Yowanis 2

Weerɛ Yeese Maawu A Ogool

1Ɗoŋikɛ jiiteene nɛɛkɛɛk lakɛɓa waawan ɗook Gɛlilaak, katamɛɛ sinɔɔnɛ riyɛ kɛ Kaanaak. Nɛɓa ɓɔrɛ ɓɛɛlɛ ɛmɛsa Yeeseya saading. 2Maɓa ɓɔrɛ riyɛɛ Yeesee a nomtaanak gɛɛŋk waawana nɛɛkaang. 3Nɛ saaɓa pedirɗi ogol wɛynik nyon sinaanɛ waawanoŋkuk, nɛɓa ɛmɛsa Yeeseya tonu Yeeseya kɛ, "Pedirkɔre sɛɛge ogolŋ."

4Nɛɓa Yeese tongeeɗ kɛ, "Iin jarti sini, lakii eet a iin jikon? In ki gayɛɛ ɔɔtɛ naakɛk."

5Saaɓak tonuɓa ɛmɛsa ijaageera sigaagaɓa atu saadik kɛ, "In ijaagɛɛ any sinɛ kɔna tonu sɛŋkik."

6Lakɛɓa saadi gaaniyɛ sigɔɓa ijaagɛɛ sɛɛg giɗeek a tula om, joop Ayuuduk latuɓa ɔɔtɛ barɛ ŋaɗɛɗoŋk. Gaani sinɔ omoŋɔŋk gagiɗɛɛ maawu a kebetɔk pɛɛy maŋk jiit. 7Nɛɓa Yeese tonu ijaageera gɛɛna kɛ, "In enyɛɛrɛɛ maawu gaaniyɛɛka gɛɛnaak." Nɛɓa sɛɛk enyɛɛrar sɛɛg kɛ rɛs. 8Saadi baŋiya tonuɓa sɛŋk kɛ, "In ɛɛkikɛɛ sɛɛg sisɔ nɔ gaɓɛɛ sɛɛg ɔɗɔwenta sinaana wɔɔroŋk." Nɛ boŋur nɛ gaɓɛrgeeɗiŋ.

9Saaɓa ɔɗɔwen sinɛ wɔɔroŋk paariiɗ maawu sigɛkan mɛyɛr a ogool wɛynik, nɛɓa ki ɗegerɔɔn kɛ ɗɔkɛɛkɔ sɛɛg eet, maɓa sɛŋk ijaager sigɛkan ɛɛkɛr maawu gɛɛŋkik ɗegerarŋ. Riyiriɓa ɔɗɔwen sinɛ wɔɔroŋk iɗit sinɛkɔ waawuguɗɛɛk, 10nɛ tongeeɗ kɛ, "Widerki joop baŋɛ ɔɗɔɔkɛ ogool wɛynik taamɛ gɛɛŋk. Ma saa pɔyarɗi joop sigɛkɔ wɔɔrɛɛk baŋiya, nɛ widerki maawu gɛɛŋk. Yakanakɔ seŋk arin ogool sigɛ mentaanak sɛɛge baŋɛk a beeɗir mɛlɛɛɗa sisɔwa."

11Ijaagɓa Yeese sɔɔriyɛ sigi tuki sɔɔriyɛɛkoŋk baŋɛ tuki ɗook Gɛlilaak katamɛɛ Kaanaak. Yaaŋɛɓa eemɛyɔn nɛɛk oko sinik, nɛɓa nomtaanak gɛɛnɛ ŋaadiɗi sɛɛne. 12Saadi baŋiya ɓurɓuɗiɓa Yeesee a ɛmɛs a manyaakak a nomtaanak gɛɛŋk agut omoŋ Kipirnahooma. Nɛɓa kaar beeɗir saadi a ɗoŋ tekeriŋ.

Ɔɔyku Yeesee Joop Sigɔ Nagadɗi Godeey Sinaanɛ Geetitank

(Maa. 21:12-13; Mar. 11:15-17; Luk. 19:45-46)

13Saaɓa wɔɔŋkuɗ Ba'aal Ɗoyiɗoŋk Ayuuduk, nɛɓa Yeese kɛɛ Yorsaleema. 14Nɛɓa dɛnɛ joop sigɔ ɓalɗiiɗ tɔgi a jiŋkuyɛ a kulɓeerakik Godeey sinaanɛ Geetitank. Nɛɓa ɓɔrɛ dɛnɛ joop sigɔ wonooyar worik a beebeɗar a atu wonooyan woriyoŋk. 15Nɛɓa kɛny melt nɛ ɔɔyku joop baŋɛ a jiŋkuyɛ a tɔgi Godeey sinaanɛ Geetitank. Nɛɓa kɛɛtɛ wori joop sigɛ wonooyar worik, ɛɓa gupar tarbesɛyɛ gɛŋkiŋ. 16Nɛɓa tonu joopa sigaaga ɓaɓali kulɓeerakɛk kɛ, "In boŋiirɛɛ ola sigi sɔ! Kat ijaagiir gode Baabɛɛk a gode nagadoŋk!"

17Nɛɓa ɔɔtɛ sineene koɓurkuɓa nomtaanak gɛɛnɛ any sinɛɓa taapɛɛ Wargatɛɛ Waakoyotoŋk kɛ, "Moɗɛti nyeken sinɛ laka agut gode nookuk a ito maɗik."

18Saadi baŋiya ɔɗɔweer Ayuuduk tonurɓa Yeeseya kɛ, "Ijaagin tina sɔɔriyɛ kɛ jikonak. Nɔkɔɔ ɗegerɗii kɛ lakin ɓaŋkawuka sinɔ ijaagiiɗin any sinik?"

19Nɛɓa Yeese tonu sɛɛga kɛ, "In aalɛɛ Gode sini Geetitank, nɛkɔɔ saak kɛnya ɗoŋikɛ sigɔɔgɛ jiitik."

20Nɛɓa sɛɛk tonurgeeɗ joop Ayuuduk kɛ, "Saaɓa kɛnyɗɛɛ Gode sini Geetitank ruumeɓa emeyik a pɔlpɔlɛ joop pɛɛyk a tula om, anɛ seŋk kɛnyin ɗoŋikɛ sigɔɔgɛ jiitik?" 21Yakanaɓa tonu Yeese kɛ Gode sinɛ Geetitank taar nɛɛk. 22Saaɓa Yeese ŋaarkiɗ ret walasak, nɛɓa nomtaanak gɛɛnɛ koɓurku any sini. Nɛɓa ŋaadir pɛɛni sinɛɓa taapɛɛ Wargatɛɛ Waakoyotoŋkuk a sinɛɓa tonu Yeeseek.

23Saaɓa Yeese arkiɗ Yorsaleeme ɔɔtɛ Ba'aale Ɗoyiɗoŋk, nɛɓa joop a ɓɔɔkaaŋ ŋaadiɗi sɛɛne agut sinɔɓa dɛnɛrɗi sɔɔriyɛ sigɛɓa ijaagik. 24Yakana agut sinɔɓa Yeese ɗegerɗi joop baŋɛk, nɛɓa ki sɛɛg ŋaadit. 25Agut sinɔɓa sɛŋk ɗegerɗi any sinɔ ar ɓayaay etoŋkuk baŋɛk, nɛɓa kiigeeɗ ɗɛyɛ iɗit sinɔ waasigeeɗ ɔɔtɛ etoŋkuk.

Currently Selected:

Yowanis 2: KSTM

Highlight

Copy