Lukaas 16

Ijaagen Sinɔ Ɗeger Ɛɛkik

1Tonuɓa Yeese nomtaanaka gɛɛna kɛ, "Lakɛɓa iɗit om sinɔ lak worik nɛɓa lak ɔɗɔwen ijaageeroŋk sinɔ ikomgeeɗ wɛy nɛɛkik, nɛɓa tonɛɛ eta sinaana lak worik kɛ sɔɔkɛ nɔ ijaagen sinɛ wori. 2Nɛɓa iɗit sinɛ lak worik riyiri sɛɛn nɛ kus tongeeɗ kɛ, 'Ege sini jikon tiya ɔɔtɛ nookɛkik? A tukiɗi ɓenyse kin oolɛɛ a dakin a ijaagen naakiŋ. Gaɓta wori sinɛkɔ ikomiiɗɛɛ ɓolaatuuru gaaŋkik.'

3"Nɛɓa ɔɗɔwen sinɛ ijaageeroŋk koɓu ɓayaay nɛɛkɛ kɛ, 'Ɔɔyɛkɔɔtu suumi naakɛ ijaag naakɛkiŋ nɛ gun puurikaaŋ, nɛkaa oolɛ. Nɛ gun kalɛyɗikaaŋ nɛ laka keeny. Anɛ araa jikon? 4Ɗegera any sinɛkɔɔ araa nɔkɔɔtu joop boŋurɗu nyakikɛ gɛŋk kɛ ɔɔykɛkɔtu ijaag naakɛŋɔŋk.'

5"Nɛɓa suumi nɛɛkɛ riy joop sigɛ latukuɗ gatik a omoŋ omoŋ nɛɓa tonu eta sinaana tuktank kɛ, 'Lakin gati suumii naakɛ a ɛtɛ ɛk?'

6"Nɛɓa sɛŋk tongeeɗ kɛ, 'Laka jayti a kebetɔk ɗibɛ.'

Nɛɓa ɔɗɔwen sinɛ ijaageeroŋk tongeeɗ kɛ, 'I, wargatɛ nɛɛk dokuɗe a gorgorŋ nɔtaapun kɛ kebetɔk pɔlpɔlɛ joop pɛɛy a aarin.'

7"Nɛ tonu eta omalta kɛ, 'Ma seŋk lakin a eger?'

"Nɛ tongeeɗ kɛ, 'Sindee a keesɛyɛ ɗibɛ.'

"Nɛɓa ɔɗɔwen sinɛ ijaageeroŋk tongeeɗ, kɛ, 'I, wargatɛ nɛɛk nɔtaapun kɛ keesɛyɛ pɔlpɔlɛ joop aŋank.'

8"Nɛɓa suumi nɛɛkɛ pɔɔsɛ ɔɗɔwen sinɛ ijaageeroŋk ɗɛgɛjik agut sinɔkan ijaagɗiiɗ ɗegerɔɔn ɛɛkoŋkuk. Joop ɗoo sinik ɗegerar ɛɛk a kaalɛr joop pɛɗɛrkaatoŋk lalaŋ sinaanɛ latu a joop sigɛ gayi a sɛɛgik. 9Tona kɔnaaŋ, saa pediɗ wori ɗoo sinik kɛnɔkoy kɔnu boŋɛ godeey sinaanɛkoy nɔkoy nɔkoyk, in laŋɛɛ joop sigɔ kɔnu porurŋɔŋk wori sineene.

10"Iɗit sinɔ ŋaadɛɛ ant sinɔɔnɛ tɛmŋɔŋkuk, nɛ ɓɔrɛ ŋaadɛɛ ant sinɔɔnɛ obiiŋɔŋkuŋ. Ma iɗit sinɔ kɛɛ ŋaadiit ant sinɔɔnɛ tɛmŋɔŋkuk, nɛ ɓɔrɛ kɛɛ ŋaadiit ant sinɔɔnɛ obiiŋɔŋk. 11Sisɔ ɔkɔn kɔnu kɛɛ ŋaadiit worii ɗoo sinikiŋ nɛ wooɗ sinɛ kɔnu ŋaadi nɔkɔna gaɓɛ wori sinɛ eekerkank? 12Ɔkɔn kɔnu kɛɛ ŋaadiit worii iɗit omkuŋ, nɛkɔna gaɓɛ wooɗ wori sinɔ noŋkuk?

13"Kɛɛ iɗit sinɔ oolɛ a ijaagɗi suumiyɛɛka sigɔɔga pɛɛyk agut omoŋɔŋk. Ɓooyu om, ma poru omoŋ. Maŋk wideer ɛɛk omalta, ma daraayɛ omoŋ. Iɗit sinɔ ijaagɗi woriyak ki gayɛ a ijaagen Waakoyotoŋkuŋ."

14"Joop Paarisik sigɔ porur worik tiyɛrɓa sini baŋɛ, nɛɓa daraayɛr Yeeseeŋ. 15Nɛɓa sɛŋk tonu sɛɛga kɛ, "Iinak ariir ɛɛk noŋk joope taamɛkɛ a mentaanakariŋ, mayakana ɗeger Waakoyot ɓayɛtun goŋkuŋ. Iɗit sinɔ eemɛyar joopk, somkan taamɛkɛ Waakoyotoŋk."

