Lukaas 17
17
Ɔɔtɛ Ɗiirin Tikiyɛɛkɛk A Tɔŋɔɗ Ɔɔtɛyoŋk A Ŋaadiyɛ
(Maa. 18:6-7,21-22; Mar. 9:42)
1Ɓeny omalte tonuɓa Yeese nomtaanaka gɛɛna kɛ, "Kikoy dakɛ a kiiki mɛlɛ any sinɔ arɗi a tikiɗikɛɛŋɔŋk, mayakana iɗit sinɛ arɗi a tikiɗikɛɛŋɔŋk duri koy sɛɛna. 2Sigeege temetuŋɔŋk iɗit sinɔ ooɗɛ om ɔɔtɛ tikiyɛɛkoŋkuk, dɔɔsgeeɗ a kurɛygiɗɛ goori ŋɔɗɔka, nɛ oriirɛɛ gɔrɔwa sinɔɔna obiiŋɔŋk ɓukuurŋɔŋk. 3In koorɛɛ ɛkan goŋk!
"Ɔkɔnna tikiɗi, masookooyuŋ goopuk. Nɛ ɔkɔnna tiyɛŋ, tɔŋɔɗarkiɗik. 4Ɔkɔnna tikiɗi waawuy sinɔɔnɛ omoŋɔŋk agut tula pɛɛyiŋ, ɛ kus waawuy sinɔɔnɛ omoŋɔŋk agut tula pɛɛy ɛna toton kɛ, 'Weerikaakɔ tikiyɛɛkɛ gaanɛŋ', nɛ tɔŋɔɗatarkiɗ."
5Tonurɓa nomtaana Suumiya kɛ, "Siipi tina ŋaadiyɛ gaŋk."
6Nɛɓa Suumii tonu sɛɛga kɛ, "Ɔkɔn latukari ŋaadiyɛ sigɔ ito saanoykuŋ ɛ toniir aabɛyta sineena kɛ, 'Monta seedi nɔ ɛtin goroo sinoonɛ obiiŋɔŋk.' Nɛkɔna tiiɗiŋ."
Ijaag Ijaagentoŋk
7"Tonuɓa Yeese kɛkar kɛ, "Ɔkɔn kɔne iɗit omaay lak ijaagen sinɔ ijaag taawak maŋk koorɛ jiŋkuyɛɛk, nɛ saa weerikiɗ ijaagen nɛɛkɛ ijaagik, nɛ sisa tongeeɗ kɛ, 'Waɗiŋ, dokuɗe nɔ ɗamun ɗama?' 8Ma moko tongeeɗ kɛ, 'Ijaagta ɗama naak nɔ ɗamika, tusu ɓeetɔn nook teeɓɛɛ mɛlɛɛɗa nɛkɔɔ ɗamiɗa ɛ utiɗiiɗaak. Nɛkɔɔ ɓaane baŋiya ɗamikin ɛ utiɗiikin?' 9Iɗit sini pɔɔsɛ ijaagen nɛɛk agut sinɔkɔ ijaagiɗ any sinɛkɔ tongeeɗikiŋ? 10Oko sinik saa ijaagirɗɔ any sinɛkɔ kɔna tonɛɛk baŋɛk, in tonɛɛ kɛ, 'Eteŋk ijaageer sigɔ kir kɔnyɗiitik. Ijaagiikɔ ijaag naŋk dakɛɗa.' "
Ebɔdɛ Yeese Joop Sigɔ Gorur Dɔɔɓɔyk A Aarin
11Saadi baŋiya saaɓa Yeese kɛɛɗ Yorsaleemak, nɛɓa ɗoyu sinɔɔnɛ kɛntɛ Sɛmaariyaak a Gɛlilaak. 12Nɛ saaɓa mɛlɛɛɗ mɛndɛra omaltaak, nɛɓa laŋirki sɛɛn joop a aarin sigɔɓa sɛɛg gaamu dɔɔɓɔyk. Nɛɓa sɛɛk ɛtɛr a yowɛɛɗiŋ, 13nɛ tonur a ɗooruŋ kɛ, "Iin rɔɔriytan, Yeesee. Maariy tin!"
14Nɛɓa Yeese dɛnɛ sɛɛg nɛ tonu sɛɛga kɛ, "In ŋaarɛɛ, nɔ kɛɛɗɛɛ yaaŋɛɛ ɛɛk noŋk tapaaka ŋaadiyɛɛkoŋk." Nɛɓa sɛɛk bɔdɛrki dɔɔɓɔy nɛɛkɛ sisa, ma atu ŋawit nɛɛkɛk.
15Saaɓa sɛɛge iɗit omaay dɛnɛɛɗ bɔdɛ nɛɛkik, nɛɓa weeriiki a pɔɔsɛ Waakoyo a ɗooruŋ. 16Pɔɔsɛɓa Yeesee a supke tepeen ɗoo derakɛ gɛɛnɛk. Egeɓa sinɛ iɗit Sɛmaariyaak.
17Nɛɓa Yeese kɔɔniy sɛɛn kɛ, "Mokokɔto bɔdɛrki joop a aarin baŋɛ? Nɛ atu eet sigɛ tula aŋank? 18Kɛɛ joop sigɔkɔ weeriik nɔ pɔɔsɛr Waakoyok ete sineene moko Ayuuduk sɔgɔɔsɔyk?" 19Nɛɓa tonu eta sinaana kɛ, "Teŋaraŋana nɔ ŋaarin. Ebɔdɛr kɔnu ŋaadiyɛ goonɛŋ."
