Lukaas 15

Rɔɔriyaaɗ Yeese Rɔmɛ Jiŋkuy Sinɛɓa Badɛk

(Maa. 18:12-14)

1Ɓeny omalte tolɛrɓa ɛɛk Yeesee tookɛɛta joop sigɔ yayawar worik a tikitaanak kɛnɔ geleewɛr pɛɛniya nɛɛkaak. 2Nɛɓa joop Paarisik a rɔɔriytaanak higi Muuseek laaganyar kɛ, "Boŋu iɗit sini tikitaanak, ɗami aasi a sɛɛg agut omoŋ!"

3Nɛɓa Yeese tonu sɛɛga rɔmɛ sini kɛ, 4"Iinakɛ kɔɔr ɔkɔn kɔne iɗit omaay lak jiŋkuyɛ a ɗibɛ, ɛ badɛɛɗ a omoŋ, wooɗ sinɛ ki toŋoɗ sigɛ pɔlpɔlɛ joop aŋank a aarin a tula aŋan teete, nɔ ki ŋaarin nɔ warɛ sinɛkɔ badɛk nɔkɔɔ laŋiɗik? 5Saa laŋkiɗik, nɛ ɗɔku tigonant a yaageeɗiŋ, 6nɛ jumurku nyaka nɛɛkaak, nɛ riy joop sigɛ porur sɛɛnik a joop sigɛ beeɗir jɔkikentik agut omoŋ nɛ tonu sɛɛga kɛ, 'Laŋakɔ jiŋkuykan naak badɛkiŋ nɛ in kɔna yaa a eet agut omoŋ.' 7Tona kɔnaaŋ, oko sinik yaa burɛɛ Waakoyotoŋk agut iɗit sinɔ tikitank sinɔ omoŋɔŋk sinɔ ɗɛygeeɗ a weerik tikiyɛɛkɛ Waakoyotak a kaalɛ joop sigɔ mentaana taamɛkɛ Waakoyotoŋk sigɔ ki ɗɛyɛ sɛɛga a weerik tikiyɛɛkɛ Waakoyotak sigɔ pɔlpɔlɛ joop aŋank a aarin a tula aŋank.

Taaribɛ Workeyoŋk Sinɛɓa Badɛk

8"Maŋk jarti sinɔ lak taaribɛyɛ workeyoŋk a aarink. Ɔkɔn badɛɛɗi a omoŋ, jarti kɛ wooɗ sinɛ ki idaawit any sinɔ ɗaawuŋɔŋk nɔ ki gaalɛ gode nɛɛk jɛt nɔ ki wariit nɔkɔɔ laŋiɗik? 9Saa laŋiɗik, riy joop sigɛ porur sɛɛnik a joop sigɛ beeɗir jɔkikentik agut omoŋ nɛ tonu sɛɛga kɛ, 'Laŋaakɔ taaribɛ naak workeyoŋk kante badɛkiŋ, nɛ in kɔna yaa a eet agut omoŋ.' 10Tona kɔnaaŋ, oko sinik yaa taamɛkɛ wosɛytaanak Waakoyotoŋkuk agut iɗit sinɔ tikitank sinɔ omoŋɔŋk sinɔ weeriki tikiyɛɛkɛ Waakoyotak."

Tɔɔn Sinɛɓa Badɛk

11Tonuɓa sɛɛga Yeese kɛkar kɛ, "Lakɓa iɗit omaay tɔɔmɔk a pɛɛy. 12Nɛɓa sinɛ tɛmk tonu ɛpɛna kɛ, 'Baabɛ, gaɓta worii nookɛ ɔɔtɛ naak.' Nɛɓa ɛpɛna kaasɛ wori nɛɛk tɔɔmɔka gɛɛnaakiŋ.

13"Nɛɓa ɗoŋikɛ sigɔɔgɛ tekeriŋɔŋk baŋiya, tɔn nɛɛkɛ sinɛ tɛmk boŋu ɔɔtɛ nɛɛk baŋɛ nɛ ŋaar ɗooka sinɔɔna yowɛɛɗŋɔŋk. Nɛɓa saadi kɛɛ sɔɔkɛ wori nɛɛk baŋɛ sɔkɔn. 14Nɛ saaɓa ruumeeɗ wori sinɛɓa lakik baŋɛk, nɛɓa lakɛ ŋaawu sinɔ ɓaŋkawuŋɔŋk ɗook sinaanɛ baŋɛ. Nɛɓa sɛŋk guuguny rakatɛya. 15Nɛɓa wideer ɛɛk eta omalta sinɔɔna nyak nɛɛk ɗook saak, nɛɓa iɗit sinɛ wosɛyɛ taawa nɛɛka kɛnɔ irgeeɗ kuturɛ. 16Nɛɓa aasi tɔn sinɛ ɗɛyɛ ɗamata taamɛ kɛɛnoŋk sigɛ ɗamar kuturɛ gɛɛnɛkik. Nɛɓa aasi kɛɛ iɗit sinɔ gageeɗ any sinik.

