Yohanise 11

Aalazarey haybowafa dendosa

1Bidzi axi Aalazare sungesi Biitaniya sunge katama hardi e yecha. Ye Biitaniyay Maaramiyara isindo busho Martaaray essaaka yecho katama e maaqicha. 2Ye Maaramey Laaxi toke shittona tisshi be qinona ucechanniyoko i maaqicha. Harda Aalazarey isindo na'uko e maaqicha. 3Ye Aalazareyndo bunaycey <<Laaxo, ne eehicho Aalazarey hardiko yese>> hidi hissine Yesuusako woosso u anso.

4Esini ye woosso siidi <<Ha hargey Wonto yeley esuna kuxuttorosa Wonto kuxa gisha baaka haybose ellusesa maaquwasso>> hidi e hido. 5Yesuusay Martaaraysi isindo busho Maaramiyaraysi usindo na'i Aalazariyaraysi modhussi e eehicha. 6Eehuwaye baaka Aalazarey hardosa siidesine be yecho godo lam'i wonte e feyssho. 7Ye e geede be erusichoshituko <<Dhaddi Yuuda wude sekke nu hammeese>> hidi e hido.

8E erusichoshiti <<Nu Laaxo! Oddhe wontame e buro Ayhudaxiti nemba shuchuna iceshe hiwadiya u yecha? Hinne assiya sekke yaha ne hange?>> hidi u hido.

9Yesuusani ususe <<Bidzi wontaafa fo'ey yesesi tamma lam'i saate maaquwaye? Wontana hantesi yesa'ayko ha saha fo'e be beene gisha dhumuttuwasso. 10Qama hantesimay fo'ey baa gisha dhumuttoko e dhumutte>> yeydi e mato. 11Ye e esa be zeerdosi geede assi <<Ni lagge Aalazarey geti e yese gisha birkusiyako ta hange>> hidi e hido.

12E erusichoshiti <<Laaxo, geti yesso hargiyafa loolako e loole>> yeydi u hido.

13Yesuusay zeerdechoshi Aalazare haybo gishako e maaqicha, ususema gehunxi gisha e zeerdosako e bishicha.

14Hinneko Yesuusay tiddhissi <<Aalazarey haydhiko yese. 15Tamba hi aadexorosa yaha ta dheeddosuna maggako ta magge. Hattema esuko nu hammeese>> yeydi e hido.

16Yenniyani Didimose sunge Toomaaseni#11:16 Didimose sunge Toomaase <<Toomaase>> hidi hiyoy Ibrayste nuunana maaqusune <<Didimose>> hidi hiyoy Grike nuunanako. E birchey <<Mente>> yeydi hiyoko. beera yecha e erusichoshita <<Nuni esaara hay'ese nu hammeese>> hidi e hido.

17Yesuusay yaha handi ello wogga Aalazarey mooguttowafay oyddi wonte maaddhi e yecha. 18Biitaniya katamay Yerusaleemefa haydzi kiilo meetire aallowoko e zaricha. 19Martaara Maaramiyara usindo na'i haybose maamusese laga Ayhudaxiti yahafa yoodi u yecha. 20Martani Yesuusay yoodo odo siidi mokkese i kesso. Maaramey yenniyaka zawa i yecha. 21Martani Yesuusako <<Laaxo! Haya ne yessako nuundo na'i hay'uwadiko e yecha. 22Maaquwaye baaka hatteni Wontoy abani e maaqo'aykoni ne shi'esa e siinenike erako ta ere>> hidi i hido.

23Yesuusani <<Neyndo na'i haybowafa dendako e dende>> hidi e hido.

24Martani <<Aallicira wonte uddi axi haybowafa dende wogga e dendenike erako ta ere>> hidi i hido.

25Yesuusani <<Haybowafa denxesaara yeso ingesaaray tambako. Tamba aadexesi hay'o'aykoni en'ako e maaqe. 26Taanna yesesaara tamba aadexesaaray be uddina fetto hay'uwasso. <Ha esa aadeko e zeerdo> hidi hitta ne hine?>> hidi e oycco.

27Isini <<Eewa, Laaxo! <Ha saha gara e yoone> hidi hicho Wonto yele Mesihey nemba maaqenike <Aadeko> hidiko ta hine>> hidi i hido. 28Martay ye esa be zeerdo geede handi beyndo busho Maarame beeko xhinqissi xheydi <<Laaxi yoodiko nemba worgiya yese>> hidi i oto. 29Maaramey ye esa siidi ukkenawo dendi Yesuusako i hando.

30Yesuusay Martay esa motto godowoko haga katamaa gello badi e yecha. 31Iso maamusese zawa yecha Ayhudaxiti Maaramey alleydi kessosa be beedo wogga <<Aalazare boossa gara handi yeefesuko iinne>> hidi hissine i geede u kesso. 32Maaramey Yesuusay yecho godo yoodi esa be beedoniyaka e toke gara undi <<Laaxo, haya ne yessako nuundo na'i hay'uwadiko yecha>> hidi i hido.