Mɛlɛɛ Burɛ Waakoyotoŋkuk
(Maa. 24:23-28,37-41)
20Kɔɔniyarɓa joop Paarisik Yeesee kɛ, "Mɛlkikoy burɛ Waakoyotoŋk okoɗ?" Nɛɓa sɛŋk jumur sɛɛga kɛ, "Mokokoy mɛlki burɛ Waakoyotoŋk oko sinɛ koorɛrɗi joopk. 21Kirkoy joop oolɛ a tonur kɛ, 'Ɓɛɛlɛ seedi' maŋk kɛ, 'Ɓɛɛlɛ sooy, agut sinɔ ɓɛɛlɛ burɛ Waakoyotoŋk iinakɛ kɔɔr."
22Tonuɓa Yeese nomtaanaka gɛɛna kɛkar kɛ, "Mɛlkikoy ɔɔtɛ sinɔkoy ɗɛyɛrɗɔ a gun dɛnɛɛr ɓɛɛnyɔwɛkɛ Tɔɔn Etoŋkuk sinɔ omoŋɔŋk, yakana kiirkoy taanta. 23Ɔkɔnkoy kɔna tonur joop kɛ, 'Ɔsɔ sɛɛn sooyuk!' maŋk kɛ, 'Isii sɛɛn seeyik!' Nɛ yakana kat ŋaadɛɛ any sinɛ kɔna tonurk ɛ kat nomɛɛ sɛɛge. 24Oko sini dɛnɛɛɗɛ nyaalan dari a nyaalɛ kɛntɛɛ mɛlɛɛɗa kɛntɛyak, ɓɛɛlɛkoy ɓɔrɛ ɓenysaakoy mɛlkiɗ Tɔn Etoŋkuk oko sinɛk. 25Yakana a in ki gayɛ sini ɗɛyɛ Tɔɔna Etoŋk a laŋki rakatɛ sinɔ ɓaŋkawuŋɔŋk a daraayɛɛ ɛ laaganyɛɛ joope eme sinik.
26"Oko sinɛɓa ɓɛɛlɛɛɗ eme Noohk, ɓɛɛlɛkoy ɓɔrɛ eme Tɔɔn Etoŋkuk oko sinɛk. 27Ɗamiɓa joop ɛ utiɗi ɛ boboŋi ɛ wawawar, mɛlɛɛɗa ɗoŋika sigaagaɓa guugunyɗu Nooh emɗa sinɔɔna obiiŋɔŋkuk. Nɛɓa mɛlki yeeye nɛ jɔɔlɛyɛɛr sɛɛg baŋɛ.
28"Ɓɛɛlɛɓa ɓɔrɛ eme Lootuk oko sinɛk, ɗamiɓa joop ɛ utiɗi, ɛ ɓalɗi ɛ ɓaɓali ɓolaatuuruwɛkɛ, ɛ waayɗi ɛ kɛnyar godeyik. 29Ɓeny sinaanɛɓa Loot ŋaarkiɗ Sɛdoomek, ɛɛkikiɓa maɗ a koon dari nɛɓa moɗɛɛr sɛɛg baŋɛ.
30"Ɓeny sinaanɛkoy ɓɔrɛ yaaŋɛɗ ɛɛk Tɔn Etoŋkuk ɓɛɛlɛkoy oko sinɛk. 31Ɓeny sinaanɛkoyk iɗit sinɔkoy ar godeey nɛɛkɛ ajeerantik katkoy worworiiki kɛnɔ boŋku ɓɔlaaturuwɛ gɛɛŋk godeey. Maɓɔrɛ iɗit sinɔkoy ar taawoyk katkoy weeriki baŋiya. 32In koɓukɛɛ jartiɓa Lootuk! 33Iɗit sinɔ ɗɛyɛ a ebɔdɛ wɛɛŋa gɛɛŋkik sɔɔkɛ sɛɛgiŋ, mayakana iɗit sinɔ oru wɛɛŋa gɛɛŋkik ebɔdɛ sɛɛgiŋ. 34Tona kɔnaaŋ, kaalt sinaanɛkoy joop a pɛɛy ɗeegararkoy a bɛɛroy omoŋ, nɛkoy boŋɛɛ om, ma omaay dakɛŋ. 35Jartiyatɔk a pɛɛy atukoy giyɛ agut omoŋ, nɛkoy boŋɛɛ om, ma omaay dakɛŋ." 36["Joop a pɛɛy atukoy ijaag taawoy tak agut omoŋ, nɛkoy boŋɛɛ om, ma omaay dakɛŋ."]
37Nɛɓa nomtaanak gɛɛnɛk kɔɔniyar Yeesee kɛ, "Suumi naŋk, boŋɛɛkoy sɛɛg etena?"
Nɛɓa sɛŋk jumur sɛɛga kɛ, "Tolɗi sɔɔlilaŋɛɛk soodi, lakiɗɛ any sinɔkɔ rɛrŋɔŋkuk."
Currently Selected:
Lukaas 17: KSTM
Highlight
Share
Copy
Want to have your highlights saved across all your devices? Sign up or sign in
