaton, ma ɔɔtɛ nɛɛkɛ kɔjujururuŋ. 36Toŋoɗar joop sigi nɔ kaar mɛndɛra sineena jɔkuk nɔ ɓalirki ɗama nɔ ɗamar."

37Yakanaɓa Yeese jumur sɛɛga kɛ, "In gaɓɛɛ sɛɛga any sinɔ ɗamarŋɔŋk sɔɔk."

Nɛɓa tonurgeeɗ kɛ, "Anɛ kɛɛɗii ɓalkii kiiwakɔ sigɔ ɗamarŋɔŋk a dinarak#6:37Dinar wori sinɔ koyɛɛ waawuy sinɔɔnɛ omoŋɔŋk ijaagenta sinɔɔna omoŋɔŋk. ɗibɛɛ pɛɛy nɔ gaɓii sɛɛgaŋ?"

38Nɛɓa sɛɛga tonu kɛ, "Ma latukari kiiwakɔ a eger? In kɛɛɗɛ dɛnkɛ sɛɛg."

Nɛ kaar dɛnɛr nɛ tonurgeeɗ kɛ, "Lakɛ kiiwakɔ a tuul a oltiir a pɛɛy."

39Saadi tonuɓa Yeese nomtaanaka gɛɛna kɛnɔ kaakasar joop sigɛ ɓɔɔkaak ponyakɔɔkɛ nɔ arir sɛɛg a dokurɗe ŋɔnyikɛ sigɔɔgɛ yoolarŋɔŋk. 40Nɛɓa joop sigɛ ɓɔɔkaak kaakasar ɛɛk a ɗibɛ ɗibɛ a pɔlpɔlɛ joop pɛɛyk aarin pɔlpɔlɛ joop pɛɛy aarin nɛ beeɗirŋ. 41Nɛɓa Yeese gaamu kiiwakɔ sigɛ tuulk a oltiir sigɛ pɛɛyk nɛ ɓɔŋgɔɔrɛ taamɛ dariya nɛ geetiŋ, nɛ ŋapati kiiwu nɛɛk, nɛ gaɓɛ nomtaanaka gɛɛna kɛnɔ kaakasar joopa sigaaga ɓɔɔkaak ɛ kaakasar oltiir sigɛ pɛɛyk sɛɛga baŋɛ. 42Nɛɓa ɗami sɛɛg baŋɛ nɛ ɓooɗorarŋ, 43nɛɓa nomtaanak gɛɛnɛ tolɛr kootaayɔ kiiwakɔ gɛɛŋk a oltiir gɛɛŋkik sigɛɓa ŋayɗiik sɛɛgek a kantɛyɛ aarin a pɛɛy a enyaataŋ. 44Joop sigɛɓa ɗamar kiiwakɔ gɛɛŋkik moojak egeɓa ɓɔɔkaaka nɛŋk kumɛɛ tuul.

Ŋawite Yeese Maawɛ Raŋk

(Maa. 14:22-33; Yow. 6:15-21)

45Sisa tonuɓa nomtaanaka gɛɛnak kɛnɔ teeŋɛr emɗa nɔ ɗeyirkun ɗɛɛgasɔ Beetɛsaydaa, ma sɛŋk dakɛ baŋiya kɛnɔ ŋɔɗur joop sigɛ ɓɔɔkaak. 46Nɛɓa saadi pakati sɛɛge ɛɛk, nɛ kɔtɔɔŋɛ kurkuma ɗanɗamɔɔna. 47Saaɓa kɔjururkuɗuk arɓa emɗ nɛɛkɛ goroo sinaanɛ obiiŋiŋk kɔɔr, maɓa sɛŋk ar walas sɛɛn mowan. 48Dɛnɛɓa nomtaanak gɛɛŋk a sanɗi a ooɗɛ sɛɛg kɛɛwɛɛt, agut yoŋgoy sinɛ yoŋgoyɛ sɛɛge ɔɗɔɔkɛk. Kaalt sayitiyɛɛkɛ sigɔɔgɛ tula aŋank kusɓa son lak sɛɛgik a ŋawiitik maawɛ raŋk. Gunɓa ɗoyu sɛɛge takan, 49yakanaɓa dɛnɛr sɛɛn a ŋawite maawɛ raŋk, nɛ koɓur kɛ raŋawo nɛ duriyerŋ. 50Dɛnɛrɓa sɛɛg baŋɛ nɛ ŋaatirŋ. Yakanaɓa sɛŋk sisa tonu sɛɛga kɛ, "Kat ŋaatɛɛ eet, kat ɓuriikɛɛ." 51Teeŋɛɓa sɛŋk emɗa nɛɛka raŋana nɛ sɛɛn a sɛɛg agut omoŋ, nɛɓa nyɛyɛ yoŋgoy nɛɛkɛŋ. Nɛɓa nomtaanak gɛɛnɛ reemɗi ɓayɛtun gɛŋk jɛt. 52Kirkiɓa koɓiiɗ rɔɔriyɔn sɔɔriyɛ sigɛɓa kiiwakɔ sigɛɓakik, agut sinɔɓa kilararɗ ɓayɛtun gɛŋk nɛ kir ŋaadiɗiitik.

Ebɔdɛ Yeese Gortaanak Gensereete

(Maa. 14:34-36)

53Ekaŋɛrɓa gɔrɔ sinɛ obiiŋɔŋk, nɛ mɛlɛr ɗooka sinɔɔna riyɛ kɛ Gensereetik, nɛ widetar emɗ nɛɛk nɛ tuserŋ. 54Saaɓa orurkuɗ ɛɛk emɗ nɛɛkɛkik, nɛɓa joop ɗegertar Yeesee sisa, 55rereriɓa sɛɛk ɗook sinaanɛ baŋɛ nɛ ɗɔkarki gortaanak beeɗiyɛɛkɛ saana arkiɗ sɛŋkik. 56Saagiyakɛɓa kaargeeɗik baŋɛ mɛndɛre a katamɛɛ a kɛntɛɛ ɗɔkarkiɓa joop gortaanak soona bakaanyŋɔŋk. Nɛɓa kalɛyir kɛnɔ aasi kumer gortaanak gɛɛnɛ abii nɛɛk kɛntɛ nɛɛk, nɛɓa bɔdɛr joop sigɛɓa kumerk baŋɛ.

Currently Selected:

Markoos 6: KSTM

Highlight

Copy