17"Nɛɓa weeriki son lak koɓi nɛɛkik nɛ tonu kɛ, 'Ɗamar ijaager baabɛɛk kiiwu nɔ ŋayɗiiki sɛɛge, ma saak rɛɛra ŋaawu seedi. 18Gundɔɔ ŋaara waa baabɛɛkiŋ nɔ kɛɛɗa tonguɗa kɛ, "Baabɛ, tikiɗiikakɔ Waakoyote a iine taamɛkɛ. 19Seedi son ki gayɛ ati riyɛ kɛ tɔɔn nookkuŋ. Ikomutu a ito eet ijaagen nook om.' 20"Nɛɓa ŋaar nɛ kɛɛ son lak ɛpɛnik.

"Nɛɓa dɛnɛɛr ɛpɛna a in ar a yowɛɛɗiŋ nɛ sanɗigeeɗiŋ. Nɛ reerirgeeɗ, nɛ kɛɛ gaamku kokoma nɛ samɓoyŋ.

21"Nɛɓa tɔn nɛɛkɛ tongeeɗ kɛ, 'Baabɛ, tikiɗiikakɔ Waakoyote a iine taamɛkɛ, nɛɓɔ seedi son ki gayɛ ati riyɛ kɛ tɔɔn nookkuŋ.'

22"Yakanaɓa ɛpɛna tonu ijaageera gɛɛna kɛ, 'In kɛɛɗɛɛ a gorgorŋ nɔ kɛɛɗɛɛ ɗɔkɛɛ abii sinɛ mentan sɛɛge baŋɛk, nɔ gagiɗɛɛ ɛɛka ɛ gagiɗɛɛ kati pɔlpɔlta ɛ gagiɗɛɛ saamɛyɛ deraka. 23In kɛɛɗɛɛ ɗɔkɛɛ tɔɔn sinɛ taŋoŋk mooyk gɔɔnŋɔŋk, nɔ kusɛɛ ŋɔɔlɛɛ, nɔ ɗamikii ɛ in tina yaa. 24Rɛrgunkan Tɔn naak siniŋ, nɛɓɔ bɔdɛ sisɔŋ. Badikɛɛkanŋ, nɛkɔɓɔ laŋɛɛŋ.' Nɛ sɛɛga saadi yaaŋ.

25"Arɓa tɔn sinɛ bɔɔlɔŋk ɔɔtɛ sinaanɛ taawoy. Saaɓa weerikiɗik nɛ saaɓa wɔɔŋkuɗ waak, nɛ tiyki koŋgoy iiliyakoŋk a duubiyeetoŋk. 26Nɛɓa sɛŋk riyiri ijaageerɛ gɛɛnɛ om nɛ kus kɔɔniy kɛ, 'Ege sini jikon?' 27Nɛɓa tongeeɗ ijaagen sinɛ kɛ, 'Mɛlkikɔ masookoy. Nɛ agut sinɔkɔ mɛlkiɗi bɔdɛɛɗik, nɛkɔ ɓaaɓa ŋɔɔlgeeɗ tɔɔn taŋoŋk sinɛ mooyk gɔɔnŋɔŋk.

28"Nɛɓa manya sinɛ bɔɔlɔŋk ŋadiŋ aɓa kiɗɛyɛ a guuguny godeyaŋ. Nɛɓa ɛpɛna ŋaarki walasa nɛ kalɛyi kɛnɔ guuguny. 29Nɛɓa sɛŋk jumur ɛpɛna kɛ, 'Ijaagɗika kɔna a emeyi ɛtɛr oko sinik a ito eet laaŋoyen, kɛɛ sekiyɛɛkɛ sinɔ omoŋɔŋk sinɔkɔ sɔɔkaak. Nɛ seŋk aasi kinkɔta gaamit tɔɔn kemtoŋk a omoŋ kɛnɔta yaa eet a joop sigɛti porurk. 30Mayakana tɔɔn nook sini kɛɛkɔ sɔɔkɛ wori nook sɛɛn a ruunykaanak, nɛ mɛlki nɛ kusun ŋɔɔlguɗun tɔɔn taŋoŋk sinɛ mooyk gɔɔnŋɔŋk.'

31"Nɛɓa tongeeɗ ɛpɛna kɛ, 'Tɔn naakɛk, iin a eet ɓɛɛnyɔwɛ gɛɛŋk baŋɛ, ege any sinɔ naakik baŋɛ nook. 32Ɗɛyɛ a tina yaa jɛt agut sinɔ masookoy sini rɛrgunkan, nɛ bɔdɛŋ. Badɛɛkanŋ, nɛkɔɓɔ laŋɛɛŋ agut sini ɗɛyɛ a tina yaa jɛt."'

Currently Selected:

Lukaas 15: KSTM

Highlight

Copy