ራእዩ ለዮሐንስ 12

ምዕራፍ 12

በእንተ ክልኤቱ ተአምራት

1ወአስተርአየ ተኣምር ዐቢይ በውስተ ሰማይ ብእሲት እንተ ትለብስ ፀሓየ ወወርኅ ታሕተ እገሪሃ ወዲበ ርእሳኒ አክሊል ዘዐሠርቱ ወክልኤቱ ከዋክብት። 2#ሚክ. 4፥10። ወፅንስት ይእቲ ብእሲት ወትግዕር ወተሐምም ለወሊድ። 3#ዳን. 7፥7። ወአስተርአየ ካልእ ተኣምር በውስተ ሰማይ አርዌ ዐቢይ ወቀይሕ ዘሰብዐቱ አርእስቲሁ ወዐሠርቱ አቅርንቲሁ ወውስተ አርእስቲሁ ሰብዐቱ ቀጸላ። 4#ዳን. 8፥10። ወበዘነቡ ይስሕብ ሣልስተ እዴሆሙ ለከዋክብተ ሰማይ ወያወርዶሙ ውስተ ምድር ወቆመ ውእቱ አርዌ አንጻረ ይእቲ ብእሲት ከመ ሶበ ወለደት ይብላዕ ሕፃና። 5#መዝ. 2፥9። ወወለደት ወልደ ተባዕተ ዘውእቱ ይርዕዮሙ ለኵሉ አሕዛብ በበትረ ኀጺን ወመሠጥዎ ለውእቱ ሕፃን ወወሰድዎ ኀበ እግዚአብሔር ወኀበ መንበሩ። 6#ማቴ. 2፥13። ወጐየት ይእቲ ብእሲት ውስተ ገዳም ወውስተ መካን ዘአስተዳለወ ላቲ እግዚአብሔር ከመ ትትዐቀብ በህየ በኵሉ መዋዕል ዐሠርተ ወክልኤተ ምእተ ወስሳ#ቦ ዘይቤ «ተስዓ» ዕለተ። 7#ዳን. 10፥13-21፤ 12፥1፤ ይሁዳ 9። ወጸብእዎ በሰማይ ለውእቱ አርዌ ሚካኤል ወመላእክቲሁ ወተጻብኦሙ ውእቱ አርዌ ምስለ መላእክቲሁ። 8ወስእኖሙ ወኢረከበ እንከ መካነ በውስተ ሰማይ። 9#ዘፍ. 3፥1-14፤ ሉቃ. 10፥18፤ ዮሐ. 12፥31። ወወድቀ ውስተ ምድር ውእቱ አርዌ ዐቢይ ወአርዌሰ ዐቢይ ውእቱ ቀዲሙ ዘአስሐቶ ለኵሉ ዓለም ዘስሙ ሰይጣን ወወድቀ ውስተ ምድር ወመላእክቲሁኒ ወድቁ ምስሌሁ ውስተ ምድር። 10#11፥15፤ ኢዮብ 1፥9-11፤ ዘካ. 3፥1፤ ሉቃ. 22፥31። ወሰማዕኩ ቃለ ዐቢየ በውስተ ሰማይ ዘይብል ኮነት መድኀኒት ወኀይል ወመንግሥት ለአምላክነ ወሥልጣን ለመሲሑ እስመ ወድቀ መስተዋድይ ዘአስተዋደዮሙ ለአበዊነ ቅድመ እግዚአብሔር መዐልተ ወሌሊተ። 11#7፥14፤ ሮሜ 8፥37። ወሞእዎ እሙንቱ በእንተ ደመ በግዑ ወበእንተ ቃለ ጽድቆሙ እስመ ኢያብደሩ ነፍሶሙ እስከ ለሞት። 12#ኢሳ. 44፥23። ወበእንቲኣሆሙ ተፈሥሑ ሰማያት ወእለ ይነብሩ ውስቴቶን አሌ ላ ለምድር ወለባሕር እስመ ወረደ ሰይጣን ውስቴቶሙ ምስለ ዐቢይ ሕምዙ እስመ የአምር ከመ ውኁድ መዋዕል ተርፎ። 13ወሶበ ርእየ ዝክቱ አርዌ ከመ ወድቀ ውስተ ምድር ዴገና ለእንታክቲ ብእሲት እንተ ወለደት ሕፃነ ተባዕተ። 14#ዘፀ. 19፥4፤ ዳን. 7፥25፤ 12፥7። ወተውህባ ለይእቲ ብእሲት ክልኤ ክንፍ ከመ ዘዐቢይ ንስር ከመ ትሥርር ውስተ ገዳም ወውስተ መካን ኀበ ትትዐቀብ በኵሉ መዋዕል ዘመነ ወአዝማነ ወመንፈቀ ዘመን እምቅድመ ገጹ ለውእቱ አርዌ ወሠረረ ወዴገና ውእቱ አርዌ። 15ወአውፅአ እምነ አፉሁ ውእቱ አርዌ ማየ ብዙኀ እንተ ድኅሬሃ ለይእቲ ብእሲት ከመ ፈለግ ዐቢይ ከመ ይንሥኣ ውኂዙ። 16ወረድአታ ምድር ለይእቲ ብእሲት ወአርኀወት አፉሃ ምድር ወሰረበቶ ለውእቱ ውኂዝ ዘአውኀዘ ውእቱ አርዌ እምነ አፉሁ ወኢያእመረ ከመ ተውህበ ላቲ ክንፍ። 17#14፥12፤ 19፥10፤ 1ዮሐ. 5፥10። ወተምዐ ውእቱ አርዌ ላዕለ ይእቲ ብእሲት ወሖረ ይጽብኦሙ ለእለ ተርፉ ውሉዳ ወለእለ የዐቅቡ ትእዛዘ እግዚአብሔር ወይሄልዉ በጽድቁ ለኢየሱስ ክርስቶስ። 18ወቆመ ውእቱ አርዌ ላዕለ ኆፃ ባሕር።

Currently Selected:

ራእዩ ለዮሐንስ 12: ሐኪግ

Highlight

Copy