Yohanise 10

Modhe yeemaxi gisha

1Sekkeni Yesuusay <<Hinuse ta ohesi fetto aadeko. Doriti anxa sumaanna maaquwasa fede ogena gelesi kaysowara fuulowarako. 2Sumaanna gelesimay dorita yeengesako. 3Sumaa kakkesi esuse gasa do'ako e do'e, doritini e katoko u siine. Esini be dorita u sunxuna sunxunako xheydi usoni isshi wude e kesse. 4Be dorita uddi wude be kesso geede u buro gardiko#10:4 u buro gardiko yeydi hiyuttasi Ayhudaxiti keemo yeemese be keemo buro gardi hamete keemoy axi geede hangicho gishako. e hange. Usini e kato shati be ere gisha e geedeko u hange. 5Fedase e kato be eruwa gisha esukofa dhaddi u ba'esa baaka e geede hamuttuwasso>> yeydi e hido.

6Yesuusay ha zeere yeydi ususe e zeerdinne ye e birchey ususe gele e dheeddo. 7Hinne Yesuusay sekke <<Hinuse ta ohesi afetto adeko. Doriti essaanna gele sumay tanko. 8Taame buro yoodasiti uddi kaysitaara fuulitaarako. Maaquwaye baaka doriti ususe siyutto baasso. 9Sumay tambako, taakona gelesi loolako e loole. E gele e kese, essaaka be yeemutte modhe godoni e degexe. 10Kaysoy esume e yoonesi kaysese, shufesaara baysesaarako. Tanimay yoodosi yeso u degexoronikiyara uddi ogena bidzoni facete keenguwa yeso u keemoronikiyarako.

11Modhe yeemaxi tambako. Modhe yeemaxi be yesoko be doritume hissine garsi e inge. 12Dorita anbaxhena yeengesi sudhami yoosune be beene woggaaka <<Ha esi taasuko>> hidi yeengesa be maaquwa gisha dattiko dhaddi e woxhe. Sudhamini dorita shoddi e ekke, ye doritini u budutte. 13Ye esi esume datti e woxhesi anbaxhena be yeengicho gishaara dorita be higiluwa gishaarako. 14Modhe yeemaxi tambako. Tani ta dorita ere, ta doritini taa ereydiko. 15Nuwadey tamba erenikiyara tani nuwade erenikiyarako tani uso ere. Tani ta doriti gishako tamba haybose garsi inge. 16Ha doritaara wolla aquwassako fede dorita ta keenge. Uso hanke ooweko tamba e worguse, usini ta kato u siine, ha doritaara bidzo u maaqe, uso yeengesini bidzo e maaqe hidiko.

17Sekke ta yesoronike tamba garsi ta inge gisha nuwadey tamba eehako e eehe. 18Tamba ta eehana garsi ta ingesa baaka tamba ta ingoronike osana mahesi baasso. Tamba garsi ingesaara sekke ta yesoronike taa mahesaara adeto keemako ta keenge. Ha woosso ta ettosi nuwadekofako>> yeydi e hido.

19Yeydi e hidosuna sekke Ayhudaxiti gidda shahoy gello. 20U giddaafa lagiti <<Ha e gara xhoozuko yesa, goojhiko e yese, abasuwa esuse hi siine?>> yeydi u hido. 21Fediti assi <<Xhooze keenge axi zeerenike zeeriya baasso. Xhoozi bal'ay beyoronike mahese danda'aa e danda'e?>> yeydi u hido.

Wonto yele gisha

22Yerusaleeme Wonto Hayla Zawa Killooma Massala#10:22 Killooma Massala yeydi hiyuttasi Yerusaleeme yecha Wonto Hayla Zawa Babiloonaxiti yoodi woddusechoyne Zerubabule beraa maaddhi yoodi sekke killonsi maxese bera aallo u kuxicho massalako. kuxicho wontey ello. Ye woggani bargo maaqicha. 23Yesuusay Wonto Hayla Zawaa <<Salamone kara>> hidi hiyutte godona sekke hanke e hanticha. 24Yenniyani Ayhudaxiti hanke e googiya bhikkilutti <<An wonte aallona numba lam'i maxo gawwa ne gade? Neni Mesihe maako tiddhissi nuuse ohuwa!>> hidi u oycco.

25Yesuusani <<Hinuko otiko ta yese, hinunimay <Aadeko e zeerdo> hidi hiwaytako. Nuwade sunxuna ta hante hantako taase ato maaqesa. 26Hinunimay ta doritukafa hi maaquwa gisha tamba <Aadeko e zeerdo> hidi hiwaytako. 27Ta doriti ta kato u siine, tanini uso erako ere. Usini ta geedeko taara wolko u hange. 28Koolo makkina u yesoronike ta mahe, koolo makkina bayese danda'uttuwasso. Uso ooneni ta kuchiyafa shoddi ekkuwasso. 29Uso taase inda nuwadey uddime garoko e gare. E kuchiyafa ooneni uso shoddi efese danda'uwasso. 30Taara nuwadiyaray bidziko>> yeydi e hido.

31Yenniyani assi Ayhudaxiti esa shuchuna iceshe shuche u etto. 32Yesuusani <<Adey taako <Hantuwa> hidi hidosa laga modhe hantako hinuse ta hanto. Hinne tamba esume hi iceshi an hantamewu?>> yeydi e hido.

33Usini <<Nemba esume shuchuna nu iceshi Wonto ne cassho gishako baaka ne hanto modhete hanta gisha maaquwasso. Ye esini neni axe maaqichine <Wontoko tani> hidi ne hido gishako>> hidi u hido.

34Yesuusani <<Hi woga fissharowa Wontoy zeerisine <Hinuni hi bidzi bidzina wontitawoko hidiko ta hido> yeydi hinesi diizutto baye? 35Axi Hayla Fissharowa diizuttesesa baysese danda'uwasso. Yebo, Wonto katoy usuko yoodosita uddi u bidzi bidzo wontitako yeydi hidiko e yese. 36Hine nuwadey tamba hantesa mati suuzzi ha saha gara e ansine <Wonto yeleko tani> hidi ta hido gisha <Wontoko e cassho> hidi abasuna tamba hiine? 37Tani nuwadey <Hantuwa> hidi hidosa hantuwasa ta maaqo'ayko tamba aadesofita. 38Nuwadey tamba <Hantuwa> hidi hidosa hantesa ta maaddho geede tamba aadexuwasa maaqo'ayketeni ta hante hanta <Ha esi Wontokofako> hidi ekkuwayte. Ha esunako nuwadey taara bidzo maaddhi tani nuwadiyara bidzo maaddhesesa tiddhissi hi ere>> hidi e hido.

39Assi esa aykese u wordechoyne u kuchiyafa dhaddi tulxhi kessi e hando. 40Yordanose waaxi semfa bade buro Yohanisey xhamaqicho godo dhaddi e hando. Yahani e decco. 41Laga axiti esuko yoodi <<Yohanisey fetto bidzi micushe hanta hanto badiko e yecha. Beese hante dheeddakoni ha axi gisha e zeerdo zeerey uddi aadeko>> hidi u hido. 42Yahani laga axi esa aadesso.

Currently Selected:

Yohanise 10: KilleC

Highlight

Copy