Higi Muuseek A Waawan

(Maa. 11:12-13; 5:31-32; Mar. 10:11-12)

16"Higi Muuseek a joop pɛrkaakoŋk mɛlɛɛɗa Yowanisa waawasarɓaŋ, nɛ saadi baŋiya waasɛɛkan Pɛɛni sinɔ Ɓɛlkɛɛstank burɛ Waakoyotoŋkuŋ. Ŋujarkoy joop baŋɛ guugunyɔn saanak. 17Mayakana, Higii ɔɔtɛ sinɔɔnɛ badɛɛɗ any sinɔ tɛmŋɔŋkuk bala sinɔ ɗoyiɗ dari a ɗook.

18"Iɗit sinɔ pakakati a jarti nɛɛk nɔ boŋu omk baŋɛ, ibiɗiiŋ. Iɗit sinɔ boŋu jarti sinɛkɔ pakakatiikɛkik, ibiɗiiŋ."

Iɗit Sinɔ Lak Worik A Alaajaar Sinɛ Sankank

19"Lakɛɓa iɗit om sinɔ lak worik sinɔɓa kadi abii sinɔ dɛɛŋɔŋk ɛ kɛwukɛwuŋɔŋk sinɔɓa ijaagɛ kɛɛt tɛlbaakoŋk. Nɛɓa sɛŋk beeɗ ɓɛɛnyɔwɛ gɛɛŋk baŋɛ a gaygeeɗ any baŋɛ a yaageeɗ ɓɛɛlɛ. 20Maɓa ɗuɗuŋɓaɗe sankan omaay sinɔ riyɛ kɛ Alaajaarik sinɔɓa ɓɛɛlɛ ɛɛk nɛɛkɛ baŋɛ a doosoy dakɛɗak, tugaat iɗit sinɛ lak worik. 21Ɗɛyɛɓa aasi a gun ɗam kootaayɔ sigɛ ɗiiɗirark nyon ɗamatoŋk sinaanɛ iɗit sinɛ lak worik. Ɛnyɛnyɛkarkɓa wartun nɛ yaayatar doosoy nɛɛk.

22Nɛɓa iɗit sinɛ sankank rɛrŋ nɛ diiler wosɛytaana Waakoyotŋk kokoma Abrahamuk. Nɛ ɓɔrɛ iɗit sinɛ lak worik rɛrŋ nɛ kɔɔwɛɛŋ, 23nɛɓa ar rakatɛɛ siioole, nɛ ɓɔŋgɔɔrɛ ɛɛk nɛ dɛnɛɛr Abraham a yowɛɛɗiŋ, nɛ dɛnɛɛr Alaajaar a kɔ gaamku kokoma. 24"Nɛɓa sɛŋk duriye kɛ, 'Iin baabɛɛ Abraham, maariytik! Rakataare maɗ sineene ɗaawuŋɔŋk, wosɛyareeta Alaajaar nɔ sawɛ pɔlpɔl nɛɛk maawɛ nɔ kus sawɛɛɗ kaɗa naak nɔ saloorur.'

25"Nɛɓa sɛŋk Abraham tongeeɗ kɛ, 'Iin tɔɔn naak, ɗegeri kɛ emeyikɛ sigaagɛkan beeɗiɗin ɗook raŋk baŋɛ, laŋinɓa ola baŋɛ a ɓana yaa ɓɛɛlɛt maɓa sɛŋk Alaajar rakatɛŋ. Nɛ sɛɛna yaa seedi sisɔ, ma seŋk arkin rakatɛɛ tak. 26Sineene baŋɛ gɔɔtaasɔ, lakɛ eteŋkɛ a iinakɛ kɔɔr koor sinɔ ɓukuurŋɔŋk. Nɛ kɛɛ iɗit sinɔ oolɛ a ekaŋɛɛr seey lak eteŋkik son lak iinakik, maɓɔrɛ saay lak iinakik sen lak eteŋkik.'

27"Nɛɓa sɛŋk tonu kɛ, 'Baabɛ, kalɛyareeni sisɔ kɛnɔ wosɛyin Alaajaar son lak baabɛɛk. 28Laka manyaakak eeta a tuul kɛnɔ kɛɛ tonu sɛɛga a ɓaŋkawuŋ kɛnɔ koy kat kurak nyona sineena rakatɛyoŋk.'

29"Nɛɓa sɛŋk Abraham tongeeɗ kɛ, 'Ɓɛɛlɛr Muuse a joop pɛrkaakoŋkuŋ. In geleewɛr sɛɛga.'

30"Nɛɓa sɛŋk tongeeɗ kɛ, 'Iin Baabɛɛ Abraham, moko oko sinɛk. Ɔkɔn iɗit omaay ŋaarki ret walasa ɛ kɛɛ son lak sɛɛgkiŋ, nɛkɔɔ weeriiki tikiyɛɛkɛ Waakoyotaŋ.'

31"Nɛɓa Abraham tongeeɗ kɛ, 'Ɔkɔn kir tiiɗit Muuseya a joopa pɛrkaakoŋkuŋ, kɛygunkɔɔ aasi ŋaarakɛ iɗit omaay ret walsaŋ kir kɔɔ ŋaadiit."'

Currently Selected:

Lukaas 16: KSTM

Highlight

Copy