33Yesuusani Maaramey yeekusuniyara isaara yooda Ayhudaxiti yeekusuniyara beedi be gawwaana iitana higilli e maddhundo. 34<<Ay hi mooddo?>> hidi e oycco. Usini <<Laaxo, yoodi beewwa!>> hidi u hido. 35Yesuusani yeetti aafunxe e gusso. 36Hinne Ayhudaxiti <<Beewayte! Waanidi esa e eehichosha>> hidi u hido. 37Usukaafa bidzi bidziti <<Ye bal'a maaqichashe loolusechashi ha axi hay'uwannike mahese danda'uwadiya e yecha?>> hidi u hido. 38Yesuusay sekke assi be gawwaana iitana higilli boossaaka e hando. Boossay malla shuchuna tucuttese googgo e maaqicha#11:38 Boossay malla shuchuna tucuttese googgo e maaqicha yeydi hiyuttasi Ayhudaxiti boossay nuusaara wola bishuwasha wocci bootti malla shuchuna ayxeseni do'eseni u danda'icho googgo e maaqicho gishako. Luq 24:1 gara yese foto beewwa!. 39Yesuusay <<Ye shuche ooxuwayte>> hidi e hido.

Ye haydhechashindo busho Martay <<Laaxo! E haydhowafay oyddi wonte maaddhiko e yese, hatte xhinqako e xhinqe>> hidi i hido.

40Yesuusani << <Aadexa'ayko Wonto kuxa fuulako ne beene> hidi hido badiya ta yecha?>> hidi e hido. 41Axitini shuche u oosso. Ye e geede Yesuusay wokke afaa beedi <<Nuwadde! Taase ne siido gisha nemba galatako ta galate. 42Uddi wogga taase ne siinesa erako ta ere. Tamba ne ansonike <Aadeko> hidi u hiyorosa ha ta googe ee'e axitume hissineko yeydi nemba ta shidho>> yeydi e hido. 43Ye esa be shidho geede be kato keddaysi <<Aalazare! Kesuwa!>> hidi e hido. 44Haydhecha Aalazarey e garani maa'oy xhaaxhutti yesenike e aafushani fede maa'ona be aykuttesenike boossaafa e kesso. Yesuusani <<Birchuwayte dhaddi hammeese>> hidi e hido.

Yesuusa gara kumutta kume

Mat 26:1-5; Mrq 14:1-2; Luq 22:1-2

45Maarame maamusese yoodecha Ayhudaxitaafa lagay e matosa beedi esa u aadesso. 46Usukaafa bidzi bidziti dhaddi handi Yesuusay hanto hanta Farasaxituko u oto. 47Kahinituse afana maagitaara Farasaxitaaray Ayhuda gate aheesita bhikkilli <<Ha axi laga micushe hanta e hante gisha am nu hanto? 48Mikke ni dhaba'ayko uddi axuko esa <Mesiheko> hidi aadexesa. Hikketeko Rooma tooraxiti yoodi ni Hayla Zawani ni axitani u bayse>> yeydi u hido. 49U giddaafa Qayaafa sunge ye berani kahinituse afana ade maaqesi zeerisineni <<Hinuni hi ere basi baasso. 50Ni axi uddi baaneesume bidzi axi laga gisha hay'esi bishesha e maaqenike gaxxho baytuwa?>> hidi e hido.

51Ha esa yeydi e zeerdosi beekofa maaquwadiko e yecha. Ye bera kahinituse afana ade e maaqusune Yesuusay Ayhudaxiti gisha hay'ese buro gara hinesako kaayo e zeerdo. 52E hay'esi Ayhudasewo e maaddho baane be godowa godowa yese Wonto nayshita bhikkilli bidzi omma mahesuko e maaqicha. 53Ye wontiyafa ayti Yesuusa wodhese u kundo. 54Yenniyafa ayti Yesuusay Ayhudaxiti gidda tiddhiyanna hante inxhadhi yaafa saha mela da'aa yese Efreeme katama handi yaha be erusichoshitaara e decco.

55Ayhudaxiti Garo Massalay uddhi e yecha. Laga axiti Garo Massalame buro Muse wogake bemba geeshe woga#11:55 bemba geeshe woga yeydi hiyuttasi Ayhudaxiti beraaka kuxutte massaliti yoodi elleesume buro fetto Garo Massalay kuxuttese laappi wontey atto geede Wonto Hayla Zawaa handi ye laappi wonte aallo be cubbo bazzi laga ogena kahinituna bemba u geeshicho wogako. alsese Yerusaleeme be wudefa wudefa u hando. 56Usini Wonto Hayla Zawa Yesuusay yoonesa eedhi kakkisine <<Am hinuse e bishe? Haliya Yesuusay ha massala yoota e yoone?>> yeydi wola u oycicha. 57Buro kahinituse afana maagitaara Farasaxitaaray Yesuusa aykese e yese godo eresi yesa'ayko usuko ohorosa axituko uddi woosso u garsecha.

Currently Selected:

Yohanise 11: KilleC

Highlight

Copy